நீங்கள் தேடியது "பனியன் தொழில்"

திருப்பூர் :

சிறந்த உட்கட்டமைப்பு வசதி, திறன்வாய்ந்த தொழிலாளர்களால் குறைந்த செலவில் சர்வதேச தரத்துடன் உற்பத்தி செய்யும் யூனிட்களை உருவாக்க தொழில் முனைவோருக்கு வழிகாட்டியாக இருந்து வருகிறது தொழில் முனைவோர் மேம்பாட்டு அமைப்பு (ஐ சீடு). இந்த அமைப்பு திருப்பூர் பனியன் தொழிலை, பின்தங்கிய மாவட்டங்களில் விரிவாக்கம் செய்ய தகுந்த முயற்சிகளை மேற்கொண்டுள்ளது.

வேலைவாய்ப்பு குறைந்த பின்தங்கிய மாவட்டங்களில் பனியன் உற்பத்தி யூனிட்களை உருவாக்கி, பயிற்சி பெற்ற தொழிலாளரை கொண்ட தொழில் முனைவோரையும் உருவாக்கி வருகின்றனர்.

இந்நிறுவனம் வெளிமாவட்டங்களை சேர்ந்த தொழில் முனைவோருக்கு முதலில் பயிற்சி அளிக்கிறது. தகுதியான நிதி ஆதார திட்டங்கள் குறித்தும் விழிப்புணர்வு ஏற்படுத்துகிறது. கடந்த, ஏப்ரல் - மே மாதங்களில், தொழில் முனைவோர் பயிற்சி அளிக்கப்பட்டது.

அதன்படி புதிய யூனிட்கள் மதுரை - தத்தனேரி, உசிலம்பட்டி, கல்லுப்பட்டி, விருதுநகர் - ராஜபாளையம் பகுதிகளில் திறக்கப்பட்டுள்ளன. திருப்பூரில் உள்ள பனியன் உற்பத்தி நிறுவனங்கள் ஆடை உற்பத்தி மற்றும் பேக்கிங் ஆர்டர்களை அவர்களுக்கு வழங்கியுள்ளன.

குறித்த நேரத்தில் கட்டிங் துணிகளை இணைத்து ஆடைகளாக உருவாக்கி தகுந்த முறையில் பேக்கிங் செய்தும் அனுப்பி வருகின்றன. இதன்மூலமாக 60க்கும் அதிகமான தொழிலாளர்கள் வேலை வாய்ப்பு பெற்றுவருகின்றனர்.

திருப்பூர்:

எச்.எம்.எஸ்., திருப்பூர் மாவட்ட மாநாடு, காந்திநகர் முத்தன்செட்டியார் மண்டபத்தில் நடந்தது. மாவட்ட செயலாளர் முத்துசாமி தலைமை வகித்தார். பனியன் சங்க துணை தலைவர் ரத்தினமூர்த்தி வரவேற்றார். மாநில செயல் தலைவர் சுப்பிரமணியம் துவக்கி வைத்தார். தேசிய தலைவர் ராஜாஸ்ரீதர், கொடியேற்றி வைத்து சிறப்புரையாற்றினார். மாவட்ட தலைவர் முருகன் உட்பட, பல்வேறு தொழிற்சங்க நிர்வாகிகள் பேசினர்.

கட்டுமான அமைப்பு சாரா தொழிலாளர்களுக்கு, பொங்கல் போனசாக, 7,000 ரூபாய் வழங்க வேண்டும். விவசாய கூலி தொழிலாளருக்கும் அரசு உதவி வழங்க வேண்டும். திருப்பூரில் இ.எஸ்.ஐ., மருத்துவமனை அமைக்கும் பணியை விரைவுபடுத்த வேண்டும். அரசு சார்பில் தொழிலாளர் தங்கும் விடுதிகள் கட்டுதல், பனியன் தொழிலை பாதுகாக்கும் வகையில் நூல் விலையை கட்டுக்குள் வைத்திருத்தல், விசைத்தறித் தொழிலை பாதுகாத்தல், நலவாரிய உறுப்பினர் குழந்தைகளுக்கு 1-ம்வகுப்பு முதல், 5ம் வகுப்பு வரை உதவி வழங்குதல், தமிழக அரசு 10 முதல் பிளஸ் 2 வரை பயிலும் மாணவிகளுக்கு உதவி வழங்குவது போல், மாணவர்களுக்கும் உதவி வழங்குதல், சிறு கடைகள், வீடுகளுக்கு நிபந்தனையின்றி மின் இணைப்பு வழங்குதல், கட்டுமான பொருட்கள் விலை உயர்வை கட்டுப்படுத்துதல் புதிதாக இ-ஷார்ம் திட்ட பதிவை கைவிட்டு 17 அமைப்பு சாரா தொழிலாளர் நலவாரியங்களை தொடர்ந்து செயல்படுத்துதல் உட்பட 23 தீர்மானங்கள் நிறைவேற்றப்பட்டன.

பனியன் தொழிலில், பல்முனை ஜி.எஸ்.டி., வரி விதிப்பால் பல்வேறு நெருக்கடி ஏற்படுகிறது. பிரதான மூலப்பொருளாக உள்ள நூலிழைக்கு மட்டும், 5 சதவீத ஜி.எஸ்.டி., விதிக்கப்பட வேண்டும். மத்திய அரசு பனியன் தொழில் மீது சிறப்பு கவனம் செலுத்தினால் மட்டுமே, வங்கதேசம் உள்ளிட்ட போட்டி நாடுகளுக்கு செல்லும் ஆர்டர்களை திருப்பூர் பக்கமாக திருப்ப முடியும் எனவும் மாநாட்டில் தீர்மானம் நிறைவேற்றப்பட்டுள்ளது.

