தேங்காய் சிரட்டை ஏற்றி வந்த லாரி கவிழ்ந்து விபத்து

பல்லடம் :

காங்கேயம் பகுதியில் இருந்து பல்லடம் நோக்கி தேங்காய் சிரட்டை ஏற்றிக்கொண்டு லாரி ஒன்று வந்து கொண்டிருந்தது. அதிகாலை 4 மணியளவில் பல்லடம் அருகே உள்ள பொங்கலூர் பேருந்து நிறுத்தம் அருகே வந்தபோது திடீரென சாலையில் கவிழ்ந்து விழுந்தது.

இதில் தேங்காய் சிரட்டை முழுவதும் சாலையில் கொட்டியது. இதனால் சற்று நேரம் போக்குவரத்து பாதிப்பு ஏற்பட்டது. இந்த இடத்தில் கோவை மற்றும் பல்லடம் பகுதிக்கு செல்வதற்கான பேருந்து நிறுத்தம் என்பதால் மக்கள் கூட்டம் அதிக அளவில் இருக்கும். அதிகாலை நேரம் என்பதால் அங்கு யாரும் இல்லை. இதனால் மிகப்பெரிய விபத்து அந்த இடத்தில் தவிர்க்கப்பட்டது. தகவல் அறிந்து சம்பவ இடத்திற்கு வந்த அவினாசிபாளையம் போலீசார் லாரியை அப்புறப்படுத்தி போக்குவரத்தை சீர் செய்தனர்.