நீங்கள் தேடியது "home jewelry robbery"

சென்னை:

சென்னை எழும்பூர் காவலர் குடியிருப்பில் வசித்து வருபவர் ஏட்டு ராஜன்.

அண்ணாசாலை போலீஸ் நிலையத்தில் பணியாற்றி வரும் இவர் நேற்று சொந்த ஊரான தஞ்சைக்கு சென்று விட்டு திரும்பினார். எழும்பூர் போலீஸ் குடியிருப்புக்கு வந்ததும் தனது வீட்டில் அசந்து தூங்கிவிட்டார்.

இன்று காலையில் எழுந்து தான் எடுத்து வந்த பையில் இருந்த 10 பவுன் நகையை பீரோவில் வைப்பதற்காக பார்த்தார். அப்போது அது காணாமல் போயிருந்தது. இதுபற்றி எழும்பூர் போலீசில் ஏட்டு ராஜன் புகார் செய்தார்.

இதுதொடர்பாக எழும்பூர் குற்றப்பிரிவு போலீசார் வழக்குப்பதிவு செய்து விசாரணை நடத்தி வருகிறார்கள். பையில் இருந்த நகை காணாமல் போனது எப்படி? என்று தெரியவில்லை.

வீட்டில் வைத்திருந்த போது திருடப்பட்டதா? இல்லை வேறு எங்காவது வைத்து நகை மாயமானதா? என்பது பற்றி விசாரணை நடத்தப்பட்டு வருகிறது.

கோவை:

கோவை புதூர் அருகே உள்ள பச்சாப்பள்ளியை சேர்ந்தவர் லியோ (40). துபாயில் வேலை பார்த்து வருகிறார்.

இவரது மனைவி மற்றும் குழந்தைகள் இங்கு வசித்து வருகிறார்கள். அவர்கள் விடுமுறை என்பதால் வீட்டை பூட்டி விட்டு வெளியூர் சென்று விட்டனர்.

இந்த நிலையில் வீட்டின் முன்பக்க கதவு உடைக்கப்பட்டு இருந்தது. இதனை பார்த்த அக்கம் பக்கத்தினர் குனியமுத்தூர் போலீசுக்கு தகவல் தெரிவித்தனர்.

போலீசார் அங்கு விரைந்து சென்றனர். இது குறித்து லியோவின் மனைவிக்கு தகவல் தெரிவிக்கப்பட்டு உள்ளது. அவர் வந்த பின்னர் தான் வீட்டில் இருந்த நகை, பணம் எவ்வளவு கொள்ளை போய் இருக்கிறது என்பது தெரிய வரும்.

சிவகிரி:

வாசுதேவநல்லூர் புதுமந்தை 3-வது தெருவை சேர்ந்தவர் சந்திரராஜ் (வயது55). பால் வியாபாரி. இவரது மனைவி இந்திரா. இவர்களது மகள் வாசுதேவி. சம்பவத்தன்று சந்திரராஜ் பால் எடுக்க சென்று விட்டார். இந்திராவும், வாசு தேவியும் வீட்டில் படுத்து தூங்கினர். அப்போது காற்றுக்காக கதவை திறந்து வைத்து தூங்கியதாக தெரிகிறது.

இந்த வேளையில் வீட்டின் பின்பக்க வழியாக மர்ம நபர் வீட்டிற்குள் நுழைந்தார். அவர் தூங்கி கொண்டிருந்த இந்திரா, வாசுதேவி அணிந்திருந்த 5 பவுன் நகைகளை பறித்து சென்று விட்டார். இதன் மதிப்பு ரூ.1 லட்சம் ஆகும். சத்தம் கேட்டு திடுக் கிட்டு விழித்த இந்திரா திருடன் திருடன் என கத்தினார்.

அக்கம் பக்கத்தினர் திரண்டு வருவதற்குள் மர்ம நபர் அங்கிருந்து தப்பி ஓடிவிட்டான். இதுபற்றி வாசுதேவநல்லூர் போலீசில் புகார் செய்யப்பட்டது. போலீசார் வழக்குப்பதிவு செய்து மர்ம நபர்களை தேடி வருகின்றனர்.

