ஈரோடு

வங்கக் கடலில் உருவான குறைந்த காற்றழுத்தத் தாழ்வுப் பகுதி நாளை தாழ்வு மண்டலாக மாறுகிறது.

இதன் எதிரொலியால், மேற்கு தொடர்ச்சி மலை மாவட்டங்களில் தொடர்ந்து கனமழை பெய்து வருகிறது.

இந்நிலையில், பவானிசாகர் அணைக்கு நீர்வரத்து ஒரே நாளில் 5 ஆயிரம் கன அடி அதிகரித்துள்ளது.

நீர் பிடிப்பு பகுதிகளில் பெய்த கனமழை காரணமாக நேற்று 1346 கன அடியாக இருந்த நீர்வரத்து தற்போது 6,357 கன அடியாக உயர்ந்துள்ளது.

பில்லூர் அணையில் இருந்து நேற்று மாலை முதல் பவானி ஆற்றில் 3000 கன அடி தண்ணீர் திறக்கப்பட்டுள்ளது.

இதனால், பவானி ஆறு மற்றும் மாயாற்றில் நீர் வரத்து வெகுவாக அதிகரித்துள்ளது.

பவானிசாகர் அணைக்கு நீர்வரத்து அதிகரித்துள்ளதால் பாசனப்பகுதி விவசாயிகள் மகிழ்ச்சி அடைந்துள்ளனர்.

சத்தியமங்கலம்:

ஈரோடு மாவட்டம் கடம்பூர் மலையில் 50-க்கும் மேற்பட்ட மலை கிராமங்களில் ஆயிரக்கணக்கான மக்கள் வசித்து வருகின்றனர். இங்கு அடர்ந்த வனப்பகுதியில் உள்ள மாக்கம்பாளையம் மலை கிராமத்தில் 2 ஆயிரத்துக்கும் மேற்பட்ட மக்கள் வசித்து வருகின்றனர்.

இந்த கிராமத்துக்கு செல்ல குரும்பூர்பள்ளம் மற்றும் சக்கரைப்பள்ளம் என இரு அபாயகரமான இடங்களை கடந்து செல்ல வேண்டும். குரும்பூர்பள்ளத்தில் இருந்து 8 கிலோ மீட்டர் தூரத்தில் சக்கரைப்பள்ளம் உள்ளது. இந்த 2 பகுதியில் மழைக்காலங்களில் வெள்ளப்பெருக்கு ஏற்படும். இதனால் பஸ் உள்ளிட்ட அனைத்து போக்குவரத்து வசதியும் தடைப்பட்டு, மாக்கம்பாளையம் மலை கிராமம் தனி தீவாக மாறும். வெள்ளம் வற்றினால்தான் இயல்பு நிலைக்கு மக்கள் வர முடியும்.

இரு பள்ளங்கள் குறுக்கே மேம்பாலம் கட்ட 20 ஆண்டுகளுக்கும் மேலாக மக்கள் போராடியதன் விளைவாக 1½ ஆண்டுகளுக்கு முன்பு பாலம் கட்டும் பணி தொடங்கியது. ஆனால் இந்த பணி மெதுவாக நடந்து வருவதால் இன்னும் முழுமை அடையவில்லை.

இந்நிலையில் மாக்கம்பாளையம், அரிகியம் வனப்பகுதியில் கடந்த சில நாட்களாக பலத்த மழை பெய்ததால் சக்கரைப்பள்ளத்தில் மழை நீர் பெருக்கெடுத்து சென்றது. இதனால் பள்ளத்தை கடந்து செல்ல முடியாமல் பஸ் வசதி தடைப்பட்டுள்ளது. இதனால் பஸ் பயணிகள், அப்பகுதி கிராம மக்கள் அடர்ந்த வனப்பகுதியில் 8 கிலோமீட்டர் தூரம் பயணித்து கிராமத்தை அடைந்தனர்.

இந்நிலையில் தொடர் மழையால் சக்கரைப்பள்ளத்தில் நேற்று கடும் வெள்ளப்பெருக்கு ஏற்பட்டது. இதனால் பஸ் வசதி முற்றிலும் நிறுத்தப்பட்டுள்ளது. இதனால் அந்த கிராம மக்கள் காட்டாற்று வெள்ளத்தை கயிறு கட்டி ஆபத்தான முறையில் இடுப்பளவு வெள்ளத்தை கடந்து சென்றனர். இந்த வீடியோ தற்போது சமூக வலைத்தளங்களில் வைரல் ஆகி வருகிறது.

இது குறித்து அப்பகுதி மக்கள் கூறும்போது,

மாக்கம்பாளையம் கிராமத்தில் இருந்து தினமும் வியாபாரம், பிழைப்பிற்காக சத்தியமங்கலம் சென்று வருகிறோம். இதற்காக அடர்ந்த வனப்பகுதியில் 8 கிலோ மீட்டர் நடந்து குரும்பூர் பள்ளம் மற்றும் சக்கரைப்பள்ளத்தை கடந்து வருகிறோம். மழைக்காலங்களில் இந்த இரு பள்ளங்களில் காட்டாற்று வெள்ளம் பெருக்கெடுத்து ஓடும். அந்த சமயம் நாங்கள் உயிரை பணயம் வைத்து காட்டாற்று வெள்ளத்தை கடந்து செல்வோம்.

இதற்கு நிரந்த தீர்வாக இரு பள்ளங்களிலும் பாலம் கட்டித்தர வேண்டும் என கடந்த 20 ஆண்டுகளுக்கும் மேலாக போராடி தற்போது பாலம் கட்டும் பணி நடந்து வருகிறது. அதுவும் மந்தமாக நடந்து வருகிறது. இந்நிலையில் தற்போது மீண்டும் பரவலாக மழை பெய்து வருவதால் காட்டாற்று வெள்ளம் ஏற்பட்டுள்ளது. பிழைப்புக்காக வெளியே சென்றாக வேண்டும். அதனால் தற்போது நாங்கள் காட்டாற்று வெள்ளத்தில் கயிறு கட்டி ஆபத்தான முறையில் சென்று வருகிறோம். இதை தவிர்க்க இரு பள்ளங்களிலும் நடக்கும் பாலம் கட்டுமான பணியை விரைந்து முடிக்க வேண்டும் என்றனர்.

