குழந்தை பராமரிப்பு

குழந்தைகளின் ஆரோக்கியமான வாழ்க்கைக்கு உணவு முறை என்பது மிக முக்கியம். பெற்றோர்கள் குழந்தைகள் விஷயத்தில் மிக கவனமாக செயல்பட வேண்டும். குழந்தைகளுக்கு ஆரோக்கியமான உணவை கொடுக்கவில்லை என்றால் அவர்கள் பல நோய்களுக்கு ஆளாவார்கள்.

பிஸியான வாழ்க்கை மற்றும் மோசமான வாழ்க்கை முறை காரணமாக, பல நேரங்களில் பெற்றோர்கள் தங்கள் குழந்தைகளின் ஆரோக்கியத்தில் கவனம் செலுத்த போதுமான நேரம் கிடைப்பதில்லை. பல நேரங்களில் பெற்றோர்கள் குழந்தைகளுக்கு அவசர அவசரமாக பல வகையான உணவுகளை வயிறு நிரம்பினால் போதும் என கொடுக்கிறார்கள்.

இந்த உணவுகள் குழந்தைகளின் ஆரோக்கியத்திற்கு தீங்கு விளைவிப்பதைத் தவிர, குழந்தைகளின் வளர்ச்சியையும் பாதிக்கிறது. அந்த வகையில் குழந்தைகள் ஆரோக்கியமாக இருக்க சில வகை உணவுகளை மறந்தும் கொடுக்கக் கூடாத உணவுகள் குறித்து இந்த பதிவில் பார்க்கலாம்.

துரித உணவுகள்

இன்றைய குழந்தைகள் பர்கர், பீட்சா, பிரஞ்சு பிரைஸ் மற்றும் பதப்படுத்தப்பட்ட உணவுகளை அதிக அளவில் உட்கொள்கின்றனர். இதனால் குழந்தைகள் சிறு வயதிலேயே உடல் பருமன், சர்க்கரை நோய், சோர்வு போன்ற பிரச்சனையால் அவதிப்படுகிறார்கள். இந்த உணவுகள் குழந்தைகளின் மூளையில் ஆரோக்கியமான உணவை மறக்கடிக்கிறது.

இனிப்பு பானங்கள்

சந்தையில் கிடைக்கும் பெரும்பாலான பானங்களில் இனிப்புச் சுவைக்காக இயற்கையான சர்க்கரைகள் சேர்க்கப்படுகின்றன. இது உடலுக்கு தீங்கு விளைவிக்கும். குழந்தைகளுக்கு பல் சிதைவு, எதிர்காலத்தில் நீரிழிவு மற்றும் உடல் பருமன் போன்ற அபாயத்தை ஏற்படுத்துகிறது.

ஸ்நாக்ஸ்

சிறு குழந்தைகள் குக்கீகள், சாக்லேட்கள் மற்றும் இனிப்புகளை அதிகம் சாப்பிடுகிறார்கள். இந்த விஷயங்கள் உடலுக்கு தீங்கு விளைவிக்கும் மற்றும் குழந்தைகளின் எடையை விரைவாக அதிகரிக்கின்றன. இதுபோன்ற உணவுகள் குழந்தைகளின் செரிமானத்தை மோசமாக பாதிக்கிறது. அதேபோல் இது போன்ற உணவுகள் குழந்தைகளுக்கு எதிர்காலத்தில் பல பிரச்சனைகளை ஏற்படுத்துகின்றன.

பதப்படுத்தப்பட்ட உணவுகள்

பதப்படுத்தப்பட்ட உணவுகள் குழந்தைகளின் உடலுக்கு பெரும் தீங்கு விளைவிக்கும். பதப்படுத்தப்பட்ட உணவுகளை உட்கொள்வது குழந்தைகளின் வளர்ச்சியை பாதிக்கிறது மற்றும் அவர்களின் மன ஆரோக்கியத்தையும் பாதிக்கிறது. குழந்தைகளுக்கு ஒருபோதும் பதப்படுத்தப்பட்ட உணவுகளை கொடுக்கக்கூடாது. இது குழந்தைகளுக்கு பெரும் பாதிப்பை ஏற்படுத்தும்.

உப்பு நிறைந்த உணவுகள்

சந்தையில் பல வகையான தின்பண்டங்கள் கிடைக்கின்றன, அவற்றில் அதிக அளவு உப்பு உள்ளது. இந்த உணவுகள் குழந்தைகளுக்கு சுவையாகத் தோன்றினாலும், அவற்றை உட்கொள்வதால் குழந்தைகளுக்கு ரத்த அழுத்தம், நீரிழிவு நோய் மற்றும் உடல் பருமன் பன்மடங்கு ஏற்படும் வாய்ப்புகள் அதிகம். குழந்தைகளுக்கு சந்தையில் கிடைக்கும் சிப்ஸ் மற்றும் ஸ்நாக்ஸ் கொடுப்பதை தவிர்க்க வேண்டும்.

குழந்தைகளுக்கு இதுபோன்ற உணவுகள் கொடுப்பதை தவிர்ப்பது நல்லது. ஒருமுறை என்றுகூட கொடுக்க வேண்டாம், காரணம் இந்த சுவை குழந்தைகளிடம் தொற்றிக் கொண்டால் அதை மீண்டும் மீண்டும் கேட்க வைக்கும்.

எல்.கே.ஜி. மற்றும் யூ.கே.ஜி. என அறியப்படும் கிண்டர் கார்டன் கல்வி முறையும், மாண்டிசோரி கல்வி முறையும்... 18-ம் நூற்றாண்டிலும், 19-ம் நூற்றாண்டிலும் கட்டமைக்கப்பட்டவை. அதைத்தான், நாம் இன்றும் பின்பற்றி, பாடம் பயில்கிறோம். அதை அப்படியே பின்பற்றினாலும், தவறில்லை.

ஆனால், 'அட்வான்ஸ்ட்' கல்வி என்ற பெயரில், 4 வயதிலேயே குழந்தைகளை எழுத, படிக்க பழக்கப்படுத்தி, அவர்களுக்கு கல்வி மீதான ஆர்வத்தை குறைத்துவிடுகிறார்கள். இத்தகைய ஹைபிரீட் கல்வி முறைதான் இப்போது இந்தியாவில் நடைமுறையில் இருக்கிறது.

உண்மையில், குழந்தைகளை 6 வயதிற்கு மேலாகதான் எழுத-படிக்க பழக்கப்படுத்த வேண்டும் என்பது, அறிவியல் உண்மை. ஆனால் அவை இந்தியாவில் பின்பற்றப்படுவதில்லை. இங்கிலாந்து, பின்லாந்து... போன்ற நாடுகளில் மட்டுமே பின்பற்றப்படுகிறது.

குறிப்பாக, 21-ம் நூற்றாண்டில் கட்டமைக்கப்பட்டிருக்கும், இ.எல்.எஸ். எடிபிகேஷன் கல்வி முறை தான் அதிகம் பின்பற்றப்படுகிறது. இதுதான், எதிர்கால கல்வியாகவும் உருவெடுத்து வருகிறது.

