பொது மருத்துவம்

பல்லுக்கும் முட்டிக்கும் மட்டுமல்ல, பல்லுக்கும் மொத்த உடம்புக்குமே நிறைய சம்பந்தம் இருக்கிறது. நீண்டகாலமாக உடம்பில் நோயோடு இருக்கிறவரின் பற்களை சோதித்துப் பார்த்தால், அந்த நோய்க்கான மூலகாரணம் பற்களில் தான் இருக்கும்.

பற்கள், ஈறுகள், வாயின் உட்பகுதிகள், நாக்கின் அடிப்பகுதியில் ஏற்படும் நோய்களினால் நோய்க்கிருமிகள் உருவாகின்றன. இவை ரத்தத்தின் மூலம் உடலில் பல்வேறு பாகங்களுக்கு பரவுகின்றன.

இந்த நோய்க்கிருமிகள் ரத்தத்தின் வழியாக பயணம் செய்து மூட்டுகளின் உள்ளிருக்கும் திரவத்தில் போய் சேர்ந்து மூட்டுகளுக்குத் தொந்தரவு கொடுக்க ஆரம்பிக்கும். எனவே பற்களுக்கும் மூட்டுவலிக்கும் சம்பந்தம் இருக்கிறது என்பது இதன் மூலம் உறுதியாகிறது.

தவிர்ப்பது எப்படி?

பொருத்தமான பற்பசை, பிரஷ்கள் கொண்டு தினமும் காலை-இரவு நேரங்களில் நன்றாக பல் துலக்க வேண்டும். பற்களுக்கு இடையில் சேரும் உணவுத்துகள்களை உடனே அப்புறப்படுத்த வேண்டும்.

தினமும் இரவு படுக்க போகும்முன் உப்பு கரைத்த சுடுநீரில் வாயை பல முறை கொப்பளிப்பது நல்லது. பலபேர் வாயை தண்ணீரில் கொப்பளிக்காமல் உதடுகளுக்கு மேலேயே தண்ணீரை வைத்து துடைத்துவிட்டு, வாயைக் கழுவிவிட்டேன் என்று வந்துவிடுகிறார்கள். இது மிகப்பெரிய தவறு.

ஆறு மாதங்களுக்கு ஒரு முறை பல் மருத்துவரைச் சந்தித்து ஆலோசனை பெறுவது நல்லது. உதடு, வாய்-கன்னத்தின் உட்பகுதிகள் வீக்கம், ஈறுகளில் ரத்தக் கசிவு, புண், சீழ், கெட்ட நாற்றம் முதலியவைகள் இருந்தால் உடனே பல் மருத்துவரிடம் சிகிச்சை பெறுவது அவசியம்.

ஒரு பல் கெட்டுப் போய்விட்டால் அந்த பல்லைப் பிடுங்கி எறிவது மிகமிகச் சுலபம். ஆனால் மறுபடியும் அந்த இடத்தில் புதிய பல் வளராது. போனது போனதுதான். பற்களை ஒழுங்காக பராமரிக்காமல் ஒவ்வொரு பல்லாக பிடுங்கிக் கொண்டே வந்தால் உணவை சரியாக, முழுமையாக மெல்ல முடியாது.

வாயில் பற்கள் இல்லை என்றால் நாம் பேசும் பேச்சு மற்றவர்களுக்கு சரியாக புரியாது. சொற்கள் சரியாக வராது. பேச்சு குளறுகிற மாதிரி இருக்கும். மொத்தத்தில் பல் போனால் சொல் போய்விடும்.

தற்போது சிறியவர்கள் முதல் பெரியவர்கள் வரை ஓட்டல்களில் ருசிப்பதை விரும்புகிறார்கள். நொறுக்குத் தீனிகள் தொடங்கி, விதவிதமான உணவுகள் வரை, வீட்டை விட வெளியே உண்பது பலருக்கும் பிடிக்கிறது. அதனால்தான் உணவகங்கள், உணவுப் பண்ட கடைகளில் கூட்டம் முண்டியடிக்கிறது.

ஆனால் இப்படி வெளியில் உண்பது, ஆரோக்கியமான பழக்கம் அல்ல. ருசிக்கு அடிமையாகி நாம் வழக்க மாக்கிக்கொள்ளும் இந்த விஷயம், நன்மையை விட பாதிப்பையே அதிகம் தரும்.

அதிலும், மழைக்காலத்தில் வெளிப்புற உணவுகளை வாங்கிச் சாப்பிடுவதால் பல சிரமங்களுக்கு உள்ளாக நேரிடலாம். அது பற்றி இந்த பதிவில் பார்க்கலாம்.

வயிற்றுத் தொற்று

மழைக்காலத்தில் வயிற்றுத் தொற்றை தவிர்க்க வெளிப்புற உணவுகளை வாங்கி சாப்பிடுவதை குறையுங்கள். ஏனெனில் தெருவோர உணவுகளில் சுகாதாரக் கேடுகள் அதிகமாக இருக்கலாம். அத்தகைய உணவகங்களில் பயன்படுத்தும் சுகாதாரமற்ற நீர் உள்ளிட்டவற்றில் பாக்டீரியாக்கள் போன்ற தீங்கு விளைவிக்கும் நுண்ணுயிரிகள் இருக்கலாம்.

எனவே அவை, சமைக்கப்படும் உணவுகளில் தங்கிவிடும். எனவே இந்த உணவுகளை சாப்பிடும்போது நுண்ணுயிரிகள் வயிற்றுக்குள் சென்று வயிற்றுத் தொற்றை ஏற்படுத்தும்.

குடிநீர்

மழைக்காலத்தில் தண்ணீரால் நோய்த் தொற்று அபாயம் ஏற்படும் வாய்ப்பு அதிகம். அசுத்தமான நீரை குடிப்பதும், அசுத்தமான நீரில் சமைத்த உணவை சாப்பிடுவதும் தான் இதற்கு முக்கிய காரணம் ஆகும். எனவே வெளிப்புற கடை களில் கொடுக்கும் தண்ணீரை குடிக்க வேண்டாம். ஏனெனில் அவர்கள் தண்ணீரை சரியாக பாதுகாப்பது கிடையாது. பொதுவாக மழைக்காலத்தில், சூடான நீரை குடிப்பது நல்லது.

கொழுப்பு-கலோரிகள்

தெருவோர உணவுகளில் கொழுப்பு மற்றும் கலோரிகள் அதிகமாகவே இருக்கும். நீங்கள் இந்த உணவுகளை அடிக்கடி சாப்பிட்டால் ஒரு நாளைக்கு எவ்வளவு கொழுப்பு. கலோரிகள் சேரும் என்று உங்களுக்கு தெரியாது. இதன் விளைவாக உங்களது உடல் எடை அதிகரிக்கும். பல பிரச்சனைகளை சந்திக்க நேரிடும்.

அரைகுறையாக சமைத்த உணவு

வெளிப்புற உணவுகள் அரைகுறையாக சமைக்கப் பட்டிருக்கலாம் என்பதால் அது ஆரோக்கியத்தில் மோசமான பாதிப்பை ஏற்படுத்தக்கூடும். செரிமானப் பிரச்சனை. உணவு நஞ்சாதல் போன்ற பிரச்சனைகளை சந்திக்க நேரிடலாம்.