சென்னிமலை:

ஒரத்துப்பாளையம் அணைக்கு கடந்த 10 நாட்களாக சுமார் 10 கன அடி தண்ணீரே வந்து கொண்டிருந்தது. மிக குறைவான நீர் வரத்தாக இருந்ததால் அணையில் தண்ணீரை தேக்கி வைக்கப்படாமல் இருந்தது. பின்னர் கடந்த செவ்வாய்க்கிழமை 91 கன அடியாகவும், புதன்கிழமை 40 கன அடியாகவும், பின்னர் நேற்று முன்தினம் வெள்ளிக்கிழமை 70 கன அடியாகவும் இருந்தது.

இந்த நிலையில் நீர் பிடிப்பு பகுதிகளான கோவை, திருப்பூர் மாவட்டங்களில் திடீரென பரவலான மழை பெய்ததால் நொய்யல் ஆறு வழியாக ஒரத்துப்பாளையம் அணைக்கு நீர்வரத்து அதிகரித்தது. நேற்று காலை 6 மணி நிலவரப்படி அணைக்கு 327 கன அடி நீர்வரத்து இருந்தது. அணைக்கு வரும் தண்ணீரை அப்படியே நொய்யல் ஆற்றில் வெளியேற்றப்பட்டு வருகிறது.

இது குறித்து ஆற்றங்கரையோரம் வசிக்கும் பொதுமக்கள் கூறுகையில், நொய்யல் ஆற்றில் செல்லும் தண்ணீர் மிகவும் கருஞ்சிவப்பு நிறத்தில் உள்ளதால் திருப்பூர் பகுதியில் உள்ள சாயப்பட்டறைகளிலிருந்து சாய கழிவு நீரை மழை நீரோடு நொய்யல் ஆற்றில் திறந்து விட்டார்களோ என்ற சந்தேகம் உள்ளது. அதனால் மாசு கட்டுப்பாட்டு வாரிய அதிகாரிகள் திருப்பூர் பகுதியில் உள்ள சாயப்பட்டறைகளை கண்காணிக்க வேண்டும் என்றனர்.

ஈரோடு:

ஈரோடு மாவட்ட மக்களின் முக்கிய குடிநீர் ஆதாரமாக உள்ளது பவானிசாகர் அணை. 105 அடி கொள்ளளவு கொண்ட பவானிசாகர் அணையின் முக்கிய நீர் பிடிப்பு பகுதியாக நீலகிரி மலைப்பகுதி உள்ளது. பவானிசாகர் அணையின் மூலம் ஈரோடு, திருப்பூர், கரூர் மாவட்டங்களைச் சேர்ந்த 2 லட்சத்து 50 ஆயிரம் ஏக்கர் விவசாய நிலங்கள் பாசன வசதி பெற்று வருகின்றன.

இந்நிலையில் நீர்ப்பிடிப்பு பகுதியான நீலகிரி மலைப்பகுதியில் கடந்த சில மாதங்களாகவே மழைப்பொழிவு இல்லாததால் அணைக்கு நீர்வரத்து குறைந்து வருகிறது. அதேநேரம் அணைக்கு வரும் நீர் வரத்தை விட பாசனத்திற்கு அதிக அளவில் தண்ணீர் திறந்து விடப்பட்டு வருவதால் அணையின் நீர்மட்டமும் தொடர்ந்து குறைந்து வருகிறது.

இந்நிலையில் கடந்த ஒரு வாரமாக ஈரோடு புறநகர் பகுதியில் பரவலாக மழை பெய்து வருவதால் பவானி சாகர் அணைக்கு நீர்வரத்து சற்று அதிகரித்து வருகிறது. இதேபோல் மற்ற அணைகளுக்கும் நீர்வரத்து அதிகரிக்க தொடங்கியுள்ளது. இன்று காலை பவானிசாகர் அணைக்கு 762 கன அடி நீர் அதிகரித்து வந்தது. இன்று காலை நிலவரப்படி அணையின் நீர்மட்டம் 45.18 அடியாக உள்ளது. கீழ்பவானி வாய்க்கால் பாசனத்திற்கு 5 கன அடி நீர் திறக்கப்பட்டுள்ளது. குடிநீருக்காக பவானி ஆற்றுக்கு 200 கனஅடி நீர் மட்டும் திறக்கப்பட்டு வருகிறது.

இதேபோல் 41.75 அடி கொள்ளளவு கொண்ட குண்டேரிபள்ளம் அணையின் நீர்மட்டம் இன்று காலை நிலவரப்படி 22.23 அடியாக உள்ளது. குண்டேரி பள்ளம் அணைப்பகுதியில் மழை பெய்து வருவதால் கடந்த இரண்டு நாட்களில் 3 அடி உயர்ந்துள்ளது. 33.45 அடி கொள்ளளவு கொண்ட வரட்டு பள்ளம் அணையின் நீர்மட்டம் 17.09 அடியாக உள்ளது. 30.84 அடி கொள்ளளவு கொண்ட பெரும்பள்ளம் அணை நீர்மட்டம் கடந்த ஒன்றரை மாதமாக முற்றிலும் வற்றிப் போய் உள்ளது. தொடர்ந்து அணைப்பகுதியில் மழை பெய்து வருவதால் நீர்மட்டமும் சற்று உயர்ந்து உள்ளது. இதனால் பொதுமக்கள், விவசாயிகள் மகிழ்ச்சி அடைந்துள்ளனர்.

ஈரோடு:

அக்னி நட்சத்திர காலம் நடைபெற்று வரும் நிலையில் வளிமண்டல கீழடுக்கு சுழற்சி காரணமாக கடந்த சில நாட்களாக தமிழகத்தில் பரவலாக மழை பெய்து வருகிறது. ஈரோடு உள்ளிட்ட 14 மாவட்டங்களில் கன மழை பெய்ய வாய்ப்புள்ளதாக வானிலை ஆய்வு மையம் அறிவித்திருந்தது. இந்த நிலையில் ஈரோடு மாவட்டத்தில் கடந்த சில தினங்களாக வானில் கருமேகங்கள் சூழ்ந்து மலை தூரி வருகிறது.

