ஃபெராரி ஃபோர்டோஃபினோ இந்தியாவில் அறிமுகம் செய்யப்பட்டது. முன்னதாக ஃபெராரியின் 70-வது ஆண்டு விழாவை முன்னிட்டு இத்தாலியில் இந்த கார் அறிமுகம் செய்யப்பட்டது குறிப்பிடத்தக்கது.
இந்தியாவில் ஃபெராரி போர்டோஃபினோ விலை ரூ.3.5 கோடி (எக்ஸ்-ஷோரூம்) என நிர்ணயம் செய்யப்பட்டுள்ளது. இத்தாலியில் உள்ள மீன்பிடி கிரமாமமான போர்டோஃபினோ பெயர் தான் புதிய ஃபெராரி காருக்கு சூட்டப்பட்டுள்ளது. பூமராங் வடிவம் கொண்ட எல்.இ.டி. ஹெட்லேம்ப்கள் கொண்டுள்ள புதிய ஃபெராரி கார் கலிபோர்னியா டி மாடலை விட அதிக அழகாக காட்சியளிக்கிறது.
போர்டோஃபினோவின் பக்கவாட்டுகள் கார்பன் ஃபைபர் மூலம் உருவாக்கப்பட்டுள்ள நிலையில், பின்புற வீல் ஆர்ச்கள் டெயில் லேம்ப்களுடன் இணைகிறது. பின்புறம் முற்றிலும் புதிய வடிவமைப்பு கொண்டுள்ள போர்டோஃபினோவின் டுவின் டெயில் லேம்ப்கள், குவாட் எக்சாஸ்ட் செட்டப் கொண்டுள்ளது.
புதிய காரின் சேசிஸ் மீண்டும் வடிவமைக்கப்பட்டு இருப்பதால், காரின் எடை 80 கிலோ வரை குறைந்துள்ளது. மேலும் புதிய சேசிஸ் 35 சதவிகிதம் வரை உறுதியானது என ஃபெராரி தெரிவித்துள்ளது. ஃபெராரி ஜி.டி. மாடல்களில் எலெக்ட்ரோ-மெக்கானிக்கல் ஸ்டீரிங் கொண்ட கார்களில் ஒன்றாக இது இருக்கிறது.
ஃபெராரி போர்டோஃபினோ மாடலில் 3.9 லிட்டர் டுவின் டர்போ வி8 இன்ஜின் கொண்டுள்ளது. இதே இன்ஜின் கலிபோர்னியா டி மாடலிலும் வழங்கப்பட்டுள்ளது. எனினும் புதிய காரில் இன்ஜின் சிறிதளவு மாற்றம் செய்யப்பட்டுள்ளது. இந்த இன்ஜின் 600 பி.ஹெச்.பி. @ 7,500 ஆர்.பி.எம். செயல்திறன் மற்றும் 760 என்.எம். டார்கியூ @ 5,250 ஆர்.பி.எம். செயல்திறன் கொண்டுள்ளது.