இது, 21-ம் நூற்றாண்டில் கட்டமைக்கப்பட்ட கல்வி என்பதால், நவீன கால குழந்தைகளின் எண்ண ஓட்டங்களை புரிந்துக்கொண்டு, அதற்கு ஏற்ப கல்விமுறையை உருவாக்கி இருக்கிறார்கள். எல்.எஸ்.ஆர்.டி.டபிள்யூ.ஏ. என்ற முறையில்தான் இது இயங்குகிறது.

அதாவது லெர்னிங், ஸ்பீக்கிங், ரீடிங், டீச்சிங், ரைட்டிங், அனிமேஷன்... இப்படிதான் பாடம் கற்பிக்கப்படும். இதில் மொழி, கணிதம், அறிவியல் உள்பட வாழ்க்கைக்கு தேவையான 10 பாடங்கள் கற்பிக்கப்படும்.

ஒரு வகுப்பில் 10 நிமிட 'தியரி' பாடமும், 15 நிமிட செயல்முறை பாடமும் கற்பிக்கப்படுவது இதன் தனிப்பெரும் சிறப்பு. மழலையர் கல்வியில் சிறப்பானதாக கருதப்படும் மாண்டிசோரியில், வெறும் 32 கல்வி உபகரணங்கள் மட்டுமே பயன்படுத்தப்படும் நிலையில், இதில் 64 கல்வி உபகரணங்கள் மூலமாக அறிவியலையும், வாழ்க்கை கல்வியையும் புகட்டுகிறார்கள்.

பெரும்பாலும், புதிர்கள், அட்டைப்படங்கள் மூலமாகவே கல்வி பயிற்றுவிக்கப்படும். பழைய கதைகளும், பழைய பாடல்களும் இதில் இருக்காது. ஆனால் நவீன உலகில் ஒன்றியிருக்கும் கதைகளும், எதிர்கால தொழில்நுட்பத்தை சார்ந்த பாடல்களுமே இதில் இடம் பிடிக்கின்றன.

இங்கிலாந்து, அமெரிக்கா, கனடா, ஆஸ்திரேலியா, இந்தியா... என வளர்ச்சி கண்டு வரும் இந்த கல்வி முறையை, எதிர்கால கல்வி முறையாக பெரும்பாலான உலக நாடுகள் ஏற்றுக்கொண்டு, மேம்படுத்தி வருகின்றன.

கல்வி என்பது, எதிர்காலத்திற்கு ஏற்றதாக இருக்க வேண்டும் என்பதை, எல்லா உலக நாடுகளும் உணர்ந்திருப்பதால், மழலையர் கல்வி முதற்கொண்டு, இத்தகைய மாற்றத்தை ஏற்படுத்தி வருகின்றனர்.

கல்வி முறைகள், நாளுக்கு நாள் மாறிக்கொண்டேதான் இருக்கும். அப்படி மாற்றம் காணும் கல்வி முறைகள்தான் சிறப்பான எதிர்காலத்தை கட்டமைக்க உறுதுணையாக இருக்கும் என்பதை உணர்ந்து கொண்டு, எதிர்காலத்திற்கு தேவையான கல்வி முறையில் குழந்தைகளை ஊக்கப்படுத்துங்கள். அதுவே அவர்களது எதிர்காலத்தை வளமானதாக கட்டமைக்கும்.

அதே வேளையில் ஏதேனும் நிர்பந்தத்தின் பேரில் குழந்தைகளின் கற்றல் திறனுக்கு பொருத்தமற்ற கல்வி முறைக்குள் திணித்து அவர்களின் கல்வி ஆர்வத்திற்கு முட்டுக்கட்டை போட்டுவிடாதீர்கள்.

சிறுநீர் பாதை தொற்று என்பது பெரியவர்களுக்கு மட்டுமல்லாமல் குழந்தைகள் மற்றும் பச்சிளம் சிசுக்களுக்கும் கூட ஏற்படுகிறது. சிறுநீர் பாதையில் பாக்டீரியாவால் ஏற்படுகின்ற தொற்றுதான் இது.

சிறுநீர் குழாயில் அடைப்பு ஏற்படும்போது, சிறுநீர் பையில் தேங்கும் நீர், பிறப்புறுப்புகளில் உண்டாகும் தொற்று போன்ற காரணங்களால், சிறுநீர் தொற்று ஏற்படுகிறது. சிறுநீர் பாதை தொற்று சிகிச்சை முறைகள் குறித்த விழிப்புணர்வு இல்லாதது இந்நோயின் தீவிரத்தை அதிகப்படுத்தி விடுகிறது.

இளம் குழந்தைகள் மற்றும் பச்சிளம் சிசுக்களுக்கு சிறுநீர் பாதை தொற்று ஏற்படும்போது உணர தகுந்த அறிகுறிகள் தென்படாது. தொற்றை கண்டுபிடிக்க இயலாத சூழலில், முறையான சிகிச்சை எடுக்க முடியாத நிலை ஏற்படும்.

மலத்தில் உள்ள பாக்டீரியா மற்றும் பிறப்பு உறுப்புக்கு அருகாமையில் உள்ள சருமத்தில் குடியிருக்கும் பாக்டீரியா ஆகியவை சிறுநீர் பாதைக்குள் நுழைவதன் காரணமாக குழந்தைகளுக்கு தொற்று ஏற்படுகிறது. சிறுநீர் பாதை மற்றும் சிறுநீர் பை ஆகிய பகுதிகளுக்கு இது பரவக்கூடும். மிகவும் அரிதாக சிறுநீரகம் வரையிலும் கூட இது பாதிப்பை ஏற்படுத்தும்.

சரியான சமயத்தில் நோயை கண்டறிந்து ஆண்டிபயாடிக் மருந்துகள் மற்றும் இதர சிகிச்சைகளை அளிக்கும் பட்சத்தில் விளைவுகளை கட்டுப்படுத்தலாம்.

சிறுநீர் பாதை தொற்று ஏற்பட்டால் சிறுநீர் கழிக்கும்போது வலி, அடிக்கடி சிறுநீர் கழிப்பது, பின் இடுப்பு வலி, வயிறு வலி போன்ற அறிகுறிகள் குழந்தைகளிடம் தென்படும்.

குழந்தைகளுக்கு தொற்று ஏற்பட்டால் அதன் காரணமாக உடல் எடை அதிகரிக்காது. குழந்தைகளின் பசி உணர்வை பரிசோதிக்க வேண்டும். வயிற்றுப்போக்கு, வாந்தி போன்ற பிரச்சனைகள் ஏற்படும். சில சமயம் காய்ச்சலும் சேர்ந்து வரும்.

குழந்தைகளுக்கான டயப்பர், மெத்தை போன்றவற்றை அடிக்கடி மாற்றி, சுத்தம் செய்ய வேண்டும். பிறப்புறுப்பு பகுதி, ஆசனவாய் பகுதி போன்ற இடங்களில் வெதுவெதுப்பான தண்ணீர் வைத்து துடைக்க வேண்டும்.

பிறப்பு உறுப்பு பகுதியில் அரிப்பு, மோசமான வாடை, மேக நிறத்தில் சிறுநீர் கழிப்பது போன்ற அறிகுறிகளை கவனிக்க வேண்டும்.

