மற்றவை

துறவு என்பது 'பொருள்கள்' சம்பந்தப்பட்டது அல்ல...'எண்ணங்கள்' சம்பந்தப்பட்டது..

துறவு 'வெளியே' சம்பந்தப்பட்டதல்ல...'உள்ளே' சம்பந்தப்பட்டது...

துறவு 'உலகம்' சம்பந்தப்பட்டதல்ல...'ஒருவன்' சம்பந்தப்பட்டது...

ஒருநாள் ஒரு பிச்சைக்காரன், ஒரு துறவியின் இருப்பிடத்திற்குசென்றான்...

துறவியோ, சொகுசு மெத்தையில், அழகுக் கூடாரத்தில், தங்கக் கட்டிலில் இருந்தார்.

இதைக் கண்ட பிச்சைக்காரன் அதிர்ச்சியடைந்து,

'இது என்ன அநியாயம்' என்று கூவினான்.

பின்னர் அவரிடம்..."ஐயா, மதிப்பிற்குரிய துறவியாரே !உங்கள் ஞானம் பற்றியும், துறவு பற்றியும், பெரிதும் கேள்விப்பட்டிருக்கிறன்.

ஆனால், உமது இந்தக் கோலம்...சொகுசான சுற்றுப்புறம்...என்னைக் குழப்புகிறதே"என்றான்.

துறவி சிரித்துக் கொண்டேசொன்னார்...

"இவைகளை எல்லாம் இப்படியே விட்டுவிட்டு உன்னுடன் வர நான் தயார். இப்பொழுதே தயார்."என்று சொல்லியபடியே துறவி உடனே எழுந்தார்.

விறுவிறுவென பிச்சைக்காரனுடன் நடந்தார்.

செருப்பைக் கூட அணியவில்லை..

சிறிது தூரம் சென்றவுடன் பிச்சைக்காரன் பதைபதைத்துக் கூறினான்.

"ஐய்யோ ! என்னுடைப் பிச்சைப் பாத்திரத்தை, உங்கள் கூடாரத்திலேயே வைத்துவிட்டேன். அது இல்லாமல், நான் என்ன செய்வேன்?

தயவு செய்து கொஞ்சம் இங்கேயே இருங்கள். நான் போய் அதைக் கொண்டு வந்துவிடுகிறேன்!"

துறவி பெரிதாகச் சிரித்தார்.

பின் கூறினார்:

என் நண்பனே! என் கூடாரத்தில் உள்ள தங்கக்கட்டில் பூமியின் மேல்தான் நிற்கிறது."என் இதயத்தின் மேல் அல்ல.!"

ஆனால், உன் பிச்சைப் பாத்திரம் உன்னை இந்த துரத்து துரத்துவதாக இருக்கிறதே!"

"உலகத்தில் இருப்பது,பற்று இல்லை...

உன் மனதில் உலகம் இருப்பதுதான் பற்று.

உன் மனதிலிருந்து, இந்த உலகம் மறைந்துவிட்டால்...அதுதான் துறவு."

-ஓஷோ

கட்டிக்கொடுத்த சோறும் கற்றுக்கொடுத்த சொல்லும் எத்தனை நாள் நிற்கும்?

கட்டினவனுக்கு ஒரு வீடானால் கட்டாதவனுக்குப் பல வீடு.

கடலுக்குக் கரை போடுவார் உண்டா?

கடலைத் தாண்ட ஆசையுண்டு கால்வாயைத் தாண்டக் கால் இல்லை.

கடல் திடலாகும், திடல் கடலாகும்.

கடவுளை நம்பினோர் கைவிடப் படார்.

கடன் வாங்கியும் பட்டினி, கல்யாணம் பண்ணியும் பிரம்மச்சாரி.

கடித்த சொல்லினும் கனிந்த சொல்லே நன்மை.

கடுகத்தனை நெருப்பானாலும் போரைக் கொளுத்திவிடும்.

கடுகு சிறுத்தாலும் காரம் போகுமா?

கடுகு போன இடம் ஆராய்வார், பூசணிக்காய் போன இடம் தெரியாது.

கடுங்காற்று மழை கூட்டும் கடுஞ் சிநேகம் பகை கூட்டும்.

கடுஞ் சொல் தயவைக் கெடுக்கும்.

கடைந்த மோரிலே குடைந்து வெண்ணெய் எடுக்கிறது..

கங்கையில் மூழ்கினாலும் காக்கை அன்னம் ஆகுமா?

கணக்கன் கணக்கறிவான் தன் கணக்கைத் தான் அறியான்.

கணக்கைப் பார்த்தால் பிணக்கு வரும்.

கண் கண்டது கை செய்யும்.

கண்கெட்ட பின் சூரிய நமஸ்காரம்.

கண்டதே காட்சி கொண்டதே கோலம்.

கண்டது சொன்னால் கொண்டிடும் பகை.

கண்டால் ஒரு பேச்சு, காணாவிட்டால் ஒரு பேச்சு.

கண்ணிலே குத்தின விரலைக் கண்டிப்பார் உண்டோ?

