மும்பை :
கடந்த நவம்பர் மாதம் குஜராத் மாநிலம் காந்திநகரில் இருந்து மும்பைக்கு கடந்த செப்டம்பர் மாதம் 30-ந்தேதி வந்தே பாரத் அதிவிரைவு ரெயிலை பிரதமர் நரேந்திர மோடி தொடங்கி வைத்தார். இந்த ரெயில் 16 பெட்டிகளுடன் 1,128 பயணிகள் அமரும் வசதி கொண்டது. காந்திநகரில் இருந்து மும்பைக்கு 5½ மணி நேரத்தில் வந்து சேருகிறது.
மும்பையில் இருந்து காந்திநகருக்கு ஏ.சி. சேர் கார் இருக்கையில் பயணிக்க ரூ.1,275 கட்டணமாகவும், காந்திநகரில் இருந்து மும்பைக்கு ரூ.1,440 ஆகவும் கட்டணம் நிர்ணயக்கப்பட்டு உள்ளது.
அதேபோல மும்பையில் இருந்து காந்திநகருக்கு எக்சிகியூட்டிவ் சேர் கார் இருக்கைக்கு ரூ.2 ஆயிரத்து 455 ஆகவும், மறுமார்க்கமாக ரூ.2 ஆயிரத்து 650 ஆகவும் வசூலிக்கப்படுகிறது.
2 மாதங்களில் இந்த வந்தே பாரத் ரெயில் பயணிகளிடம் அமோக வரவேற்பை பெற்று உள்ளது. கடந்த நவம்பர் மாதத்தில் ரெயில் எண் 20901 மும்பை-காந்திநகர் வந்தே பாரத் ரெயில் டிக்கெட் மூலம் ரூ.4 கோடியே 49 லட்சமும், 20902 எண் கொண்ட காந்திநகர்-மும்பை வந்தே பாரத் ரெயில் டிக்கெட் கட்டணம் ரூ.4 கோடியே 72 லட்சமும் கிடைத்து உள்ளது. மொத்த வருவாய் ரூ.9 கோடியே 21 லட்சம் ஆகும்.
கடந்த அக்டோபர் மாதம் டிக்கெட் கட்டணம் மூலம் ரூ.8 கோடியே 25 லட்சம் வருவாய் ஈட்டி இருப்பது குறிப்பிடத்தக்கது.
இது பற்றி ரெயில்வே அதிகாரி ஒருவர் கூறுகையில், "வந்தே பாரத் ரெயிலுக்கு பயணிகளிடம் 130 சதவீத வரவேற்பு கிடைத்துள்ளது. இருப்பினும் இந்த ரெயிலின் சேவையால் சதாப்தி எக்ஸ்பிரஸ் போன்ற மும்பை- ஆமதாபாத் இடையே இயக்கப்படும் மற்ற ரெயில்களின் சேவை பாதிக்கப்படவில்லை. புதிய வந்தே பாரத் ரெயில் பயணிகளின் தேவையை பூர்த்தி செய்கிறது. அதே நேரத்தில் மற்ற ரெயில்களும் 100 சதவீத பயணிகளுடன் இயங்குகிறது" என்றார்.
