பெண்கள் தொடர்ந்து உடற்பயிற்சி செஞ்சா கருத்தரிக்க முடியாதா...?

``இந்த அச்சம் ஜிம்முக்குச் செல்லும் பலரிடமும் இருக்கிறது. மனித உடல் என்பது இயங்குவதற்காகவே படைக்கப்பட்டது. 12 மணி நேரம்கூட உடலுழைப்பு செய்யலாம். வேட்டை, விவசாயம் என்று பல மணி நேரம் உழைத்தவர்கள் தான் மனிதர்கள். கடந்த 100 வருடங்களாகத்தான் நம்மில் பலரும் வொயிட் காலர் ஜாப் செய்ய ஆரம்பித்துவிட்டோம். அதே நேரம், சுவைக்கு ஆசைப்பட்டு வறுத்தது, பொரித்தது, இனிப்பு வகைகள் என்று கலோரி அதிகமான உணவுகளையும் அதிகம் சாப்பிட ஆரம்பித்து விட்டோம்.

இதன் விளைவுதான் நீரிழிவு, ரத்த அழுத்தம் போன்ற வாழ்வியல் பிரச்சினைகள். இந்த பிரச்சினைகள் வரக்கூடாது என்றால், ஒவ்வொருவரும் தினமும் 6,000 அடிகள் நடக்க வேண்டும். இது கிட்டத்தட்ட நாலரை கிலோ மீட்டர் வரும். செக்ஸ் வாழ்க்கை நன்றாக இருக்க வேண்டும் என்று விரும்புபவர்கள் நாளொன்றுக்கு 10,000 அடிகள் நடக்கலாம் அல்லது 6 முதல் 7 கிலோ மீட்டர் தூரம் வரை நடக்கலாம்.

நிறைய பேர் உடற்பயிற்சி செய்தால் ஆண்மை குறைந்துவிடுமோ? `தொடர்ந்து உடற்பயிற்சி செய்தால் கருத்தரிக்க முடியாதா...? என்றெல்லாம் நினைத்துக் கொண்டிருக்கிறார்கள். உடற்பயிற்சியில் அதிக ஈடுபாடு கொண்ட பெண்கள் கூட கர்ப்பமாக இருக்கும்போது உடற்பயிற்சி செய்தால் கரு கலைந்துவிடும் என்று நம்புகிறார்கள். ஆனால், இவை எதுவுமே உண்மை கிடையாது.

ஆண்கள் ஆரோக்கியமாக வாழ உடற்பயிற்சி அவசியம். தவிர, உடற்பயிற்சி செய்யும்போது டெஸ்டோஸ்டீரான் சுரப்பு தூண்டப்பட்டு ஆண்மையும் அதிகரிக்கும். உடற்பயிற்சி செய்யாமல் இருப்பவர்கள், கலோரி அதிகமான உணவுகளைத் தொடர்ந்து சாப்பிட்டு வந்தால் சருமத்துக்கு அடியில் கொழுப்பு அதிகமாக சேரும். ரத்தத்தில் இருக்கிற ஆண் ஹார்மோன் சருமத்துக்கடியில் இருக்கிற அந்த கொழுப்புடன் இணைந்து பெண் ஹார்மோனாக மாறி ரத்தத்துடன் கலக்கும். இதை அரோமேட்டிஸேஷன் என்போம். இது ஆண்மைக்குறைவை ஏற்படுத்தும்.

பெண்களுக்கும் உடற்பயிற்சி ஆரோக்கியத்தைத் தரும். ஆரோக்கியம் அவர்களுக்கு நல்ல கருத்தரிப்புத் திறனைக் கொடுக்கும். கருத்தரித்த பிறகு, மருத்துவரின் ஆலோசனைபடி உடற்பயிற்சிகளைத் தொடரலாம். சில பெண்களுக்கு மட்டும், கர்ப்பமாக இருக்கும்போதும் சில நேரங்களில் ரத்தப்போக்கு இருக்கும். அவர்கள் மட்டும், உடற்பயிற்சிகளை தவிர்க்க வேண்டும்.

தினமும் ஜிம்முக்குச் சென்று உடற்பயிற்சி செய்தால் யாருக்குமே எந்த தீங்குமே வராதா என்றால், வரலாம். ஜெயிக்க வேண்டும் என்பதற்காக ஒரு நாளைக்கு 8 முதல் 10 மணி நேரம் ஜிம்மிலேயே இருப்பவர்களுக்கு வளர்சிதை மாற்றங்கள் மற்றும் ஹார்மோன் மாற்றங்கள் நிகழலாம். பெண்களுக்கு மாதவிலக்கு சுழற்சியில் மாற்றங்கள் வரலாம். இதனால், பிற்காலத்தில் கருத்தரிப்பதில் பிரச்சினைகள் வரலாம். மற்றபடி, ஆரோக்கியத்துக்காக ஜிம்முக்குச் சென்று உடற்பயிற்சி செய்கிற ஆண்களுக்கு ஆண்மைக் குறைபாடு வராது. பெண்களுக்கு கருத்தரிப்பதில் எந்த சிக்கலும் வராது.