கண்ணீர் வெந்நீரானாலும் நெருப்பை அணைக்கும்.

கப்பற்காரன் பெண்டாட்டி தொப்பைக்காரி, கப்பல் உடைந்தால் பிச்சைக்காரி

கப்பற்காரன் வாழ்வு காற்று அடித்தால் போச்சு.

கரணம் தப்பினால் மரணம்.

கருமத்தை முடிக்கிறவன் கட்டத்தைப் பாரான்.

கரும்பு கசக்கிறது வாய்க் குற்றம்.

கல்லடி பட்டாலும் படலாம் கண்ணடி படக்கூடாது.

கலகம் பிறந்தால் நியாயம் பிறக்கும்

கல்லாடம் [நூல்] படித்தவனோடு மல் ஆடாதே.

கல்லாதவரே கண்ணில்லாதவர்.

கல்லாதார் செல்வத்திலும் கற்றார் வறுமை நலம்.

கல்வி அழகே அழகு.

கல்வி இல்லாச் செல்வம் கற்பில்லா அழகு.

கல்விக்கு இருவர், களவுக் கொருவர்.

கவலை உடையோர்க்குக் கண்ணுறக்கம் வராது.

களை பிடுங்காப் பயிர் காற்பயிர்.

கழனி பானையில் கைவிட்ட மாதிரி.

கழுதைக்கு தெரியுமா கற்பூர வாசனை.

கள் விற்றுக் கலப்பணம் சம்பாதிப்பதைவிடக் கற்பூரம் விற்றுக் காற்பணம் சம்பாதிப்பது மேல்.

கள்ள மனம் துள்ளும்.

கள்ளம் பெரிதோ? காப்பு பெரிதோ!

கள்ளிக்கு முள்வேலி இடுவானேன்!

கள்ளைக் குடித்தால் உள்ளதைச் சொல்லுவான்.

கறையான் புற்று பாம்புக்கு உதவுகிறது.

கற்றது கைம்மண்ணளவு கல்லாதது உலகளவு.

கற்றோர்க்குச் சென்ற இடமெல்லாஞ் சிறப்பு.

கற்கையில் கல்வி கசப்பு, கற்றபின் அதுவே இனிப்பு.

கற்பில்லாத அழகு, வாசனை இல்லாத பூ.

கறப்பது கால்படி என்றாலும் உதைப்பது பல்லு போகவாம்..

கனவில் கண்ட பணம் செலவிற்கு உதவுமா?

கனிந்த பழம் தானே விழும்.

கனியை விட்டுக் காயைத் தின்பாளா?

- பிரகாஷ் முனுசாமி

அரைப்பாவாடையுடன்

ஓடியாடிய குழந்தை

திடுமென வளர்ந்து

ஆளாகி நிற்பதுபோல்

போன தீபாவளிக்கு

அஞ்சு வட்டிக்கு

வாங்கிய ஐயாயிரம்

பத்தாயிரமாய் வளர்ந்து-

பயமுறுத்தும்....!

கடன்காரர்களுக்கு

காரணம் சொல்லி

காரணம் சொல்லியே

அம்சமாய் இருந்த

மனைவி இன்று-

அரைக் கிழவியாகி _

நிற்பாள் ....!

யமக் கிங்கரர்களாய்

கனவிலும் வந்து

பயமுறுத்தும்

பால்காரன்

பேப்பர்காரன்

கடைக்காரன்

கூடவே.....

கைமாத்து கொடுத்த-

கடன்காரன்.........!

கடனாளியால்

கதவடைத்து

உள்ளிருந்தாலும்

கட்டாயம் வந்து விடுகிறது

மாதத்தில் இருமுறையேனும்

உறவுக்காரர் திருமணம்

இரண்டும்...

ஊர்த்திருவிழாவுக்கு

நன்கொடைகேட்கும்

அழைப்பிதழ்-

ஒன்றும்........!

வலிகளும் இரணங்களும்

வலைவிரித்துக்

காத்திருந்தாலும்

தீபாவளி என்னும்

ஒற்றைநாளில்

மலர்ந்து விடுகிறது

உலர்ந்து கிடந்த-

வாழ்க்கை.......!

அசராமல் மறுபடியும்

பத்துவட்டிக்கு

கடன்வாங்கி

பண்டிகையை

எதிர்நோக்குகையில்

மூத்தபெண்

ஆளான சேதியோடு

முறைசெய்ய வரச்சொல்லி

அழைப்பு வரும்-

தங்கையிடமிருந்து....!

குறிப்பிட்ட தேதிக்குள்

தவணைத்தொகை

கட்ட சொல்லி

கோர்ட்டிலிருந்து

நோட்டிஸ் வரும்..!

கைமாத்து

கொடுத்த நண்பன்

கதவுக்கு

வெளியே நிற்பான்..!

மறுநாள் முதல்

தொடரப்போகும்

மாயப்பிசாசுகளை

மறந்து..

ஒருநாளாவது

இருப்போமே-

இன்பமுடன்......!

