ரஞ்சி கோப்பையில் களமிறங்கும் ரிஷப் பந்த்: விராட் கோலி சந்தேகம்

ஆஸ்திரேலிய அணிக்கு எதிரான படுதோல்வியின் காரணமாக அணியின் தலைமை பயிற்சியாளர் கௌதம் கம்பீர், கேப்டன் ரோகித், விராட் கோலி, சுப்மன் கில் உள்ளிட்டோர் மீது கடுமையான விமர்சனங்கள் எழுந்தன. அதுமட்டுமில்லாமல் இந்த தொடரில் பேட்டர்கள் சொதப்பியதற்கு காரணம் அவர்கள் உள்ளூர் போட்டிகளை தவிர்த்து வருவது தான் என்றும் குற்றச்சாட்டுகள் எழுந்தன. இதையடுத்து சமீபத்தில் பிசிசிஐ பொதுக்குழு கூட்டம் மும்பையில் நடைபெற்றது.

அக்கூட்டத்தின் முடிவில் பல்வேறு முடிவுகளை பிசிசிஐ அடுத்துள்ளதாக கூறப்படுகிறது. இதில், இந்திய அணி வீரர்கள் உள்ளூர் போட்டிகளில் விளையாட வேண்டும் என்பதை கட்டாயமாக்கியதாக கூறப்பட்டது.

இதனையடுத்து இந்திய அணி கேப்டன் ரோகித் சர்மா மும்பை ரஞ்சி கோப்பை அணியுடன் இணைந்து பயிற்சிகளை தொடர்ந்தார். இதனால் ரஞ்சி கோப்பை தொடரின் எஞ்சிய போட்டிகளில் அவர் விளையாடுவார் என்றும் கூறப்படுகிறது.

ரோகித் சர்மா ரஞ்சி டிராபியின் இரண்டாம் கட்டப் பயிற்சிக்கு முன்னதாக மும்பை அணியுடன் இணைந்து வான்கடே மைதானத்தில் 2 மணிநேர பயிற்சியில் ஈடுபட்டார்.

வருகிற 23-ந் தேதி ரஞ்சி டிராபி மீண்டும் தொடங்குகிறது. மும்பை அணிக்காக 2015-ம் ஆண்டில் உத்தரபிரதேச அணிக்கு எதிராக போட்டியில் ரோகித் சர்மா விளையாடி இருந்தார். மும்பை அணியின் அடுத்த போட்டியில் அவர் ஆடுவாரா? என்பதை பொறுத்திருந்து தான் பார்க்க வேண்டும். இதே போல விராட் கோலி, சுப்மன்கில், ரிஷப்பண்ட் ஆகியோரும் ரஞ்சி டிராபியில் விளையாட திட்டமிட்டுள்ளார்.

சௌராஷ்டிரா அணிக்கு எதிரான ரஞ்சி கோப்பை போட்டியில் விளையாடும் டெல்லி அணியில் விளையாடுவதற்கு ரிஷப் பண்ட் விருப்பம் தெரிவித்துள்ளதாக கூறப்படுகிறது.

இதுகுறித்து பேசிய டெல்லி கிரிக்கெட் சங்க தலைவர் ரொஹன் ஜெட்லி, "டெல்லியின் அடுத்த ரஞ்சி டிராபி போட்டியான சவுராஷ்டிராவுக்கு எதிராக ரிஷப் பண்ட் விளையாட உள்ளதாக உறுதி செய்துள்ளார்" என்று கூறியுள்ளார்.

அதேசமயம் விராட் கோலியும் இப்போட்டியில் விளையாடுவாரா என்பது குறித்து எந்த தகவலும் வெளியாகவில்லை.