இயக்குனர் 'ஷோமேன்' பிரேம் இயக்கத்தில் துருவா சர்ஜா புதிய படம் ஒன்றில் நடித்துள்ளார். காளி என்ற கதாபாத்திரத்தில் துருவா நடிக்கும் இந்த படத்தை கே.வி.என். புரொடக்ஷன் தயாரித்துள்ளது. இந்த படத்திற்கு அர்ஜுன் ஜன்யா இசையமைத்துள்ளார். இந்த படத்தின் டைட்டில் டீசர் சமீபத்தில் வெளியானது. அதன்படி, இந்த படத்திற்கு 'கேடி - தி டெவில்' என படக்குழு தலைப்பு வைத்துள்ளது.
அதிரடி ஆக்ஷன் காட்சிகள் நிறைந்துள்ள இந்த டீசருக்கு கன்னடம், இந்தி, தெலுங்கு, தமிழ் மற்றும் மலையாளத் திரையுலகைச் சேர்ந்த ஹீரோக்கள் குரல் கொடுத்துள்ளனர். இதன் தமிழ் பதிப்புக்கு விஜய் சேதுபதி குரல் கொடுத்துள்ளார். இந்தி மற்றும் மலையாளப் பதிப்புக்கு சஞ்சய் தத், மோகன்லால் மற்றும் கன்னட பதிப்பிற்கு இயக்குனர் பிரேம் ஆகியோர் குரல் கொடுத்துள்ளனர்.
இந்த படத்தின் டைட்டில் டீசர் வெளியீட்டு விழாவில் இயக்குனர் பிரேம் பேசியதாவது, "எங்கே நல்லது இருக்கிறதோ, அங்கே கெட்டதும் இருக்கும். உதாரணத்திற்கு, ராமன் இருந்தபோது, ராவணனும் இருந்தான். படத்தில் இதே போன்ற வரிகள் உள்ளன. இந்தப்படம் ரத்தம் தோய்ந்த கதை மட்டுமல்ல, காதல் மற்றும் அறம் கலந்த கதை. இந்த படம் கேஜிஎஃப் மற்றும் புஷ்பாவில் இருந்து முற்றிலும் மாறுபட்ட படம்" என்று கூறினார்.
இப்படத்தின் தமிழ் பதிப்பை உதயநிதி ஸ்டாலினின் ரெட் ஜெயண்ட் மூவிஸ் நிறுவனம் வழங்கவுள்ளது குறிப்பிடத்தகக்து.