இதைத்தொடர்ந்து நேற்று பகல் 2 மணி வரை வானில் மேகங்கள் திரண்டு குளிர்ந்த காற்று வீச துவங்கியது. இதைத் தொடர்ந்து மாலை 4 மணி முதல் பரவலாக மழை பெய்தது. இதனால் பொதுமக்களின் இயல்பு வாழ்க்கை பாதித்தது. மேலும் மலைப்பகுதிகளான தாளவாடி, ஆசனூர், கடம்பூர் மற்றும் அந்தியூரில் கனமழை பெய்தது. கோபி, பவானி, மொடக்குறிச்சி, பெருந்துறை மற்றும் சென்னிமலை பகுதியிலும் பரவலாக மழை பெய்தது.

நம்பியூர் மற்றும் சுற்றுப்புற பகுதியில் நேற்று மாலை திடீரென கன மழை பெய்ய தொடங்கியது. சுமார் இரண்டு மணி நேரத்திற்கு மேலாக பெய்த கனமழை காரணமாக நம்பியூர் அருகே உள்ள சந்தன நகர் பகுதியில் உள்ள குளம் நிரம்பி உடைப்பு ஏற்பட்டது. தொடர் கனமழை காரணமாக குளத்திற்கு அதிக அளவு தண்ணீர் வரத்து இருந்ததை தொடர்ந்து, குளத்தில் இருந்த தண்ணீர் முழுமையாக வெளியேறி வருகிறது. இந்த குளத்தில் இருந்து தண்ணீர் சந்தன நகர், ஆண்டிக்காடு, கோரக்காடு, ராஜீவ்காந்தி நகர் உள்ளிட்ட பகுதிகள் மற்றும் விவசாய நிலங்கள் வழியாக வெளியேறி வருகிறது. இந்த பகுதியில் உள்ள குளம் உடைப்பு ஏற்பட்டதால் இங்குள்ள வீடுகளுக்குள் மழை நீர் புகும் அபாயம் ஏற்பட்டது. இதனால் அப்பகுதியில் தாழ்வான இடங்களில் வசித்து வரும் பொதுமக்கள் மேடான பகுதிக்கு செல்லவும், கால்நடைகளை பாதுகாப்பாக வைக்கவும், காவல்துறை சார்பில் ஒலிபெருக்கி மூலமாக எச்சரிக்கை விடப்பட்டது. ஆனால் மழை நீர் முழுவதும் தாழ்வான பகுதிகள் வழியாக வெளியேறியதால் வீடுகளுக்குள் புகவில்லை. இந்நிலையில் இன்று காலை குளம் உடைப்பு ஏற்பட்ட பகுதியில் வருவாய்த்துறையினர் ஆய்வு செய்தனர்.

சென்னிமலை யூனியன், வாய்ப்பாடி ஊராட்சி, வாய்ப்பாடி, விஜயமங்கலம் ஆர்.எஸ்., ரெயில்வே பாலம் அடியில் நேற்று மாலை பெய்த மழை பெய்தது. அப்போது ரெயில்வே பாலம் அடியில் கார் ஒன்று சென்றது. அப்போது கார் நீரில் மூழ்கியது. காரில் இருந்தோர் வெளியேறினர். அதை தொடர்ந்து பெரிய டாரஸ் லாரி ஒன்று மழை தண்ணீரில் சிக்கிக் கொண்டது. இதை ஜே.சி.பி. மூலம் வெளியே எடுக்கப்பட்டது. கார் மட்டும் தண்ணிருக்குள் முழ்கி உள்ளது. இதையடுத்து மின் மோட்டார் மூலம் தண்ணீர் வெளியேற்றினர். ரெயில்வே பாலத்தில் நடுப்பகுதியில் சுமார் 10 அடி உயரத்தண்ணீர் உள்ளது. இன்று காலை தண்ணீரில் மூழ்கி இருந்த காரை வெளியே எடுத்தனர். கார் முற்றிலும் சேதம் அடைந்துள்ளது.

பெருந்துறை சுற்றுப்பகுதிகளில் கடந்த ஒரு வாரமாக பரவலாக மழை பெய்து வருகிறது. பெருந்துறையில் மாலை 3 மணிக்கு தொடங்கி 5 மணி வரையிலும் கன மழை பெய்தது. அதன் பிறகு லேசான சாரல் மழை அவ்வப்போது விட்டு விட்டு பெய்தது. இதனால் பெருந்துறையை சுற்றியுள்ள விளை நிலங்களின் பல பகுதிகளில் முழங்கால் அளவிற்கு தண்ணீர் தேங்கி நின்றது. மழையால் சாலைகளில் வெள்ள நீர் பெருக்கெடுத்து ஓடியது. விஜயமங்கலம் பகுதியில் மலையங்குட்டை, மொடவாட்டு குட்டைகளுக்கு செல்லும் நீர்வழிப் பாதை அடைக்கப்பட்டதால் குட்டைகளுக்கு மழைநீர் செல்லாமல் தண்ணீர் ஆங்காங்கே தேங்கி நின்றது. பெருந்துறை சிப்காட்டிலும் தண்ணீர் அதிக அளவில் தேங்கி நின்றது. தற்போது இந்த மழையால் வறட்சி நீங்கி காய்ந்துபோன கரும்பு, வாழை போன்ற பயிர்களுக்கும், சோளம், கம்பு, நிலக்கடலை, மக்காச்சோளம் போன்ற மானா வாரி பயிர்களுக்கும் வரப்பிரசாதமாக இருக்கும் என்று விவசாயிகள் மகிழ்ச்சி தெரிவித்தனர். மேலும் குடிநீர் தட்டுப்பாடு நீங்கி நிலத்தடி நீர்மட்டம் உயர்ந்துள்ளதால் கிணறுகளின் நீர்மட்டம் உயர்ந்துள்ளது. மழை இல்லாமல் புல் பூண்டு காய்ந்து கிடந்த நிலையில் தற்போதைய மழையால் மீண்டும் துளிர்க்கத் தொடங்கியுள்ளதால் கால்நடைகளுக்கு தீவன பஞ்சம் குறையும் என்றும் விவசாயிகள் தெரிவித்தனர்.

