தருமபுரி,
தருமபுரி மாவட்ட கலெக்டர் அலுவலக வளாகத்தில்டிசம்பர் 10-ஆம் நாள் மனித உரிமைகள் தினமாக அனுசரிக்கப்படுவதை முன்னிட்டு தேசிய மனித உரிமைகள் தின உறுதிமொழி ஏற்பு நிகழ்ச்சி கலெக்டர் சாந்தி தலைமையில் நடைபெற்றது.
இந்நிகழ்ச்சியில் மாவட்ட கலெக்டர் தேசிய மனித உரிமைகள் தின உறுதிமொழியான "இந்திய அரசியலமைப்புச் சட்டத்திலும், இந்தியாவில் செயல்படுத்தத்தக்க பன்னாட்டு சட்டங்களிலும் வரையறுக்கப்பெற்ற மனித உரிமைகள் குறித்து உண்மையுடனும், பற்றுறுதியுடனும் நடந்து கொள்வேன் என்று நான் உளமார உறுதி மொழிகிறேன். எவ்வித வேறுபாடுமின்றி, அனை வரின் மனித உரிமைகளை மதித்து நடப்பதுடன், மனித உரிமைகளைப் பாதுகாக்கும் வகையில், நான் என்னுடைய கடமைகளை ஆற்றுவேன். என்னுடைய எண்ணம், சொல் அல்லது செயல் மூலம், பிறருடைய மனித உரிமைகளை மீறுகிற எந்தவொரு செயலையும், நேரடியாகவோ மறைமுகமாகவோ செய்ய மாட்டேன். மனித உரிமைகள் மேம்படுத்துவதற்கு, நான் எப்போதும் ஆயத்தமாக இருப்பேன் என்று உளமாற உறுதி கூறுகிறேன்" என்பதை வாசிக்க அலுவலர்கள் மற்றும் பணியாளர்கள் உறுதிமொழியினை ஏற்றுக்கொண்டனர்.
இந்நிகழ்ச்சியில் மாவட்ட வருவாய் அலுவலர் அனிதா, கலெக்டரின் நேர்முக உதவியாளர் (பொது) பழனிதேவி, தனித்துனை ஆட்சியர் (சபாதி) சாந்தி, உட்பட அரசுத்துறை அலவலர்கள் மற்றும் பணியாளர்கள் கலந்துகொண்டனர்.
