நீங்கள் தேடியது "MENTALLY ILL"

ராஜஸ்தானில் இறந்துவிட்டதாகக் கருதி எரியூட்டும் மேடையில் கிடத்தப்பட்ட நபர் உயிருடன் எழுந்து வந்த அதிர்ச்சி சம்பவம் நிகழ்ந்துள்ளது.

ராஜஸ்தான் மாநிலம் ஜுன்ஜுனு மாவட்டத்தில் என்ஜிஓ நடத்தும் மா சேவா சன்ஸ்தான் என்ற பராமரிப்பு இல்லத்திலிருந்த மன நலம் பாதிக்கப்பட்ட மாற்றுத்திறனாளி நபரான ரோகித்தேஷ் என்பர் கடந்த வியாழக்கிழமை உடல்நலக்குறைவு காரணமாக பகவான் தாஸ் கேதன் அரசு மருத்துவமனைக்கு அழைத்துச் செல்லப்பட்டார். சுயநினைவை இழந்து காணப்பட்ட அவர் தீவிர சிகிச்சை பிரிவில் அனுமதிக்கப்பட்டார்.

ஆனால் அவர் உடல்நிலையில் எந்த முன்னேற்றமும் இல்லாததால் அவர் உயிரிழந்து விட்டதாக அன்றைய தினமே மருத்துவர்கள் அறிவித்துள்ளனர். அவரது உடலுக்கு யாரும் பொறுப்பேற்க வராததால் மருத்துவர்கள் அவருக்கு பிரேத பரிசோதனை செய்யாமலேயே போஸ்ட் மார்ட்டம் சான்றிதழைத் தயாரித்து உடலை போலீசிடம் ஒப்படைத்துள்ளனர்.

பிணவறை குளிர்சாத Freezer-இல் அவரது உடல் 4 மணி நேரமாக வைக்கப்பட்டுள்ளது. அதன்பின் உடலை எரியூட்டுவதற்காக போலீசார் ஆம்புலன்சில் எடுத்துச் சென்றுள்ளனர். ஆனால் மேடை மீது கிடத்தப்பட்ட ரோகித்தேஷ் உடலில் திடீரென அசைவுகள் தெரிந்ததால் உடன் இருந்தவர்கள் திடுக்கிட்டனர்.

உடனே அவர் ஆம்புலன்சில் மீண்டும் மருத்துவமனைக்கு கொண்டு செல்லப்பட்டார். இந்த விவகாரம் மாவட்ட ஆட்சியர் வரை சென்ற நிலையில் இதுதொடர்பாக மருத்துவர்களிடம் விசாரணை நடத்தப்பட்டது.

இந்நிலையில் ரோகித்தேஷ் இறந்துவிட்டதாக அறிவித்த மருத்துவர்கள் மூவரை மாவட்ட ஆட்சியர் ராமாவதார் மீனா சஸ்பெண்ட் செய்து உத்தரவிட்டார். மேலும் இதுதொடர்பாக விரிவான விசாரணைக்கு அவர் உத்தரவிட்டார். ரோகித்தேஷ் உடல்நிலை பரிசோதிக்கப்பட்டு வருகிறது.

கள்ளக்குறிச்சி:

சங்கராபுரம் அருகே ஆற்கவாடி பகுதியை சேர்ந்தவர் அண்ணாமலை மகன் இளந்தமிழன்(வயது30). சற்று மனநலம் பாதிக்கப்பட்டவர். சம்பவத்தன்று இவர் மூங்கில்துறைப்பட்டு மரப்பட்டறை அருகே நடந்து சென்ற போது அந்த வழியாக வந்த அடையாளம் தெரியாத வாகனம் மோதியதில் படுகாயம் அடைந்த இளந்தமிழன் சம்பவ இடத்திலேயே பரிதாபமாக உயிரிழந்தார். இது குறித்த புகாரின் பேரில் மூங்கில்துறைப்பட்டு போலீசார் வழக்குப்பதிவு செய்து விசாரணை செய்து வருகின்றனர்.

திருச்சி,

திருச்சி மாநகரில் சமீப காலமாக ஆதரவற்ற முதியவர்கள் மற்றும் மன நோயாளிகளின் நடமாட்டம் அதிகரித்து கொண்டு செல்கிறது. வெளி மாவட்டங்கள் மற்றும் வெளி மாநிலங்களைச் சேர்ந்த மனநோயாளிகளை ஈவு இரக்கமில்லாமல் அவர்களது உறவினர்கள் வாகனத்தில் அழைத்து வந்து நெடுஞ்சாலை பகுதிகளில் இறக்கி விட்டு செல்கிறார்கள்.

பின்னர் அவர்கள் கால் போன போக்கில் நடந்து மாநகர பகுதிகளில் அடைக்கலமாகி ஆங்காங்கே கிடைக்கும் உணவுகளை சாப்பிட்டு ஆதரவின்றி அழுக்கு ஆடையுடன் சுற்றி திருகிறார்கள். இதேபோன்று குழந்தைகளை பெற்றெடுத்து வளர்த்து ஆளாக்கிய முதியவர்களும் ஆதரவற்ற நிலைக்கு தள்ளப்படும் வேதனையான நிகழ்வுகளும் நடக்கின்றன.

திருச்சி மாநகரில் தற்போதைய நிலையில் 150 க்கு மேற்பட்ட முதியவர்கள் மனநலம் குன்றியவர்கள் சுற்றி திரிவதாக தகவல்கள் கிடைத்துள்ளன.

