'பெண் அதிகாரம்' என்பதை நோக்கி தமிழ்நாடு முன்னேறி வருகிறது- முதலமைச்சர் மு.க.ஸ்டாலின்

சென்னை:

சென்னை சைதாப்பேட்டையில் கலைஞர் மகளிர் திறன் மேம்பாட்டு மையத்தை முதலமைச்சர் மு.க.ஸ்டாலின் இன்று திறந்து வைத்தார்.

அப்போது அவர் பேசியதாவது:-

புத்தாண்டு பிறந்து நான் கலந்துகொள்ளக் கூடிய முதல் நிகழ்ச்சி இந்த நிகழ்ச்சி. அதிலே எனக்கு மிகுந்த மகிழ்ச்சி.

புத்தாண்டுக்கு முன்னாடி நான் பங்கேற்ற நிகழ்ச்சியான புதுமைப்பெண் விரிவாக்கத் திட்டம் இருப்பது ஒரு குறிப்பிடத்தக்க வகையிலே பெருமைப்படும் வகையிலே அமைந்திருக்கிறது.

திராவிட இயக்க சமூகத்தில் இருக்கக்கூடிய ஏற்றத் தாழ்வுகளை நீக்கி சமத்துவத்தை நிலைநாட்ட உருவான இயக்கம்தான் நம்முடைய இயக்கம். அதில் பாலின சமத்துவம் முக்கியமான ஒன்று. பெண்களுடைய உரிமைகளுக்காகவும், முன்னேற்றத்துக்காகவும் ஏராளமான திட்டங்களை தி.மு.க. அரசு ஏற்கனவே அண்ணா, கலைஞர் காலத்திலே பல்வேறு திட்டங்களை நிறைவேற்றி இருந்தாலும் அதைத் தொடர்ந்து நம்முடைய அரசு அண்ணா, கலைஞர் வழியில் தந்தை பெரியார் எந்த கனவை கண்டு கொண்டிருந்தாரோ, எதற்காக வாழ்நாள் முழுவதும் போராடினாரோ அந்த எண்ணங்கள் நிறைவேற்றப்பட கூடிய வகையில், இன்றைக்கு பல்வேறு திட்டங்கள் நிறைவேற்றப்பட்டு கொண்டிருக்கிறது.

குறிப்பாக சொல்ல வேண்டும் என்றால் அரசுப் பணிகளில் மகளிருக்கு இட ஒதுக்கீடு, மகளிர் சுய உதவிக் குழுக்கள், சொத்தில் பெண்களுக்கு சம உரிமை. இப்படி பல்வேறு திட்டங்களை நிறைய சொல்லலாம்.

பெண்களின் பொருளாதார தன்னிறைவுக்காகவும், பல திட்டங்களை நமது திராவிட மாடல் ஆட்சியில் நாம் தொடர்ந்து தீட்டி வந்து கொண்டிருக்கிறோம்.

பெண்கள் கல்வி அறிவு பெற வேண்டும் என்பதை தாண்டி அதனுடைய அடுத்த கட்டமாக பெண்களுடைய உயர் கல்வியை உறுதி செய்திடும் வகையில் நாம் திட்டங்களை தீட்டி வருகிறோம்.

கலைஞர் மகளிர் உரிமைத் திட்டம் அதாவது விடியல் பயணம் திட்டம், புதுமைப்பெண் திட்டம், பணிபுரிந்து கொண்டிருக்க கூடிய பெண்களுக்கான தோழி விடுதி, இப்படி ஒவ்வொரு திட்டமும் பெண்களின் கல்வி அறிவு பெறணும், பெண்கள் நல்ல வேலைக்கு போக வேண்டும், பெண்கள் அதிகாரத்தில் அமர வேண்டும். பெண்கள் உலக அறிவை பெற வேண்டும் என்பதற்காகதான் இதையெல்லாம் இன்றைக்கு செயல்படுத்திக் கொண்டிருக்கிறோம்.

இதற்கு காரணம் பெண்கள் உயர்ந்தால்தான் ஒரு சமூகம் நிமிர்ந்து நிற்க முடியும். பெண் அடிமை தீர்ந்து பெண் அதிகாரம் பெறும் அந்த மாற்றத்தை நோக்கி இன்றைக்கு தமிழ்நாடு மிக வேகமாக போய்க் கொண்டிருக்கிறது.