-அழ. இரஜினிகாந்தன்

நாம் இன்று சாப்பிடும் உணவு இன்றிலிருந்து 70 ஆம் நாளில் விந்தாக மாறுகிறது. இந்த விந்து பெண்ணுக்கும் (சுரதோணியம்) உண்டு;

நமது உடலில் இருக்கும் எலும்பு மூட்டுக்களில் இந்த விந்துவை உற்பத்தி செய்யும் தொழிற்சாலைகள் இருக்கின்றன; இந்த விந்துவை அளவோடு செலவழித்தால், நாம் ஆரோக்கியமாக வாழமுடியும்.

நமது வேலை அல்லது தொழிலில் திறமையோடு சாதனைகள் செய்ய முடியும். நமது வாழ்நாள் முழுக்கவும் மூட்டுவலி வராமல் வாழ முடியும்.

நமது உடலுக்கு எடையைத் தருவது இந்த வெள்ளை அணுக்கள்தான்;இந்த வெள்ளை அணுக்கள்தான் நமது உடலுக்குள் புகும் காய்ச்சல், தலைவலி முதலான சிறு உபாதைகளை உருவாக்கும் நோய்க்கிருமிகளை எதிர்த்துப் போராடி, அழிக்கிறது.

நமது முகத்தில் தேஜஸ்ஸைத் தருகிறது. நமது இளமையைப் பாதுகாக்கிறது; நமது ஆரோக்கியத்தோடு, செல்வச் செழிப்பையும் ஈர்த்துத் தருகிறது.

இதை நாம் எந்த அளவுக்கு அளவாகப் பயன்படுத்துகிறோமோ, அந்த அளவுக்கு நமது உடல்நலம் சிறக்கும்; அதன் மூலமாக நமது மனநலமும் சிறப்பாக இருக்கும்;

மனநலம் சிறப்பாக இருப்பின், நமது குடும்ப நலமும் வலிமையாக இருக்கும்;

குடும்ப நலம் சிறப்பாக இருந்தால், நமது வெளித் தொடர்புகளான பிற குடும்பங்களுடனான உறவுகள் சிறப்பாக மிளிரும்.

நமது உடலைப் பாதுகாத்து வரும் வெள்ளை அணுக்களை அளவுக்கு மீறி வீணாக்கினால், முதலில் ஞாபக மறதி வரத்துவங்கும்; அத்துடன் அடிக்கடி வறட்டு இருமலும் உண்டாகும்.

இது நமக்கு மறைமுகமாக நமது உடலின் பாதுகாப்பு அமைப்பு விடும் எச்சரிக்கை ஆகும்

இந்த சேமிப்பு அளவுக்கு மீறும்போதுதான் நமது ஜாதகப்படி இருக்கும் தோஷங்கள், நவக்கிரகங்களில் ஏற்படும் தடைகள் அனைத்தும் நீங்கத் துவங்கும்.

"நாட்டில் வேலையில்லாத் திண்டாட்டம் அதிகரித்துவிட்டது."

"ஏழை மக்கள் சோற்றுக்குத் திண்டாடுகிறார்கள்."

இவ்வாறு, 'திண்டாட்டம்' என்ற சொல் நம்மிடையே பரவலாகப் புழக்கத்திலிருக்கும் ஒன்றாகும்.

ஒன்றன் பற்றாக்குறையால் ஏற்படும் துன்பத்தைக் குறிக்க நாம் இச்சொல்லைப் பயன்படுத்துகிறோம்.

இதன் பின்னணி என்ன?

அந்நாளில் ஊர்களிலுள்ள சந்திகளிலும் பொது இடங்களிலும் திண்டுகள் இருப்பதுண்டு; திண்டு என்பது சிறு திண்ணையைக் குறிப்பது. அந்தத் திண்டுகளில் குறச்சிறுமியர் சோறு வேண்டிக் கூத்தாடுவது வழக்கமாக இருந்திருக்கிறது. அவ்வாறு கூத்தாடுகின்ற சிறுமியர்க்கு இரக்கமுள்ள மக்கள் உணவளித்திருக்கிறார்கள்.

எனவேதான் இவர்களைப் போல ஒருவன் சோறில்லாமல் இடர்ப்படும்போது, "அவன் சோற்றுக்குத் திண்டாடுகிறான்" என்று கூறுகின்ற வழக்கம் ஏற்பட்டிருக்கின்றது. இதன் நீட்சியாகத்தான் வேலைவாய்ப்பின்மையையும், ஈதொத்த பிற இடர்ப்பாடுகளையும் குறிக்க நாம் திண்டாட்டம் என்ற சொல்லை இன்றும் பயன்படுத்திவருகிறோம்.

இதுபோலவே 'தாளம் போடுதல்', 'சிங்கி அடித்தல்' போன்றவையும் வறுமையால் ஏற்படும் இழிநிலையைக் குறிக்க நம்மிடையே பயன்பாட்டிலிருக்கும் வேறுசில சொற்கள்.

ஒன்றைக் கவனித்தீர்களா?

ஆடுதல், பாடுதல், இசைக்கருவிகள் வாசித்தல் போன்ற உயர்ந்த கலைகள்கூட அவற்றிற்கு மதிப்பளிக்கக்கூடிய இடங்களில் நிகழ்த்தப்பெறவில்லையெனில் மரியாதை இழந்து இழிநிலை அடைந்துவிடுகின்றன.

