திருச்சி:
ஏழ்மையை மட்டுமே பின்னணியாக கொண்ட பலரும் அதனை துச்சமென தூக்கி எறிந்து லட்சியத்தை எட்டிப் பிடித்து எல்லையில்லா இந்த உலகில் தனி முத்திரை பதித்துள்ளனர். அந்த வரிசையில் புதிய விருட்சமாய் இணைந்துள்ளார் மலைக்கோட்டை மாநகரின் தங்க மங்கையாக அடையாளம் காணப்பட்டுள்ள கோமதி.
சற்றும் மனம் தளராத தன்னம்பிக்கையை உந்து சக்தியாக கொண்டு எள்ளி நகையாடுபவர்களுக்கு முன்பு சாதிக்க வேண்டும் என்ற உறுதியோடு வறுமையை தோற்கடித்து தடகள விளையாட்டில் தங்கம் வென்ற கோமதி தமிழகத்திற்கு மட்டுமின்றி இந்தியாவிற்கே பெருமை சேர்த்துள்ளார்.
இந்த சாதனைக்கு சொந்தக்காரர், கத்தாரில் நடைபெற்று வரும் 23-வது ஆசிய தடகள சாம்பியன்ஷிப் போட்டியில் இந்தியா சார்பில் பங்கேற்றுள்ள திருச்சி வீராங்கனை கோமதி தான். 30 வயதான கோமதி மகளிர் 800 மீட்டர் ஓட்டப் பந்தயத்தின் முதல் சுற்றில் முதல் இடம் பிடித்து, பைனலில் அபாரமாக செயல்பட்டு (2 நிமிடம், 2.70 விநாடி) தங்கப்பதக்கத்தை பெற்றார்.
இதற்கு முன் பாட்டியாலாவில் நடந்த பெடரேஷன் கோப்பை தடகள போட்டியில் 800 மீட்டர் தொலைவை 2 நிமிடம் 3.21 விநாடிகளில் கடந்ததே அவரது முந்தைய சாதனையாக இருந்தது. அதை ஆசிய தொடரில் முறியடித்து அசத்தியுள்ளார்.
சர்வதேச அளவில் கோமதி வெல்லும் முதல் தங்க பதக்கம் இது என்பது குறிப்பிடத்தக்கது. இது குறித்து அவர் கூறுகையில், தொடக்கத்தில் வாழ்க்கை எனக்கு மிகவும் சவாலாகவே இருந்தது. ஆனாலும் என் திறமை மீது எந்த சந்தேகமும், எப்போதுமே இருந்ததில்லை. தன்னம்பிக்கையும், கடின உழைப்பும் என்னை இங்கே கொண்டு வந்திருக்கிறது.
இந்த போட்டியில் கடைசி 150 மீட்டர் வரை பின் தங்கி இருந்தேன். அதன்பிறகுதான் வேகமெடுத்தேன். வெற்றிக் கோட்டை கடந்த பிறகு சிறிது நேரம் கழித்துதான் தங்கம் வென்றதை உணர்ந்தேன் என்றார்.
கோமதியின் சொந்த ஊர் திருச்சியில் இருந்து சுமார் 15 கி.மீ. தூரத்தில் உள்ள முடிகண்டம் என்ற கிராமம். தந்தை மாரிமுத்து, விவசாயி. தாய் ராசாத்தி. சகோதரிகள் லதா, திலகவதி. இருவருக்கும் திருமணம் ஆகிவிட்டது. சகோதரர் சுப்பிரமணி. கோமதிதான் இளைய மகள். திருச்சி ஹோலிகிராஸ் கல்லூரியில் படிக்கும் போது அவரது தோழி சுருதியை பார்த்து ஓட்டப்பந்தயத்தில் அவருக்கு ஆர்வம் ஏற்பட்டுள்ளது. 20 வயதில் தான் பயிற்சியை தொடங்கினார்.
புனேவில் 2013-ம் ஆண்டு நடைபெற்ற ஆசிய சாம்பியன்ஷிப் போட்டியில் 800 மீட்டர் ஓட்டத்தில் 7-வது இடம், 2015-ல் சீனாவில் நடந்த போட்டியில் 4-வது இடம் பிடித்தார். தந்தை மாரிமுத்து, புற்றுநோய் பாதிப்பாலும், பயிற்சியாளர் காந்தி மாரடைப்பு ஏற்பட்டும் இறந்தது கோமதியின் தடகள வாழ்க்கையை வெகுவாக புரட்டிப்போட்டது.
பயிற்சியின் போது கோமதிக்கும் இடுப்பில் காயம் ஏற்பட்டது. இது அவருக்கு பெரும் பின்னடைவை கொடுத்தது. இப்படி தொடர்ந்த பிரச்சனைகளால் 2 ஆண்டுகள் பயிற்சி பெறாமல் இருந்தார். அதனால் ஆசிய விளையாட்டு போட்டி உள்ளிட்ட சர்வதேச போட்டிகளில் பங்கேற்கவில்லை.
நீண்ட இடைவெளிக்கு பிறகு மீண்டும் பயிற்சியை தொடங்கியவர் தேசிய அளவிலான போட்டிகளில் பங்கேற்றார். இப்போது பல்வேறு தடைகளை தாண்டி ஆசிய போட்டியில் இந்தியாவுக்காக முதல் தங்கத்தை வென்று சாதனை படைத்துள்ளார். பெங்களூரில் வருமான வரித்துறையில் பணியாற்றி வருகிறார். விளையாட்டு ஒதுக்கீட்டின் கீழ் அவர் அப்பணியில் சேர்ந்துள்ளார்.