அட்டென்ஷன் டிஃபிளிக்ட் ஹைப்பர்ஆக்டிவிட்டி டிஸ்ஸார்டர் (ADHD - Attention Deficit Hyperactivity Disorder) என்பது குழந்தைகளுக்கு ஏற்படும் ஒரு சிக்கலான நரம்பியல் கோளாறாகும். சுருக்கமாக சொன்னால் இது கவனக்குறைவு சீர்குலைவு என்று கூறலாம். இந்தியாவில் பள்ளி வயது குழந்தைகளில் சுமார் 7% பேர் ADHD நோயால் பாதிக்கப்படுகின்றனர். இது குழந்தை பருவத்தில் மிகவும் பொதுவான நரம்பியல் வளர்ச்சி நோய்களில் ஒன்றாகும்.

ADHD-ஆல் பாதிக்கப்படும் நபர் வெளியுலக வாழ்க்கை மற்றும் தனிப்பட்ட உறவுகளின் செயல்திறனை கணிசமாக பாதிக்கிறது. இதனால் பாதிக்கப்பட்டுள்ள நபர் தங்களின் உணர்ச்சிகளை நிர்வகிப்பதில் சிரமப்படுவார்கள். இவர்கள் மிகவும் கவன குறைவாகவும், அதே சமயம் அதிவேகமாகவும் இருப்பார்கள். இவர்களால் ஒரே இடத்தில் நீண்ட நேரம் உட்கார முடியாது.

ஒருவர் பேசும் போது அதை கவனிக்கும் திறன் எப்படி உள்ளது, பிறருடன் பழகும் திறன் உள்ளிட்டவற்றை அவ்வப்போது கண்காணிக்க வேண்டும். உங்கள் செயல்பாட்டில் அமைதி தெரியவில்லை, நீங்கள் உங்கள் கட்டுப்பாட்டை இழந்து ஒரு விஷயத்தை செய்கிறீர்கள், தேவையற்ற நடத்தைகளை கட்டுப்படுத்த முடியாமல் இருந்தால், அதிக கவனக்குறைவுடன் இருக்கிறீர்கள் எனில் அது ADHD-ஆக இருக்க கூடும்.

ADHD அறிகுறிகள் இருப்பின் கவனக்குறைவு அறிகுறிதான் முதலில் தோன்றும். எந்த ஒரு விஷயத்திலும் அதிகபட்சமாக 15 நிமிடங்களுக்கு மேல் கவனம் செலுத்த முடியாது. பல படிகளை உள்ளடக்கிய டாஸ்க் ஒன்றை கொடுக்கும் போது, ADHD கொண்ட குழந்தைகள் அல்லது பெரியவர்கள் அந்த டாஸ்க்கை தொடங்க அல்லது முடிக்க மிகவும் சிரமப்படுவார்கள். இது பெரியவர்களுக்கும் பொருந்தும். ஏதாவது ஒரு செயலை செய்வது அல்லது அதன் வழிமுறைகளைப் பின்பற்றுவதில் சிரமத்தை எதிர்கொள்ள நேரிடுவதால் இது நிகழ்கிறது.

ADHD பாதிப்பு கொண்ட நபர் அதிக மறதி கொண்டவர்களாக இருப்பார்கள். எதிலும் ஒழுங்காக இருக்க வேண்டும் என்பதை பெரிதாக நினைக்க மாட்டார்கள். அடிக்கடி குழப்பத்துடன் காணப்படுவார்கள். மறதி மற்றும் குழப்பம் இரண்டின் காரணமாக கவனச்சிதறலுடன் கூடிய நடத்தையை கொண்டிருப்பார்கள். இதனால் இவர்கள் தங்களின் இலக்கை மறந்து எளிதில் திசை திரும்பிவிடுவார்கள். தங்கள் பொருட்களை சரியான இடத்தில் வைக்க மாட்டார்கள்.

ஏற்கனவே நாம் கூறியபடி ADHD பாதிக்கப்பட்டவர்கள் ஓரிடத்தில் சில நிமிடங்கள் கை, கால்களை வைத்து கொண்டு அமைதியாக உட்காருவது என்பது அரிது. குழந்தைகளாக இருப்பின் ஆசிரியர்கள் வகுப்பில் பாடம் நடத்தி கொண்டிருக்கும் போதே அதில் கவனம் செலுத்தாமல் கிளாஸை ரவுண்ட் அடிப்பார்கள். ஓரிடத்தில் உட்கார்ந்திருந்தாலும் கை மற்றும் கால்களை அசைத்தபடி நெளிந்து கொண்டே இருப்பார்கள். அமைதியாக இருந்தாலும் அதிகபட்சம் 20 நிமிடங்கள் தான். அதற்கு மேல் அவர்கள் சும்மா இருக்க மாட்டார்கள்.

அதே போல மற்றவர்களை பேச விடாமல் இடைமறித்து இவர்கள் பேசி கொண்டே இருப்பார்கள். மேற்காணும் அறிகுறிகள் 6 மாதத்திற்கும் மேல் நீடித்தால் நிச்சயமாக தகுந்த நிபுணர்களின் உதவியை நாடுவது அவசியம் என்கிறார்கள் நிபுணர்கள்.

நொறுக்கு தீனிகள் சுவையாக இருந்தாலும், அவை அதிக அளவு கொழுப்பு, சர்க்கரை மற்றும் உப்பு கொண்டவை. இவை உடல் நலத்திற்கு பல பிரச்சனைகளை ஏற்படுத்தும். எனவே நொறுக்கு தீனிகளால் உடல்நலத்திற்கு ஏற்படும் பிரச்சனைகள் என்னென்ன என்பதை பார்ப்போம்.

நொறுக்கு தீனிகளில் அதிக அளவு கலோரிகள் இருக்கும். அவை எளிதில் ஜீரணிக்கப்படுவதால், விரைவில் பசி மீண்டும் ஏற்படும். இதனால், அதிகமாக சாப்பிடும் வாய்ப்பு அதிகம். இது உடல் பருமனுக்கும், அதன் மூலம் பிற நோய்களுக்கும் வழிவகுக்கும்.

நொறுக்கு தீனிகளில் அதிக அளவு கொழுப்பு, குறிப்பாக டிரான்ஸ் கொழுப்பு இருக்கும். இது இரத்தத்தில் கெட்ட கொழுப்பின் (LDL) அளவை அதிகரித்து, நல்ல கொழுப்பின் (HDL) அளவை குறைக்கும். இதனால் இதய நோய்கள் ஏற்படும் அபாயம் அதிகரிக்கும்.

நொறுக்கு தீனிகளில் அதிக அளவு சர்க்கரை இருக்கும். இது இரத்த சர்க்கரை அளவை அதிகரிக்கும். நீண்ட காலத்திற்கு அதிக அளவு சர்க்கரை உட்கொள்வது நீரிழிவு நோய்க்கு வழிவகுக்கும்.

நொறுக்கு தீனிகளில் அதிக அளவு உப்பு இருக்கும். இது இரத்த அழுத்தத்தை அதிகரிக்கும். உயர் இரத்த அழுத்தம் இதய நோய், பக்கவாதம் மற்றும் சிறுநீரக நோய் போன்ற பிற நோய்களுக்கும் வழிவகுக்கும்.