இரைப்பை, குடல் பிரச்சினை

மழைக்காலத்தில் வெளிப்புற உணவுகளை அளவுக்கு அதிகமாக சாப்பிட்டால் இரைப்பை, குடல் பிரச்சனைகள் மாதிரியான அவதிகளுக்கு உள்ளாகலாம். வாந்தி, வயிற்றுவலி, காய்ச்சல், குமட்டல் போன்ற பாதிப்புகள் ஏற்படக்கூடும்.

பொதுவாக மழைக்காலம் மட்டுமல்ல, எக்காலத்திலும் முடிந்த அளவுக்கு வெளியில் வாங்கி சாப்பிடுவதை தவிர்க்க வேண்டும், ஆசைக்காக, எப்போதாவது, அதிலும் சுகாதாரமாக காணப்படும் இடங்களில் உண்ணலாம்.

வீட்டில் சமைத்த ஆரோக்கியமான உணவுகளை சாப்பிடுவதற்கு முக்கியத்துவம் கொடுங்கள். பிடித்த உணவுகளையும், ருசித்துப் பார்க்க விரும்பும் புதிய உணவுகளையும் அதற்கான மூலப்பொருட்களை வாங்கி வீட்டிலேயே தயாரிக்கலாம்.

இதனால் நோய்த் தொற்றுகளில் இருந்து பாதுகாப்பு பெறலாம். நமக்கு பிடித்த உணவை நாமே தயாரித்து உண்ட திருப்தியும் கிடைக்கும்.

நம் உடலில் உள்ள அனைத்து செல்களும் நன்றாக வளர, தொற்று மற்றும் அழற்சியிலிருந்து குணமடைய, புதுப்பித்து கொள்ள புரோட்டின் மிகவும் இன்றியமையாததாகும். உடலை ஆரோக்கியமாக வைத்துக்கொள்ள போதுமான அளவு புரோட்டினை உட்கொள்வது அவசியம்.

ஒரு நாளைக்கு, சராசரியாக ஒரு கிலோ எடைக்கு 0.8 கிராம் புரோட்டின் உட்கொள்ள வேண்டும். உடற்பயிற்சி செய்பவர்கள், விளையாட்டு வீரர்கள் ஆகியோருக்கு சற்று அதிகம் தேவைப்படும்.

உணவு மூலம் சரியான அளவு புரோட்டின் உட்கொள்ள முடியாதவர்கள் புரோட்டின் பவுடர் எடுத்துக்கொள்ளலாம்.

புரோட்டின் பவுடர்கள் பொதுவாக 3 வகைப்படும்.

1) பால் அல்லது பால் பொருட்களில் இருந்து பெறப்படும் லாக்டோஸ்களை கொண்டுள்ள புரோட்டின் பவுடர் (கேசின், வேய்).

2) தாவர வகைகளில் இருந்து தயாரிக்கப்படும் லாக்டோஸ் இல்லாத புரோட்டின் பவுடர் (சோயா, பட்டாணி, பழுப்பு அரிசி).

3) முட்டையின் வெள்ளை கருவிலிருக்கும் நீர்ச்சத்து நீக்கப்பட்டு தயாரிக்கப்படும் புரோட்டின் பவுடர்.

புரோட்டின் பவுடரை தண்ணீரிலோ அல்லது பாலிலோ கலந்து குடிக்கலாம். சர்க்கரை நோயாளிகள் புரோட்டின் பவுடர் உட்கொள்வதால் தசைகளின் வளர்ச்சி மற்றும் செயல்பாடு மேம்படுகிறது.

மேலும் இது நோய் எதிர்ப்பு திறனை அதிகரித்தும், எலும்புகளை வலுவடையச் செய்தும், வயிறு நிறைவு உணர்வை ஏற்படுத்தி, உண்ணும் அளவை குறைத்தும், ரத்த சர்க்கரையை குறைக்கிறது.

புரோட்டின் பவுடர் சாப்பிடுவதால் கொலஸ்ட்ரால் அளவு குறைவதாகவும், ஆன்டிஆக்ஸிடன்டஸ் பண்புகளைஅதிகரிப்பதாகவும் பல்வேறு ஆராய்ச்சிகளில் கண்டறியப்பட்டுள்ளது. இதனை இடை உணவாகவோ அல்லது உடற்பயிற்சிக்கு முன்னரோ பின்னரோ எடுத்து கொள்ளலாம்.

புரோட்டின் பவுடரை நீங்கள் தினசரி பயன்படுத்துவது தவறல்ல. ஆனால், அதன் ஊட்டச்சத்து விவர சீட்டை நன்றாக சரிப்பார்த்து, ஒரு கரண்டியில் 20 முதல் 30 கிராம் வரை புரதம் இருக்கக்கூடியதாகவும், சர்க்கரை மற்றும் கலோரிகள் குறைவாக உள்ள பவுடரையே தேர்ந்தெடுங்கள்.

புரோட்டின் பவுடர்களில் காபீன், கிரியாட்டின் போன்ற சேர்க்கை பொருட்களோ அல்லது ஆர்சனிக், ஈயம், காட்மியம் போன்ற அடர் உலோகங்களோ இருந்தால் அவற்றை தவிர்த்தல் நல்லது.

வேய் புரோட்டின் பவுடர் நுண்ணுயிர் எதிர்ப்பிகள், பாஸ்பனேட்ஸ், லிவோ டோபா போன்ற மருந்துகளின் செயல்பாட்டிற்கு இடைவினைகள் ஏற்படுத்துவதால் மருத்துவரின் அனுமதி பெற்றே இதனை உட்கொள்ள வேண்டும்.

லாக்டோஸ் ஒவ்வாமை உள்ளவர்கள் மற்றும் சிறுநீரக செயலிழப்பு பாதிப்புள்ளவர்கள் புரோட்டின் பவுடரை தவிர்க்க வேண்டும்.

குளிர்காலத்தில் ஐஸ்கிரீம் சாப்பிடலாமா? வேண்டாமா? என்ற கேள்வி அனைவர் மனதிலும் எழும். ஆனால் குளிர்காலத்தில் ஐஸ்கிரீம் சாப்பிடுவதால் சில நன்மைகளும் உண்டாகின்றன. அது பற்றி தெரிந்து கொள்வோம்.

1. குளிர் காலத்தில் ஐஸ்கிரீம் சாப்பிடுவது உடலுக்கு இதமாக இருக்கும். குறிப்பாக குளிர் காலநிலையில் மிகவும் வசதியாக உணர வைக்கும்.

2. ஐஸ்கிரீமின் இனிப்பு சுவை செரோடொனின் போன்ற மகிழ்ச்சி ஹார்மோன்களின் வெளியீட்டை அதிகரித்து, மனநிலையை மேம்படுத்துகிறது.

3. ஐஸ்கிரீம் கலோரிகள் நிறைந்தவை. இவை குளிர்காலத்தில் உடலில் ஆற்றல் அளவை பராமரிக்க உதவும்.

4. ஐஸ்கிரீமில் வைட்டமின்கள் ஏ, டி மற்றும் பி12 உள்ளன. இவை குளிர்காலத்தில் ஒட்டுமொத்த உடல் ஆரோக்கியத்தை மேம்படுத்த உதவுகிறது.

