பல்வேறு காரணங்களுக்காக பயணம் செய்பவர்கள் பலரும், சிரமத்தை சந்திப்பது உணவு விஷயத்தில் தான். பயணம் மேற்கொள்ளும் சமயங்களிலும், தாங்கள் செல்லும் இடங்களிலும், தங்களுக்கு ஏற்ற ஆரோக்கியமான உணவுகளை பெறுவது பலருக்கு சவாலாக இருக்கும். அதேசமயம், சத்துள்ள உணவுகளை சாப்பிடாவிட்டால் அந்த பயணம் வெற்றிகரமாக அமையாது என்பதும் உண்மைதான்.
பசியை போக்கு வதற்காக உணவு சாப்பிட வேண்டும் என்பதைத் தாண்டி, சத்தான உணவை உட்கொள்ள வேண்டும் என்பதை முதலில் நினைவில் நிறுத்துங்கள். உங்கள் பயணத்தின்போது ஊட்டச்சத்து நிறைந்த உணவுகளைச் சாப்பிடுவதற்கான எளிய குறிப்புகள் இங்கே...
முட்டை:
பயணத்தின்போது முட்டையை உடன் எடுத்துச் செல்லுங்கள். இதை உடையாமல் கொண்டு செல்வதற்கு பல்வேறு வசதிகள் கொண்ட பெட்டிகள் கிடைக்கின்றன. தற்போது முட்டையை வேக வைப்பதற்காக பல எளிய எலக்ட்ரிக் உபகரணங்கள் வந்துள்ளன. இவை மின்சாரம் மற்றும் பேட்டரியின் மூலம் இயங்கக்கூடியவை. வேகவைத்த முட்டை வயிற்றை நிரப்புவதோடு உடலுக்குத் தேவையான சத்துக்களையும், ஆற்றலையும் கொடுக்கும்.
சாண்ட்விச்:
பயணம் செல்லும்போது ரொட்டி மற்றும் சில வகை காய்கறிகளைக் கொண்டு சென்றால் எளிதாக சாண்ட் விச் தயாரித்து சாப்பிடலாம். இது பசியை போக்கு வதோடு உங்கள் உடலுக்குத் தேவையான சத்துக்களையும், புத்துணர்வையும் அளிக்கும்.
காய்கறி சாலட்:
பச்சையாக சாப்பிடக்கூடிய முளைவிட்ட பயறு வகைகள், கேரட், வெள்ளரிக்காய், வெங்காயம் போன்ற காய்கறிகளைக் கொண்டு சாலட் தயாரித்து சாப்பிடலாம். இது பயணத்துக்கு ஏற்ற சிறந்த சிற்றுண்டியாக அமையும். இதில் உள்ள நீர்ச்சத்து மற்றும் எலக்ட்ரோலைட்டுகள் உடல் களைப்படையாமல் பாதுகாக்கும்.
விதைகள் மற்றும் உலர் பழங்கள்:
பாதாம், முந்திரி, சூரியகாந்தி விதை, ஆளி விதை, பூசணி விதை, தர்பூசணி விதை, சியா விதை, உலர் திராட்சை, பேரீட்சை, உலர்ந்த அத்திப்பழம் ஆகியவற்றை ஒன்றாக சேர்த்த கலவையை காற்றுப்புகாத பாட்டில்களில் போட்டு உடன் எடுத்துச் செல்லுங்கள். ஆற்றல் நிறைந்த இவை பசியை தணிப்பதோடு. உடலுக்குத் தேவையான புரதம், நல்ல கொழுப்பு, இரும்புச்சத்து, ஆன்டி-ஆக்சிடென்டுகள் ஆகிய சத்துக்களையும் அளிக்கக்கூடியவை
எதையெல்லாம் சாப்பிடக்கூடாது?
பயணத்தின்போது பலரும் காபி. டீ மட்டுமே குடித்து நாட்களை கழிப்பார்கள். இது மிகவும் தவறானதாகும். வெளியிடங்களுக்கு பயணிக்கும் போது அசைவம் சாப்பிடுவதை தவிர்க்க வேண்டும். உணவின் தரம், சுகாதாரம் சரியாக இல்லை என்றால் இவ்வகை உணவுகள் உடல் ஆரோக்கியத்த, பாதிக்கக்கூடும்.
வெளி இடங்களில் சாப்பிடும்போது முடிந்தவரை எண்ணெய்யில் பொரித்த மற்றும் வறுத்த உணவுகள், அதிக காரம் மற்றும் மசாலா சேர்த்த உணவுகள். கொதிக்க வைக்காத உணவுகள், சமைக்காத பச்சை உணவுகள் ஆகியவற்றை சாப்பிடுவதை தவிர்க்க வேண்டும்.