ஈரோடு மாவட்ட பகுதிகளில் பெய்த மழை அளவு மில்லி மீட்டரில் வருமாறு:- தாளவாடி-71, பெருந்துறை-57, அம்மாபேட்டை-35, நம்பியூர்-26, பவானி-24, சென்னிமலை-18, கவுந்தபாடி-18, குண்டேரிபள்ளம்-9, கோபி-9, வரட்டுபள்ளம்-9, சத்தி-7, ஈரோடு-6, கொடிவேரி-6, பவானிசாகர் -4, மொடக்குறிச்சி-4 கொடுமுடி-4.

ஈரோடு:

ஈரோடு மாவட்டத்தில் கடந்த 2 மாதங்களாக கடும் வெயில் வாட்டி வந்தது. இதை தொடர்ந்து 110 டிகிரிக்கு மேல் வெயிலின் தாக்கம் அதிகமாக இருந்தது. வெப்பத்தின் தாக்கம் வழக்கத்தை விட அதிகரித்து காணப்பட்டது. அனல் காற்று வீசியது. இதனால் மக்கள் கடும் அவதி அடைந்து பல இன்னல்களுக்கு ஆளாகினர்.

இந்த நிலையில் ஈரோடு மாவட்டத்தில் கடந்த 1 வாரமாக பரவலாக மழை பெய்து வருகிறது. குறிப்பாக புறநகர் பகுதிகளில் மாலை மற்றும் இரவு நேரங்களில் இடி, மின்னலுடனும் பலத்த சூறாவளி காற்றுடன் தொடர்ந்து மழை பெய்து வருகிறது. இதனால் கடும் வெயிலால் அவதிப்பட்டு வந்த மக்கள் நிம்மதி பெருமூச்சு விட்டனர்.

இதே போல் சத்தியமங்கலம் அடுத்த தாளவாடி, தலமலை மற்றும் அந்தியூர் அடுத்த பர்கூர், தாமரைக்கரை, தட்டக்கரை உள்பட வனப்பகுதிகளில் கடந்த 2 மாதங்களாக கடும் வெயில் வாட்டியது. இதனால் மாவட்டத்தின் வனப்பகுதிகளில் மரம், செடி, கொடிகள், புல் வயல்கள் காய்ந்து காட்சி அளித்தது. தொடர்ந்து கடும் வெயில் சுட்டெரித்ததால் சத்தியமங்கலம் அருகே உள்ள தாளவாடி வனப்பகுதியில் கடந்த 1 மாதத்துக்கு முன்பு திடீரென தீப்பிடித்தது. இதை தீயணைப்பு துறையினர் மற்றும் வனத்துறையினர் துரிதமாக செயல்பட்டு தீயை அணைத்தனர். இதே போல் 2 முறை வனப்பகுதியில் தீ பிடித்து அணைக்கப்பட்டது.

இந்த நிலையில் தாளவாடி, தலமலை மற்றும் சுற்று வட்டார வனப்பகுதிகளில் கடந்த ஒரு வாரமாக பரவலாக பலத்த மழை கொட்டி வருகிறது.

தொடர்ந்து இரவு மற்றும் நள்ளிரவில் சாரல் மழை தூறி கொண்டே இருக்கிறது. மேலும் பகல் நேரங்களில் ஒரு சில நேரங்களில் பலத்த காற்றுடன் மழை கொட்டி தீர்த்தது.

இந்த நிலையில் தாளவாடி மற்றும் சுற்று வட்டார பகுதிகளில் தொடர்ந்து மழை பெய்து வருவதால் வெயிலால் தவித்த மலை கிராம மக்கள் மகிழ்ச்சி அடைந்தனர். இதே போல் நேற்றும் தாளவாடி வனப்பகுதியில் சாரல் மழை பெய்தது.

தொடர்ந்து மழை பெய்வதால் தாளவாடி வனப்பகுதியில் குளிர்ந்த காற்று வீசி வருகிறது. மேலும் வனப்பகுதி முழுவதும் மரம், செடி, கொடிகள் துளிர்ந்து பசுமையாக காட்சி அளித்து வருகிறது. இதனால் அந்த வழியாக செல்லும் வாகன ஓட்டிகள் மகிழ்ச்சி அடைந்தனர். வெயிலால் சொல்ல முடியாத இன்னல்களை சந்தித்த மக்கள் வனப்பகுதியில் குளிர் காற்று வீசுவதால் குதுகளித்தனர்.

இதே போல் அந்தியூர் அருகே உள்ள பர்கூர், தட்டக்கரை, தாமரைக்கரை உள்ளிட்ட வனப்பகுதிகளிலும் கடந்த 1 வாரமாக தொடர்ந்து மழை பெய்து வருகிறது. குறிப்பாக இரவு நேரங்களில் பர்கூர் மலை கிராம பகுதிகளில் சாரல் மழை மற்றும் பலத்த மழை பெய்தது.

இதே போல் நேற்றும் பர்கூர் வனப்பகுதியில் சுமார் 30 நிமிடங்களுக்கும் மேலாக பரவலாக மழை கொட்டியது. இதனால் வனப்பகுதி முழுவதும் பசுமையாக காணப்பட்டு வருகிறது.

மேலும் மலைப்பகுகளில் காலை மற்றும் இரவு நேரங்களில் குளிர் காற்று வீசுகிறது. இதனால் மக்கள் மகிழ்ச்சி அடைந்தனர். தற்போது பெய்து வரும் மழையால் வனப்பகுதி பசுமையாக காட்சி அளித்து வருகிறது.

ஈரோடு:

ஈரோடு மாவட்டத்தில் கடந்த சில நாட்களாக வெயிலின் தாக்கம் அதிக அளவில் பதிவாகி வந்தது. இதனால் பொதுமக்கள் அவதி அடைந்து வந்தனர். இந்நிலையில் தமிழக முழுவதும் கடந்த சில நாட்களாக கனமழை தீவிரமடைந்து வருகிறது.