தாம்பரம்:

பல்லாவரத்தை அடுத்த அனகாபுத்தூர், வினாயகா நகர், 4-வது தெருவில் வசித்து வருபவர் அலெக்ஸ். என்ஜினீயர். மயிலாப்பூரில் உள்ள தனியார் நிறுவனத்தில் வேலை பார்த்து வருகிறார்.

இவரது 5 வயது மகள் மதிவானிக்கு உடல்நிலை பாதிக்கப்பட்டது. இதையடுத்து அவரை வடபழனியில் உள்ள தனியார் ஆஸ்பத்திரியில் அனுமதித்தனர். அலெக்சும், அவரது மனைவியும் ஆஸ்பத்திரியில் இருந்து மகளை கவனித்து வந்தனர்.

இந்த நிலையில் நேற்று இரவு உடல் நலம் தேறிய மகளை அவர்கள் வீட்டுக்கு அழைத்து வந்தனர். அப்போது வீட்டின் கதவு பூட்டு உடைக்கப்பட்டு கிடந்தது.

பீரோவில் இருந்த 70 பவுன் நகை, வெள்ளிப் பொருட்களை காணவில்லை. வீட்டில் ஆட்கள் இல்லாததை நோட்டமிட்ட மர்ம கும்பல் நகை-பொருட்களை சுருட்டி சென்று இருப்பது தெரிய வந்தது.

இது குறித்து சங்கர் நகர் போலீசில் புகார் செய்யப்பட்டது. போலீசார் வழக்குப் பதிவு செய்து விசாரணை நடத்தி வருகிறார்கள்.

கோவை:

கோவை மதுக்கரை பாரதி காலனியை சேர்ந்தவர் பிரின்ஸ் ஜோசப் (32). கால் டாக்சி டிரைவர்.சம்பவத்தன்று இவர் வீட்டை பூட்டி விட்டு குடும்பத்துடன் வெளியே சென்றார். பின்னர் வீடு திரும்பிய போது வீட்டின் முன் பக்க கதவு உடைக்கப்பட்டு இருந்தது.

வீட்டின் உள்ளே இருந்த பீரோ உடைக்கப்பட்டு அதில் வைக்கப்பட்டு இருந்த 3 பவுன் நகை திருட்டு போய் இருந்தது. இது குறித்து பிரின்ஸ் ஜோசப் மதுக்கரை போலீசில் புகார் செய்தார்.போலீசார் வழக்கு பதிவு செய்து விசாரணை நடத்தி வருகிறார்கள்.

கோவை சுண்டக்காமுத்தூரை சேர்ந்தவர் திருப்பதி (47). இவர் வீட்டை பூட்டி விட்டு குடும்பத்துடன் வெளியூர் சென்று இருந்தார். திரும்பி வந்து பார்த்த போது வீட்டின் முன் பக்க கதவு உடைக்கப்பட்டு இருந்தது.

வீட்டின் உள்ளே இருந்த பீரோ திறந்து கிடந்தது. அதில் வைக்கப்பட்டு இருந்த 5 பவுன் நகையை காணவில்லை. அதனை யாரோ மர்ம நபர்கள் திருடி சென்றது தெரிய வந்தது.இது குறித்து பேரூர் போலீசில் திருப்பதி புகார் அளித்தார். போலீசார் வழக்கு பதிவு செய்து நகையை திருடிய மர்ம நபர்களை தேடி வருகிறார்கள்.

தேனி:

தேனி அருகே கொடுவிலார்பட்டியை சேர்ந்தவர் பாலகிருஷ்ணன் (வயது34). தேனியில் உள்ள தேசியமயமாக்கப்பட்ட வங்கியில் கேஷியராக வேலை பார்த்து வருகிறார்.

இவர் தனது குடும்பத்துடன் தேனியில் உள்ள தாய் வீட்டிற்கு சென்றார். அப்போது பக்கத்து வீட்டு காரர்கள் பாலகிருஷ்ணனின் வீட்டின் கதவு உடைக்கப் பட்டிருப்பதாக அவருக்கு செல்போன் மூலம் தகவல் தெரிவித்தனர். அவர் விரைந்து வந்து பார்த்தபோது வீட்டில் இருந்த பொருட்கள் சிதறி கிடந்தன. அதிர்ச்சி அடைந்த பாலகிருஷ்ணன் உள்ளே சென்று பார்த்தபோது பீரோவும் உடைக்கப்பட்டிருந்தது.

