கொச்சி:
6-வது புரோ கபடி ‘லீக்‘ போட்டி கடந்த அக்டோபர் மாதம் 7-ம் தேதி சென்னையில் தொடங்கியது. இதில் 12 அணிகள் பங்கேற்றன. அவை இரண்டு பிரிவாக பிரிக்கப்பட்டது. ஒவ்வொரு அணியும் 22 லீக் ஆட்டங்களில் மோதின. 12 நகரங்களில் ‘லீக்‘ ஆட்டங்கள் முடிவடைந்தன.
இதில் ‘ஏ’ பிரிவில் குஜராத் பார்சுன் (93 புள்ளி), மும்பை (86 புள்ளி), தபாங் டெல்லி (68 புள்ளி) ஆகிய அணிகள் முதல் 3 இடங்களை பிடித்து ‘பிளே ஆப்’ சுற்றுக்கு முன்னேறின.
இதேபோல், ‘பி’ பிரிவில் பெங்களூர் புல்ஸ் 78 புள்ளியுடன் முதல் இடத்தையும், பெங்கால் வாரியர்ஸ் 69 புள்ளியுடன் 2-வது இடத்தையும், உ.பி. யோதா 57 புள்ளியுடன் 3-வது இடத்தையும் பிடித்து ‘பிளே ஆப்’ சுற்றுக்கு தகுதி பெற்றன.
இந்நிலையில், கொச்சியில் இன்று இரவு 8 மணிக்கு எலிமினேட்டர் 1 ஆட்டம் நடைபெற்றது. இந்த போட்டியில் ஏ பிரிவில் 2வது இடம் பிடித்த மும்பையும், ‘பி’ பிரிவில் 3-வது இடம் பிடித்த உ.பி. யோதா அணியும் மோதின.
ஆட்டத்தின் தொடக்கத்தில் இருந்தே உ.பி. யோதா அணி வீரர்கள் அபாரமாக ஆடினர். அவர்களுக்கு ஈடுகொடுத்து யு மும்பா அணியும் விளையாடியது. ஆனாலும், ஆட்டத்தின் முதல் பாதியில் 18 - 15 என்ற புள்ளிக்கணக்கில் உபி யோதா அணி முன்னிலை பெற்றது.
இறுதியில், உ.பி. யோதா அணி 34 - 29 என்ற புள்ளிக்கணக்கில் வெற்றி பெற்றது.
இதில் வெற்றி பெற்ற உ.பி. அணி ‘எலிமினேட்டர் 3’ ஆட்டத்துக்கு தகுதி பெற்றுள்ளது. தோற்ற மும்பை அணி போட்டியில் இருந்து வெளியேறியது. #ProKabbadi #UMumba #UpYodha