நொறுக்கு தீனிகளில் அதிக அளவு சர்க்கரை இருக்கும். இது பற்களில் பாக்டீரியாக்கள் வளர உதவுகிறது. இது பல் சொத்தை மற்றும் ஈறு நோய்களுக்கு வழிவகுக்கும்.

நொறுக்கு தீனிகளில் ஊட்டச்சத்துக்கள் குறைவாக இருக்கும். அதிக அளவு நொறுக்கு தீனிகள் சாப்பிடுவது ஊட்டச்சத்து குறைபாட்டுக்கு வழிவகுக்கும்.

அதிக அளவு சர்க்கரை மற்றும் உப்பு கொண்ட நொறுக்கு தீனிகள் மன அழுத்தம் மற்றும் பதட்டத்தை அதிகரிக்கலாம்.

நொறுக்கு தீனிகள் எளிதில் ஜீரணிக்கப்படுவதால், விரைவில் பசி மீண்டும் ஏற்படும். இதனால், அதிகமாக சாப்பிடும் வாய்ப்பு அதிகம். இது செரிமான பிரச்சனைகளுக்கு வழிவகுக்கும்.

குழந்தை பருவத்தில் நொறுக்கு தீனி பொருட்கள் அதிகமாக சாப்பிடுபவர்களுக்கு புற்றுநோய் ஏற்படுவதற்கான வாய்ப்புகள் அதிகம் என புற்றுநோய் சிகிச்சை நிபுணர்கள் எச்சரிக்கின்றனர்.

பல கடைகளில் தந்தூரி சிக்கன் என்ற பெயரில் கோழி இறைச்சி மீது பல விதமான ரசாயனங்களை தடவி, எண்ணெய்யில் பொறித்து விற்கிறார்கள். குழந்தைகளுக்கு தேவையற்ற அளவில், பக்கெட் சிக்கன், சிக்கன் 65, சில்லி சிக்கன் என பல பெயர்களில், இந்த கோழி இறைச்சி விற்கப்படுகிறது. இது போன்ற முறையில் சமைக்கப்படும் உணவுகளும், அதை அளவுக்கு அதிகமாக உட்கொள்வதும் முற்றிலும் ஆபத்தானது என அறிவியல் ரீதியான கண்டுபிடிப்புகள் வெளியாகியுள்ளன,

நொறுக்கு தீனி சாப்பிடுவது மட்டுமே புற்றுநோய் ஏற்படுத்தும் என்று சொல்லமுடியாது. பல முக்கிய காரணங்களில் ஒன்று நொறுக்கு தீனி. அதிக அளவில் ரசாயனம் கலக்கப்பட்டுள்ள பிஸ்கட், சிப்ஸ், பொறிக்கப்பட்ட கோழி உள்ளிட்ட இறைச்சி வகைகள் மற்றும் செயற்கை வண்ணங்களை கொண்ட ரசாயன பழச்சாறுகள் போன்றவற்றை தொடர்ச்சியாக எடுத்துக்கொண்டு வரும் குழந்தைகள், ஆரோக்கியம் இல்லாமல், இளவயதில் புற்றுநோய் நோயாளியாக மாறுவதற்கு அதிக வாய்ப்பு உள்ளது,

தேவைக்கு மீறிய அளவில், பொறித்த துரித உணவுகள், பெரிய சூப்பர்மார்கெட்களில் கழிவு விலையில்(discount) விற்கப்படும் பிஸ்கட், கேக் போன்றவை, இலவச பொருட்களுடன் விற்கப்படும் தீனிகள் , சினிமா, விளையாட்டு பிரபலங்கள் விளம்பரம் செய்யும் ரசாயனம் சேர்க்கப்பட்ட பொருட்கள் ஆகியவற்றை பெற்றோர்கள் வாங்குவதை தவிர்க்கவேண்டும்

பெற்றோர்களின் உண்ணும் பழக்கம் குழந்தைகளிடம் அதிக தாக்கத்தை ஏற்படுத்தும். சிறுவயதில் இருந்து குழந்தைகளிடம் விளம்பரம் செய்யப்படும் பொருட்களுக்கும், வீட்டில் தயாரிக்கப்படும் ஆரோக்கியமான உணவுக்கும் இருக்கும் வித்தியாசத்தை சொல்லவேண்டும். குழந்தைகளுக்கு புரியவைக்க பெற்றோர்கள் முயற்சி செய்வதுதான் குழந்தைகளின் ஆரோக்கியத்தைக் காப்பாற்ற பெற்றோர்கள் செய்யும் முதல் முயற்சி ஆகும்.

குழந்தை பிறந்து ஒரு மாதமே ஆன நிலையில் குழந்தை பராமரிப்பில் பெற்றோர்களுக்கு நிறைய குழப்பம் ஏற்படலாம். பெற்றோருக்கு இந்த குறிப்புகள் உதவியாக இருக்கும்.

* புதிதாக பிறந்த குழந்தைகள் பகலில் அதிக நேரம் தூங்குவார்கள். இரவில் விழித்திருப்பார்கள். அவர்களது உணவு முறை மற்றும் தூக்க முறை குறித்து குழப்பங்கள் இருக்கலாம்.

* பிறந்த குழந்தைக்கு நாள் ஒன்றுக்கு கணக்கில்லாமல் பல முறை உணவளிக்க வேண்டும். குழந்தைக்கு ஒரு மாதம் வரை ஆறு முறைக்கு மேல் உணவளிக்க வேண்டும். 12 முறை வரை உணவளிக்கலாம். 

* குழந்தை அதிக நேரம் தூங்குவார்கள் ஆனாலும் குழந்தையின் உணவு நேரத்தை கட்டுப்படுத்த கூடாது. குழந்தையை தட்டி எழுப்பியாவது பசியாற செய்ய வேண்டும்.

* பிறந்த குழந்தையின் வளர்ச்சி ஆழ்ந்த தூக்கத்தில் உள்ளது. 1 மாத குழந்தை பராமரிப்பில் தூக்க முறைகளை கவனிப்பது முக்கியமானது. தூங்கும் நேரம் சரியாக கணக்கிட முடியாது. குழந்தைகள் தூங்கும் நேரம் மாறுபடும். குழந்தைகள் நாள் முழுவதும் தூங்க முயற்சிக்கிறார்கள்.

* ஒரு மாத கைக்குழந்தையை அவரவர் வசதிக்கேற்ப தூங்க விடுங்கள். குழந்தையின் தூக்க குறிப்புகளை உணர்ந்து கொள்ளுங்கள். பெரும்பாலான குழந்தைகள் உணவளித்த உடனேயே தூங்கிவிடுவார்கள். அவர்களது தூக்கத்தை கெடுக்காமல் இருக்க வேண்டும்.

* குழந்தை விழித்திருக்கும் நேரம் மிக குறைந்த நேரம். குழந்தை விழித்திருக்கும் போதெல்லாம் அவர்களுடன் பழகுங்கள். குழந்தையின் பெயரை சொல்லி அழையுங்கள். குழந்தை திரும்ப மாட்டார்கள். ஆனால் அவர்களால் புரிந்து கொள்ள முடியும். கேட்க முடியும். குழந்தைகள் இசையை கவனிப்பார்கள்.

* குழந்தையின் தலையை நேராக வைத்து கண்களை நோக்கி பேசுங்கள். குழந்தையால் பேசுவதை புரிந்து கொள்ள முடியும்.