அங்கிருந்த 6 பவுன் தங்க நகைகளை மர்ம நபர்கள் கொள்ளையடித்து சென்றது தெரிய வந்தது. இது குறித்து பழனிசெட்டிபட்டி போலீசில் புகார் அளிக்கப்பட்டது. போலீசார் வழக்குப்பதிவு செய்து துணிகர கொள்ளையில் ஈடுபட்ட மர்ம நபர்களை தேடி வருகின்றனர்.

தேனி புறநகர் பகுதியில் தனியாக இருக்கும் வீடுகளை நோட்டமிட்டு கொள் ளையடிக்கும் சம்பங்கள் அதிகரித்து வருகின்றன.

வியாபாரிகள் போல் நோட்டமிட்டு பூட்டி கிடக்கும் வீடுகளில் தங்கள் கைவரிசையை காட்டி வருகின்றனர். மேலும் தனியாக நடந்து செல்லும் பெண்களிடம் நகை பறிக்கும் சம்பவங்களும் அதிகரித்து வருகிறது.

எனவே போலீசார் ரோந்து பணியை தீவிரப்படுத்த வேண்டும் என பொதுமக்கள் வலியுறுத்தி உள்ளனர்.

கோவை:

கோவை ஒண்டிப்புதூர் சூர்யா நகர் முதல் தெருவை சேர்ந்தவர் கார்த்திகேயன் (வயது 32). என்ஜினீயர். இவரது மனைவி பிரியலட்சுமி. சம்பவத்தன்று கார்த்திகேயன் தனது மனைவியை அழைத்துக்கொண்டு நெகமத்தில் நடந்த திருமண நிகழ்ச்சிக்கு சென்றார். இன்று அதிகாலை திரும்பி வந்து பார்த்தபோது வீட்டின் பூட்டு உடைக்கப்பட்டிருந்தது. அதிர்ச்சியடையந்த அவர் வீட்டுக்குள் சென்று பார்த்தபோது அங்கிருந்த 7½ பவுன் நகை மற்றும் ரூ.5 ஆயிரம் கொள்ளைபோனது தெரியவந்தது.

இது குறித்து சிங்காநல்லூர் போலீசில் புகார் செய்யப்பட்டது. போலீசார் வழக்குப்பதிவு செய்து கொள்ளையர்களை தேடி வருகிறார்கள்.

கோவை:

கோவை பெரியகடை வீதி அருகே சாமி அய்யர் புது வீதி கே.சி.தோட்டம் பகுதியை சேர்ந்தவர் கணேசன் (வயது 44).

இவர் பெரியகடை வீதியில் தங்க நகை பட்டறை நடத்தி வருகிறார்.

நேற்று இரவு 7 மணி அளவில் இவர் வீட்டை பூட்டி விட்டு குடும்பத்தினருடன் வெளியே சென்றார். பின்னர் இரவு 8.30 மணிக்கு வீடு திரும்பினார்.

அப்போது வீட்டின் முன் கதவு உடைக்கப்பட்டு இருப்பதை கண்டு அதிர்ச்சியடைந்தார். உள்ளே சென்ற போது பீரோவை திறந்து மர்ம நபர்கள் 45 பவுன் நகையை திருடி சென்றிருப்பது தெரிய வந்தது.

இதுகுறித்து பெரியகடை வீதி போலீசில் புகார் செய்யப்பட்டது. சம்பவஇடத்துக்கு மாநகர மேற்கு சரக குற்றப் பிரிவு உதவி கமி‌ஷனர் ராஜ்குமார்நவராஜ், இன்ஸ்பெக்டர் ஆனந்த் மற்றும் போலீசார் விரைந்து சென்று விசாரணை நடத்தினர்.

கைரேகை நிபுணர்கள் வரவழைக்கப்பட்டு விசாரணை நடந்தது. இதில் 2 இடங்களில் பதிவாகி இருந்த கைரேகைகள் சிக்கியது.

கொள்ளை நடந்த வீட்டின் அருகே ஏராளமான வீடுகள், நகைபட்டறைகள் உள்ளன. வீட்டில் இருந்து சிறிது தூரத்தில் வங்கி ஏ.டி.எம். மையம் உள்ளது.

