மதுரை
மதுரை மாநகர் மாவட்ட அ.தி.மு.க. செயலாளர், முன்னாள் அமைச்சர் செல்லூர் ராஜூ வெளியிட்டுள்ள அறிக்கை யில் கூறியிருப்பதாவது:-
அ.தி.மு.க. இடைக்கால பொது செயலாளர், முன்னாள் முதலமைச்சர் எடப்பாடி பழனிசாமி ஆணைக்கிணங்க தமிழ கத்தில் கடந்த 1½ ஆண்டு காலமாக பொதுமக்களை பல்வேறு வகைகளில் வாட்டி வதைக்கும் தி.மு.க. அரசு சமீபத்தில் சொத்து வரி உயர்வு, ஆவின் பால் விலை உயர்வு, மின்கட்டணம் உயர்வு என்பது போன்ற அத்தியாவசிய தேவைகளின் வரிகளை, விலைகளை அதிக அளவில் உயர்த்தி பொதுமக்களை வாட்டி வதைத்து வருகிறது.
இந்த கட்டண உயர்வு களை திரும்ப பெற்றிட வலியுறுத்தி மதுரை மாநகர் மாவட்ட அ.தி.மு.க. சார்பில் மதுரை முனிச்சாலை சந்திப்பில் (தினமணி தியேட்டர்) நாளை (செவ்வாய்க்கிழமை) காலை 10 மணி அளவில் மாபெரும் கண்டன ஆர்ப்பாட்டம் நடைபெறுகிறது.
இந்த ஆர்ப்பாட்டத்தில் இன்னாள், முன்னாள் நாடாளுமன்ற, சட்டமன்ற உறுப்பினர்கள், மாவட்ட கழக நிர்வாகிகள், சார்பு அணி நிர்வாகிகள், பகுதி, வட்ட நிர்வாகிகள், முன்னோடிகள், தொண்டர்கள் மற்றும் பொதுமக்கள் அனைவரும் திரளாக பங்கேற்று மக்கள் விரோத தி.மு.க. அரசுக்கு பாடம் புகட்ட அன்புடன் வேண்டுகிறேன்.
இவ்வாறு அவர் தெரிவித்துள்ளார்.