இது போன்ற சாலை ஓரங்களில் ஆதரவு இல்லாமல் சுற்றித் திரியும் மன நோயாளிகள் மற்றும் முதியவர்கள் மழை வெயில் மற்றும் கடும் குளிரில் உணவின்றி, மருத்துவ வாய்ப்பின்றி, உயிருக்கு பாதுகாப்பற்ற நிலையில் இருப்பவர்களை மீட்க ஹீ டு இந்தியா தொண்டு நிறுவனம் முன் வந்தது.

திருச்சி கோட்டை காவல் நிலைய எல்லைக்குட்பட்ட பகுதிகளில் அதிக ஆதரவற்றோர் நடமாட்டம் இருந்ததால் அந்த காவல் நிலைய இன்ஸ்பெக்டருக்கு மேற்கண்ட தொண்டு நிறுவனம் சார்பில் மீட்பு பணிக்கு உதவ கோரிக்கை வைக்கப்பட்டது. அதனைத் தொடர்ந்து சிறப்பு மற்றும் போலீசார் ஆதரவற்றவர்களில் நேரில் சந்தித்து விசாரணை செய்தனர்.

பின்னர் கங்காரு மனநல காப்பக பணியாளர்கள் மற்றும் ட்ரீம் இந்தியா நெட்வொர்க் தொண்டு நிறுவனத்தின் உதவியுடன் சத்திரம் பஸ் நிலையம்,மெயின் கார்டு கேட் பகுதிகளில் சுற்றித்திரிந்த 6 மன நோயாளிகள், 3 முதியவர்கள் என மொத்தம் 8 பேரை ஒரே நாளில் மீட்டனர்.

அதன் பின்னர் போலீசார் மீட்கப்பட்டவர்களை திருச்சி எடமலைப்பட்டி புதூர் பகுதியில் உள்ள கங்காரு மனநல காப்பகம் மற்றும் கங்காரு முதியோர் இல்லத்தில் ஒப்படைத்தனர்.

இந்த இல்லத்தின் முதன்மை சேவகர் தீபா ராஜா கூறும் போது, மீட்கப்பட்ட ஒவ்வொருவருக்கும் உரிய மருத்துவ முதலுதவி மற்றும் உளவியல் ஆலோசனை வழங்க ஏற்பாடு செய்யப்பட்டுள்ளது. உறவினர்களை கண்டுபிடிக்கும் பணி அல்லது மறுவாழ்வு பணிக்கு சில வாரங்களில் இல்லத்தின் சார்பாக ஏற்பாடு செய்யப்படும் என்றார்.

மேற்கண்ட இல்லத்தின் இயக்குனர் ராஜா கூறும்போது,

திருச்சி மாவட்டம் முழுவதும் இன்றைய தேதியில் 1,500 க்கும் மேற்பட்ட ஆதரவற்ற முதியவர்கள் மனநலம் குன்றியவர்கள் சாலைகளில் ஆதரவு இல்லாமல் சுற்றி திரிவதாக புள்ளிவிவரங்கள் தெரிவிக்கின்றன. இவர்கள் அனைவரையும் மீட்க எங்களுக்கு ஆசைதான். ஆனால் இங்கு தங்க வைப்பதற்கான கட்டுமான வசதிகள் இல்லை. மத்திய,மாநில அரசுகள் பல்வேறு மக்கள் நலத் திட்டங்களை முன்னெடுத்து செல்கின்றன. அதேபோன்று இந்த ஆதரவற்ற மற்றும் முதியோர்களை பாதுகாக்கவும் திட்டங்களை தீட்ட வேண்டும். தாலுகா வாரியாக ஒரு முதியோர் இல்லத்தை கட்டுமானம் செய்து அதனை முறையாக தன்னார்வலர்களிடம் ஒப்படைத்து கண்காணித்தாலே இத்தனை பேர் சாலைகளில் ஆதரவு இல்லாமல் சுற்றுவது தடுக்கப்படும் என்றார்.

சமூக ஆர்வலர்கள் கோரிக்கை

திருச்சி மாநகராட்சி நிர்வாகம் மாநகரை அழகுப்படுத்தும் திட்டங்களுக்கு பல கோடிகளை செலவழிக்கிறது. இதில் சொற்ப தொகையை ஆதரவற்றோரை மீட்டு பாதுகாக்க கொடுக்கலாம்.

பொதுவாக இது போன்ற ஆதரவற்றோர் இல்லங்கள் மாவட்டத்தின் தலைநகரங்களில் மட்டுமே இயங்கி வருகின்றன.

அதுவும் சொந்த கட்டிடங்கள் இல்லாமல் அதனை நடத்தும் தன்னார்வலர்கள் வாடகை உள்ளிட்ட செலவினங்களால் திக்கு முக்காடுகின்றனர்.

இன்றைக்கும் பல அரசு கட்டிடங்கள் எந்த பயன்பாடும் இல்லாமல் இருக்கின்றது. இது போன்ற கட்டிடங்களை கூட ஆதரவற்றோர் காப்பகத்துக்கு கொடுக்க முடியும். ஒரு சில மனநலம் பொதுமக்களுக்கும் போக்குவரத்துக்கும் கூட இடையூறுகள் ஏற்படுகின்றன. இவற்றையெல்லாம் தவிர்ப்பதற்கு மாவட்ட நிர்வாகம் உரிய நடவடிக்கை எடுக்க வேண்டும் என சமூக ஆர்வலர்கள் கோரிக்கை விடுத்துள்ளனர்.