மோகனூர் அருகே ஒருவந்தூர் காவிரி ஆற்றில் 2-வது முறையாக அமலாக்கத்துறையினர் ஆய்வு

பரமத்தி வேலூர்:

நாமக்கல் மாவட்டம் மோகனூர் அருகே ஒருவந்தூர் பகுதியில் உள்ள காவிரி ஆற்றில் ஒப்பந்ததாரர் லாரிகள் மூலம் மணல்களை அள்ளி சென்று வலையபட்டி செல்லும் சாலையில் உள்ள ஒரு இடத்தில் மணல் குவாரி அமைத்து அங்கு கொட்டி வைத்து மணல்களை விற்பனை செய்து வந்தனர்.

இந்நிலையில் காவிரி ஆற்றில் ஒப்பந்ததாரர் அதிக அளவு மணல்களை அள்ளி சென்று உள்ளதாகவும், ஆனால் முறைப்படி மணல் விற்பனை செய்யவில்லை என்றும், ரசீது இன்றி கள்ள மார்க்கெட்டில் ஏராளமான மணலை விற்பனை செய்து வருவதாகவும் சென்னையில் உள்ள அமலாக்கத்துறை அலுவலகத்தில் ஒரு சிலர் புகார் செய்ததாக கூறப்படுகிறது.

அதன் அடிப்படையில் கடந்த 10-ந் தேதி ஒருவந்தூர் பகுதியில் உள்ள காவிரி ஆற்றுக்கு சென்ற அமலாக்கத்துறையினர் டிரோன் மூலம் அங்கு மணல் அள்ளிய குழிகளின் நீளம், அகலம், ஆழம் ஆகியவற்றை சுமார் 2 மணி நேரம் அளந்து பார்த்துவிட்டு அதனைக் குறித்துக் கொண்டு சென்றனர்.

இந்த நிலையில் நேற்று மீண்டும் அமலாக்கத்துறையினர் மோகனூர் காவிரி ஆற்றில் 2-வது முறையாக ஆய்வு செய்தனர். மாலை 4.30 மணிக்கு வந்த அதிகாரிகள் 6 மணி வரை சோதனை செய்து சென்றனர்.