மகள் கோமதி வென்ற பதக்கங்களை தாங்கி அழகு பார்க்கும் தாய் ராசாத்தி.
கோமதியின் சாதனை குறித்து அவரது தாய் ராசாத்தி கூறியதாவது:-
சிறு வயது முதலே விளையாட்டில் குறிப்பாக ஓட்டப் பந்தயத்தில் கோமதி ஆர்வம் மிக்கவராக இருந்தார். தினமும் காலையில் எழுந்து 5 கி.மீ. தொலைவில் உள்ள பள்ளி விளையாட்டு மைதானத்துக்கு சென்று பயிற்சி பெற்று வந்தார். அர்ப்பணிப்புமிக்க ஆர்வம் தான் அவரை இந்தளவுக்கு உயர்த்தியுள்ளது. இதன் மூலம் கிராமத்திற்கும், தமிழ்நாட்டிற்கும் நாட்டுக்கும் பெருமை சேர்த்துள்ளார்.
சிறுவயது முதல் வறுமை, கஷ்டங்களை மட்டுமே பார்த்து வளர்ந்த கோமதி பலமுறை அவரது அப்பாவிடம் தகராறில் ஈடுபட்டுள்ளார். பள்ளி படிப்பை முடித்து கல்லூரியில் படிக்க வைக்க முடியாத சூழ்நிலையில் தவித்தபோது, என்னுடைய வாழ்க்கையை வீணாக்கி விடாதீர்கள் என்று கதறி அழுது இருக்கிறார்.
அதன்பிறகு தான் கோமதியை கல்லூரியில் படிக்க வைத்தோம். ஓட்டப்பந்தயத்தில் பயிற்சி பெற்று அவ்வப்போது போட்டிகளில் வெற்றி பெற்று பதக்கத்தை கொண்டு வருவார். அதன் பிறகு எங்களுக்கே ஆர்வம் வந்தது. இதையடுத்து கோமதியின் விருப்பப்படி விட்டு விட்டோம்.
தற்போது பட்டிக்காட்டில் பிறந்து எங்கேயோ நடந்த போட்டியில் கலந்துகொண்டு தங்கப்பதக்கம் வென்றதை எண்ணி பெருமைப்படுகிறோம். ஆனால் ஒரே ஒரு குறை, இதையெல்லாம் பார்க்க அவரை கஷ்டப்பட்டு படிக்க வைத்த அவரது அப்பா இல்லை என்பதுதான் என்று கூறி ஆனந்த கண்ணீர் வடித்தார்.
கோமதியின் தாய் ராசாத்தி, சகோதரர் சுப்பிரமணி.
கோமதியின் சகோதரர் சுப்பிரமணி கூறியதாவது:-
பெண் பிள்ளை என்பதால் விளையாட்டுக்கு அனுப்பக்கூடாது என்று என் தந்தையிடம் நான் கூறினேன். ஆனால் கோமதியின் ஆர்வத்தை கண்டு கொண்ட என் தந்தை குடும்பம் வறுமையில் இருந்த நிலையிலும் தேவையான உதவிகளை செய்து கோமதியை ஊக்கப்படுத்தினார். அவருக்கு பக்க பலமாக இருந்தார்.
அதற்கேற்ப கோமதி தினமும் அதிகாலையிலும், மாலையில் பள்ளி முடிந்த பிறகும் தவறாமல் ஓட்டப்பயிற்சி மேற்கொண்டார். எப்போதும் பயிற்சி என்றே இருந்ததால் கிராமத்தில் அவருக்கு தோழிகள் கூட கிடையாது. பள்ளி நேரத்தை தாண்டி அவரது எண்ணம், செயல் எல்லாமே ஓட்டம் என்பதாகவே இருந்தது.
அவரது ஆர்வத்தை பார்த்த அப்போதைய கிராம நிர்வாக அலுவலர் கணேசன், பயிற்சியாளர் ஒருவரிடம் அறிமுகப்படுத்தினார். அதைத்தொடர்ந்து கல்லூரியில் சேர்ந்த பிறகு அவருக்கு ஓட்டத்தில் நல்ல பயிற்சி கிடைத்தது. முயற்சி செய்தால் எதையும் சாதிக்கலாம் என்பதற்கு என் தங்கை கோமதியும் உதாரணம் என்பதில் எனக்கு பெருமையாக உள்ளது என்றார்.
சாதனை படைத்த கோமதிக்கு முதல்வர் எடப்பாடி பழனிசாமி, தி.மு.க. தலைவர் மு.க.ஸ்டாலின், அ.ம.மு.க. பொதுச்செயலாளர் டி.டி. வி.தினகரன், ம.தி.மு.க. பொதுச் செயலாளர் வைகோ, ச.ம.க. தலைவர் சரத்குமார், கொ.ம.தே.க. பொதுச்செயலாளர் ஈ.ஆர்.ஈஸ்வரன், கனிமொழி எம்.பி. உள்பட ஏராளமானோர் வாழ்த்து தெரிவித்துள்ளனர்.
சாதாரண பின்னணியை கொண்டவர்கள் சாதிக்க முடியாது என்பதை தவிடு பொடியாக்கி தோகாவில் இந்தியாவின் பெருமையை நிலைநாட்டிய தங்க மங்கை கோமதி, சாதிக்க துடிக்கும் இளம் தலைமுறையினருக்கு ஊக்க மருந்தாக உள்ளார். #AsianAthleticChampionship #Gomati