அதன்படி ஈரோடு புறநகர் பகுதிகளான சத்தியமங்கலம், அந்தியூர், கோபி செட்டிபாளையம் பகுதிகளிலும் ஈரோடு மாவட்ட எல்லை பகுதிகளான தாளவாடி மற்றும் அதன் சுற்று வட்டார பகுதிகளிலும் கடந்த 3 நாட்களாக இரவு நேரங்களில் இடியுடன் கூடிய கனமழை பெய்து வருகிறது.

குறிப்பாக சத்தியமங்கலம் மற்றும் அதன் சுற்று வட்டார பகுதியில் பரவலாக மழை பெய்து வருவதால் சத்தியமங்கலம் அடுத்த கடம்பூர் மலை கிராமங்களில் காட்டாற்று வெள்ளம் ஏற்பட்டு போக்கு வரத்து பாதிப்பு ஏற்பட்டு பொது மக்கள் அவதி அடைந்து வருகின்றனர்.

இந்நிலையில் நேற்று காலை வழக்கம் போல் ஈரோடு மாவட்டம் முழுவதும் வெயிலின் தாக்கம் இருந்தது. ஆனால் மதியம் 3 மணிக்கு பிறகு மாவட்ட த்தின் பல்வேறு பகுதிகளில் மழை பெய்ய தொடங்கியது.

பெருந்துறை மற்றும் அதன் சுற்றுவட்டார பகுதியில் மதியம் 3 மணிக்கு வானம் மேகமூட்டத்துடன் காணப்பட்டது. 3 மணிக்கு பின்னர் சாரல் மழை பெய்ய தொடங்கியது. பின்னர் சிறிது நேரத்தில் பலத்த காற்றுடன் கனமழை பெய்ய தொடங்கியது. 3 மணிக்கு பெய்ய தொடங்கிய கனமழை மாலை 6 மணி வரை வெளுத்து வாங்கியது.

இதன் காரணமாக பெருந்துறை, காஞ்சிக்கோவில், பெத்தம்பாளையம், திங்களூர், நசியனூர், பணி க்கம்பாளையம், கிருஷ்ணம்பாளையம், விஜயமங்கலம், புங்கம்பாடி போன்ற தாழ்வான பகுதியில் மழை நீர் தேங்கியது. புங்கம்பாடியில் உள்ள அணைக்கட்டு பகுதியில் பலத்த மழை பெய்ததால் அணைக்கட்டு நிரம்பி அந்த உபரிநீர் அருகே உள்ள குளங்களுக்கு சென்றது.

பெருந்துறை அருகே தெற்கு பள்ளம், பெருந்துறை ரிங் ரோடு பகுதி, டைமன் சிட்டி பகுதி உள்பட பெருந்துறையில் உள்ள 6 குளங்கள் நேற்று பெய்த பலத்த மழையால் நிரம்பியது. இதன் உபரிநீர் ஈரோடு சூரம்பட்டி அணைக்கட்டிற்கு சென்று சூரம்பட்டி அணைக்கட்டும் நிரம்பியது. 6 குளங்கள், அணைக்கட்டு நிரம்பியதால் விவசாயிகள் மகிழ்ச்சி அடைந்துள்ளனர்.

இதேபோல் குண்டேரிப்பள்ளம் அணைப்பகுதியிலும் கடந்த 2 நாட்களாக இரவில் பலத்த மழை பெய்து வருகிறது. இதன் காரணமாக குண்டேரிப்பள்ளம் அணையின் நீர்மட்டமும் உயர்ந்து வருகிறது. கவுந்தப்பாடி, சென்னிமலை, கொடுமுடி, பவானி, மொட க்குறிச்சி, பவானிசாகர், நம்பியூர், வரட்டுப்பள்ளம் என ஈரோடு புறநகர் பகுதியில் பலத்த மழை பெய்தது.

அதே நேரம் ஈரோடு மாநகர் பகுதியில் லேசான சாரல் மழையுடன் நின்றுவிட்டது. இதனால் மாநகர் பகுதி மக்கள் ஏமாற்றம் அடைந்தனர்.

ஈரோடு மாவட்ட எல்லை பகுதியான தாளவாடி மற்றும் அதன் சுற்று வட்டார பகுதியில் கடந்த 4 நாட்களாக பலத்த மழை பெய்து வருகிறது. இதனால் ஓடைகளில் காட்டாற்று வெள்ளம் ஏற்பட்டுள்ளது. புறநகர் பகுதியில் பெய்த மழையில் வெப்பம் தணிந்து குளிர்ச்சியான சூழ்நிலை நிலவி வருகிறது.

ஈரோடு மாவட்டத்தில் நேற்று இரவு பெய்த மழை மில்லி மீட்டரில் வருமாறு:-

பெருந்துறை-51, குண்டேரிப்பள்ளம்-25.20, கவுந்தப்பாடி-14, சென்னிமலை-12, கொடுமுடி-8.60, பவானி-6.40, மொடக்குறிச்சி-6, பவானிசாகர்-5, நம்பியூர்-3.10, வரட்டுப்பள்ளம்-3.

ஈரோடு:

ஈரோடு ரெயில் நிலையத்திற்கு தினமும் 100-க்கும் மேற்பட்ட ரெயில்கள் வந்து செல்கின்றன. கடந்த சில நாட்களாக ஈரோடு வழியாக செல்லும் ரெயிலில் கஞ்சா கடத்தப்பட்டு வரும் சம்பவங்கள் அதிகரித்துள்ளன.

இதையடுத்து ஈரோடு ரெயில்வே போலீசார் உஷார் படுத்தப்பட்டு ரெயில் நிலையத்துக்கு வரும் அனைத்து ரெயில் களையும் ஒவ்வொரு பெட்டியாக சென்று சோத னை செய்து வருகின்றனர்.

அதன்படி ஜார்க்கென்ட் மாநிலம் டாட்டா நகர் பகுதியில் இருந்து கேரள மாநிலம் எர்ணாகுளம் வரை செல்லும் டாட்டா நகர் எக்ஸ்பிரஸ் ரெயில் ஈரோடு நோக்கி வந்து கொண்டு இருந்தது.

நேற்று இரவு ஈரோடு ரெயில் நிலையம் அருகே வந்த போது ரெயில்வே போலீசார் ரெயிலில் சோதனை நடத்தினர்.

