டெல்லி சட்டமன்ற தேர்தலில் பகுஜன் சமாஜ் கட்சி தனித்து போட்டி - மாயாவதி அதிரடி

பகுஜன் சமாஜ் கட்சி (பிஎஸ்பி) தலைவர் மாயாவதி, வரவிருக்கும் டெல்லி சட்டப்பேரவைத் தேர்தலில் சுயேட்சையாக போட்டியிடுவோம் என்று அறிவித்தார். இது குறித்து அவர் தனது எக்ஸ் தளத்தில் பதிவிட்டுள்ளார்.

அதில், "டெல்லி சட்டமன்றத்திற்கான பொதுத் தேர்தல் பிப்ரவரி 5, 2025 அன்று ஒரே கட்டமாக நடைபெறும். இது தொடர்பாக தேர்தல் ஆணையம் வெளியிட்டுள்ள அறிவிப்பு வரவேற்கத்தக்கது. பகுஜன் சமாஜ் கட்சி இந்தத் தேர்தலில் முழு தயார் நிலையிலும், பலத்துடனும் போராடுகிறது. இந்தத் தேர்தலில் கட்சி நிச்சயம் சிறப்பாக செயல்படும் என்று எதிர்பார்க்கப்படுகிறது."

"தேர்தல்கள் ஜனநாயகத்தின் முதுகெலும்பு, மற்றும் ஓரங்கட்டப்பட்டவர்களின் முன்னேற்றத்திற்காக அர்ப்பணிக்கப்பட்ட கட்சி என்ற வகையில், இந்த தேர்தல்கள் வகுப்புவாதம் மற்றும் அரசாங்க இயந்திரங்களை தவறாகப் பயன்படுத்துவது உட்பட பிற எதிர்மறை தாக்கங்களில் இருந்து விடுபடுவதை தேர்தல் ஆணையம் உறுதி செய்யும் என்று நாங்கள் எதிர்பார்க்கிறோம்," என்று குறிப்பிட்டுள்ளார்.

தேர்தலில் போட்டி குறித்த அறிவிப்புடன், வாக்காளர்களுக்கு வேண்டுகோள் விடுத்த பகுஜன் சமாஜ் கட்சித் தலைவர் மாயாவதி, "மற்ற கட்சிகளின் கவர்ச்சியான வாக்குறுதிகளுக்கு திசைதிருப்ப வேண்டாம் என்றும் பகுஜன் சமாஜ் கட்சி வேட்பாளர்களுக்கு புத்திசாலித்தனமாக வாக்களிக்க வேண்டும்," என்றும் வலியுறுத்தினார்.

டெல்லி சட்டப் பேரவைக்கு வருகிற பிப்ரவரி 5 ஆம் தேதி ஒரே கட்டமாக தேர்தல் நடைபெறும் என்று அறிவிக்கப்பட்டுள்ளது. இதைத் தொடர்ந்து பிப்ரவரி 8 ஆம் தேதி வாக்கு எண்ணிக்கை நடைபெறும்.