இருக்கும் இடத்தில் இருந்தால்தான் எல்லாருக்கும்/எல்லாவற்றுக்கும் மதிப்பு; இல்லையேல் அவமதிப்பே!

-மேகலா இராமமூர்த்தி

ஒரு முறை விஞ்ஞானி நியூட்டனிடம் ஒரு பெண்மணி வந்து, "மிஸ்டர் நியூட்டன் அவர்களே!, இந்த கண்டுபிடிப்புக்களை எல்லாம் எப்படி உங்களால் கண்டுபிடிக்க முடிந்தது?" என கேட்டாள்.

அதற்கு நியூட்டன் "இலகுவான விடயம், பூமியில் கீழே விழும் பொருட்கள் பற்றி சிந்திப்பதில் நான் தினமும் என் நேரத்தைச் செலவழித்தேன். அதனால் இலகுவாக கண்டுபிடிக்க முடிந்தது" என்றார்.

அதற்கு அந்தப் பெண்மணி "நானும்தான் நாளாந்தம் பல மணிநேரம் சிந்திக்கிறேன், ஆனால் எதுவும் ஆகவில்லையே!" என்றாள்.

"நீங்கள் எது பற்றி சிந்திக்கிறீர்கள்?"

"என்னுடன் சண்டைபிடித்து, என்னை விட்டுப் பிரிந்து சென்ற என் கணவரைப் பற்றித்தான்!"

"நீங்கள் இருவரும் பிரிவதற்கு முன்னால் சிந்தித்தீர்களா? அல்லது பிரிந்த பின்னால் சிந்தித்தீர்களா?" .

"பிரிந்த பின்னர்தான்"

"நீங்கள் பிரியும் முன்னர் உங்கள் கணவர் பற்றி சிந்தித்திருத்தால், அற்புதமான ஈர்ப்பு சக்தி விதியை கண்டுபிடித்திருப்பீர்கள்!" என்றார் நியூட்டன்.

-இம்ரான் பாரூக்

மார்பகப் புற்று நோயைக் கண்டறிய சுயமாக செய்து கொள்ளும் எளிய பரிசோதனை குறித்த செய்முறை விளக்கம்

இருபது வயதைக் கடந்த அனைத்து மகளிரும் மாதம் ஒருமுறை தங்களின் மாதவிடாய் காலம் முடிந்து ஒரு வாரத்திற்குப் பிறகு பின்வரும் சுய மார்பகப் பரிசோதனையை கட்டாயம் செய்யவும்

முதல் படி:

முகம் பார்க்கும் கண்ணாடி முன் நின்று கொண்டு தங்களின் இருபக்க தோள்பட்டைகளையும் நேராக வைத்துக் கொண்டு கைகளை கீழே தொங்க விட்டுக் கொள்ளுங்கள்.

இப்போது தங்களின் இருபக்க மார்பகங்களிலும் அளவிலோ வடிவத்திலோ நிறத்திலோ ஏதேனும் மாற்றத்தை காண்கிறீர்களா? ஏதேனும் வீக்கத்தைக் காண்கிறீர்களா?

இப்போது உங்களின் இரு கைகளையும் மேலே தூக்கிக் கொண்டு மேற்கூறியவற்றைப் பார்க்கவும்.

இரண்டாவது படி:

தங்களின் தோள்பட்டைப் பகுதிக்குக் கீழ் தலையைணையை வைத்துப் படுத்துக் கொண்டு, தங்களின் இடது கையை வைத்து வலது புற மார்பகத்தையும் வலது கையை வைத்து இடது புற மார்பகத்தையும் தொட்டு உணர்ந்து பாருங்கள்.

மூன்றாவது படி:

உங்களின் நடு மூன்று விரல்களின் உள்ளங்கைப் பகுதியைக் கொண்டு அங்குலம் அங்குலமாக தங்களின் மார்பகங்களை அழுத்திப் பரிசோதனை செய்யுங்கள்.

தங்களின் மூன்று விரல்களையும் தட்டையாக சேர்த்து வைத்துக் கொண்டு சீரான அழுத்தத்தைக் கொடுத்து இந்த பரிசோதனையைச் செய்யுங்கள்.

சிறிய சிறிய வட்ட வடிவில் தங்களின் விரல்களை வைத்து அழுத்திப் பார்க்க வேண்டும். இவ்வாறு தங்களின் மார்பகம் முழுமையையும் பரிசோதனை செய்திருக்க வேண்டும்.

ஒவ்வொரு முறை வட்ட வடிவில் அழுத்தம் தருவதற்கு இடையிலும் விரல்களை எடுக்காமல் தொடர்ந்து பரிசோதனை செய்யவும்.

வெளிப்புறத்தில் இருந்து சுற்றுப் பகுதிகளை பரிசோதனை செய்து கொண்டே உட்பக்கம் வந்து இறுதியில் முலைக் காம்பு வரை அழுத்தம் தந்த பரிசோதனை செய்திருப்பதை உறுதி செய்யவும்.

