பாலெம்பேஸ்:
இந்தோனேசியாவில் நடந்து வரும் ஆசிய விளையாட்டு போட்டி 5-வது நாளாக நடக்கிறது.
இன்று நடந்த வில்வித்தை போட்டியில் பெண்கள் தனிநபர் பிரிவில் இந்திய வீராங்கனை தீபிகா குமாரி 6-2 என்ற கணக்கில் வடகொரிய வீராங்கனை ஜியாங்கை வீழ்த்தி கால்இறுதிக்கு முந்தைய சுற்றுக்கு தகுதி பெற்றார்.
மற்றொரு இந்திய வீராங்கனையான பிரோமிளா 2-6 என்ற கணக்கில் மாங்கோலியா வீராங்கனையிடம் தோல்வி அடைந்தார். ஆண்கள் வில்வித்தை பிரிவில் அட்னுதாஸ் 7-3 என்ற கணக்கில் வடகொரியாவை சேர்ந்த யூங்கை வீழ்த்தி கால்இறுதிக்கு முந்தைய சுற்றுக்கு தகுதி பெற்றார்.
இதேபோல் மற்றொரு வீரரான விஸ்வாஸ் 6-2 என்ற கணக்கில் மாங்கோலியாவின் பாட்டாவை வீழ்த்தினார். காலையில் ஆண்களுக்கான 50 மீட்டர் பட்டர்பிளை நீச்சல் போட்டி தகுதி சுற்று நடந்தது. இதில் இந்திய வீரர் விர்தலால் காதே 24.09 வினாடியில் கடந்து 5-வது இடத்தை பிடித்து இறுதி போட்டிக்கு தகுதி பெற்றார்.
மற்றொரு இந்திய வீரரான அன்ஷில் கோத்தாரி இறுதி சுற்றுக்கு முன்னேறவில்லை. அவர் 25.45 வினாடியில் கடந்து 28-வது இடத்தை பிடித்தார்.
ஆண்கள் 100 மீட்டர் பிரிஸ்டைல் தகுதி சுற்றில் டிசாசா 27-வது இடம் (51.50 வினாடி), விர்தலால் காதே 43-வது இடமும் (59.11 வினாடி) பிடித்து இறுதி சுற்று வாய்ப்பை இழந்தனர்.
ஆண்கள் 200 மீட்டர் பேக்ஸ்ட்ரோக் பிரிவில் இந்திய வீரர் ஸ்ரீஅரி நட்ராஜ் இறுதிப் போட்டிக்கு தகுதி பெற்றார். அவர் தகுதி சுற்றில் 2 நிமிடம் 02.97 வினாடியில் கடந்து 7-வது இடத்தை பிடித்தார்.
மற்றொரு இந்திய வீரர் அத்வாய்பேஜ் 12-வது இடத்தை (2.06.85) பிடித்து வாய்ப்பை இழந்தார். #AsianGames2018