5. இதிலுள்ள பால் உள்ளிட்டவை, உடலுக்கு தேவையான தினசரி நீர்ச்சத்தை பூர்த்தி செய்கின்றன.

புரதம் நம் உடலுக்கு மிகவும் முக்கியமானது. தசைகள், தோல், முடி, நகங்கள் போன்ற உடல் பாகங்களின் வளர்ச்சிக்கு இது மிகவும் அவசியம். ஆரோக்கியமான வாழ்க்கை முறைக்கு போதுமான அளவு புரதத்தை உட்கொள்வது முக்கியமானது.

புரதம் என்பது அமினோ அமிலங்கள் எனப்படும் சிறிய மூலக்கூறுகளால் ஆனது. இந்த அமினோ அமிலங்கள் வெவ்வேறு வரிசைகளில் இணைந்து பல்வேறு வகையான புரதங்களை உருவாக்குகின்றன.

நம் உடலால் தானாக உற்பத்தி செய்ய முடியாத அமினோ அமிலங்களை அத்தியாவசிய அமினோ அமிலங்கள் என்று அழைக்கிறோம். இந்த அத்தியாவசிய அமினோ அமிலங்களை நாம் உணவின் மூலமாகவே பெற வேண்டும்.

புரதம் பொதுவாக அனைத்து வகையான உணவுகளிலும் காணப்படுகிறது. ஆனால் சில உணவுகளில் அதிகமாகவும் சில உணவுகளில் மிகவும் குறைந்த அளவிலும் காணப்படுகிறது.

மேலும் அசைவ உணவுகளில் காணப்படும் புரதம் நிறைவுற்ற புரதம் எனவும் சைவ உணவுகளில் காணப்படும் புரதம் முழுமையற்ற புரதம் இரு வகையாக உள்ளது. இப்போது, நாம் எவ்வளவு புரதத்தை உட்கொள்ள வேண்டும் என்பதை பார்ப்போம்.

புரதம் உட்கொள்வது நமது உடல் எடை மற்றும் பாலினத்தைப் பொறுத்தது. ஆய்வுகளின்படி, சராசரி வயது வந்தவருக்கு ஒரு உடல் எடையில் புரதம் 0.83 கிராம்/கிலோ ஆகும்.

இதன் மூலம், 70 கிலோ எடையுள்ள ஒருவர் தினமும் 58 கிராம் புரதத்தை உட்கொள்ள வேண்டும். இது 200 கிராம் கோழியை உட்கொள்வதற்கு சமம்.

உங்கள் உணவில் தரமான புரதத்தின் அளவை அதிகரிக்க, இறைச்சி, முட்டை, பால் பொருட்கள், மீன், பருப்புகள், விதைகள், பருப்பு வகைகள் மற்றும் கோதுமை, அரிசி அல்லது சோளம் போன்ற தானியங்கள் போன்ற சில முக்கிய உணவு ஆதாரங்களைச் சேர்க்கலாம்.

உங்கள் உணவில் புரதம் ஏன் முக்கியமானது?

கலோரி, சர்க்கரை மற்றும் உப்பு நுகர்வு ஆகியவற்றைக் கண்காணிக்கும் போது, போதுமான புரத நுகர்வு உறுதிப்படுத்துவதும் முக்கியம். நமது உடலில் உள்ள ஒவ்வொரு செல்லின் உருவாக்கம் மற்றும் பராமரிப்பிற்கு புரதம் அவசியம், இது செல்லுலார் செயல்பாட்டிற்கு தேவையான ஆற்றலை வழங்குகிறது.

உங்கள் ஒட்டுமொத்த நல்வாழ்வு வழக்கத்தின் ஒரு பகுதியாக செல் ஆரோக்கியத்தை பராமரிக்க தினசரி புரத உட்கொள்ளலை உறுதி செய்வது அவசியம். புரதங்கள் அமினோ அமிலங்களைக் கொண்டிருக்கின்றன, அவை பெரும்பாலும் கட்டுமானத் தொகுதிகள் என குறிப்பிடப்படுகின்றன. ஒட்டுமொத்த ஆரோக்கியத்தை ஆதரிக்க கணிசமான அளவு புரதத்தை உட்கொள்வது அவசியம்.

புரதம், தசை செல்களின் வளர்ச்சி மற்றும் பழுது பார்ப்புக்கு அவசியம். குறிப்பாக, உடற்பயிற்சி செய்பவர்களுக்கு தசை வளர்ச்சியை அதிகரிக்க போதுமான அளவு புரதம் தேவைப்படுகிறது. இது எலும்புகளை வலுப்படுத்தவும், எலும்பு முறிவிலிருந்து பாதுகாக்கவும் உதவும்.

நோய் எதிர்ப்பு மண்டலம் வலுவாக புரதம் மிகவும் முக்கியம். உடலில் உள்ள பல ஹார்மோன்கள் புரதத்தால் ஆனவை. குறிப்பாக, இன்சுலின் போன்ற ஹார்மோன்களின் உற்பத்திக்கு புரதம் அவசியம்.

மழைக்காலம் தொடங்கியதும் குழந்தைகள் சாதாரண குடிநீருக்கு விடை கொடுத்துவிட்டு வெந்நீர் குடிப்பது நல்லது. ஏனெனில் வெந்நீர் மழைக்கால நோய்களான சளி, இருமல் பிரச்சனை வராமல் தடுக்கும். இயல்பாகவே வெதுவெதுப்பான நீர் அருந்துவது ஏராளமான நன்மைகளை உடலுக்கு அளிக்கும். அவற்றுள் 7 பலன்கள் பற்றி பார்ப்போம்.

1. தொண்டைக்கு இதமளிக்கும்

ஒரு கப் சூடான நீரை எடுத்துக்கொள்ள வேண்டும். அதிலிருந்து வெளிப்படும் நீராவியை மூக்கு துவாரங்கள் வழியாக ஆழமாக உள்ளிழுக்க வேண்டும். பின்பு அந்த நீரை பருக வேண்டும். அப்படி சூடான நீரை உள்ளிழுப்பதும், பருகுவதும் சைனஸ் மற்றும் தொண்டை பகுதிகளை சூழ்ந்திருக்கும் சளி சவ்வுகளுக்கு இதமளிக்கும். அந்த பகுதியை சூடேற்றுவதோடு சளி கட்டிகளால் ஏற்படும் தொண்டை புண்ணை ஆற்றவும் உதவும்.

தேநீர், வெந்நீர் போன்ற சூடான பானம் மூக்கு ஒழுகுதல், இருமல், தொண்டை வலி, சோர்வு போன்றவற்றுக்கு நிவாரணம் அளிக்கும் என்பதை ஆய்வு முடிவுகளும் உறுதிபடுத்தியுள்ளன.

2. செரிமானத்திற்கு உதவும்

வெந்நீர் குடிப்பது செரிமான மண்டல செயல்பாடுகளை ஊக்குவிக்க உதவும். வயிறு மற்றும் குடல் வழியாக வெந்நீர் செல்லும்போது, உடல் கழிவுகளை அகற்றுவதற்கும் துணை புரியும். குறிப்பாக செரிமானமாவதில் சிக்கல் இருந்தால் சூடாக நீர் பருகுவது பலனளிக்கும்.