* குழந்தையை படுக்க வைக்கும் இடம் பாதுகாப்பாக இருக்கட்டும். குழந்தைக்கு தீங்கு விளைவிக்காத இடத்தில் படுக்க வையுங்கள்.

* குழந்தை படுக்கும் அருகில் தொட்டிலில் பொம்மைகள் மற்றும் பிற பொருள்கள் வைப்பதை தவிருங்கள்.

* குழந்தையை தூக்கும் போதும் கவனமாக தூக்குங்கள்.

* குழந்தை பிறந்த ஒரு மாதத்துக்குள் அவருக்கு தடுப்பூசி தேவைப்படலாம். தடுப்பூசி அட்டவணைக்கேற்ப குழந்தைக்கு தடுப்பூசிகள் போட வேண்டும். குழந்தைக்கு தொற்றுநோய் அல்லது நோயாளிகள் உடன் நெருக்கமான தொடர்பை தவிர்க்க வேண்டும்.

* குழந்தையை தூக்கும்போதும் தாய்ப்பால் கொடுக்கும்போதும் கைகளை, உடலை சுத்தமாக வைத்திருங்கள். குழந்தையின் டயபரை அவ்வப்போது மாற்றி விட் வேண்டும். தூய்மையும் சுகாதாரமும் குழந்தையின் வளர்ச்சியை சிறப்பானதாக்கும்.

குழந்தைகள் இயல்பாகவே கள்ளம் கபடமற்றவர்கள். அவர்கள் மற்றவர்களிடம் பார்க்கும் மற்றும் கேட்கும் விஷயங்களை அப்படியே செய்வார்கள். எனவே அவர்கள் முன் நாம் செய்யும் ஒவ்வொரு விஷயத்தையும் கவனமாக செய்ய வேண்டும்.

* உங்கள் குழந்தையின் முன் வாக்குவாதத்தில் ஈடுபட வேண்டாம். குழந்தையின் முன் வாக்குவாதத்தில் ஈடுபடுவது குழந்தையின் மன அமைதியை பாதிப்பதோடு, அவர்களை கடின உள்ளம் கொண்டவர்களாக மாற்றும். நாம் செய்யும் அனைத்து செயலையும் அவர்கள் அப்படியே வெளியுலகத்தில் பிரதிபலிக்கலாம்.

* குழந்தைகளின் முன் மது அருந்துவது மற்றும் புகைப்பிடிக்கும் பழக்கத்தை செய்ய வேண்டாம். குழந்தைகள் பல விஷயங்களை நம்மை பார்த்து கற்றுக்கொள்வார்கள். தந்தை செய்யும் பழக்கம் சரி தான் என நம்ப நேரிடும். எனவே, குழந்தைகளின் முன் தீய பழக்கங்களில் ஈடுபட வேண்டாம்.

* உங்கள் குழந்தையின் முன் கெட்ட வார்த்தைகளை பயன்படுத்த வேண்டாம். குழந்தைகளின் முன்பு நீங்கள் பயன்படுத்தும் வார்த்தைகள், அவர்களின் மனதில் ஆழமாக பதிந்துவிடும். அதை அவர்கள் மற்றவர்களிடம் பேசுவதற்கு வாய்ப்பு அதிகம்.

* குழந்தைகளின் முன் மற்றவர்களை பற்றி தவறாகவோ அல்லது இழிவாகவோ பேச வேண்டாம். அப்படி செய்வதால் அந்த நபர் பற்றி, குழந்தைகள் தங்கள் மனதில் தவறான கருத்துக்களை வளர்த்துக்கொள்ள நேரிடும்.

* மற்றவர் முன் உங்கள் குழந்தைகளையோ அல்லது மற்றவர் பற்றி உங்கள் குழந்தைகளின் முன் ஒப்பிட்டு பேசுவது தவறான விஷயம். இவ்வாறு செய்வது அவர்களை மனதளவில் பாதிப்புக்கு உள்ளாக்கும். 

* ஸ்மார்ட்போன், மடிக்கணினி, ஹெட்போன், வீடியோ கேம் போன்ற தொழில்நுட்ப சாதனங்களை குழந்தைகளின் முன் அதிகம் பயன்படுத்த வேண்டாம். இவ்வாறு பயன்படுத்துவது அவர்களை தனிமையாக உணர வைக்கும்.

* பொதுவாகவே கணவன், மனைவியை அடிப்பதும், மனைவி கணவரை அடிப்பதும் தவறு. இருப்பினும் இதுபோன்ற விஷயங்களை குழந்தைகள் முன் செய்யாமல் இருப்பது நல்லது. அதேபோல் அடிக்கடி திட்டுவதும் தவறு. இதனால் குழந்தைக்கும் அவரை பற்றிய தவறான கருத்தை மனதில் பதியக்கூடும்.

* பெற்றோர் முடிந்தவரை குழந்தைகளின் முன் பொய் பேசுவதைத் தவிர்க்க வேண்டும்.

* உடலுக்கு கெடுதலை உண்டாக்கும் உணவுகளை சாப்பிடக்கூடாது என்கிற அறிவுரையை குழந்தைகளுக்குச் சொல்வதோடு பெற்றோரும் கடைபிடிக்க வேண்டும்.

இன்றைய இணைய உலகில் மொபைல் போன்கள் அவசியமாகிவிட்டன. மொபைல்போன் இல்லாத வாழ்க்கை பலருக்கு சங்கடமாக இருக்கிறது. ஒவ்வொரு மனிதனும் எல்லா நேரங்களிலும் தம்முடன் எடுத்துச்செல்லும் அத்தியாவசிய பொருட்களில் ஒன்றாக மாறிவிட்டது.

நம்மில் பலர் தூங்கும்போது கூட மொபைல் போன்களை பக்கத்திலேயே வைத்திருப்போம். இந்த ஸ்மார்ட்போன் மோகம் குழந்தைகளையும் விட்டுவைக்க வில்லை. சிறு வயது குழந்தை முதல் பெரியவர்கள் வரை மொபைல் போன்களில் சிக்கிக்கொள்ளும் அவலநிலையே இன்றளவும் தொடர்ந்து நடந்துகொண்டிருக்கிறது.

வாட்ஸ் அப்பில் தங்கள் நண்பர்களுடன் அரட்டை அடிப்பது, இன்ஸ்டாகிராமில் படங்களை பகிர்வது, பேஸ்புக்கில் இடுகைகளை இடுவது, யூடியூப்பில் வீடியோக்கள் பார்ப்பது, ரீல்ஸ் எடுப்பது மற்றும் கேம்கள் விளையாடுவது போன்று குழந்தைகள் மணிக்கணக்கில் செல்போனில் தான் அவர்களைது நேரத்தை செலவிடுகின்றனர்.

ஸ்மார்ட் போன் தொழில்நுட்பத்தில் குறிப்பிடத்தக்க நன்மைகள் இருந்தாலும் அது அதிகம் தீங்கு விளைவிக்கும் விளைவுகளையே கொண்டுள்ளது.

