நீங்கள் தேடியது "Train Accidents"

கர்நாடக மாநிலம் மைசூருவில் இருந்து சென்னை வழியாக பீகார் மாநிலம் தர்பங்காவுக்கு சென்ற பாகுமதி எக்ஸ்பிரஸ் கடந்த 12-ந்தேதி திருவள்ளூர் மாவட்டம் கவரைப்பேட்டை அருகே சரக்கு ரெயில் மீது மோதி விபத்துக்குள்ளானது. இந்த விபத்தில் 19 பயணிகள் காயம் அடைந்தனர். சம்பவ இடத்தை பார்வையிட்டு ரெயில்வே பாதுகாப்பு கமிஷனர், தெற்கு ரெயில்வேயை சேர்ந்த உயர் அதிகாரிகள், தேசிய புலனாய்வு முகமை அதிகாரிகள் விசாரணை நடத்தினர்.

இதில், பாகுமதி எக்ஸ்பிரஸ் ரெயில் விபத்துக்குள்ளாவதற்கு நாசவேலையே காரணம் என்று சந்தேகம் உள்ளதாக அதிகாரிகள் தெரிவித்துள்ளனர். ரெயிலை கவிழ்த்து பெரிய அளவில் சேதத்தை ஏற்படுத்தவேண்டும் என்ற முயற்சிகள் கடந்த ஜூன் மாதத்தில் இருந்தே தொடர்ச்சியாக நடைபெற்று வருவதை பார்க்க முடிகிறது. ரெயிலை கவிழ்க்க நடைபெற்ற பெரும்பாலான முயற்சிகள் ரெயில் ஓட்டுனர்கள், 'கார்டுகள்', ரெயில்வே ஊழியர்களால் வெற்றிக்கரமாக முறியடிக்கப்பட்டு இருக்கிறது. அதேசமயத்தில் தவிர்க்க முடியாத சில இடங்களில் ரெயில் பெட்டிகள் தடம்புரண்டு உள்ளன.

உத்தரகாண்ட் மாநிலம் ரூர்க்கியில் இருந்து நேற்று முன்தினம் லக்சர் நோக்கி சென்ற சரக்கு ரெயிலை கவிழ்க்க தண்டவாளத்தில் கியாஸ் சிலிண்டர் வைத்து சதி செய்யப்பட்டு இருந்தது. இதனை ரெயில் என்ஜின் டிரைவர் கவனித்ததால், விபத்து தவிர்க்கப்பட்டது. கடந்த மாதம் 19-ந்தேதி உத்தரபிரதேச மாநிலம் பிலாஸ்புர் ரோடு மற்றும் உத்தரகாண்ட் மாநிலம் ருத்ராபூர் இடையே 'தூன்' எக்ஸ்பிரஸ் சென்றுக்கொண்டிருந்தபோது தண்டவாளத்தில் குறுக்காக 7 அடி நீள இரும்பு கம்பி போடப்பட்டிருந்தது.

ரெயில் ஓட்டுனர் அவசர பிரேக் போட்டு நிறுத்தியதால் விபத்து தவிர்க்கப்பட்டது. இந்த சம்பவம் நடைபெற்ற 2 நாட்களுக்கு பின்னர் அதாவது 21-ந் தேதி பாந்த்ரா ஏழைகளின் ரதம் ரெயில் கடந்து செல்ல இருந்த நிலையில், குஜராத் மாநிலம் சூரத் அருகே தண்டவாளத்தை தரையில் போடப்பட்டு இருக்கும் காங்கிரீட் சிலாப்புகளோடு இணைக்கும் இரும்பு தகடுகளை மர்ம ஆசாமிகள் நீக்கியிருந்தனர். சரியான நேரத்தில் இது கண்டுபிடிக்கப்பட்டதால் அசம்பாவிதம் தவிர்க்கப்பட்டது.

இந்த சம்பவம் நடைபெற்ற மறுநாள் உத்தரபிரதேச மாநிலம் கான்பூர் அருகே ரெயில் தண்டவாளத்தில் கியாஸ் சிலிண்டர் வைக்கப்பட்டிருந்தது. இதனை சரக்கு ரெயில் ஓட்டுனர் கண்டுபிடித்ததால் விபத்து தப்பியது.