அப்படி வெந்நீர் பருகுவது செரிமானத்திற்கு உதவுவதாக உணர்ந்தால் அதனை தொடர்வது எந்த தீங்கும் விளைவிக்காது என்பது ஆய்வுகளின் மூலம் உறுதியும் செய்யப்பட்டிருக்கிறது.

3. நரம்பு மண்டல செயல்பாட்டை மேம்படுத்தும்

போதுமான அளவு தண்ணீரோ, வெந்நீரோ, குளிர்ந்த நீரோ பருகாவிட்டால் நரம்பு மண்டலத்தின் செயல்பாட்டில் எதிர்மறையான விளைவுகளை ஏற்படுத்தக்கூடும். இறுதியில் மன நிலை மற்றும் மூளை செயல்பாட்டில் பாதிப்பை உண்டாக்கலாம்.

போதுமான அளவு தண்ணீரோ, வெந்நீரோ பருகுவது நரம்பு மண்டலத்தின் செயல்பாட்டையும், மனநிலையையும் மேம்படுத்தும் என்பது ஆய்வுகளிலும் கண்டறியப்பட்டுள்ளது.

4. மலச்சிக்கலை போக்கும்

மலச்சிக்கல் ஏற்படுவதற்கு நீரிழப்பும் முக்கிய காரணமாக அமைந்திருக்கிறது. அதனால் மலச்சிக்கலை போக்குவதற்கு தண்ணீர் சிறந்த வழிமுறையாக இருக்கிறது. உடலில் நீரேற்றத்தை தக்கவைப்பது மலத்தை மென்மையாக்கும்.

தொடர்ந்து வெந்நீர் பருகுவது குடல் இயக்கங்களை சீராக வைத்துக்கொள்ள உதவும். மலச்சிக்கல் பிரச்சனைக்கு நிவாரணம் தரும்.

5. நீரேற்றமாக வைத்திருக்கும்

வெந்நீரோ, தண்ணீரோ அதனை எந்த வெப்பநிலையில் பருகினாலும் உடலை நீரேற்றமாக வைத்திருக்க உதவும். பெண்கள் குறைந்தபட்சம் 2.3 லிட்டர் தண்ணீரும், ஆண்கள் குறைந்தபட்சம் 3.3 லிட்டர் தண்ணீரும் பருக வேண்டும் என்று இன்ஸ்டிடியூட் ஆப் மெடிசின் அமைப்பு பரிந்துரைக்கிறது.

எல்லா நேரமும் அருந்த முடியாவிட்டாலும் தினமும் காலை பொழுதில் வெந்நீர் அருந்தும் பழக்கத்தை தொடரலாம். உடலின் அனைத்து அத்தியாவசிய செயல்பாடுகளுக்கும் தண்ணீர் மிகவும் தேவை என்பதை உணர்ந்து செயல்பட வேண்டும்.

6. குளிரில் நடுக்கம் குறையும்

குளிர்ச்சியான சூழலின் போது சூடான திரவங்களை பருகுவது உடல் நடுக்கத்தை குறைக்க உதவும். அந்த சமயத்தில் சூடான நீரை பருகுவது உடல் வெப்பநிலையை பராமரிப்பதற்கும் உதவிடும்.

குளிர்ச்சியான சூழலில் வேலை செய்பவர்கள், உடற்பயிற்சி செய்பவர்களுக்கு இது பயனுள்ளதாக இருக்கும் என்று ஆய்வு முடிவுகளும் கூறுகின்றன.

7. ரத்த ஓட்டத்தை மேம்படுத்தும்

வெதுவெதுப்பான நீரில் குளியல் போடுவது தமனிகள், நரம்புகளை விரிவடைய செய்து ரத்த ஓட்டத்தை மேம்படுத்தும். ரத்த அழுத்தம், இதய நோய் அபாயம் ஏற்படுவதை தடுக்கும். வெந்நீர் குடிப்பதும் இதேபோன்ற விளைவை ஏற்படுத்தும்.

அதிலும் இரவில் சுடு நீரில் குளியல் போடுவதும், வெந்நீர் அருந்துவதும் உடலை ஆசுவாசப்படுத்தி நிம்மதியான உறக்கத்திற்கு தயார்படுத்த உதவும்.

எப்படி பருகுவது?

மிகவும் சூடாக இருக்கும் நீரை குடிப்பது உணவுக்குழாயில் உள்ள திசுக்களை சேதப்படுத்தலாம். நாக்கின் சுவை மொட்டுகளையும் பாதிக்கும். அதனால் மிதமான சூட்டில் இருக்க வேண்டும்.

வெந்நீர் மற்றும் சூடான பானங்களை அருந்தும்போது, 130 முதல் 160 டிகிரி பாரன்ஹீட் வரையே வெப்பநிலை இருக்க வேண்டும்.

இக்காலகட்டத்தில் வயதானவர்கள் மட்டுமல்லாது நடுத்தர வயதினரும், இளைஞர்களும் கூட நீரிழிவு நோயால் அதிகம் பாதிப்பு அடைகின்றனர். நீரிழிவு நோயால் புதிதாக கண்டறியப்பட்டவர்களுக்கும் பொதுவாக நடுத்தர வயதினருக்கும் நீரிழிவு நோயை நிர்வகிப்பது ஒரு பெரிய சவாலாக உள்ளது.

சில சந்தர்ப்பங்களில் ரத்தச் சர்க்கரையின் அளவு அதிகரிப்பதால் இன்சுலின் ஊசி பயன்பாடு அவசியமாகிறது. இதனால் அவர்களின் சிகிச்சைக்கான செலவும் அதிகரிக்கின்றது.

நீரிழிவு நோயை கட்டுப்பாட்டில் வைக்காவிடில் தலை முதல் கால் வரை அனைத்து உறுப்புகளும் பாதிப்புக்குள்ளாகும். குறிப்பாக இதயம், கண், நரம்புகள், சிறுநீரகம் மற்றும் கால் பாதிப்பைத் தவிர்ப்பது அவசியம்.

இந்த ஆண்டு நீரிழிவு தினத்தையொட்டி, உலகளாவிய ஆரோக்கியத்தை மேம்படுத்தும் வகையில் "நீரிழிவு மற்றும் நல்வாழ்வு" என்னும் தலைப்பில் கொண்டாடப்படுகிறது.

சில எளிய வழிமுறைகளால் நீரிழிவு நோயை சிறப்பாக கட்டுக்குள் வைக்கலாம். அவை அதிக உடல் எடை மற்றும் தொப்பை தவிர்ப்பது , உணவுக்கட்டுப்பாடு அதாவது சர்க்கரை மற்றும் இனிப்பு பண்டங்களைத் தவிர்த்தல், எண்ணெய் மற்றும் கொழுப்பு நிறைந்த உணவைத் தவிர்த்தல், மது மற்றும் புகைப்பிடிப்பதைத் தவிர்ப்பது மிகுந்த நன்மைகளை விளைவிக்கும்.