மொபைல் போன்கள் குழந்தைகளின் மூளையை பாதிக்கிறது. மற்றும் பிற உடல் செயல்பாடுகளுக்கும் தீங்கு விளைவிக்கிறது. செல்போன்களில் இருந்து வெளியாகும் கதிர்வீச்சு அவர்களது மூளையை பெரிதும் பாதிப்பதாக மருத்துவர்கள் கூறுகிறார்கள். மொபைல் போன்களை அதிகநேரம் பயன்படுத்துவது, தூங்கும் போது அருகில் வைத்திருப்பது ஆகியவற்றால் அவர்களின் மூளை பாதிக்கப்படும்.

மேலும் குழந்தைகள் மொபைல் போன்களை பயன்படுத்துவதால் அவர்களின் கண்களும் பாதிக்கப்படுகின்றன. மொபைல் போன் திரைகளை நீண்டநேரம் வெளிப்படுத்துவது நம் கண்களில் குறிப்பிடத்தக்க அழுத்தத்தை கொடுப்பதாக நிரூபிக்கப்பட்டுள்ளது. இதன் விளைவாக கடுமையான கண்பார்வை தொடர்பான பிரச்சினைகள் ஏற்படும். வீடியோ கேம்களை நீண்டநேரம் விளையாடும் போது விழித்திரை பாதிக்கப்பட்டு தூக்கமின்மைக்கு வழிவகுக்கிறது மற்றும் கண்களில் விரும்பத்தகாத தாக்கங்களை உண்டுபண்ணுகிறது.

உட்கார்ந்த நிலையிலேயே இருந்து செல்போன் கேம் விளையாடுவதால் அவர்களின் முதுகெலும்புகள் பாதிக்கப்படுகின்றன. மேலும் உடல் பருமன், சோம்பல், மனச்சோர்வு போன்ற பல்வேறு பிரச்சனைகளுக்கு வழிவகுக்கும்.

குழந்தைகள் அதிக நேரம் மொபைல் போன்களுக்கு அடிமையாகி விடுவதால், படிப்பிற்கு நேரம் ஒதுக்குவது குறைவு. இது அவர்களின் கல்வி முன்னேற்றம் மற்றும் செயல்திறனில் பாதிப்பை ஏற்படுத்துகின்றன.

மொபைல் ஃபோன்களைப் பயன்படுத்தும் குழந்தைகள் டிஜிட்டல் அடையாள மோசடி, சைபர்புல்லிங், ஃபிஷிங், மால்வேர் போன்ற பல்வேறு சைபர் கிரைம்களுக்கு ஆளாகின்றனர். இந்த சைபர் குற்றங்கள் குழந்தைகளின் நுட்பமான மனதில் ஆழ்ந்த மன, உடல் மற்றும் பொருளாதார தாக்கத்தை ஏற்படுத்தும்.

இணைய உலகம் பெரும்பாலும் கட்டுப்பாடற்றது. உலகளவில் பொருளாதாரங்கள் கட்டுப்பாடுகளுடன் வரும் அதே வேளையில், இணையத்தில் உள்ள உள்ளடக்கம் இன்னும் பெரும்பாலும் கட்டுப்பாடற்றதாகவே உள்ளது. இது குழந்தைகளுக்குப் பொருத்தமில்லாத உள்ளடக்கத்தை அணுகுவதற்கான வாய்ப்பை குழந்தைகளுக்கு ஏற்படுத்துகிறது.

அதிகப்படியான வன்முறை, போலிச் செய்திகள், ஆபாசப் படங்கள் மற்றும் பிற பொருத்தமற்ற காட்சிகள் அல்லது செய்தி அனுப்புதல் ஆகியவற்றைக் கொண்ட உள்ளடக்கம் குழந்தைகளின் நுட்பமான ஆன்மாவில் ஆழமான மற்றும் நீண்டகால தாக்கத்தை ஏற்படுத்தும். இந்த பதிவுகள் அவர்களின் சிந்தனை மற்றும் மனநிலையில் அழியாத வடுக்களை ஏற்படுத்தலாம். பெற்றோர்கள் யோசித்து செயல்படுங்கள்.

குழந்தைப் பருவத்தில் வாசிக்கும் பழக்கத்தை அறிமுகப்படுத்தி விட்டாலே போதும் அவர்கள் வளர வளர படிக்கும் ஆர்வம் தானாகவே வரும்.

புத்தகங்களை படிக்கும் குழந்தைகள் இயல்பாகவே அறிவுத் திறனையும், கற்பனை ஆற்றலையும், நினைவாற்றலையும் பெற்று விடுகின்றனர். இத்தகைய ஆற்றலால் பள்ளிப் பாடங்கள் படித்தல் கூட எளிதாக வசப்பட்டு விடுகிறது.

படிக்கும் போதே மகிழ்ச்சியைத் தருவது புத்தகங்கள் என்பது மறுக்க இயலாத உண்மை. புத்தகங்களைப் படிக்கும் குழந்தைகள் அதில் வரும் பாத்திரங்களை மனதில் காட்சிப் படுத்தும் போதே கற்பனைத் திறன் விரிவடைகிறது.

மனம் சோர்ந்திருக்கும் போது ஊக்கத்தை தருவதும் புத்தகங்கள் தான். அறம் சார்ந்த சிந்தனைகளையும் சமூகம் சார்ந்த தாக்கத்தையும் ஏற்படுத்த முயல்வதும் புத்தகங்கள் தான்.

ஒரு குழந்தையை நேர்மையான வழியில் நடக்க வைப்பதற்கும், சிறந்த சமூக செயற்பாட்டாளானாக அவனை உருவாக்குவதிலும் புத்தகங்கள் பெரும்பங்கு வகிக்கின்றன.

புத்தகங்களைப் போன்ற சிறந்த வழிகாட்டி எதுவும் இல்லை. நல்ல நண்பனாக நம்முடன் பயணிப்பவை புத்தகங்கள். நம் சிந்தனையைத் துாண்டவும், சிந்தனையை புதுப்பிக்கவும் உதவுவது புத்தகங்கள்.

நம் மனதை உழுது, அதில் நல்ல பண்புகளை விதைப்பது புத்தகங்கள். சிறந்த வாசிப்பாளனால் மட்டுமே சிறந்த எழுத்தாளானாக முடியும்.

எனவே பெற்றோர்கள் புத்தகங்களை வாசிக்கும் குழந்தைகளை சின்ன சின்ன பரிசுகள் கொடுத்து ஊக்கப்படுத்துங்கள்.

படித்த புத்தகத்தில் உள்ள செய்திகள் பற்றி கலந்துரையாடுங்கள். குழந்தைகளின் பிறந்த நாளில் புத்தகங்களை பரிசளியுங்கள். கதைகளை படிக்கும் குழந்தைகளை பின்னர் அந்த கதையை கூறச் செய்யலாம்.

கதை சொல்லிகளாக இருந்த பாட்டிகள் விட்டுச் சென்ற வெற்றிடத்தை குழந்தைகளைக் கொண்டு நிரப்புங்கள். பின்னாளில் அவர்களை சிறந்த கதை சொல்லிகளாக உருவாக்கும் நல் வாய்ப்பை புத்தகங்கள் வழங்குகின்றன.

முதலில் பெற்றோர் முன்னுதாரணமாக இருந்து புத்தகங்களை வாசிக்க வேண்டும். குழந்தைகளுக்கும் அப்பழக்கம் இயல்பாக மாறிவிடும்.