அப்போது முன்பதிவு செய்யப்பட்ட எஸ்.1 பெட்டியின் கழிப்பறை அருகே சோதனை செய்த போது பை ஒன்று கேட்பாரற்று கிடந்தது. போலீசார் அதனை பிரித்து பார்த்த பொழுது அதில் 9 கிலோ கஞ்சா இருந்தது தெரியவந்தது.

ரெயிலில் கஞ்சா கடத்திய கும்பல் போலீஸ் வருவதை பார்த்ததும் கஞ்சா பையை போட்டு விட்டு தப்பி சென்றது தெரிய வந்தது.

கஞ்சாவை கைப்பற்றிய ஈரோடு ரெயில்வே போலீசார் இது குறித்து வழக்குப் பதிவு செய்து விசாரணை நடத்தி வருகின்றனர்.

மேலும் கைப்பற்றப்பட்ட கஞ்சாவை ஈரோடு மது விலக்கு அமலாக்கத்துறை போலீசாரிடம் ஒப்படைத்தனர்.

கோபி:

ஈரோடு மாவட்டம் கோபிசெட்டிபாளையம் அருகே உள்ள கூகலூரை சேர்ந்தவர் பழனிச்சாமி. இவரது மனைவி பாப்பக்காள்(65). இவர்களது மகன் தேவராஜ். பழனிச்சாமி கடந்த சில ஆண்டுகளுக்கு முன் இறந்து விட்ட நிலையில் தேவராஜ் கூலி வேலை செய்து தாயாரை காப்பாற்றி வந்தார்.

இந்நிலையில் தேவராஜின் உறவினர்கள் கோபி, சத்தி, கோவை உள்ளிட்ட பல்வேறு பகுதிகளில் இருந்து 50-க்கும் மேற்பட்டோர் ரெயில் மூலமாக சம்பவத்தன்று காலை காசியாத்திரை சென்றுள்ளனர்.

இந்நிலையில் தேவராஜ் உட்பட அனைவரும் ஒடிசா மாநிலம் பூரியில் உள்ள ஜெகநாதர் கோவிலில் சாமி தரிசனம் செய்து உள்ளனர். சாமி தரிசனம் முடிந்து வெளியே வந்த சிறிது நேரத்தில் தேவராஜூக்கு வாந்தி, மயக்கம் ஏற்பட்டுள்ளது.

உடனே அருகில் இருந்த அவரது உறவினர்கள் அவரை மீட்டு பூரி அரசு மருத்துவ கல்லூரி மருத்துவமனைக்கு கொண்டு சென்றுள்ளனர். ஆனால் வழியிலேயே தேவராஜ் உயிரிழந்தார்.

இந்நிலையில் இதுகுறித்து தகவல் அறிந்து தேவராஜூவின் தாயார் கதறி துடித்து, மகனின் உடலை வீட்டிற்கு கொண்டு வர முயன்ற போது, தனியார் ஆம்புலன்ஸ் வாகனங்கள் ஒரு லட்சம் முதல் ஒன்றரை லட்சம் ரூபாய் வரை வாடகையாக கேட்டு உள்ளனர்.

வறுமையில் வாழும் பாப்பக்காவினால் மகனின் உடலை கொண்டு வர முடியாத நிலை ஏற்பட்டது. அதைத்தொடர்ந்து மகனின் உடலை தமிழகம் கொண்டு வர அரசின் உதவியை கேட்டு கோபி ஆர்.டி.ஓ. கண்ணப்பனிடம் கண்ணீர் மல்க மனு அளித்துவிட்டு கதறி அழுதார்.

கணவரை இழந்த நிலையில் மகனின் ஆதரவில் வாழ்ந்து வந்த ஏழை தாயினால், மகனின் உடலை கொண்டு வர முடியாமல் தவிப்பது பெரும் சோகத்தை ஏற்படுத்தியது.

அந்தியூர்:

ஈரோடு மாவட்டம் சத்தியமங்கலம் புலிகள் காப்பகத்தில் மொத்தம் 10 வனச்சரகங்கள் உள்ளன. இங்கு யானை, புலி, சிறுத்தை, கரடி, காட்டெருமை உட்பட பல்வேறு வன விலங்குகள் வசித்து வருகின்றன. குறிப்பாக யானைகள் அதிக அளவில் வசித்து வருகின்றன.

தற்போது வனப்பகுதியில் கடும் வறட்சி நிலவுவதால் வனப்பகுதியில் உள்ள நீர் நிலைகள் வறண்டு காணப்படுகிறது. இதனால் வனவிலங்குகள் உணவு தண்ணீரை தேடி கிராமத்துக்குள் வருவது தொடர்கதை ஆகிவருகிறது.

குறிப்பாக கடந்த சில நாட்களாகவே யானை கூட்டங்கள், ஒற்றை யானைகள் வனப்பகுதியை விட்டு வெளியேறி கிராமத்துக்குள் புகுந்து விளை நிலங்களை தொடர்ந்து சேதப்படுத்தி வருகிறது.

இந்நிலையில் ஈரோடு மாவட்டம் அந்தியூர் அருகே உள்ள எண்ணமங்கலம் கிராமம், செலம்பூர் அம்மன் கோவில் வனப்பகுதியொட்டி அமைந்துள்ளது. இந்நிலையில் வனப்பகுதியில் இருந்து நேற்று அதிகாலை தண்ணீர் மற்றும் உணவை தேடி வெளியேறிய ஒற்றை காட்டு யானை அங்குள்ள விவசாய நிலங்களுக்குள் புகுந்து அங்கும் இங்கும் ஓடியது.

இதை கண்ட விவசாயிகள் அந்தியூர் வனத்துறையினருக்கு தகவல் தெரிவித்தனர். தொடர்ந்து வனத்துறையினர் மற்றும் விவசாயிகள் ஒன்றிணைந்து சத்தம் எழுப்பி யானையை வனப்பகுதிக்குள் விரட்ட முயன்றனர்.