சிறந்த வாழ்க்கை முறையைக் கடைபிடிப்பது மிகவும் அவசியம், நடைபயிற்சி, எளிய உடற்பயிற்சி, சத்தான உணவுமுறை, மன அழுத்தத்தைத் தவிர்ப்பது, தன்னம்பிக்கை, மன உறுதி, நல்ல உறக்கம் ஆகிய பழக்கவழக்கங்களால் நீழிவு நோயை சிறப்பாக கட்டுக்குள் வைக்கலாம்.

மேலும், மருத்துவர் கூறும் ஆலோசனைகளை பின்பற்றி மாத்திரை அல்லது இன்சுலினை தவறாமல் எடுத்தல் நல்லது. அதனோடு குடும்பத்தினர் கூறும் அறிவுரைகளையும் கேட்டு நடப்பது அவசியம்.

குடும்பத்தார், நீரிழிவுக்குறைபாடு உள்ளவர்களின் நலன் கருதி அவர்களுக்கு உறுதுணையாக இருக்க வேண்டும்.

ஆதலால், நீரிழிவு நோயைக் கண்டு மன வருத்தம் அடைவதை விட வாழ்க்கை முறையை மேம்படுத்தி நீரிழிவு நோயை வென்று ஆரோக்கியமாக நீண்ட ஆயுளோடு வாழ முடியும்.

உடலில் ரத்த சர்க்கரையின் அளவு அதிகமாவதை நீரிழிவு நோய் என்று கூறுகிறோம். 10 முதல் 20 வருடங்களுக்கு முன்பு வரை 10% பேர் இதனால் பாதிக்கப்பட்டவர்கள் என்று இருந்த நிலை மாறி இன்று நூற்றுக்கு 20 முதல் 25 பேர் நீரிழிவு நோயினால் பாதிக்கப்படுகின்றனர்.

டயாபடீஸ் மெலிட்டஸ் என்ற இந்த நீரிழிவு நோய் உடலின் முக்கிய பாகங்களான கண்கள், இதயம், ரத்தக் குழாய்கள், கல்லீரல், நுரையீரல், சிறுநீரகம் மற்றும் நரம்புகளை பாதிக்கிறது.

கட்டுப்படுத்தப்படாத சர்க்கரை நோய் இந்த பாதிப்புகளை நாளடைவில் உடலில் ஏற்படுத்துகிறது. அந்த வகையில் நீரிழிவு நோயினால் பாதிக்கப்படும் ஒன்று டயாபட்டிக் ரெடினோபதி என்ற கண்களில் ஏற்படும் பிரச்சனை ஆகும்.

நீரிழிவு பாதிப்பினால் விழித்திரை பாதிக்கப்படுவது என்பது 100-ல் 20 பேருக்கு ஏற்படலாம். நாம் ஒரு காட்சியை பார்க்க கருவிழியும் விழித்திரையும் இணைந்து செயல்படுகிறது. கருவிழி மூலம் ஊடுருவும் ஒளி விழித்திரையில் பட்டு பிரதிபலிப்பதையே நாம் காட்சியாக பார்க்கிறோம்.

இந்த விழித்திரை நீரிழிவு நோயினால் பாதிப்புக்கு உள்ளாகிறது. இந்த விழித்திரை இரண்டு விதங்களில் பாதிக்கப்படுகிறது.

ஒன்று விழித்திரை படலத்தில் ரத்த கசிவு ஏற்படுவது அதாவது ரெட்டினல் ஹெமரேஜ் என்பதாகும் மற்றொரு பிரச்சனை விழித்திரையில் நீர் கோர்வை ஏற்படுவது, அதாவது மேக்யூலர் எடிமா என்று அழைக்கப்படும் இந்தப் பிரச்சனையும் நீரிழிவினால் கண்களில் ஏற்படலாம். இந்த இரண்டு பிரச்சனைகளாலும் பார்வைத்திறன் குறையலாம்.

டயாபடிக் ரெட்டினோபதி என்பதில் நான்கு ஸ்டேஜ்கள் உள்ளன இதில் முதல் ஸ்டேஜ் என்பது பார்வை திறன் குறைவு இருக்காது. அறிகுறிகளும் இருக்காது. பொதுவாக கண் மருத்துவரிடம் பரிசோதனை செய்யும் பொழுது இதை மருத்துவர் கண்டுபிடிப்பார்.

இந்த பிரச்சனை பொதுவாக, நீரிழிவு நோய் மட்டுமல்லாமல் ரத்த உயர் ரத்த அழுத்தம், உயர் இரத்த கொழுப்பு, சிறுநீரக செயல்பாடு பாதிப்பினால் யூரியா கிரியாட்டினைன் போன்றவை அதிகரித்தல், ரத்த சோகை மற்றும் புகை பிடித்தல் போன்ற காரணிகளை நீக்கும் பொழுது அல்லது சரி செய்யும் பொழுது இந்த முதல் ஸ்டேஜ் டயாபடிக் ரெட்டினோபதி சீரமைக்கப்படுகிறது.

முதல் ஸ்டேஜ் கண்டுபிடிக்கப்படாமல் தொடர்ந்து நீடித்த நீரிழிவு மற்றும் மேல் குறிப்பிட்ட பிரச்சனைகள் தொடரும் பொழுது இரண்டாவது ஸ்டேஜ்க்கு இது செல்கிறது. இந்த நிலையில் ரெடினாவில் ரத்தக் கசிவு இருக்கும் அல்லது நீர் கோர்வை ஏற்படும்.

இந்த ஸ்டேஜில் லேசான பார்வை குறைபாடு இருக்கலாம். அந்த நேரத்திலும் மேற்குறிப்பிட்ட காரணிகளை சரி செய்ய வேண்டும்.

மேலும் மேக்யூலர் எடிமா என்ற விழித்திரையில் தேங்கி இருக்கும் நீரை ஊசி மூலம் சிகிச்சை அளித்து, ஸ்டேஜ் டூ ரெட்டினோபதி சீரமைக்கப்படுகிறது.

இதையும் தாண்டி நீரிழிவு ரத்த அழுத்தம் சிறுநீரக செயல்பாடு குறைந்து இருப்பது போன்ற காரணிகளால் நீரிழிவு கட்டுக்குள் இல்லாத பொழுது டயாபெடிக் ரெட்டினோபதி மூன்றாவது ஸ்டேஜ்க்கு செல்கிறது.

இந்த நிலையில் விழித்திரையில் அதிக ரத்த கசிவு இருக்கலாம் அல்லது நீர் தேக்கமும் அதிகமாக இருக்கலாம். இந்த நிலையில் பார்வை குறைவு ஏற்படும்.

விழித்திரையின் சேதத்தை கணிக்க பிளாரசென்ட் ஆஞ்சியோகிராம் என்ற பரிசோதனை செய்ய வேண்டும். இதன் மூலம் ரத்தக் கசிவு எங்கு ஏற்படுகிறது என்பதை கணித்து அந்த இடத்தில் லேசர் மூலம் சிகிச்சை அளிக்க வேண்டும்.

