பாஜகவை எதிர்த்து போராடும் துணிச்சல் காங்கிரஸ்காரர்களிடம் உள்ளது- பிரியங்கா காந்தி பரபரப்பு பேச்சு

காங்கிரஸ் கட்சியின் 85-வது மாநாடு சத்தீஸ்கர் மாநிலம் ராய்ப்பூரில் நேற்று முன்தினம் தொடங்கியது. 2-வது நாளான நேற்று காங்கிரஸ் முன்னாள் தலைவர் சோனியாகாந்தி பேசினார்.

அப்போது அவர் பாரத ஒற்றுமை யாத்திரையுடன் எனது பணி நிறைவடைகிறது என்பதில் மிகவும் மன நிறைவாக உள்ளது என்று பேசினார். இதனால் அவர் அரசியலில் இருந்து ஓய்வு பெறுவார் என்று தகவல் பரவி உள்ளது.

இந்தநிலையில் இன்று (ஞாயிற்றுக்கிழமை) மாநாட் டின் இறுதி நாள் நிகழ்ச்சிகள் நடந்தன. இதில் பங்கேற்று காங்கிரஸ் பொதுச் செயலா ளர்களில் ஒருவரான பிரியங்கா பேசினார்.

அப்போது அவர் கூறியதாவது:-

பாராளுமன்ற தேர்தலுக்கு இன்னும் ஒரு ஆண்டு தான் உள்ளது. நாடு முழுவதும் எதிர்க்கட்சிகள் ஓரணியில் திரள வேண்டும் என்று மக்கள் மிகவும் ஆர்வமுடன் எதிர்பார்க்கிறார்கள். எல்லா எதிர்க்கட்சிகளும் ஒற்றிணைந்து பாரதீய ஜனதாவை எதிர்க்க வேண்டும் என்று விரும்புகிறார்கள்.

நாட்டின் மூலை முடுக்குகளில் எல்லாம் இந்த எதிர்பார்ப்பு நிலவுகிறது. குறிப்பாக காங்கிரஸ் கட்சியிடம் மக்கள் அதிகம் எதிர்பார்க்கிறார்கள். எனவே எதிர்க்கட்சிகளை ஓரணியில் கொண்டு வரும் மிகப் பெரிய பொறுப்பு காங்கிரசுக்கு உள்ளது.

இந்த சூழ்நிலையில் பாரதீய ஜனதா கட்சியின் தவறுகளை காங்கிரஸ் தொண்டர்கள் ஒவ்வொருவரும் நாட்டு மக்களிடம் எடுத்து சென்று சொல்ல வேண்டும். மக்களுக்கு இழைக்கப்படும் அநீதிகளை பிரசாரம் செய்ய வேண்டும். இதற்கான பணிகளை காங்கிரஸ் தொண்டர்கள்தான் மேற்கொள்ள வேண்டும்.

பாரதீய ஜனதாவை எதிர்த்து போராடும் தைரியமும், துணிச்சலும் காங்கிரஸ்காரர்களிடம் இருக்கிறது. கட்சிக்காக துணிச்சலுடன் செயல்பட்டு கொண்டிருக்கும் ஒவ்வொருவரையும் நான் பாராட்டுகிறேன். உங்கள் வீரத்தை நாங்கள் அறிவோம்.

உங்கள் துணிச்சலை நாட்டுக்காக வெளிப்படுத்த வேண்டிய காலம் வந்துவிட்டது. இதை சரியாக பயன்படுத்துங்கள்.

காங்கிரஸ் கட்சி நாடு முழுவதும் வலிமைப்பெற்று வருகிறது. மண்டல அளவிலும் உள்கட்டமைப்புகள் பலப்படுத்தப்பட்டு வருகின்றன. எனவே காங்கிரஸ் தொண்டர்கள் துணிச்சலாக செயல்பட வேண்டும்.

இவ்வாறு பிரியங்கா பேசினார்.