இதனால் ஆவேசம் அடைந்த அந்த ஒற்றை யானை ஒவ்வொரு விவசாய தோட்டத்துக்குள் புகுந்து விவசாய நிலங்களை சேதப்படுத்தியது. அங்கு விவசாயிகள் மக்காச்சோளம், முட்டைக்கோஸ் அதிக அளவில் பயிரிட்டு இருந்தனர்.

அந்த தோட்டத்துக்குள் யானை புகுந்து பயிர்களை சேதப்படுத்தியது. சுமார் 10 மணி நேரம் அந்த ஒற்றை காட்டு யானை வனத்துறையினர் மற்றும் விவசாயிகளுக்கு போக்கு காட்டி அங்கும் இங்கும் ஓடியது.

பின்னர் ஒரு வழியாக அந்த ஒற்றை காட்டு யானை வனப்பகுதிக்குள் சென்றது. இதன் பின்னரே விவசாயிகள் மற்றும் வனத்துறையினர் நிம்மதி பெரும் மூச்சு விட்டனர்.

இதேபோல் சத்தியமங்கலம் வனச்சரகத்திற்குட்பட்ட கொண்டப்ப நாயக்கன்பாளையம் வனப்பகுதியில் இருந்து வெளியேறிய காட்டு யானை ஒன்று பெரும்பள்ளம் அணை அருகே உள்ள தரிசு நிலங்களில் பகல் நேரங்களில் நடமாடி வருகிறது. உடல் நலம் குன்றியதால் தீவனம் ஏதும் உட்கொள்ளாமல் பகல் நேரங்களில் தரிசு நிலைகளில் சுற்றி வருகிறது.

இதனால் அந்த பகுதியில் கால்நடைகளை மேய்ப்பவர்கள் அதிர்ச்சி அடைந்துள்ளனர். குடிநீருக்காக அந்த யானை கடந்து சில நாட்களாக பெரும்பள்ளம் மலைப்பகுதியில் சுற்றி வருகிறது. எனவே அந்த பகுதியில் செல்பவர்கள் கவனத்துடன் செல்ல வேண்டும் என வனத்துறையினர் எச்சரிக்கை விடுத்துள்ளனர்.

ஈரோடு:

ஈரோடு மாவட்டத்தில் கடந்த சில நாட்களாக வெயிலின் தாக்கம் அதிகரித்து வந்தது. பிப்ரவரி மாதத்தில் இருந்தே வெப்ப அளவு உயர்ந்து வந்தது. சராசரியாக 104 டிகிரி முதல் 111 டிகிரி வரை வெயில் பதிவாகி வந்ததால் மக்கள் அவதி அடைந்து வந்தனர். இதனால் மழை பெய்யாதா என ஈரோடு மக்கள் ஏக்கத்துடன் காத்துக் கொண்டிருந்தனர்.

இந்நிலையில் ஈரோடு மாவட்டம் தாளவாடியில் கடந்த 2 நாட்களாக சூறாவளி காற்றுடன் ஒரு மணி நேரம் மழை கொட்டி தீர்த்தது. ஆனால் ஈரோடு மாநகர் பகுதியில் நேற்று முன்தினம் 10 நிமிடம் மட்டுமே மழை பெய்து ஏமாற்றியது. நேற்று காலை வழக்கும் போல் வெயிலின் தாக்கம் சற்று அதிகமாக இருந்தது. பகல் 11 மணிக்கு மேல் வானத்தில் கரு மேகங்கள் சூழ்ந்து இருந்தன.

இதனையடுத்து பிற்பகல் 3 மணி அளவில் லேசான மழை பெய்ய தொடங்கியது. பின்னர் நேரம் செல்ல சொல்ல சூறாவளி காற்றுடன் பலத்த மழை பெய்தது. சுமார் ஒரு மணி நேரம் இடியுடன் கூடிய கனமழை போட்டி தீர்த்தது. இதனால் ஈரோடு மாநகர பகுதியில் தாழ்வான பகுதிகளில் மழைநீர் தேங்கியது. கொங்காளம்மன் கோவில் வீதி, வீரப்பன்சத்திரம் போன்ற பகுதியில் மழை நீர் குளம் போல் தேங்கி நின்றது. பலத்த காற்றுக்கு தாக்கு பிடிக்க முடியாமல் மாநகர் பகுதி முழுவதும் 100-க்கும் மேற்பட்ட மரக்கிளைகள் முறிந்து விழுந்தன. சாலை நடுவில் வைக்கப்பட்டிருந்த தடுப்பு வேலிகள் காற்றில் தூக்கி வீசப்பட்டன.

ஈரோடு முருகேசன் காலனி மற்றும் கணபதி காலனி பகுதியில் மரக்கிளைகளுடன் மின்கம்பங்களும் முறிந்து விழுந்ததால் அந்த பகுதியில் இரவு முழுவதும் மின்தடை ஏற்பட்டு பொதுமக்கள் அவதி அடைந்தனர். தற்போது அந்த பகுதியில் மின் ஊழியர்கள் மின்கம்பங்களை சரி செய்யும் பணியில் ஈடுபட்டு வருகின்றனர்.

ஈரோடு கோபி அடுத்த மொடச்சூர் பகுதியில் பலத்த மழையால் நூற்றுக்கும் மேற்பட்ட வாழைத்தோட்டத்தில் மழை நீர் தேங்கி நின்றது. கோபி அருகே உள்ள குள்ளம்பாளையம் பகுதியில் 5 ஏக்கர் நிலத்தில் பயிரிடப்பட்டிருந்த செவ்வாழை, கதலி, வாழை மரங்கள் கீழே சாய்ந்து சேதம் அடைந்தன. இதன் மதிப்பு ரூ.15 லட்சம் ஆகும்.

இதேபோல் அந்தியூர் அருகே உள்ள காட்டூர் பகுதியில் சூறைக்காற்றுடன் மழை பெய்தது. இந்த சூறைக்காற்றுக்க தாக்கு பிடிக்க முடியாமல் 100-க்கும் மேற்பட்ட வாழை மரங்கள் முறிந்து சேதம் அடைந்தன.