விழித்திரையில் ஏற்படும் நீர் தேக்கத்திற்கு மாதம் ஒருமுறை ஊசி மூலம் சிகிச்சை அளிக்க வேண்டி இருக்கும். இந்த சிகிச்சை கடந்த காலங்களை விட தற்பொழுது அதிகமான அளவில் பலன் அளிக்கிறது என்றாலும் கூட இதில் பார்வை குறைபாட்டை முழுவதுமாக கொண்டு வர முடியும் என்பதை உறுதியாக கூற முடியாது.

இந்த மூன்றாவது ஸ்டேஜையும் கடந்து சிகிச்சை அளிக்கப்படாமல், கவனிக்கப்படாமல் இருக்கும் டயாபட்டிக் ரெடினாபதி நான்காவது ஸ்டேஜ் அதாவது என்ட் ஸ்டேஜ் என்ற கடைசி பிரிவுக்கு தள்ளப்படுகிறது.

இந்த நிலையில் விழித்திரையில் மட்டுமின்றி கண்ணுக்குள் அதிகமான ரத்த கசிவு ஏற்படும். இது விட்ரியஸ் ஹெமரேஜ் என்று அழைக்கப்படுகிறது. கண்ணுக்குள் ரத்தக்கசிவு ஏற்படுவதால் விழித்திரை பிரிந்து விடும் நிலையும் ஏற்படுகிறது. அதாவது ரெடினல் டிடாச்மெண்ட்.

கண்ணுக்குள் ஊசி மூலம் சிகிச்சையோ லேசர் சிகிச்சையோ அளிக்க முடியாது. இதற்கு அறுவை சிகிச்சை மட்டுமே செய்ய வேண்டி இருக்கும். விட்ரெக்ட்மி என்ற இந்த அறுவை சிகிச்சையை செய்து ரத்த கசிவை அகற்றி விழித்திரையை மீண்டும் இணைக்க செய்வோம். இதெல்லாம் செய்யும்பொழுது ஓரளவிற்கு பார்வை திரும்ப வரலாம்.

இந்த நிலையில் பார்வை முழுமையாக திரும்ப கொண்டு வர முடியும் என்று உறுதி அளிக்க முடியாது. ஏனென்றால் நீரிழிவு நோயால் சிறிய ரத்த நாளங்கள் அதிக அளவில் பாதிக்கப்படும். விழித்திரையை மீண்டும் இணைத்தாலும் கூட அதற்கு போதுமான அளவிற்கு ரத்த ஓட்டம் கிடைத்து மறுபடியும் இயங்கும் என்பதை உறுதியாக கூற முடியாது.

எனவே தான் ஸ்டேஜ் ஒன்று மற்றும் இரண்டில் பிரச்சனையை சீரமைத்து விட முடியும். ஆனால் மூன்றாவது மற்றும் நான்காவது பிரிவுகளில் சிகிச்சை பலனளிக்காமலும் போகலாம்.

எனவே தான் நீரிழிவு நோய் உள்ளவர்கள் கண் பாதுகாப்பிற்கு அதிக முக்கியத்துவம் கொடுக்க வேண்டும் என்று கூறி முடித்தார்.

சர்க்கரை நோயாளிகளுக்கு வாழைப்பழம் ஒரு சுவையான, ஊட்டச்சத்துக்கள் நிறைந்த, மலிவான விலையில் கிடைக்ககூடிய பழமாக விளங்குகிறது.

ஒரு வாழைப்பழத்தில் 112 கலோரிகள், 29 கிராம் கார்போஹைட்ரேட், 3 கிராம் நார்சத்து, 15 கிராம் சர்க்கரை, 422 கிராம் பொட்டாசியம் இருக்கிறது. மேலும் இதில் வைட்டமின்கள் ஏ, பி6, சி ஆகியவையும், மாங்கனீஸ், மெக்னீசியம், துத்தநாகம் போன்ற தாதுக்களும், கேட்டிசின் போன்ற ஆன்டிஆக்ஸிடன்ட்களும் உள்ளன.

ஒரு வாழைப்பழத்தின் கிளைசெமிக் இன்டெக்ஸ் 31 முதல் 62 வரையிலும், கிளைசெமிக் லோட் 11 முதல் 22 வரையிலும் வேறுபடலாம். நன்றாக பழுத்த வாழைப் பழத்தின் கிளைசெமிக் இன்டெக்சும், கிளைசெமிக் லோடும் அதிகமாக இருக்கும்.

ஆனால் அதே சமயம் குறைவாக பழுத்த வாழைப்பழத்தின் கிளைசெமிக் இன்டெக்சும், கிளைசெமிக் லோடும் குறைவாக இருக்கும். சர்க்கரை நோயாளிகள் பொதுவாக பச்சை நிறத்தில் உள்ள சற்று பழுக்காத நிலையில் இருக்கும் வாழைப்பழத்தை சாப்பிடுவது நல்லது.

ஏனெனில் குறைவாக பழுத்த வாழைப் பழத்தில் இருக்கும் ரெசிஸ்டன்ட் ஸ்டார்ச் இன்சுலின் எதிர்மறை நிலையை குறைத்து ரத்த சர்க்கரை அளவை குறைக்கிறது. மேலும் இது குடல் ஆரோக்கியத்தையும் மேம்படுத்துகிறது.

வாழைப்பழம் பழுக்கும் போது இதில் உள்ள ஸ்டார்ச் (மாவு சத்து) சர்க்கரையாக மாறுகிறது. வாழைப்பழத்தில் உள்ள அதிகமான அளவு பொட்டாசியம் மற்றும் மெக்னீசியம் ரத்த நாளங்களை தளர்த்தி ரத்த அழுத்தத்தை குறைத்து இதய ஆரோக்கியத்திற்கு துணை புரிவதாக ஆராய்ச்சிகளில் கண்டறியப்பட்டுள்ளது.

மேலும் இதில் உள்ள அதிகமான அளவு நார்ச்சத்து, உணவு சாப்பிட்ட உடனே ஏற்படும் குளுக்கோஸ் ஸ்பைக்ஸ் வராமல் தாமதப்படுத்துகிறது.

வாழைப் பழம் பழுக்கும் போது அதனை திடமாக வைத்திருக்கும் பெக்டின் அளவு குறைந்து அதனை மிருதுவாக மாற்றுகிறது. வாழைப்பழத்தில் இருக்கும் பெக்டின், குளுக்கோஸ் மற்றும் கொலஸ்ட்ரால் குடலில் உறிஞ்சப்படுவதை தடுக்கும் ஆற்றல் உடையது என்று ஆராய்ச்சிகள் தெரிவிக்கின்றன.

பொதுவாக சர்க்கரை நோயாளிகள் குளுக்கோஸ் அளவு அதிகம் உள்ள பூவன்பழம், ரஸ்தாளி போன்ற பழங்களை தவிர்ப்பது நல்லது. அதிக நார்ச்சத்து உள்ள குறைவாக பழுத்த பச்சை வாழைப்பழம், செவ்வாழை, நேந்திரம்பழம் போன்றவற்றை சர்க்கரை நோயாளிகள் சாப்பிடலாம்.

சிறுநீரக பாதிப்பு உள்ளவர்கள் வாழைப் பழத்தில் பொட்டாசியம் அதிகம் உள்ளதால் அதனை சாப்பிடுவதை தவிர்க்க வேண்டும். நீங்கள் மலச்சிக்கலுக்காக தினமும் வாழைப்பழம் சாப்பிடுவது தவறல்ல. ஆனால் சிறிய அளவிலான, குறைவாக பழுத்த வாழைப்பழத்தை தேர்ந்தெடுத்து சாப்பிட வேண்டும்.