அதற்காகத்தான் இத்தனை திட்டங்களை நாம் செயல்படுத்தி வருகிறோம். பெரிய அளவிலான பல திட்டங்களை நம் அரசு செய்து வந்தாலும், சின்ன சின்ன அளவிலான திட்டங்களும் ரொம்ப முக்கியமாக அமைந்திருக்கிறது. அந்த வகையில்தான் என்னுடைய கொளத்தூர் தொகுதியில், நீட் தேர்வின் காரணமாக தற்கொலை செய்து கொண்ட அனிதா பெயரில் அனிதா அச்சீவர்ஸ் அகாடமி ஆரம்பித்து பெண்களுக்கு திறன் பயிற்சி திட்டத்தை நாங்கள் நிறைவேற்றிக் கொண்டிருக்கிறோம்.

டேலி உள்ளிட்ட கணினி சார்ந்த படிப்புகள், இலவச மடிக்கணினி, தையல் பயிற்சி உள்ளிட்ட பல பயிற்சிகளை பெண்கள் முடித்து இன்றைக்கு அவர்கள் நல்ல நிலையில் இருக்கிறார்கள்.

கொளத்தூர் தொகுதியிலே, அந்த நிகழ்ச்சியில் நான் கலந்து கொள்ளும் போது, அதை அவர்கள் சொல்லி கேட்கிறபோது, எனக்கு ஏற்படக்கூடிய மகிழ்ச்சி அளவிட முடியாத அளவுக்கு இருக்கும்.

அதேபோல்தான் இன்று சைதை தொகுதியில் அமைச்சர் மா.சுப்பிரமணியன் முன்னெடுப்பில் கலைஞர் மகளிர் திறன் மேம்பாட்டு மையம் தொடங்கப்படுகிறது.

நேச்சுரல்ஸ் மூலமாகவும், உஷா நிறுவனம் மூலமாகவும், மகளிருக்கு திறன் பயிற்சி கிடைக்கப் போகிறது.

கொளத்தூர் அனிதா அச்சீவர்ஸ் போல, இந்த கலைஞர் திறன் மேம்பாட்டு மையத்திலும், டேலி பயிற்சி வழங்கப்படுகிறது. அதுவும் ஒவ்வொரு ஆண்டும், 2 ஆயிரம் பேருக்கு இந்த பயிற்சியை தந்து, அவர்கள் வாழ்க்கையில் ஒரு அடி முன்னேறி நிற்க மா.சுப்பிரமணியன் உதவியிருக்கிறார்.

2017-ம் ஆண்டு தமிழ்நாடு முழுவதும் பல நீர்நிலைகளை குளங்களை நமது கழகத்தினர் தூர் வாருகின்ற பணியிலே ஈடுபட்டனர். அதை தொடங்கிய இடம் இந்த சைதாப்பேட்டையில்தான்.

இங்குள்ள கோதண்ட ராமர் குளத்தில்தான் அந்த தூர் வாரும் பணியை நான் வந்து தொடங்கி வைத்தேன். அதை என்னால் மறக்க முடியாது. தமிழ்நாடு முழுவதும் ஒரு இயக்கமாக நாம் செய்தது மக்கள்கிட்ட நமக்கு மிகப்பெரிய நல்ல பெயரை வாங்கித் தந்துள்ளது.

அதேபோல நடப்படுகிற மரங்கள் ஒழுங்காக பராமரிக்கப்பட்டு, அவை மரங்களாக வளர்வதை உறுதி செய்ய வேண்டும் என அதையும் கவனத்தில் வைத்து முறையாக பராமரிக்கக்கூடியர்களுக்கு பசுமை காவலர் விருதுகளை வழங்கி ஊக்குவித்தவர்தான் அமைச்சர் மா.சுப்பிரமணியன். அதுவும் மிக பாராட்டுக்குரியது.

மக்கள் பணியானாலும், கழக பணியானாலும் முன்னிலையில் நிற்கக் கூடியவர் அமைச்சர் மா.சுப்பிரமணியன். அவர் எதையும் தொடங்கி வைத்து பாதியில் விடுபவர் அல்ல. மாரத்தான் போல, நீண்ட நெடிய பல காலத்துக்கு நிலைக்கக் கூடிய திட்டமாகத்தான் இருக்கும்.

அதுபோலதான் இன்றைக்கு தொடங்கி வைத்துள்ள கலைஞர் மகளிர் திறன் மேம்பாட்டு மையம் இருக்கும் என நிச்சயம் நம்புகிறேன்.

இவ்வாறு அவர் பேசினார்.