பரமத்திவேலூர்:
நாமக்கல் மாவட்டம் பரமத்திவேலூர் பேட்டை திருஞான சம்பந்தர் மடாலயத்தில் ஆனி திருமஞ்சனம் மற்றும் ஆனி உத்திர தரிசனத்தை முன்னிட்டு நடராஜ பெருமானுக்கு பால், தயிர், பன்னீர், இளநீர், சந்தனம், மஞ்சள், திருமஞ்சனம், பஞ்சாமிர்தம், விபூதி, தேன், கரும்புச்சாறு உள்ளிட்ட 18 வகையான வாசனைத் திரவியங்களால் அபிஷேகம் நடைபெற்றது.
அதனைத் தொடர்ந்து மலர்களால் அலங்காரம் செய்யப்பட்டு தீபாராதனை காட்டப்பட்டது. பின்னர் சிறப்பு அலங்காரத்தில் நடராஜ பெருமான் பக்தர்களுக்கு காட்சி அளித்தார்.
திருமஞ்சனத்தை முன்னிட்டு காலை 8 மணி முதல் மதியம் 12 மணி வரை தேவாரம் மற்றும் திருவாசகம் ஓதுதலும், அதனை தொடர்ந்து சிவகாமசுந்தரி உடனாகிய நடராஜப் பெருமானுக்கு ஆனித் திருமஞ்சனம் அபிஷேகம் நடைபெற்றது.
நால்வர் பெருமக்களுக்கும் அபிஷேகங்கள் செய்யப்பட்டு மகாதீப ஆராதனை காண்பிக்கப்பட்டது. மதியம் 1 மணி அளவில் மகேஸ்வர பூஜையும், பக்தர்களுக்கு அன்னதானம் மற்றும் அருட்பிரசாதம் வழங்கும் நிகழ்ச்சியும் நடைபெற்றது.
இதே போல் கோப்பணம்பாளையம் அங்காள பரமேஸ்வரி அம்மன், மாசாணி அம்மன், அரசாயி அம்மன் கோவிலில் உள்ள பரமேஸ்வரர் ஆலயத்தில் ஆனி திருமஞ்சனம் மற்றும் ஆனி உத்திர தரிசனத்தை முன்னிட்டு பரமேஸ்வரருக்கு சிறப்பு அபிஷேக ஆராதனை நடைபெற்றது.
நிகழ்ச்சியில் பரமத்திவேலூர் மற்றும் பாண்டமங்கலம் சுற்று வட்டார பகுதிகளைச் சேர்ந்த சிவனடியார்கள் மற்றும் பொதுமக்கள் கலந்து கொண்டு சிவகாமசுந்தரி உடனாகிய நடராஜப் பெருமானையும், பரமேஸ்வரரையும் தரிசனம் செய்தனர்.
