மதுரை:
மதுரையில் ரெயில் பெட்டி தீ விபத்தில் இறந்த 5 ஆண்கள், 4 பெண்களின் உடல்கள் பிரேத பரிசோதனைக்காக மதுரை அரசு ஆஸ்பத்திரிக்கு கொண்டு செல்லப்பட்டது. அங்கு இறந்தவர்களின் உடல்களை அடையாளம் காண சுற்றுலா வந்தவர்களை போலீசார் அரசு ஆஸ்பத்திரிக்கு அழைத்து சென்றனர்.
பிணவறையில் வைக்கப்பட்டிருந்த உடல்களை உறவினர்கள் அடையாளம் காண்பித்தனர். அதன்படி ஏற்கனவே தீவிபத்தில் சப்தமன் சிங், மிதிலேஸ்வரி ஆகியோர் அடையாளம் காணப்பட்ட நிலையில், தற்போது 6 பேரின் உடல்களை உறவினர்கள் அடையாளம் காண்பித்தனர்.
அதன்படி ரெயில் பெட்டி தீ விபத்தில் பரமேஸ்வர் டயத் குப்தா, தாமன் சிங் சந்துரு, ஹேமன் பன்வால், நிதிஷ் குமாரி, சாந்தி தேவி, மனோவர்மா அகர் என தெரியவந்துள்ளது. இவர்கள் அனைவரும் உத்தரபிரதேச மாநிலத்தை சேர்ந்தவர்கள் ஆவார்கள்.
தீ விபத்தில் இறந்த 8 பேரின் உடல்கள் அடையாளம் காணப்பட்ட நிலையில் ஒருவரின் அடையாளம் மட்டும் கண்டுபிடிக்க முடியவில்லை. விபத்தில் அவர் உடல் கருகியதால் உடனே அடையாளம் காண்பதில் சிக்கல் ஏற்பட்டுள்ளது. இருப்பினும் போலீசார் இதுகுறித்து விசாரணை நடத்தி வருகின்றனர்.
முன்னதாக உடல்களை அடையாளம் காண மதுரை அரசு ஆஸ்பத்திரிக்கு வந்தவர்கள் மொழி தெரியாமல் திகைத்தனர். இதனால் அதிகாரிகள், போலீசார் கேட்ட கேள்விகளுக்கு அவர்களால் உரிய பதிலளிக்க முடியவில்லை. அதன்பின் இந்தி தெரிந்த அதிகாரிகள் வரவழைக்கப்பட்டு தகவல்கள் சேகரிக்கப்பட்டன.