நடப்பது

இரவு உணவு சாப்பிட்ட உடனேயே சிறிது நேரம் நடக்க வேண்டும் என்று கூறப்படு கிறது. இவ்வாறு செய்வது உடல் நலத்துக்கு நல்லது என்று சொல்வார்கள். ஆனால் அது முற்றிலும் உண்மை இல்லை. ஏனெனில் சாப்பிட்ட உடனே நடைப்பயிற்சி செய் வதால் கை, கால்களுக்கு ரத் தம் செல்லும். இது செரிமானத் தில் குறுக்கிடுகிறது. எனவே சாப்பிட்ட உடனே நடக்க வேண்டாம். ஒரு மணி நேரம் அல்லது ஒன்றரை மணி நேரம் கழித்து நடக்கலாம்.

தண்ணீர் பருகுவது

நம் உடலுக்கு தண்ணீர் தேவை. ஆனால் அதை சரியான நேரத்தில் குடிக்க வேண்டும். குறிப்பாக இரவு உணவுக்குப் பிறகு தண்ணீர் பருக வேண்டாம். குறைந்தது 30 முதல் 60 நிமிடங்கள் காத்திருக்கவும்.

பழங்கள் சாப்பிடுவது

இரவு உணவு உண்ட உடனேயே பழங்கள் சாப்பிடு வதை பலர் வழக்கமாகக் கொண்டுள்ளனர். ஆனால் அதை செய்வதை தவிர்க்க வேண்டும். ஏனெனில் இரவு உணவுக்குப் பிறகு பழங்களைச் சாப்பிட்டால் எளிதில் ஜீரணமாகாது. பல் துலக்குவது.

பல் துலக்குவது

இரவு உணவு உண்ட உடனேயே பல் துலக்கும் பழக்கமும் பலருக்கும் உண்டு. ஆனால் அது. பல்லின் எனாமல் அடுக்கை பாதிக்கும். அதனால் பற்கள் இயற்கையான பொலிவை இழக்கும். எனவே இரவு உணவு உண்ட உடனே பல் துலக்க வேண்டாம். குறைந்தது 30 நிமிடங்களாவது காத்திருந்து பல் துலக்கலாம்.

டீ, காபி குடிப்பது

பலர் இரவு உணவுக்குப் பிறகு உடனடியாக டீ அல்லது காபி குடிப்பார்கள். இரவுப் பணியில் இருப்பவர்கள் அதிகமாக காபி, டீ அருந்துவார்கள். உண்மை யில் இரவு உணவுக்குப் பிறகு உடனடியாக டீ அல்லது காபி குடித்தால்,செரிமானம் பாதிக்கப்படும். வாயு மற்றும் அமிலத்தன்மை பிரச்சினைகள் ஏற்படும். உண்ணும் உணவில் உள்ள சத்துகள் உடலுக்கு கிடைக்காது. முக்கியமாக இரும்புச்சத்து உடலால் உறிஞ்சப்படாது. எனவே சாப்பிட்ட உடனேயே காபி, டீ குடிக்க வேண்டாம்.

குளிப்பது

சாப்பிட்ட உடனேயே குளித்தாலும், உடலின் மற்ற பாகங்களுக்குச் செல்லும் ரத்தம் செரிமான மண்டலத்துக்குச் சரியாகப் போவதில்லை. இதனால் செரிமானம் சீராக நடைபெறாது.

உறங்குவது

சிலர், சாப்பிட்ட உடனே படுக்கையில் சாய்ந்துவிடு வார்கள். அவ்வாறு உடனே உறங்க வேண்டாம். இவ்வாறு செய்வதால் செரிமான பாதிப்பு ஏற்படும். வாயு. அமிலத்தன்மை அதிகரித்து, உண்ணும் உணவு கொழுப்பாக மாறும். எனவே உடல் எடை கூடும். அதனால் படுக்கைக்குச் செல்வதற்கு 2 மணி நேரத்துக்கு முன்பே சாப்பிட்டுவிடுங்கள்.

பற்களை பொறுத்தவரை மேலே உள்ள தலை பகுதியை சுத்தமாக வைத்து கொண்டால் மட்டும் போதும் என்று பலரும் நினைக்கிறார்கள். ஆனால், அது பல் கட்டுமானத்தில் சிறு பகுதி மட்டுமே.

அதை தாண்டி பற்கள் மூன்று பகுதிகளாக உள்ளன. முதல் பாகம் நாம் வெளியே பார்க்கக்கூடிய க்ரோன் என்று அழைக்கப்படுகிறது. இரண்டாவது பகுதி எனாமல், மூன்றாவது ஈறுகளுக்கு கீழே இருக்கும் வேர்ப்பகுதி ஆகியவைதான். இந்த மூன்றும் இணைந்தது தான் ஒரு முழு பல்லின் கட்டுமானம்.

இதில் முதல் பாகத்தில்தான் நமது உடலின் உறுதியான பகுதி இருக்கிறது. அதை நாம் எனாமல் என்று அழைக்கிறோம். கடினமானதையும் கடித்து உண்ண உதவும் பகுதிதான் இது.

அடுத்து இருக்கும் லேயர் டென்டின் என்று அழைக்கப்படுகிறது. இந்த பகுதியில் மிகச்சிறியதாக லேயர்கள் உள்ளது.

உங்களின் எனாமல் தேய தேய நீங்கள் சாப்பிடும் சூடான அல்லது குளிர்ந்த பொருட்கள் இந்த டென்டின் மீது பட்டு உங்கள் பற்களை அதிக உணர்திறன் கொண்டதாக மாற்றி விடும்.

அதனால் தான் பல்கூச்சம் ஏற்படுகிறது. அதற்கும் உள்ளே ரத்தக்குழாய்களால் சூழப்பட்ட பல்ப் சேம்பர் என்ற பகுதி இருக்கும். இது முழுக்க ரத்தக்குழாய்களால் ஆனது. அதற்கு கீழ் பிரவுன் நிறத்தில் சிமெண்ட் போன்று இருக்கும்.

ஈறுகளுக்கு கீழே பற்களுக்கு வெளியே தாடை எலும்புகளையும், பற்களின் வேர்பகுதிகளையும் இணைக்கும் இடம்தான் சிமண்டம் என்று சொல்லக் கூடிய பகுதி இருக்கிறது. இதுதான் உங்கள் பற்களை உறுதியாக பிடித்து வைத்து கொள்கிறது.

இதற்கும் கீழே ரத்த குழாய்களால் நிறைந்த ரூட் கேனல் இருக்கிறது. அதேபோல் மஞ்சள் நிறத்தில் இருக்க கூடிய நரம்பு இழைகள் ஒவ்வொரு பல்லையும் நேரடியாக மூளையோடு இணைக்கிறது.

இதைத்தாண்டி வெளியே இருக்கும் தாடை எலும்புகளில்தான் ஒவ்வொரு பல்லும் இணைக்கப்பட்டுள்ளது. இதை இணைக்கும் மேல்பகுதிதான் பெரிடோன்டல் லிகமென்ட் என்ற பகுதி.