தாளவாடி பகுதியில் நேற்று 3-வது நாளாக இடியுடன் கூடிய கனமழை பெய்தது. இதனால் ஓடைகளில் வெள்ள நீர் பெருக்கெடுத்து ஓடியது. இதேப்போல் பவானிசாகர் அணை, வரட்டுப்பள்ளம் அணை பகுதியிலும் மழை பரவலாக பெய்தது. மாவட்டத்தில் பெய்த இந்த திடீர் மழையால் வெப்பம் தணிந்து குளிர்ச்சியான சூழ்நிலை நிலவியது.

ஈரோடு மாவட்டத்தில் நேற்று இரவு பெய்த மழை அளவு மில்லி மீட்டரில் வருமாறு:-

எலந்த குட்டை மேடு-33.40, தாளவாடி-23.60, கோபி-23.20, பவானிசாகர்-13.20, ஈரோடு-14, வரட்டுப்பள்ளம்-8.20, சென்னிமலை-4.

ஈரோடு:

ஈரோடு மாவட்டம் வெள்ளோடு அருகே அமைந்துள்ளது வெள்ளோடு பறவைகள் சரணாலயம். சுமார் 240 ஏக்கர் பரப்பளவில் உள்ள இந்த பறவைகள் சரணாலயத்தில் 50 ஏக்கர் அளவில் 30 அடிக்கு தண்ணீர் தேக்கும் வகையில் குளம் அமைக்கபட்டுள்ளது.

கீழ்பவானி வாய்க்காலின் கசிவு நீர் மற்றும் மழை காலத்தில் நீர் வழி ஓடையின் மூலமாக வரும் தண்ணீரையே ஆதாரமாக கொண்டுள்ளது இந்த பறவைகள் சரணாலயம். கடந்த சில ஆண்டுகளுக்கு முன்பு வறட்சியின் காரணமாக குளம் மற்றும் மரங்கள் வரண்டு போனது.

இதனையடுத்து ரூ.2 கோடியே 35 லட்சம் மதிப்பில் பறவைகள் சரணாலயம் புதுப்பிக்கபட்டு சரணாலயத்தை சுற்றி கரைகள் பலப்படுத்தப்பட்டு சிறு பாலங்கள், நடை பாதைகள், பறவைகளின் வண்ண ஓவியங்கள், பட்டாம்பூச்சி பூங்கா, செல்பி பாயின்ட் என பல்வேறு மேம்பாட்டு பணிகள் முடிவுற்று எழில்மிகு ரம்மியமாக காட்சியளிக்கின்றது வெள்ளோடு பறவைகள் சரணாலயம்.

இந்த சரணாயத்தில் உள்ள குளத்தில் உள்ள மீன்களை உண்டு இனப்பெருக்கம் செய்ய பறவைகள் அதிகம் வருவதுண்டு. ஆண்டு தோறும் அக்டோபர் மாதம் தொடங்கி மார்ச் மாதம் வரையில் பறவைகளுக்காக சீசன் தொடங்கும்.

இந்த காலத்தில உள்நாட்டு பறவைகளான மஞ்சள் மூக்கு நாரை, நத்தை குத்தி நாரை, வெள்ளை அரிவால் மூக்கன், பொறி உள்ளான், நீலவால் இரைக்கோழி, சிறிய நீர் காகம், சாம்பல் நாரை, பஞ்சுருட்டான் போன்ற உள்நாட்டு பறவைகளும் சைபீரியா, நியூசிலாந்து, ஆஸ்திரேலியா, ரஷ்யா போன்ற நாடுகளில் இருந்து சுழைக்கடா, வண்ண நாரை, நெடுங்கல் உள்ளான், செம்பருந்துபூ நாரை, வால் காக்கை, காஸ்பியன் ஆலா, வெண்புருவ சின்னான், கருங்கழுத்து நாரை போன்ற வெளிநாட்டு பறவைகள் கூட்டம் கூட்டமாக வந்து இந்த சரணாலய குளத்தில் குளித்து கும்மாலமிட்டு மீன்களை உணவாக உண்டு மரங்களில் கூடுகட்டி இனப்பெருக்கம் செய்து குஞ்சுகள் வளர்ந்தவுடன் பறந்து சென்று விடுவது வழக்கமான ஒன்றாக உள்ளது.

இந்த பறவைகளைகான ஈரோடு மாவட்டம் மட்டு மின்றி அருகிலுள்ள கோவை, சேலம், திருச்செங்கோடு என பல்வேறு மாவட்டங்களில் இருந்தும் பொதுமக்கள் வருவது உண்டு. ஈரோடு மாவட்ட த்தின் சிறந்த சுற்றுலா தளமாக வெள்ளோடு பறவைகள் சரணாலயம் திகழ்ந்து வந்தது. அயல் நாடுகளில் இருந்து கூட்டம் கூட்டமாக பறவைகள் வருவதும் அதனை பார்க்க பொது மக்கள் ஆர்வம் காட்டி வந்தனர்.

இந்நிலையில ஈரோடு மாவட்டத்தில் எந்த ஆண்டும் இல்லாத அளவுக்கு வெயிலின் தாக்கம் அதிகரித்து நாட்டிலேயே 2-வது இடத்தை ஈரோடு மாவட்டம் பிடித்தது. 110 டிகிரி பாரன் ஹிட் அளவுக்கு வெயிலின் தாக்கம் அதிகரித்து உள்ளதால் பொதுமக்களின் இயல்பு வாழ்க்கை வெகுவாக பாதிக்கப்பட்டது. பகல் நேரங்களில் பொது மக்கள் வீட்டை விட்டு வெளியே வர முடியாத அளவுக்கு வெயிலின் தாக்கம் இருந்து வருகிறது.

தற்போது வெள்ளோடு பறவைகள் சரணாலயத்தில் மேம்படுத்தப்பட்ட பணிகள் நிறைவடைந்து சரணாலயம் ரம்யமாக காட்சி அளித்தாலும். வெயிலின் தாக்கம் காரணமாக வெளிநாட்டு பறவைகள் வரத்து இல்லை. பறவைகள் எண்ணிக்கை வெகுவாக குறைந்துவிட்டது. ஒரு சில உள்நாட்டு பறவைகள் மட்டுமே வந்து செல்கின்றன.

இதனால் பொதுமக்கள், சுற்றுலா பயணிகள் மிகுந்த ஏமாற்றம் அடைந்து உள்ளனர்.