தக்கலை :
தக்கலை போலீஸ் சப்-இன்ஸ்பெக்டர் ஆஷா ஜெபகர் தலைமையில் போலீசார் ரோந்து பணியில் ஈடுபட்டனர். திருவிதாங்கோடு கைத குழி பகுதியில் சென்ற போது, வேகமாக ஒரு டெம்போ வந்தது. அதனை நிறுத்தும்படி போலீசார் கூறினர். ஆனால் அந்த டெம்போ நிற்காமல் சென்றது. இதனை தொடர்ந்து போலீசார் விரட்டிச் சென்று மடக்கினர்.
டெம்போ டிரைவர் பிடிபட்ட நிலையில் அதில் வந்த 2 பேர் தப்பி ஓடிவிட்டனர். அந்த டெம்போவில் செம்மண் கடத்துவது தெரியவந்தது. இதனை தொடர்ந்து போலீசார் டெம்போவை பறிமுதல் செய்து டிரைவரையும் கைது செய்தனர். விசாரணையில் அவரது பெயர் ஷாஜன் என தெரிய வந்தது. மேலும் தப்பி ஓடியவர்கள் கண்ணனூர் பகுதியை சேர்ந்த அஜித், கைதகுழி பகுதியை சேர்ந்த விஜி என்றும் தெரிய வந்தது. அவர்களை போலீசார் தேடி வருகின்றனர்.