இந்த மையத்தின் முன்புறம் பொருத்தப்பட்டிருந்த கண்காணிப்பு  கேமிரா காட்சி களை ஆய்வு செய்து போலீசார் விசாரணை நடத்தி வருகின்றனர்.

கணேசன் வீட்டில் இருந்து குடும்பத்தினருடன் வெளியே செல்வதை கண்காணித்து மர்மநபர்கள் கைவரிசை காட்டி உள்ளனர். எனவே அதேபகுதியை சேர்ந்தவர்கள் இதில் ஈடுபட்டிருக்கலாம்? என போலீசார் கருதுகின்றனர். அந்த பகுதியில் சந்தேகத்திற்கிடமாக நடமாடியவர்கள் யார்-யார்? என பட்டியல் சேகரித்து போலீசார் விசாரணையை தீவிரப் படுத்தி உள்ளனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

கவுண்டம்பாளையம்:

கோவை அருகே உள்ள கோவிந்த நாயக்கன் பாளையம் ஏ.ஜி. நகரை சேர்ந்தவர் தேவராஜ். தனியார் கல்லூரியில் லேப்-டெக்னீசியனாக வேலை பார்த்து வருகிறார். இவரது மனைவி கவிதா. இவர் அதே கல்லூரியில் அலுவலக உதவியாளராக உள்ளார். இவர்களது மகன் விக்னேசும் அக்கல்லூரியில் 3-ம் ஆண்டு படித்து வருகிறார். சம்பவத்தன்று 3 பேரும் கல்லூரிக்கு சென்று விட்டனர். மாலை 4 மணியளவில் விக்னேஷ் வீடு திரும்பினார். அப்போது வீட்டின் முன் பக்க கதவு திறந்து கிடந்தது.

இதனால் அதிர்ச்சி அடைந்த அவர் தனது பெற்றோருக்கு தகவல் தெரிவித்தார். அவர்கள் வீட்டிற்கு விரைந்து வந்தனர். உள்ளே சென்று பார்த்த போது பீரோ திறந்து கிடந்தது.

அதில் வைக்கப்பட்டு இருந்த 4 பவுன் செயின்,2 பவுன் மைனர் சங்கிலி, 2 பவுன் மோதிரம் ஆகியவை திருட்டு போய் இருந்ததை கண்டு திடுக்கிட்டனர். இது குறித்து பெரியநாயக்கன் பாளையம் போலீசில் புகார் செய்யப்பட்டது.போலீசார் வழக்கு பதிவு செய்து விசாரணை நடத்தி வருகிறார்கள். கடந்த ஆண்டு இதே போல் தேவராஜ் வீட்டில் 15 பவுன் நகை திருட்டு போய் இருந்தது.

அதில் சம்பந்தப்பட்ட குற்றவாளிகள் இன்னும் பிடிபடவில்லை.

இந்த நிலையில் மீண்டும் திருட்டு நடைபெற்று இருப்பது பரபரப்பை ஏற்படுத்தி உள்ளது.

போரூர்:

எம்.ஜி.ஆ.ர் நகர் சூளைபள்ளம் மிசா ஆபிரகாம் தெருவைச் சேர்ந்தவர் அமிர்தராஜ். ரியல் எஸ்டேட் தொழில் செய்து வருகிறார்.

இவர் வீட்டை பூட்டி விட்டு குடும்பத்துடன் வெளியே சென்று விட்டு மாலையில் திரும்பி வந்தார்.

அப்போது வீட்டு கதவு பூட்டை உடைந்து திறந்து கிடந்ததை கண்டு அதிர்ச்சி அடைந்தார். உள்ளே சென்று பார்த்த போது பீரோவில் இருந்த ரூ.49ஆயிரம் மற்றும் 5 சவரன் நகைகளை மர்ம நபர்கள் கொள்ளையடித்து சென்று இருப்பது தெரிய வந்தது.

இதுகுறித்து எம்.ஜி.ஆர். நகர் போலீசில் அமிர்தராஜ் நேற்று புகார் அளித்தார். இன்ஸ்பெக்டர் சொர்ண களஞ்சியம் அந்த பகுதியில் உள்ள கண்காணிப்பு கேமராவை ஆய்வு செய்து வருகிறார்.

இதுதொடர்பாக வீட்டின் மேல்தளத்தில் வசிக்கும் அமிர்தராஜின் சகோதரரிடம் போலீசார் விசாரணை நடத்தி வருகிறார்கள்.