இந்தப் பரிசோதனையில் ஏதேனும் வீக்கம், கட்டி இருப்பது போன்ற உணர்வு, தோல் பகுதி ஆரஞ்சுப் பழ தோல் போன்று தடிமனாக இருத்தல் போன்றவற்றை பரிசோதிக்கவும்

அப்படியே அந்தப் பக்கம் இருக்கும் கக்கம் (Arm pit) பகுதியை அழுத்தி அங்கு ஏதேனும் கழலை வீக்கம் இருக்கின்றதா? என்பதை பரிசோதிக்கவும்.

நான்காவது படி:

தங்களது முலைக்காம்பை மெதுவாகப் பிதுக்கிப் பார்க்க வேண்டும். முலைக் காம்பில் இருந்து நீர் போன்ற, பால் நிற அல்லது மஞ்சள் நிற திரவமோ அல்லது ரத்தமோ வெளியேறுகிறதா என்பதைப் பார்க்கவும். ரத்தம் வெளியேறுவது புற்று நோய்க்கான அறிகுறியாக இருக்கலாம்.

ஐந்தாவது படி:

மேற்கூறிய அனைத்து படிநிலைகளையும் மற்றொரு மார்பகத்திலும் செய்ய வேண்டும். ஏதேனும் வித்தியாசமாகத் தெரிந்தால் உடனே தங்களின் மருத்துவரை நாட வேண்டும்.

இந்தப் பரிசோதனையை மாதம் ஒரு முறை செய்வதன் மூலம் தங்கள் மார்பகங்களில் நேரும் மாற்றங்களை உடனே இனங்கண்டு மருத்துவ உதவியை நாட முடியும்.

முப்பது வயதைக் கடந்தோர் வருடம் ஒருமுறையேனும் மருத்துவரிடம் நேரடி மார்பகப் பரிசோதனை செய்து கொள்வது நல்லது.

விரைவான நோய் கண்டறிதல் மூலம்துரிதமான சிகிச்சை அளித்துவியத்தகு முன்னேற்றம் அடைந்துமுழுமையான நோய் குணம் பெற முடியும்.

-டாக்டர் அ.ப.ஃபரூக் அப்துல்லா

"கை தட்டுதல்" என்பது ஒரு சின்ன விடயம் தான். நாம் பிறரை உற்சாகப்படுத்த கைகளை தட்டுகிறோம். அவர் அந்த ஒலி அலைகள் மூலம் உற்சாகம் கொள்கிறார். ஆனால் நாம் நம் உடலில் தோன்றும் அதிர்வலைகளால் உற்சாகம் கொள்கிறோம்.

நாம் அடுத்தவர்களுக்காக கை தட்டும் அதே நேரம் நமக்காகவும் கொஞ்சம் கை தட்டும் பழக்கத்தை ஏற்படுத்திக் கொள்ளல் வேண்டும்.

சோர்வாக இருக்கும் பொழுதோ, மன அழுத்தம் உள்ள நேரங்களில் அல்லது தனிமை பொழுதுகளில் கை தட்டுதல் என்பது நம்மை நாமே தட்டி எழுப்பும் ஒரு செயல் மட்டுமன்றி நம் உடலில் பல நன்மைகளையும் செலவில்லாமல் செய்து விடுகிறது.

ஏனெனில் நமது கைகளில் அனைத்து உறுப்புக்களுக்குமான நரம்புகள் பின்னிக் கிடக்கின்றன. கைகளே, உடலின் பல்வேறு உறுப்புகளுக்கு, ஆற்றல் மையமாக விளங்குகிறது. இவ்வாறு கை தட்டும் பொழுது முழு உடலும் நன்மை பெறுகிறது.

கை தட்டுவதால் இரத்த அழுத்தம் சீராகிறது.

ஆஸ்துமாவுக்கு ஒரு சிறந்த தீர்வை தரும்.

கால், கை, கழுத்து மற்றும் இடுப்பில் தோன்றும் மூட்டு வலிகளை நீக்கும்.

மூளைத்திறனையும், ஆற்றலையும் அதிகரிக்கும். மாணவர்களுக்கு மிக உகந்தது.

மன அழுத்தம், பதற்றம், பயம், சோர்வு போன்றவை அகலும்.

தலைவலி நீங்கும்.

பார்வை கோளாறுகள் நீங்கும்.

முடி கொட்டுதல் பிரச்சனை நீங்கும்.

இரத்தம் நன்கு சுத்திகரிக்கப்பட்டு தூய்மை பெறும்.

உடலின் எதிர்ப்புசக்தி மேம்படுகிறது.

இரத்த அடைப்புக்கள் நீங்கும்.

முகம் பிரகாசமாகும்.

இதயம், கல்லீரல், நுரையீரல், சிறுநீரக பாதிப்புகள் விலகும்.

உணவு செரிக்காமை பாதிப்புகள் நீங்கும்

இப்படி கை தட்டுதலால் ஏற்படும் பலன்களை பட்டியலிட்டுக் கொண்டே போகலாம்.