அதற்கும் மேல் உங்கள் கண்களுக்கு பிங்க் நிறத்தில் தெரிவதுதான் ஈறுகள். இதுதான் பற்களின் அழகான கட்டமைப்பு.

பல்வலி ஏற்பட காரணம்?

பற்கள் தான் உணவை மெல்லுவதற்கும், பேசுவதற்கும் முக்கியமாக உதவுகிறது. இந்நிலையில் பற்களில் ஏற்படும் வலி, பல் கூச்சம், இதர அசௌகரியமான உணர்வுகளுக்கு நிறைய காரணம் உள்ளது.

முதலில் நாம் அதிகம் கேள்விப்பட்ட கேவிட்டிஸ் சிறு குழந்தைகளில் துவங்கி பெரியவர்கள் வரை யாருக்கு வேண்டுமானாலும் வரும். இதை மருத்துவ துறையில் கேரீஸ் என்று அழைக்கப்படுகிறது.

உங்கள் பற்களுக்கு அடியில் இருக்கும் மூளைக்கு போகும் நரம்பு இழைகள்தான் பல் உணரும் உணர்ச்சிகளை மூளைக்கு எடுத்துச் சென்று உடனடியாக பிரதிபலிக்கும்.

ஆரோக்கியமற்ற முறையில் பற்களை பராமரிக்காமல், அதிகமாக சர்க்கரை தன்மையுள்ள உணவுகளை நீங்கள் தொடர்ந்து சாப்பிட்டு கொண்டே இருந்தால் உங்கள் பற்களின் நிறம் மாறும்.

பெரும்பாலும் அதிகமாக இனிப்புத் தன்மையுள்ள உணவை தின்று விட்டு சரியாக ஒரு நாளைக்கு இரண்டு முறையாவது பல் தேய்க்காமல், பற்களை பராமரிக்காமல் இருந்தால் இதன் பாதிப்பு பெரிதாகி வேர்ப்பகுதி வரை சென்றுவிடும்.

அதற்கு பிறகும் அதை கண்டுகொள்ளாமல் இருந்தால் அது பாக்டீரியாக்கள் மற்றும் கெமிக்கல்களோடு கலந்து சொத்தைப்பல்லை உருவாக்கிவிடும். இதுவும் சிறிதாக துவங்கி பெரியதாக மாறிவிடும்.

அப்படியே ஒரு பல்லோடு நிற்காமல் அடுத்தடுத்த பற்களுக்கும் பரவி கொண்டே இருக்கும். இதே நேரத்தில் ஈறுகளும் தொற்றுக்கு உள்ளாகி ஈறுகளில் தொற்று அல்லது ஈறுவீக்கம் போன்றவற்றை ஏற்படுத்தும் வாய்ப்புகள் உள்ளது.

அதே போல், பற்களை இணைக்கும் பகுதிகளும் தொற்றுக்கு உள்ளாகலாம். அதை நாம் பெரியோடோன்டிடிஸ் என்று அழைக்கிறோம்.

இப்படி பிரச்சனைகள் ஆகும்போது தான் நமது பற்களுக்கு கீழ் இருக்கும் நரம்பு இழைகள் அந்த வலியை உடனடியாக மூளைக்கு தெரிவித்து நமது பற்களில் பிரதிபலிக்கும். அது நமக்கு தாங்க முடியாத வலியை தருகிறது.

சென்னை:

பொது சுகாதாரத்துறை இயக்குநா் டாக்டா் செல்வவிநாயகம் வெளியிட்டுள்ள அறிக்கையில் கூறியதாவது:-

சமீப காலமாக காய்ச்சல், சளி, தொண்டையில் ஏற்படும் கிருமித் தொற்று உள்ளிட்ட பாதிப்புகளுடன் மருத்துவமனைகளை நாடுவோரின் எண்ணிக்கை அதிகரித்து வருகிறது. புளூ வைரஸ்களால் பரவும் இன்புளூயன்ஸா காய்ச்சல் தற்போது பரவி வருகிறது.

இதைத்தவிர, நுரையீரல் தொற்றும் அதிகரித்துள்ளது. இருமல், தொண்டை அலா்ஜி, காய்ச்சல், உடல் சோா்வு, உடல் வலி, தலைவலி, சளி, வாந்தி மற்றும் வயிற்றுப்போக்கு உள்ளிட்ட அறிகுறிகள் ஏற்பட்டால் அவற்றை அலட்சியப்படுத்த வேண்டாம். அரசு மருத்துவமனைகளிலோ அல்லது தனியாா் மருத்துவமனைகளிலோ பரிசோதனை செய்ய வேண்டும்.

மற்றொருபுறம், டாக்டர்கள் நோயின் தீவிரத்தைப் பொருத்து சிகிச்சைகளை வழங்குதல் அவசியம். மிதமான பாதிப்புகள் இருந்தால், ஆன்ட்டி வைரல் மருந்துகளோ அல்லது மருத்துவப் பரிசோதனைகளோ தேவையில்லை.

ஒரு சில நாள்களுக்கு சம்பந்தப்பட்ட நோயாளிகள் தங்களைத் தனிமைப்படுத்திக் கொள்ள வேண்டும். அதேவேளையில், தீவிர பாதிப்பு உள்ள 65 வயதுக்கு மேற்பட்டவா்கள், 5 வயதுக்கு குறைவான குழந்தைகள், சா்க்கரை நோய், உயா் ரத்த அழுத்தம், இதய பாதிப்பு, சிறுநீரகம், கல்லீரல் பாதிப்புகள், நாள்பட்ட நுரையீரல் மற்றும் நரம்பு சாா்ந்த பிரச்சனைகளை எதிா்கொள்பவா்கள், கா்ப்பிணிகள், புற்றுநோயாளிகள், உடல் பருமன் உள்ளவா்களுக்கு ஓசல்டாமிவிா் எனப்படும் ஆன்ட்டி வைரல் மருந்துகளை வழங்க வேண்டும்.

தீவிர பாதிப்புக்குள்ளானவா்களை அதீத கவனத்துடன் கையாள வேண்டும். மூச்சுத் திணறல், ரத்த அழுத்தம் குறைதல், சீரற்ற இதயத்துடிப்பு, வலிப்பு, சிறுநீா் அளவு குறைதல் உள்ளிட்ட பாதிப்புகளுக்கு உள்ளானோரை மருத்துவப் பரிசோதனைக்கு உட்படுத்த வேண்டும்.

ஓசல்டாமிவிா் உள்ளிட்ட மருந்துகளுடன் மருத்துவமனையில் அனுமதித்து அவா்களுக்கு சிகிச்சை அளிக்க வேண்டும். தேவைப்படுவோருக்கு தடுப்பூசிகள் வழங்கலாம்.

மருத்துவத் துறையினா், சுகாதார களப் பணியாளா்கள் முகக்கவசம் அணிதல் கட்டாயம். பொது இடங்களுக்குச் செல்லும் மக்கள் மூன்று அடுக்கு முகக் கவசங்களை அணியலாம்.

இவ்வாறு அவர் கூறியுள்ளார்.