தேடலை உருவாக்கி அவர்களின் சிந்தனைகளைத் துாண்டிவிடும். புத்தகங்களைப் படிக்கும் போது அவை நம்மை அந்த காலத்திற்கே கடத்திச் செல்லும். இயற்கை காட்சிகளை கண்முன் கொண்டு வந்து நிறுத்தும். வரலாற்றுக் காலத்தின் சுவடுகளில் அவர்களை பதிய விடும்.

மலச்சிக்கல் என்பது பெரியவர்களுக்கு மட்டும் அல்ல. பிறந்த குழந்தைகளுக்கு கூட வரலாம். குழந்தைகளின் அழுகை, மலம் கழிக்கும் போது அலறல் மற்றும் முக மாற்றம் போன்ற அறிகுறிகளோடு மலச்சிக்கலை பெற்றோர்கள் அறியலாம்.

பிறந்தது முதல் 6 மாதம் வரை உள்ள குழந்தைகள் தாய்ப்பால் மட்டும் குடிப்பவர்களாக இருந்தால் அவர்கள் மலம் கழித்தல் என்பது தாய்ப்பாலுக்கு பிறகு இருக்கும். நாள் ஒன்றுக்கு இரண்டு முறை. சில நேரங்களில் பிறந்த உடன் 5 முதல் 7 வரை இருக்கலாம். இது இயல்பானது.

குழந்தைகள் இரண்டு வாரங்கள் வரை கூட மலம் கழிக்காமல் இருப்பார்கள் அல்லது தாமதமாகலாம். எனினும் குழந்தைகளுக்கும், பெரியவர்களுக்குமான மலச்சிக்கலின் அறிகுறிகள் மாறுபடும். சில நாட்கள் வரை குழந்தைகள் மலம் கழிக்காமல் இருக்கலாம்.

அறிகுறிகள்:

* மலம் வெளியேற்றும் போது குழந்தை சிவந்த முகத்துடன் 10 நிமிடங்களுக்கு மேல் கஷ்டப்படலாம். இது மலம் கழிப்பதில் சிரமத்தை குறிக்கிறது.

* மலம் கழிக்கும் போது குழந்தை குழப்பமடையலாம். இது வலியுடன் இருப்பதை குறிக்கிறது.

* மலம் கழிக்கும் போது வாயு திரட்சியால் வயிறு வீங்குவது. வாயு வெளியேற்றம் கடினமாக இருப்பது.

* மலம் வெளியேறாமல் ஆசனவாய் வாய்பகுதியில் நீண்ட நேரம் இருப்பது.

* குழந்தையின் வயிறு வழக்கத்திற்கு மாறாக வீங்கியதாகவும் தொடுவதற்கு கடினமாகவும் இருக்கலாம்.

* கடுமையான மலச்சிக்கல் என்கோபிரெசிஸை ஏற்படுத்தலாம் இது குழந்தையின் டயபர் அல்லது உள்ளாடைக்குள் ஒரு சிறிய அளவு திரவ மலம் தன்னிச்சையாக கசிவை உண்டாக்கலாம்.

* கடுமையான சந்தர்ப்பங்களில் குழந்தை நகரும் போது மலத்தில் ரத்தப்போக்கு உண்டாகலாம். குழந்தை மலத்தை வெளியேற்ற சிரமப்படலாம். மலம் கழிக்கும் வழக்கத்தில் மாற்றங்கள் தொடர்ந்து இருந்தால் மலச்சிக்கல் இருக்கலாம்.

மலச்சிக்கல் உண்டாக காரணம்:

* குழந்தைக்கு போதுமான தாய்ப்பால் கிடைக்கவில்லை என்றால் அரிதாக கடினமான மலத்தை கவனிக்கலாம்.

* தண்ணீர் குடிக்காததால் மலச்சிக்கல் ஏற்படலாம்.

* திட உணவில் குறைந்த நார்ச்சத்து இருப்பதால் மலத்தை கடினப்படுத்தலாம்.

* மலச்சிக்கல் உண்டாவது இரைப்பை குடல் நோய்த்தொற்றின் விளைவாக இருக்கலாம்.

கையில் தாங்கு தாங்குவென தாங்கி குழந்தைகளை வளர்க்கின்றோம். ஹச் என்று தும்பியவுடன் மருத்துவர் வீட்டு வாசலில் நின்றுவிடுகின்றோம். அல்லது நாமாக உடனடியாக மருந்து மாத்திரைகளை கொடுத்துத் விடுகின்றோம். ஏ

உடம்பில் பிரச்சனை என்றால் தானாக சரிசெய்துகொள்ளும் திறமை உடம்பிற்கு உள்ளது. ஆனால் இந்த immunity மற்றும் resistance தன்மையை உடனடி மருத்துவம் பார்த்துத் அடியோடு அழித்துத் விடுகின்றோம். மருத்துவம் இல்லாமலே குணமாகிவிடும், அதற்காக மருத்துவரை பார்க்கவே வேண்டாம் என்று அர்த்தமில்லை, அவரை எப்போது பார்ப்பது என்பதில் புரிதல் வேண்டும்.

கையில் தாங்குவதால் உடலுக்கு மட்டுமல்ல மனதிற்கு பெரும் பாதகத்தினை குழந்தைகளுக்கு செய்துவருகின்றோம். கண்ணில் இருந்து கண்ணீர் வரக்கூடாது. என் குழந்தை அழக்கூடாது. என் குழந்தை தோற்கக்கூடாது என்ற எண்ணங்கள் வெகுவாக எல்லா பெற்றோர்களிடமும் இருக்கும்.

இதனால் என்ன நடக்கின்றது. கேட்டது உடனே கிடைக்கவேண்டும் என்ற மனப்போக்கு வந்துவிடுகின்றது. சக குழந்தைகளுடன் விளையாட விடுவதில்லை. பிஞ்சுகளின் கால்கள் மண்ணை தொட்டே மாமாங்கம் கடந்திருக்கும். பெருவாரியான இடங்களில் மண்ணை பார்க்க கூடா முடியாத அவலம். அப்படியே இருந்தாலும் விளையாட்டு என்பது இல்லை. இன்னொரு

வருத்தமான விஷயமும் இருக்கின்றது. குழந்தைகள் ஒன்றாக கூடினால் அவர்களுக்கு தானாக விளையாட வருவதில்லை.

தொலைக்காட்சி சம்பந்தமாகவே அவர்கள் விளையாட்டுகளை கட்டமைக்கின்றார்கள். பூங்காக்களில் விளையாடும் போது பெற்றோர்களின் கண் பார்வையிலேயே விளையாட வேண்டும். சருக்காமரத்தில் குழந்தை ஏறுவதற்கு அங்கே வந்து பெற்றோர்கள்

ரெக்கமெண்டேஷன் கொடுப்பார்கள் அல்லது பெற்றோர்கள் உடன் வராத குழந்தைகளை பின்னுக்கு தள்ளிவிட்டு தன் குழந்தையை நீ விளையாடு என்பார்கள். குழந்தையை சுற்றி ஒரு கண்ணோ ஒரு கைப்பிடியோ இருந்துகொண்டே இருக்கின்றது. கீழே விழுந்துவிட்டால் உடனே இதுக்கு தான் சொன்னேன் இங்க எல்லாம் விளையாட வேண்டாம்னு. ஆனால் கடந்த தலைமுறையினரை யாரைக்கேட்டாலும் அவர்கள் யார் மேற் பார்வையிலும் விளையாடி இருக்க மாட்டார்கள். என்ன விளையாடினீர்கள் என்றாலும் தெரியாது ஆனால் காலை முதல் இருட்டும்வரை விளையாடி இருப்பாகள். கீழே விழுந்தால் முட்டியில் எச்சில் தொட்டு போயிக்கிட்டே இருப்பார்கள்.

