ரோகித் சர்மாவை தொடர்ந்து பயிற்சியின் போது விராட் கோலிக்கு காயம்

அடிலெய்டு:

20 ஓவர் உலக கோப்பை கிரிக்கெட் போட்டி ஆஸ்திரேலியாவில் நடைபெற்று வருகிறது. 2 நாட்கள் ஓய்வுக்கு பிறகு அரை இறுதி ஆட்டம் இன்று நடந்தது. முதல் அரை இறுதியில் நியூசிலாந்து -பாகிஸ்தான் அணிகள் மோதின. இதில் பாகிஸ்தான் அணி 7 விக்கெட் வித்தியாசத்தில் நியூசிலாந்தை வீழ்த்தி இறுதி போட்டிக்கு முன்னேறியது.

நாளை 2-வது அரையிறுதி ஆட்டம் அடிலெய்டில் நடக்கிறது. இதில் இந்தியா- இங்கிலாந்து அணிகள் மோதுகிறது. விராட் கோலி இதுவரை அடிலெய்ட் மைதானத்தில் சர்வதேச கிரிக்கெட்டில் 14 இன்னிங்ஸ் விளையாடி இருக்கிறார். இதில் கோலி 907 ரன்களை அடித்திருக்கிறார். இதில் சராசரி 75.88 ஆகும். இதில் டெஸ்ட் கிரிக்கெட்டில் மட்டும் அடிலெய்டில் கோலி 3 சதம், 4 அரைசதம் அடித்திருக்கிறார். 4 ஒருநாள் போட்டியில் விளையாடியுள்ள கோலி, 2 சதம் அடித்திருக்கிறார்.

டி20 கிரிக்கெட்டில் விராட் கோலி, 2 போட்டிகளில் விளையாடி 154 ரன்கள் அடித்திருக்கிறார். இதில் 2 அரைசதம் அடங்கும். இதனால், அரையிறுதியில் விராட் கோலி பெரிதாக சாதிப்பார் என ரசிகர்கள் எதிர்பார்த்துள்ளனர். இந்த நிலையில் அடிலெய்ட் மைதானத்தில் விராட் கோலி பயிற்சி செய்து வந்தார். அப்போது ஹர்சல் பட்டேல் வீசிய பந்தில் விராட் கோலிக்கு காயம் ஏற்பட்டது. இதனால் வலியால் துடித்த விராட் கோலி மைதானத்தில் சுருண்டு விழுந்து சிறிது நேரம் மைதானத்திலேயே அப்படியே அமர்ந்து இருந்தார்.

ஆனால் விராட் கோலி மைதானத்தை விட்டு செல்லாமல் மீண்டும் தனது பயிற்சியை தொடங்கினார். எனினும் விராட் கோலிக்கு அடைந்த காயம் தொடர்பான முழு தகவலை பிசிசிஐ தெரிவிக்கவில்லை.