திருத்தணி மற்றும் திருப்பதிக்கு வாகனங்கள் சுமூகமாக செல்லும் வகையில் கடந்த 2007-ம் ஆண்டு சென்னை- திருத்தணி- ரேணி குண்டா மாநில நெடுஞ்சாலையை 6 வழிப்பாதையாக மேம்படுத்த மாநில அரசு முன்மொழிந்தது.
தேசிய நெடுஞ்சாலை ஆணையம், அசிமேலுங்ரங்க புரத்தில் இருந்து திருநின்றவூர் வரையிலான சாலையை விரிவாக்கம் செய்து திருவள்ளுர் வரை 58 கிலோ மீட்டர் வரை பணியை முடித்தது.
ஆனால் திருநின்றவூர்- திருவள்ளூர் இடையே நிலம் கையகப்படுத்துவதில் உள்ள பிரச்சினையால் பணிகள் முடியவில்லை. அது போல் பாடி-கொரட்டூர் சந்திப்பில் இருந்து திருவணிந்தரவூர் வரையிலான 22 கி.மீ. சென்னை- திருப்பதி நெடுஞ்சாலை பகுதியை ஆறு வழிப்பாதையாக மாற்ற மாநில அரசு திட்டமிட்ட நிலையில் அங்கு நான்கு வழிச்சாலை மட்டுமே விரிவாக்கம் செய்யும் சூழல் ஏற்பட்டது. இத்திட்டத்துக்கு மண்ணூர்பேட்டை, பாடி, அம்பத்தூர் உள்ளிட்ட பகுதிகளை சேர்ந்த வியாபாரிகள் எதிர்ப்பு தெரிவித்தனர். நிலம் கையகப்படுத்துவதை எதிர்த்து வழக்குகள் தொடரப்பட்டன.
இந்த நிலையில் 6 ஆண்டுகளுக்கு பிறகு சென்னை- திருப்பதி நெடுஞ்சாலையில் பாடி- திருநின்றவூர் இடையே 22 கிலோ மீட்டர் தூரம் 6 வழிச்சாலை அமைப்பதற்கான பணி விரைவில் தொடங்கப்பட்டு உள்ளது. இதற்கு நிலம் கையகப்படுத்தும் மாநில நெடுஞ்சாலைத்துறை ரூ.152 கோடியை வழங்கி உள்ளது.
அதே போல் திருநின்றவூர் - திருவள்ளூர் இடையே சென்னை- திருப்பதி நெடுஞ்சாலையை ரூ.340 கோடி செலவில் நான்கு வழிச்சாலையாக மாற்றும் குடிமராமத்து பணி தொடங்கியுள்ளது.
இதுகுறித்து மாநில நெடுஞ்சாலைத்துறை அதிகாரி ஒருவர் கூறும் போது நிலம் கையகப்படுத்துவதில் உள்ள பிரச்சினைகள் தீர்க்கப்பட்டு ரூ.152 கோடி ஒதுக்கப்பட்டு உள்ளது. உரிய நடைமுறைப்படி விரைவில் பணி தொடங்கும் என்றார்.
தேசிய நெடுஞ்சாலை துறை ஆணைய அதிகாரி கூறும் போது, ஒரு சில இடங்களில் தேசிய நெடுஞ் சாலையை சீரமைக்கும் பணி தொடங்கி உள்ளது. நான்கு வழிச்சாலை பணி இன்னும் 18 மாதங்களில் முடியும் என்றார்.