தோல்வியை சுவைக்கவே கற்றுத்தருவதில்லை. வலியை அவர்கள் அண்ட விடுவதில்லை. செயற்கையாக வலியை கொடுக்கச் சொல்லவில்லை, செயற்கையாக தோல்விகளை சந்திக்கச் சொல்லவில்லை ஆனால் அவை நிகழும் போது அது வாழ்வில் ஒரு அங்கமென கற்றுத்தர வேண்டும். அல்லது அதனை கண்டும் காணாதது போலவும் இருந்துவிடலாம். விழுந்துவிட்டால், தட்டி விட்டு ஓடு. தோல்வியை ஏற்றுக்கொள்ள கற்காவிட்டால் வாழ்வின் அடுத்த அடுத்த படிகளில் பெரும் சிரமங்களை சந்திப்பார்கள். நட்பு வட்டம் குறுக்கிக்கொண்டே இருக்கும்.

வாழ்கை என்பது வெற்றிகளால் மட்டுமே கட்டமைக்கப்பட்டு இருக்காது, அது பெரும் திருப்பத்துடனும் அதிர்ச்சிகளுடன் நிரம்பியதாக இருக்கக்கூடும்.

பல நாடுகளில் பல நாட்டவர்கள் உண்ணும்போது கைகளைப் பயன்படுத்துவதில்லை. வேறு உபகரணங்களைக் கொண்டே வாயில் உணவை எடுத்து வைக்கின்றனர். ஆனால் அரிசி மற்றும் அதுசார்ந்த உணவுப் பொருட்களை பிரதானமாக உண்ணும் நாம் கையால் உண்ணும் வழக்கத்தையே காலங்காலமாக மேற்கொள்கிறோம்.

உணவு உண்ணுதல் என்பது மனிதன் உயிர் வாழ்வதற்கான ஒரு மிக முக்கியமான வாழ்க்கை நடவடிக்கை. அதேசமயம், அது ஒரு சமூக நிலையில் ஏற்கப்படக்கூடிய முறைகளை உள்ளடக்கிய ஒரு நடவடிக்கையாக இருக்க வேண்டியதும் அவசியமாகிறது.

பல நபர்கள், எத்தனை வயதாகியும், சமூகத்தால் ஏற்கப்படக்கூடிய முறையில், உணவு உண்ணும் வழக்கத்தை பின்பற்றக்கூடிய நிலையில் இல்லாதவர்களாக இருக்கிறார்கள். அவர்கள் உண்ணும் முறை பார்க்கும் பலரை முகம் சுளிக்க வைக்கிறது.

எனவே, இளமையில் கல் என்ற முதுமொழிக்கு ஏற்ப, குழந்தைப் பருவத்திலேயே, நாகரீகமான முறையில் உணவு உண்ணுதல் எப்படி என்பதை நம் குழந்தைகளுக்கு கற்றுக்கொடுக்க வேண்டியுள்ளது.

சாப்பிடும்போது விரல்களை மட்டுமே பயன்படுத்தி உண்ணுமாறு கூற வேண்டும். சாப்பிடும்போதும், பிசையும்போதும் உள்ளங்கை வரை உணவு செல்லக்கூடாது.

மேலும், உணவை எடுத்து வாயில் வைக்கும்போது, சரியான அளவில் உணவை எடுக்க வேண்டும் என்று அறிவுறுத்த வேண்டும். ஏனெனில், தேவைக்கும் அதிகமான அளவில் உணவை எடுத்து வாயில் வைக்கும்போது, இடம் போதாமல் உணவு சிந்தும் நிலை ஏற்படுகிறது. இதைப் பிறர் பார்ப்பதற்கு நன்றாக இருக்காது.

உணவை வாயில் வைத்தப் பின்னர், அதை மூடிய நிலையில் மெல்லுமாறு குழந்தைகளுக்கு அறிவுறுத்த வேண்டும். அப்போதுதான் சவக் சவக் என்ற அநாகரீகமான சத்தம் வராது.

உண்ணும்போது, சற்று குனிந்து செயல்பட வேண்டிய அவசியத்தை உணர்த்த வேண்டும். ஏனெனில், அப்போதுதான் தட்டிற்கும், வாய்க்கும் இடையேயான இடைவெளி குறைந்து, உணவு தேவையற்ற இடங்களில் சிந்துவதை தவிர்க்க முடியும்.

டைனிங் டேபிளில் அமர்ந்து உண்ணும்போது, தட்டிற்கு கீழே விரிப்பை பயன்படுத்த வேண்டும். அப்போதுதான் உண்ணும்போது, உங்களின் குழந்தை தேவையற்ற இடங்களில் தட்டை நகர்த்தாமல், முறையான இடத்தில் தட்டை வைத்து உண்ணப் பழகும்.

தொலைக்காட்சியைப் பார்த்துக்கொண்டோ அல்லது எதையாவது படித்துக்கொண்டோ உண்பதற்கு, எந்த சூழலிலும் உங்களின் குழந்தையை அனுமதிக்க வேண்டாம்.

குழந்தைகள் சாப்பிடும்போது அவசரப்படுத்தக்கூடாது. இது ஒரு தவறான பழக்கம்.

டைனிங் டேபிளில் அமர்ந்து உண்ணும்போது, இரண்டு கால்களையும் கீழே தொங்கவிட்டு, ஒரு கையை டேபிளிலேயே தட்டிற்கு அருகே வைத்துக்கொண்டு, இன்னொரு கையைப் பயன்படுத்தி உண்பதற்கும், கீழே அமர்ந்து உண்ணும்போது, இரண்டு கால்களையும் மடக்கி வைத்துக்கொண்டு அமர்ந்து, ஒரு கையை கால்களின் மீது மடக்கி வைத்துக்கொண்டு, இன்னொரு கையால் சற்று குனிந்த நிலையில் இருந்து உண்பதற்கும் சொல்லித்தர வேண்டும்.

சிறு குழந்தைகள் சாப்பிடும்போது, அவர்களின் கைகள் மற்றும் கண்களுக்கு இடையிலான ஒருங்கிணைப்பு வலுவடைகிறது. மேலும், அதேசமயத்தில், அவர்கள் சமூகத்தால் ஏற்றுக் கொள்ளப்படும் வகையிலான உண்ணும் பழக்கத்தைக் கற்றுக் கொள்கின்றனர்.

எதையும் உண்ணும் முன்னதாக, கைகளைக் கழுவும் பழக்கத்தை உங்களின் குழந்தை கட்டாயம் பின்பற்றுவதை உறுதிசெய்ய வேண்டும். இதுதான் அனைத்திற்கும் அடிப்படை.