திருப்பூர்:
பிரபல சினிமா டைரக்டரும், மனிதன் சினி ஆர்ட்ஸ் என்ற தயாரிப்பு நிறுவனத்தை நடத்தி வந்த ஜெயமுருகன் திருப்பூரில் இன்று காலை மாரடைப்பால் உயிரிழந்தார்.
1995-ம் ஆண்டு மன்சூர் அலிகானை கதாநாயகனாக வைத்து சிந்துபாத் திரைப்படத்தை ஜெயமுருகன் தயாரித்தார். அந்த படத்தை தொடர்ந்து, பாண்டிய ராஜன், கனகா நடித்த புருசன் எனக்கு அரசன் படத்தை தயாரித்தார். இந்த படங்கள் வெற்றி பெற ரோஜா மலரே, அடடா என்ன அழகு, தீ இவன் ஆகிய படங்களை தயாரித்தார்.
அதுவரை தயாரிப்பாளராக இருந்த ஜெயமுருகன், முரளி, அருண் பாண்டியன் மற்றும் ஆனந்த் பாபு ஆகியோர் முக்கிய வேடத்தில் நடித்த 'ரோஜா மலரே' என்ற படத்தின் மூலம் இயக்குனராக அறிமுகமானார். இப்படம் வெளியாகி விமர்சகர்களிடம் இருந்து கலவையான விமர்சனங்களை பெற்றது.
அடடா என்ன அழகு, தீ இவன் படத்தை தயாரித்த இவர் அந்த படத்திற்கு இசையும் அமைத்து இருந்தார். மேலும், லிவிங்ஸ்டன், உதயா மற்றும் விந்தியா நடித்த 'பூங்குயிலே' என்ற படத்தை தயாரித்தார். ஆனால் அந்த படம் வெளியாவதில் சிக்கல் ஏற்பட்டது.
இயக்குநர் மற்றும் தயாரிப்பாளராக திரைத்துறையில் ஜொலித்துக்கொண்டு இருந்த ஜெயமுருகன் சினிமாவை விட்டு விலகி திருப்பூரில் குடும்பத்துடன் வசித்து வந்தார்.
இந்நிலையில் நேற்றிரவு அவருக்கு திடீரென நெஞ்சுவலி ஏற்பட்டதை அடுத்து திருப்பூரில் உள்ள தனியார் மருத்துவமனையில் அனுமதிக்கப்பட்டார். ஆனால் அங்கு சிகிச்சை பலன் அளிக்காமல் உயிரிழந்து விட்டதாக மருத்துவர்கள் தெரிவித்தனர். இதையடுத்து அவரது உடல் திருப்பூர் தென்னம்பாளையத்தில் உள்ள அவரது இல்லத்திற்கு கொண்டு செல்லப்பட்டு அஞ்சலிக்காக வைக்கப்பட்டுள்ளது. பொதுமக்கள், முக்கிய பிரமுகர்கள் கலந்து கொண்டு அஞ்சலி செலுத்தி வருகின்றனர்.
திருப்பூர் தெற்கு மின் மயானத்திற்கு உடல் கொண்டு செல்லப்பட்டு தகனம் செய்யப்பட உள்ளது. ஜெயமுருகனின் திடீர் மறைவு திரைத்துறை மற்றும் அவரது நண்பர்கள், உறவினர்கள் மத்தியில் சோகத்தை ஏற்படுத்தியுள்ளது.