மங்கலம் :

திருப்பூர் மாவட்டம்,மங்கலத்தில் பாப்புலர் பிரண்ட் ஆப் இந்தியா மங்கலம் நகரம் சார்பில் மக்கள் சங்கமம் மாநாடு நடைபெற்றது. மக்கள் சங்கமம் மாநாட்டின் தொடக்க நிகழ்ச்சியாக மங்கலம் ஆர்.பி.நகர் பகுதியில் உள்ள மர்ஹீம் ராஜாக்கண்ணு காஜாமுஹைதீன் நினைவுத்திடலில் மாபெரும் இஸ்லாமிய வரலாற்று கண்காட்சி நடைபெற்றது. மக்கள் சங்கமம் மாநாடு துவக்க நிகழ்ச்சியில் பாப்புலர் பிரண்ட் ஆப் இந்தியா அமைப்பின் திருப்பூர் மாவட்ட செயலாளர் முஹம்மது ரபீக் கொடியேற்றி வைத்தார் .

வரலாற்று கண்காட்சியை பாப்புலர் பிரண்ட் ஆப் இந்தியா அமைப்பின் கோவை மண்டல தலைவர் உசேன் திறந்து வைத்தார். அதனைத் தொடர்ந்து நேற்று மாலை 7 மணிக்கு மங்கலம் ஆர்.பி.நகர் பகுதியில் மக்கள் சங்கமம் மாநாடு நடைபெற்றது.இந்த மாநாட்டிற்கு எஸ்.டி.பி.ஐ.கட்சியின் கோவை மண்டல தலைவர் ராஜாஉசேன், திருப்பூர் மாவட்ட தலைவர் ஹாரிஸ்பாபு, திருப்பூர் தெற்கு மாவட்ட பொதுச்செயலாளர் மன்சூர்அகமது கான், திருப்பூர் வடக்கு மாவட்ட தலைவர் பஷீர்அகமது, ஏ.ஐ.ஐ.எம்.சி-திருப்பூர் மாவட்ட தலைவர் அப்பாஸ் நூரி, பல்லடம் தொகுதி தலைவர் யாசர்அரபாத், நேஷனல் விமன்ஸ் பிரண்ட் அமைப்பின் மங்கலம் பகுதி தலைவர் கத்தீஜா அப்பாஸ், நேஷனல் விமன்ஸ் பிரண்ட் அமைப்பின் மங்கலம் பகுதி செயலாளர் குர்ஷித் நௌசாத் ஆகியோர் முன்னிலை வகித்தனர்.

மாநாட்டிற்கு பாப்புலர் பிரண்ட் ஆப் இந்தியா அமைப்பின் திருப்பூர் மாவட்ட தலைவர் ஹபிபுர் ரகுமான் துவக்கவுரை ஆற்றினார். மாநில செயலாளர் நாகூர் மீரான், திருப்பூர் மாவட்ட தலைவர் ஜன்னத்இப்ராகிம், நேஷனல் விமன்ஸ் பிரண்ட் ஆப் இந்தியா அமைப்பின் மாநில தலைவர் ஆசியா மர்யம் ஆகியோர் சிறப்புரையாற்றினர்.இறுதியாக பாப்புலர் பிரண்ட் ஆப் இந்தியா அமைப்பின் மங்கலம் நகர செயற்குழு உறுப்பினர் நௌசாத்அலி நன்றி கூறினார்.

மக்கள் சங்கமம் மாநாட்டில் நிறைவேற்றப்பட்ட தீர்மானங்கள் வருமாறு:-

பாலியல் ரீதியான குற்றங்களில் ஈடுபடுவோருக்கு கடுமையான தண்டனைகளை வழங்கும் சட்ட ரீதியான நடவடிக்கைகளை மாநில அரசு மேற்கொள்ள வேண்டும்,தமிழக மக்களின் வாழ்வாதாரத்தை பாதிக்கும் வகையில் உயர்த்தியுள்ள சொத்துவரி ,குடிநீர் வரியை குறைக்க வேண்டும், மின் மீட்டருக்கு வாடகை வசூலிக்க கூடிய திட்டத்தை அமல்படுத்தக்கூடாது. திருப்பூர் மக்களின் வாழ்வாதாரமாக உள்ள பனியன் தொழிலை பாதுகாக்க பனியன் தொழில்சார்ந்த பயிற்சி நிறுவனம் அமைக்க வேண்டும். இதன்மூலம் தொழிலாளர் பற்றாக்குறையை சீர்செய்து பாதுகாக்க முடியும்.மேலும் நூல் விலையை கட்டுக்குள் வைப்பதற்கு தமிழக அரசு பஞ்சு நூல் கொள்முதல் கிடங்கு அமைக்க வேண்டும். மத்திய அரசு உடனடியாக விலைவாசி உயர்வு, வரிகளை திரும்ப பெற வேண்டும் உள்ளிட்ட பல்வேறு தீர்மானங்கள் நிறைவேற்றப்பட்டது.