சென்னிமலை:

ஈரோடு மாவட்டம், சென்னிமலை அடுத்த ஈங்கூர் பகுதியில் உள்ளது சி.எஸ்.ஐ. காலனி. இங்கு வசிப்பவர் தனபாக்கியம் (65) இவரது கணவர் சாமுவேல், கடந்த 5 வருடத்திற்கு முன்பு இறந்து விட்டார்.

இதனால் தனபாக்கியம் அவரது வீட்டில் தனியாக வசித்து வந்தார். கடந்த 15 நாட்களுக்கு முன்பு கோவையில் உள்ள உறவினர் வீட்டிற்கு தனபாக்கியம் சென்று விட்டார்.

நேற்று மதியம் வீட்டுக்கு வந்து பார்த்தபோது வீட்டின் ஓடு பிரிக்கப்பட்டிருந்தது கண்டு அதிர்ச்சியானார். வீட்டுக்குள் இருந்த பீரோ உடைக்கப்பட்டு அங்கிருந்த 5½ பவுன் தாலிக்கொடி, 1ž பவுன் மோதிரம் ஒன்று ½ பவுன் மோதிரம் ஒன்று மற்றும் ½ பவுன் தோடு திருட்டு போயிருந்தது தெரிய வந்தது.

இதுகுறித்து சென்னிமலை போலீசாருக்கு தனபாக்கியம் தகவல் கொடுத்தார். அதன் பேரில் இன்ஸ்பெக்டர் செல்வராஜ் சம்பவ இடத்திற்கு வந்து விசாரணை நடத்தி வரு கிறார்.

ஈரோடு:

ஈரோடு கீழ் திண்டல் நல்லியம்பாளையம், பாலாஜி ஆர்கேட் பகுதியை சேர்ந்தவர் ரவி (வயது 51).

சொந்தமாக நிதி நிறுவனம் நடத்தி வருகிறார். இவரது மனைவி காஞ்சனா. இவர்களுக்கு 2 மகள்கள் உள்ளனர். நேற்று வழக்கம் போல் ரவி வேலைக்கு சென்றுவிட்டார்.

அவரது மனைவியும் 2 மகள்களும் ஜவுளி எடுப்பதற்காக வீட்டை பூட்டி விட்டு சென்றனர். நேற்று இரவு ரவி வேலை முடிந்து மீண்டும் வீட்டுக்கு வந்தார்.

அப்போது வீட்டின் கதவு உடைக்கப்பட்டு இருப்பதை கண்டு அதிர்ச்சி அடைந்தார். வீட்டுக்கு உள்ளே சென்று பார்த்தபோது வீட்டின் உள்ள 2 பீரோக்கள் கதவு திறந்து துணிகள் சிதறி கிடந்தன.

பீரோவில் இருந்த 30 பவுன் நகைகள் மற்றும் ரூ.1 லட்சம் ரொக்கப்பணம் கொள்ளையடிக்கப்பட்டிருந்ததை கண்டு ரவி அதிர்ச்சி அடைந்தார்.

வீட்டில் ஆட்கள் இல்லாததை நோட்டமிட்ட மர்ம நபர்கள் இந்த கொள்ளையில் ஈடுபட்டிருக்கலாம் என தெரிகிறது. இதுகுறித்து ரவி தாலுகா போலீசுக்கு தகவல் தெரிவித்தார்.

அவர்கள் சம்பவ இடத்திற்கு விரைந்து வந்து விசாரணை நடத்தினர். மேலும் கைரேகை நிபுணர்களும் சம்பவ இடத்திற்கு வந்து தடயங்களை பதிவு செய்தனர்.

கொள்ளை நடந்த வீட்டிலும் அந்த பகுதியிலும் சி.சி.டி.வி. கேமிரா இருக்கிறதா? என்று போலீசார் பார்த்தனர். ஆனால் கேமிரா பொருத்தப்படவில்லை.

இதனால் கொள்ளையர்களை கண்டுபிடிப்பதில் சிக்கல் ஏற்பட்டுள்ளது. ஈரோடு தாலுகா போலீசார் இது குறித்து வழக்குப்பதிவு செய்து விசாரணை நடத்தி கொள்ளையர்களை தேடி வருகின்றனர்.