ஓஷோ, இரண்டு பிறவிகளுக்கிடையே உள்ள காலமற்ற இடைவெளியில் இந்த ஆன்மாவுக்கு என்ன நேரிடுகிறது ?

ஒரு பிறவிக்கும் , மறுபிறவிக்கும் இடையில் ஏற்படும் அனுபவங்கள் ஒரு கனவுபோலத்தான்.

அப்பொழுது அது உண்மையைப்போலத் தோன்றும் .

ஆனால் புலன்களுக்கு வேலை இல்லை .

ஏனெனில் உடல் இல்லை .

அப்படிக் கனவு காணும்பொழுது உங்களுக்கு எந்தச் சந்தேகமும் வராது .

ஆகவே , அந்த இடைவெளியில் நடப்பவை அனைத்தும் உண்மை போலவே தோன்றும் . அப்பொழுது தோன்றும் தோற்றங்கள் மிகவும் அசாதாரணமானவையாகக்கூட இருக்கக்கூடும் .

ஆத்மா சொர்கத்தை அடைவது அல்லது நரகத்தை அனுபவிப்பது என்பது இந்தக் கனவு நிலையைக் குறிப்பிடுவதுதான் .

உண்மையில் சொர்க்கமும் இல்லை , நரகமும் இல்லை ! 

ஆனால் இது ஒருவித கனவு நிலை , அவ்வளவுதான்.

முழுமையான பாப ஆத்மாக்களுக்குத் தகுந்த தாய், தகப்பன் கிடைப்பது மிகவும் கஷ்டம் .

முழு புண்ணிய ஆத்மாக்களுக்கும் தகுந்த பெற்றோர்கள் கிடைப்பது கடினம் !

இந்த இரண்டுக்கும் இடையில் உள்ள ஆன்மாக்கள் நல்லதும் , கெட்டதும் கலந்திருக்கின்றன .

ஆனால் அடுத்த பிறவியில் இதில் எதுவும் ஞாபகம் இருக்காது .

இந்த இடைப்பட்ட காலத்தில் அதாவது ஆன்மா மறுபிறவி எடுப்பதற்கு முன்பு அந்த ஆன்மா நிலையாகவும் இல்லை, அது அங்கும், இங்கும் அலைந்துகொண்டும் இல்லை. அது ஒரு இரண்டுங்கெட்டான் நிலையில் இருக்கிறது.

இதை தர்க்கரீதியாகப் புரிந்துகொள்ள முடியாது . இந்த ஆன்மாவில் முற்பிறவியில் ஏற்பட்ட அனுபவங்கள் கருத்துக்கள் , தீய மற்றும் நல்ல செயல்களின் பலன்கள் அனைத்தும் கரு வடிவில் அப்படியே பதிந்திருக்கின்றன.

அது மீண்டும் உடலை எடுக்கும்பொழுது அவை அனைத்தும் மெல்ல செயல்புரிய ஆரம்பித்துவிடுகின்றன.

தீபாவளி விருந்தாலும், பலகாரங்களாலும் ஏற்படும் வயிற்று உப்புசம், அஜீரணக் கோளாறு, திடீர் ஏப்பங்கள், வாந்தி, வயிற்று வலி, அசதி போன்றவற்றுக்கு லேகியம் நிவாரணம் கொடுக்கும். கூடவே பனிக்காலத்தில் வரக்கூடிய சளி, இருமல், காய்ச்சல் போன்றவற்றிற்கும் இது அருமருந்தாகும்.

தேவையான பொருள்கள்:

சுக்கு - 50 கிராம்

மிளகு - 50 கிராம்

திப்பிலி - 50 கிராம்

சதகுப்பை - 30கிராம்

சிறுநாகப்பூ - 50 கிராம்

வாய்விடங்கம் - 50 கிராம்

கருஞ்சீரகம் - 50 கிராம்

சீரகம் - 50 கிராம்

இலவங்கப்பட்டை - 50 கிராம்

கோரைக் கிழங்கு - 50 கிராம்

கொத்தமல்லி - 30 கிராம்

சித்தரத்தை - 30 கிராம்

ஓமம் - 30 கிராம்

அதிமதுரம் - 20 கிராம்

கிராம்பு - 20 கிராம்

வெல்லம்- 300 கிராம்

தேன் - 100 கிராம்

நெய் - 100 மில்லி

செய்முறை

* அடுப்பில் பாத்திரம் வைத்து, மேலே குறிப்பிட்டுள்ள ஒவ்வொரு பொருளையும் தனித்தனியாக சிறு தீயில் வைத்து வறுத்து எடுத்துக் கொள்ளவும்.

* வறுத்து வைத்த ஒவ்வொரு பொருளையும் தனித்தனியாக நன்றாக அரைத்து, சலித்துக்கொள்ளவும்.

* லேகியத்திற்கு வேண்டிய அளவு வெல்லத்தை எடுத்து பாகு காய்ச்சவும். பாகு கம்பி பதம் வந்தவுடன் அடுப்பில் இருந்து எடுக்காமல் தீயை கொஞ்சம் குறைத்து, அரைத்து வைத்திருக்கும் பொடிகளை ஒன்றன் பின் ஒன்றாக சிறிது சிறிதாகச் சேர்த்து கைவிடாமல் கிளறிக்கொண்டே இருக்கவும்.

