ராமேசுவரம்
கச்சத்தீவு அருகே நடுக்கடலில் மீன்பிடிக்கும் தமிழக மீனவர்களை இலங்கை கடற்படையினர் கைது செய்வது, தமிழக மீனவர்களின் விசைபடகுகளை பறிமுதல் செய்யும் சம்பவங்கள் தொடர்ச்சியாக நடந்து வருகிறது.
இலங்கை கடற்படையினர் மேற்கொண்டு வரும் இந்த நடவடிக்கைக்கு முற்றுப்புள்ளி வைக்க மத்திய-மாநில அரசுகள் நடவடிக்கை எடுக்க வேண்டும் என்று தமிழக மீனவர்கள் தொடர்ந்து கோரிக்கை வைத்து வருகின்றனர்.
இந்த நிலையில் ராமேசுவரம் பகுதியை சேர்ந்த 2 ஆயிரத்திற்கும் மேற்பட்ட மீனவர்கள் 500-க்கும் மேற்பட்ட விசைப்படகுகளில் நேற்று காலை மீன்பிடிக்க கடலுக்கு புறப்பட்டு சென்றனர். அவர்கள் கச்சத்தீவு அருகே மீன்பிடித்து கொண்டிருந்தனர்.
அப்போது அங்கு இலங்கை கடற்படையினர் ஏராளமான பிளாஸ்டிக் படகுகளில் ரோந்து வந்தனர். அவர்கள் எல்லை தாண்டி மீன்பிடிக்க கூடாது என்றும், திரும்பி செல்லுமாறும் ராமேசுவரம் மீனவர்களை எச்சரித்துள்ளனர்.
மேலும் அவர்களது வலைகள் மற்றும் மீன்பிடி பொருட்களை சேதப்படுத்தி அங்கிருந்து விரட்டியடித்துள்ளனர். இதையடுத்து ராமேசுவரம் மீனவர்கள் மீன்பிடிக்காமல் கரைக்கு திரும்பினர். அவர்கள் இன்று காலை ராமேசுவரத்திற்கு வந்து சேர்ந்தனர்.
கச்சத்தீவு அருகே மீன் பிடித்து கொண்டிருந்த தங்களை இலங்கை கடற்படையினர் விரட்டியடித்ததாகவும், 50-க்கும் மேற்பட்ட விசைப்படகுகளில் இருந்த வலைகளை வெட்டி மீன்பிடி சாதனங்களை சேதப்படுத்தியதாகவும், இதனால் ஒரு படகிற்கு ரூ.50 ஆயிரம் முதல் ரூ. 1 லட்சம் வரை இழப்பு ஏற்பட்டுள்ளதாகவும் ராமேசுவரம் மீனவர்கள் குற்றம் சாட்டினர்.
கச்சத்தீவு அருகே மீன் பிடித்த ராமேசுவரம் மீனவர்களை இலங்கை கடற்படையினர் வலைகளை சேதப்படுத்தி விரட்டியடித்த சம்பவம் தமிழக மீனவர்கள் மத்தியில் அதிர்ச்சியை ஏற்படுத்தி உள்ளது.
தமிழக மீனவர்கள் தொடர்ந்து இலங்கை கடற் படை–யால் சிறைபிடிக்கப் பட்டு வருவது மீனவ மக்களி–டையே பெரும் கொந்த–ளிப்பை ஏற்படுத்தியுள்ளது. உடனடியாக மத்திய, மாநில அரசுகள் மீனவர்களை விடுவிக்கவும், அவர்களின் படகுகளை திரும்ப ஒப்ப–டைக்கவும் நடவடிக்கை எடுக்க வேண்டும் என்று சக மீனவர்கள் மற்றும் அவர் களின் குடும்பத்தினர் வலி–யுறுத்தி உள்ளனர்.
