பெட்ரோல் விலை உயர்வால் இ-ஸ்கூட்டருக்கு மாறும் வாகன ஓட்டிகள்

புதுச்சேரி:

புதுச்சேரி போக்குவரத்துத்துறையின் கீழ் பாகூர், காரைக்கால், மாகி, உழவர்கரை புதுச்சேரி, வில்லியனூர், ஏனாம் மற்றும் புதுச்சேரி செக்போஸ்ட் ஆகிய 8 இடங்களில் வட்டார போக்குவரத்து அலுவலகங்கள் செயல்பட்டு வருகிறது.

புதுச்சேரி மாநிலத்தில் புதிய வாகனம் வாங்கும் போது, அதை வட்டார போக்குவரத்து அலுவலகத்தில் பதிவு செய்ய வேண்டும். அப்போதுதான் வாகன பதிவு சான்றிதழ் வழங்கப்படும்.

இந்தநிலையில் கடந்த 2 ஆண்டுகளில் புதுச்சேரி மாநிலத்தில் இருசக்கர வாகனங்களின் தேவையும், விற்பனையும் அதிகரித்துள்ளது.

கடந்த 2023-ம் ஆண்டு 43 ஆயிரத்து 134 இருசக்கர வாகனங்கள் விற்பனையாகி உள்ளது. அதாவது ஒருநாளைக்கு 18 இருசக்கர வாகனங்கள் புதுச்சேரி மாநிலத்தில் விற்பனையாகி உள்ளது.

கடந்த 2024-ம் ஆண்டு இருசக்கர வாகனங்களின் விற்பனை 50 ஆயிரத்து 438 ஆக உயர்ந்துள்ளது. அதாவது கடந்த 2023-ம் ஆண்டை விட 14 சதவீதம் இருசக்கர வாகன விற்பனை அதிகரித்துள்ளது.

சமீப காலமாக நாளுக்கு நாள் பெட்ரோல் மற்றும் டீசல் விலை அதிகரித்து வருகிறது. இதுஒருபுறம் இருக்க, புதுச்சேரி மாநிலத்தில் போக்குவரத்து நெருக்கடி, சுற்றுசூழல் மாசு அதிகரித்து வருகிறது.

இந்தநிலையில் புதுச்சேரி மாநிலத்தில் கடந்த 2023-ம் ஆண்டு 2 ஆயிரத்து 638 ஆக இருந்த இ-ஸ்கூட்டர் விற்பனை, கடந்த ஆண்டு (2024) 3 ஆயிரத்து 195 ஆக உயர்ந்துள்ளது.

கடந்த ஆண்டு 17 சதவீதம் இ-ஸ்கூட்டரின் விற்பனை அதிகரித்துள்ளது. பெட்ரோல் விலை உயர்வால் பெரும் பாலான இரு சக்கர வாகன ஓட்டிகள் இ-ஸ்கூட்டருக்கு மாறியுள்ளனர்.