இதுபோன்று கடந்த சில மாதங்களில் மட்டும் ரெயில் தண்டவாளத்தில் சிமெண்டு மூட்டை, சைக்கிள், கியாஸ் சிலிண்டர், இரும்பு கம்பி என வெவ்வேறு பொருட்களை வைத்து ரெயிலை கவிழ்க்கும் நாசவேலைக்கான முயற்சிகள் 24 முறை நடைபெற்றுள்ளதாகவும், இதில் 90 சதவீத முயற்சிகள் ரெயில் ஓட்டுனர், கார்டுகள் மற்றும் ரெயில்வே ஊழியர்கள் சாமர்த்தியமாக செயல்பட்டதால் முறியடிக்கப்பட்டுள்ளதாகவும் ரெயில்வே அதிர்ச்சி தகவலை தெரிவித்துள்ளது.

கடந்த 2019-ம் ஆண்டு முதல் நடப்பாண்டு ஆகஸ்டு மாதம் வரை நாடு முழுவதும் 218 ரெயில் விபத்துகள் அரங்கேறி இருப்பதாகவும், 145 ரெயில்கள் தடம் புரண்டுள்ளதாகவும் மத்தியபிரதேசத்தை சேர்ந்த தகவல் அறியும் உரிமை சட்ட ஆர்வலர் விண்ணப்பித்து பெற்ற தகவலில் தெரியவந்துள்ளது. இதில் அதிகபட்சமாக 2019-ம் ஆண்டு மட்டும் 55 விபத்துகள் பதிவாகி உள்ளன. இதேபோல அதே ஆண்டு 40 ரெயில்கள் தடம் புரண்டு விபத்தினை சந்தித்ததாகவும் தெரிவிக்கப்பட்டு இருக்கிறது.

* டிசம்பர் 1964 -ஆம் ஆண்டு ஏற்பட்ட சூறாவளியில் பாம்பன்-தனுஸ்கோடி பயணிகள் ரெயில் அடித்துச் செல்லப்பட்டது. அதில் பயணம் செய்த 126-க்கும் மேற்பட்ட பயணிகள் உயிரிழந்தனர்.

* கடந்த 1981ஆம் ஆண்டு நாட்டின் மிக மோசமான மற்றும் உலகின் இரண்டாவது பெரிய ரெயில் விபத்து பீகாரில் நடந்தது. பீகார் மாநிலம் பாலகோட்டில் வீசிய சூறாவளிக் காற்றில் சிக்கிய பயணிகள் ரெயில் பாக்மதி ஆற்றில் தடம் புரண்டு கவிழ்ந்தது. 9 பெட்டிகளுடன் பயணிகள் நெரிசலில் சென்ற ரெயிலின் 7 பெட்டிகள் பாக்மதி ஆற்றில் தடம் புரண்டு கவிழ்ந்தது. நாட்டையே உலுக்கிய இந்த கோர விபத்தில் ஏறத்தாழ 800 பேர் வரை உயிரிழந்ததாக கூறப்பட்டது.

* 1981 ஆம் ஆண்டில் வாணியம்பாடியில் 3 பயணிகள் ரெயில்கள் ஒரே பாதையில் அடுத்தடுத்து மோதிக்கொண்ட விபத்தில் 20 பேர் உயிரிழந்தனர்.

* 1988 ஆம் ஆண்டு ஜூலை 8 ஆம் தேதி கேரளாவில் உள்ள அஷ்டமுடி ஏரியின் மீதுள்ள பெருமான் பாலத்தில் ரெயில் தடம் புரண்டு தண்ணீரில் விழுந்ததில் 105 பேர் உயிரிழந்தனர்.

* 1995 ஆம் ஆண்டு உத்தரபிரதேச மாநிலம் ஃபிரோசாபாத் அருகே நின்று கொண்டிருந்த காளிந்தி எக்ஸ்பிரஸ் மீது டெல்லி செல்லும் புருஷோத்தம் எக்ஸ்பிரஸ் மோதி விபத்துக்குள்ளானது. இந்த விபத்தில் 358 பயணிகள் உயிரிழந்தனர்.