* பின்னர் வாணலியை இறக்கி வைத்து நெய் விட்டு நன்றாகக் கிளறி சிறிது ஆறிய பின் சிறிது சிறிதாக தேன் விட்டுக் கிளறி வேறு பாத்திரத்தில் எடுத்து வைத்துக் கொள்ளவும்.

* ஆறிய பின்னர் வயதுக்கு ஏற்றவாறு 3 - 12 வயது வரை 5 கிராம் காலை மற்றும் இரவு உணவிற்குப் பிறகு எடுத்து சப்பிச் சாப்பிடலாம். 13 வயதுக்கு மேற்பட்டோர் 10 கிராம் அளவு எடுத்து காலை மற்றும் இரவு உணவிற்குப் பிறகுச் சப்பிச் சாப்பிடலாம்.

-சித்த மருத்துவர் காமராஜ்.

இந்த உலகில் எத்தனையோ விஞ்ஞானிகள் வந்தாலும் எடிசனுக்கு தனி இடம் உண்டு.

அவர் அளவு சோதனையினை சந்தித்தவனுமில்லை, அவர் அளவு சாதித்தவருமில்லை. அப்படிபட்ட வாழ்வு அவருடையது

சிறுவயதில் நோயாளி, பள்ளி செல்லவே 8 வயது ஆனது. அங்கு சென்றாலும் காது கேட்காது, கூடவே படிப்பில் மந்தம். ஆனால் ஏகபட்ட கேள்விகள் எழுப்பினார், பூராவும் படிப்பிற்கு சம்பந்தமில்லா விஷயம்.

ஆசிரியர் இவன் மூளை கோளாறு பிடித்தவன் என கழுத்தை பிடித்து தள்ள, எடிசனின் அம்மா ஆசிரியர் ஆனார், அவருக்கு வாசிக்க கற்றுகொடுத்தார், அப்பா மரவியாபாரி கணக்கு பார்க்க கற்றுகொடுத்தார் இவ்வளவுதான் படிப்பு.

அவர் வாசித்ததெல்லாம் நியூட்டனும், பாரடேயும். ஆயினும் பிழைக்க வேண்டுமே ரெயில் நிலையத்தில் தந்தி அடிக்கும் வேலைக்கு சென்றார், அங்கும் ஆய்வு செய்கின்றேன் என எதனையோ அமிலத்தை கொட்டிவிட அந்த வேலையும் போனது.

பின் அதேரெயில் நிலையத்தில் நொறுக்கு தீனி விற்றார். அதன் பின் காய்கறி விற்றார், சலூன் கூட நடத்தினார் என்கின்றார்கள்.

அந்த எடிசன் பிற்காலத்தில் உலகை மாற்றுவான் என கடவுளே நம்பி இருக்கமாட்டார்.

பல வேலைகளை செய்த எடிசன் பின்பு பங்கு சந்தை அலுவலகத்தில் வந்தபொழுதுதான் அவர் வாழ்க்கை மாறியது, பங்கு தகவல்களை அனுப்பும் தந்தி முறையில் வேலைக்கு சேர்ந்தார்.

ஏன் என்றால் காது கேட்காதவன் நிலைக்கு அதுதான் சரி. தந்தி புள்ளிகளாக வரும், கோடுகளாக வரும். அதை வைத்து சிலவற்றை எழுத வேண்டும், இதற்கு காது கேட்கும் அவசியமில்லை.

இதனால் அப்பணி எளிதாக கிடைத்தது, அதில் இருந்த எடிசன் அதன் சிக்கல்களை கண்டு எளிதாக்க எண்ணிணான்.

எடிசன் எனும் விஞ்ஞானி இங்குதான் உருவானான், கோடுகளாக வரும் தந்தியினை அதுவரை மனிதன் மொழிபெயர்க்க வேண்டும், எடிசன் அந்த கோடுகளை எந்திரமே எழுதினால் என்ன என யோசித்தார், அதை செயல்படுத்த முனைந்தார். அதுவரை ஒற்றை வழியாக இருந்த தந்திமுறையினை இருவழியாக்கினார்.

ஆய்வு என்பது அபின் போன்றது, உள்ளே இழுத்துவிட்டால் விடாது. எடிசனும் தொடர்ந்து கருவிகளை உருவாக்கி கொண்டே இருந்தார்.

அதில் மாபெரும் வெற்றிதான் மின்விளக்கு, மானிட குலத்திற்கு அவர் காட்டிய மாபெரும் ஒளி அது.

நியூயார்க் நகரம் இரவில் விளக்கு பெற்றதும் அது உலக நாடுகளுக்கு அதிசயமாக விளங்கி வழிகாட்டியதும் எடிசன் என்பவராலே.

இருட்டில் இருந்த உலகம் எடிசனால் இன்று இரவு நாம் காணும் வர்ண ஜாலத்திற்கு மாறியது.

