சென்னை:
கார்த்திகை தீப விழாவை முன்னிட்டு சென்னையில் தீப விளக்குகள் தயாரிப்பு தொடங்கியது.
கார்த்திகை மாதம் வருகிற 17-ந்தேதி தொடங்குகிறது. அதை தொடர்ந்து திருக்காத்திகை தீப விழா வருகிற டிசம்பர் 6-ந்தேதி கொண்டாடப்பட உள்ளது.
அன்றைய தினத்தில் வீடுகளில் அகல் விளக்குகளில் தீபம் ஏற்றுவார்கள். பெரும்பாலானோர் அகல் விளக்குகள் பயன்படுத்துவார்கள்.
இதையொட்டி சென்னையில் அகல் விளக்கு தயாரிப்பு தற்போது தொடங்கி உள்ளது.
சென்னையில் ராயப்பேட்டை, கொசப்பேடையில் தீப விளக்குகள் தயாரிப்பு மும்முரமாக நடந்து வருகிறது. மேலும் சாலையோர கடைகளில் விதவிதமான அகல் விளக்குகள் விற்பனைக்கு குவித்து வைக்கப்பட்டு உள்ளன. இந்த ஆண்டு பலவித வண்ணங்களில், விதவிதமான வகையில் அகல் விளக்குகள் விற்பனைக்கு வந்து உள்ளன.
சென்னையில் கொசப்பேட்டை புரசைவாக்கம், வடபழனி, பெரம்பூர், எழும்பூர், திருவல்லிக்கேணி, சைதாப்பேட்டை, ராயப்பேட்டை வண்ணாரப்பேட்டை உள்ளிட்ட இடங்களில் அகல்விளக்குகள் விற்பனை தீவிரமாக நடந்து வருகிறது. அகல் விளக்குகள் வண்ண ரகங்களில் ரூ.10 முதல் ரூ.50 வரையிலான விலையில் விற்பனை செய்யப்படுகின்றன.
திருக்கார்த்திகையை முன்னிட்டு அகல் விளக்குகளை ஏராளமான பெண்கள் ஆர்வமாக வாங்கி செல்கிறார்கள். பல்வேறு வண்ண வடிவிலான அகல்விளக்குகள் பொது மக்களை கவர்ந்து வருகின்றன.
கடந்த 2 ஆண்டுகளை விட இந்த ஆண்டு கார்த்திகைக்கு அகல் விளக்குகள் விற்பனை அமோகமாக நடைபெறும் என மண்பாண்ட தொழிலாளர்கள் தெரிவித்தனர்.