* 1998 ஆம் ஆண்டு கொல்கத்தா செல்லும் ஜம்மு தாவாய்-சீல்டா எக்ஸ்பிரஸ், பஞ்சாபின் வடக்கு ரெயில்வேயின் கன்னா-லூதியானா பிரிவில் அமிர்தசரஸ் செல்லும் எல்லைப்புற கோல்டன் டெம்பிள் மெயிலின் தடம் புரண்ட 6 பெட்டிகள் மீது மோதி விபத்துக்குள்ளானது. இந்த விபத்தில் 212 பேர் உயிரிழந்தனர்.

* 1999 ஆம் ஆண்டு அசாம் மாநிலம் கவுகாத்தியில் இருந்து 310 மைல் தொலைவில் உள்ள கைசல் அருகே இரண்டு அதிவேக ரெயில்கள் ஒன்றுடன் ஒன்று மோதி விபத்தை ஏற்படுத்தியது. அப்போது இரண்டு ரெயில்களில் 2500க்கும் மேற்பட்ட பயணிகள் இருந்தனர். விபத்தில் இரண்டு ரெயில்களில் பயணித்த சுமார் 290 பேர் உயிரிழந்துள்ளனர்.

* 2002-ஆம் ஆண்டு இந்தியாவின் அதிவேக ரெயிலான ராஜ்தானி எக்ஸ்பிரஸ் ரஃபிகஞ்ச் நிலையம் அருகே தடம் புரண்டு விபத்துக்குள்ளானது. இந்த விபத்தில் சுமார் 140 பயணிகள் உயிரிழந்தனர்.

* 2005- ஆம் ஆண்டு தெலுங்கானாவில் உள்ள ஒரு சிறிய ரெயில் பாலம் வெள்ளத்தால் அடித்து செல்லப்பட்டது. பாலத்தின் சேதமடைந்த பகுதி அருகே சென்றபோது டெல்டா பாஸ்ட் பாசஞ்சர் ரெயில் தடம் புரண்டு 114 பேர் இறந்தனர்.

* 2010-ஆம் ஆண்டு மேற்கு மிட்னாபூரில் உள்ள கெமாஷூலி மற்றும் சர்திஹா அருகே மும்பை நோக்கிச் சென்ற ஹவுரா குர்லா லோக்மான்ய திலக் ஞானேஸ்வரி சூப்பர் டீலக்ஸ் எக்ஸ்பிரஸ் தடம் புரண்டது. அப்போது அவ்வழியாக வந்த சரக்கு ரெயில் மீது மோதி சுமார் 148 பேர் உயிரிழந்துள்ளனர்.

* 2011-ஆம் ஆண்டு உத்தரப் பிரதேசத்தின் ஃபதேபூர் அருகே கல்கா மெயில் ரெயில் தடம் புரண்டதில் 70 பேர் உயிரிழந்தனர்.

* 2016 -ஆம் ஆண்டு இந்தூர்-பாட்னா எக்ஸ்பிரஸ் கான்பூர், புக்ராயன் அருகே தடம் புரண்டு விபத்துக்குள்ளானதில் 150 பேர் உயிரிழந்தனர்.

* 2017-ஆம் ஆண்டு தெற்கு ஆந்திராவில் ஏற்பட்ட ரெயில் விபத்தில் 41 பேர் உயிரிழந்தனர்.

* 2018-ஆம் ஆண்டு பஞ்சாப் மாநிலம் அமிர்தசரஸ் நகரில் நடந்த ரெயில் விபத்தில் 50க்கும் மேற்பட்டோர் பலியாகினர்.

* 2023-ஆம் ஆண்டு ஒடிசாவில் பாலசோர் பகுதியில் நடந்த ரெயில் விபத்தில் 296 பேர் உயிரிழந்தனர்.

* மேற்கு வங்கத்தில் இன்று நிகழ்ந்த ரெயில் விபத்தில் இதுவரை 15 பேர் உயிரிழந்துள்ளனர்.