எப்படியப்பா இப்படி எல்லாம் மனிதனால் முடிகின்றது என உலகம் வியக்கும் பொழுது மின்மோட்டாரை உருவாக்கினார் எடிசன்.

ஆம் இன்று பம்புசெட், கார் முதல் வீட்டு பேன், தொழிற்சாலை வரை இயங்கும் மோட்டார், அது அன்றி அமையாது தொழில் உலகு.

அதுதான் இன்றைய கிரைண்டர், மிக்ஸிக்கும் அடிப்படை. அவை இன்றி இன்றைய சமையல் கூடங்களும் இல்லை, அதற்கு அடிப்படை கொடுத்தது எடிசன்.

அதன் பின்னும் மனிதர் சும்மா இருந்தாரா? இன்றைய சிடி, டிவிடி வகையாறாகளுக்கு முன்னோடியான கிராம்போனை கண்டுபிடித்தார்.

அதாவது ஒலியினை பதிவு செய்யும் கருவி அது. பாடல்கள் இப்படித்தான் முதலில் பதிவு செய்யபட்டது. மனிதன் பாடியதை எந்திரம் திருப்பி பாடும் அதிசயத்தை செய்து காட்டினார் எடிசன்.

ஒலியினை பதிந்து காட்டியாயிற்று.. இதை போல ஒளிபடங்களை உருவாக்கினால் என்ன எனும் அவரின் சிந்தனையில் உதித்ததுதான் திரைப்பட படபிடிப்பு கருவி.

ஆம் அவரின் அந்த கண்டுபிடிப்புதான் சினிமா எனும் உலகினை தொடங்கி வைத்தது, உலகில் பெரும் மாற்றத்தை அது கொடுத்தது.

இன்று காணும் ஒளிவிளக்கு, தகவல் தொடர்பு, பிரிண்டர், சிடி, டிவிடி, சினிமா கேமரா என பல விஷயங்களை தொடங்கி வைத்தவர் எடிசன் என்பவரே.

நாம் அனுபவிக்கும் இந்த விஞ்ஞான வசதிகளுக்கெல்லாம் காரணம் அவரே, மறுக்க மறைக்க முடியாது

கிட்டதட்ட 1400 கண்டுபிடிப்புகளுக்கு காப்புரிமை வாங்கி இருந்தார், வாங்காமல் விட்டவை இன்னும் ஏராளம்.

எப்படி அம்மனிதனால் இப்படி சாதிக்க முடிந்ததென்றால், அவனின் சுயநலத்திலே பொதுநலமும் கலந்திருந்தது.

மக்களின் வசதிக்காக, அவர்களின் வாழ்க்கை முறையினை எளிதாக்க என்ன செய்யலாம் என சிந்தித்தான், இறைவன் அவனுக்கு அந்த அளவு ஞானத்தையும் கொடுத்தான்!

-பிரம்ம ரிஷியார்

18 ஆம் நூற்றாண்டின் மத்தியில் (கி. பி. 1750) இங்கிலாந்தில் தொடங்கிய பஞ்சாலைகளே தொழிற்புரட்சிக்கு வித்திட்டன.

இன்று நாம் காணும் ஒட்டுமொத்த அறிவியல் கண்டுபிடிப்புகளுக்கும் பொருளாதார அரசியல் நிர்வாக மேம்பாடுகளுக்கும் தொடக்கப்புள்ளி பஞ்சாலைகளே காரணமாக அமைந்தது என்பதை நினைத்துப் பார்க்கப் பார்க்க வியப்பு ஏற்படுகிறது.

பஞ்சாலைகளுக்குத் தேவையான கட்டுமானப் பொருள்கள், இயந்திரங்கள் ஆகியவற்றுக்கு இரும்பு தேவையாக இருந்ததால் சுரங்கத் தொழில் விரிவடைந்தது.

நீராவி எஞ்சின் கண்டுபிடிக்கப்பட்ட பிறகு நிலக்கரி தேவைப்பட்டது.

உற்பத்திப் பொருள்களைக் கொண்டு செல்ல ரெயிலும் மோட்டார் வாகனங்களும் உருவாயின.

அவற்றுக்குத் தேவையான சக்கரங்கள், பெட்ரோல்-டீசல், பணிமனைகள், சாலைகள் என்று ஒவ்வொன்றாக அல்லது எல்லாமும் காலப்போக்கில் கண்டுபிடிக்கப்பட்டன.

மின்சாரம் கண்டுபிடிக்கப்பட்ட பின்னர் எல்லாமே மாறிப்போனது!

இவை அத்தனைக்கும் ஆதாரமாக இருந்தது பஞ்சாலைத் தொழில்தான்!

இங்கிலாந்தின் மான்செஸ்டர் என்ற இடம் பஞ்சாலைக்குப் பெயர் பெற்ற இடமாக இருந்தது.

கோயம்புத்தூர் தென்னிந்தியாவின் மான்செஸ்டர் என்று அழைக்கப்பட்டது வெறும் வரலாறாக சுருங்கி விட்டது!

-மா. பாரதிமுத்துநாயகம்.