திருநெல்வேலி

நெல்லை:

நெல்லை, தென்காசி மாவட்டங்களில் வடகிழக்கு பருவமழை பரவலாக பெய்து வருகிறது.

நெல்லையில் ஒரு வாரத்துக்கும் மேலாக மாநகர் மற்றும் புறநகர் பகுதிகளில் பரவலாக பெய்து வரும் கனமழையால் பொதுமக்களின் இயல்பு வாழ்க்கை வெகுவாக பாதிக்கப்பட்டுள்ளது. அதே நேரம் மேற்கு தொடர்ச்சி மலைப் பகுதிகளில் தொடர்ந்து கனமழை பெய்து வருவதால் மாவட்டத்தின் பிரதான அணைகளான பாபநாசம், மணிமுத்தாறு, சேர்வலாறு அணைகளுக்கு நீர்வரத்து தொடர்ந்து அதிகரித்து வருகிறது. இதனால் அணைகளின் நீர்மட்டம் வெகுவாக உயர்ந்து வருகிறது.

மணிமுத்தாறு அணை நீர்மட்டம் நேற்று 73 அடியாக இருந்த நிலையில் இன்று 3 அடி உயர்ந்து 76 அடியை கடந்துள்ளது. அந்த அணைக்கு வினாடிக்கு 1,782 கனஅடி நீர் வந்து கொண்டிருக்கிறது.143 அடி கொள்ளளவு கொண்ட பாபநாசம் அணை நீர்மட்டம் இன்று மேலும் ஒரு அடி உயர்ந்து 88 அடியை கடந்துள்ளது. அந்த அணைக்கு வினாடிக்கு 2130 கன அடி நீர் வந்து கொண்டிருக்கிறது. அங்கு அதிகபட்சமாக 22 மில்லி மீட்டரும், மணிமுத்தாறில் 12 மில்லி மீட்டரும் மழை பதிவாகியுள்ளது. சேர்வலாறு அணை நீர்மட்டம் கிடுகிடுவென உயர்ந்துள்ளது. நேற்று அந்த அணையில் 82.68 அடி நீர் இருப்பு இருந்த நிலையில் இன்று ஒரே நாளில் சுமார் 9 அடி உயர்ந்து 91.38 அடியை எட்டியுள்ளது.

இதனிடையே தாமிரபரணி ஆற்றில் பெரிய அளவில் வெள்ளப்பெருக்கு இல்லை என்றாலும் பரவலாக பெய்து வரும் மழையால் சுமார் 2100 கன அடி தண்ணீர் வந்து கொண்டிருக்கிறது. மழையும் தொடர்ந்து பெய்த வண்ணம் உள்ளது. இதன் காரணமாக நீர்வரத்து அதிகரிக்க வாய்ப்பு இருக்கிறது. எனவே பொதுமக்கள் தாமிரபரணி ஆறு மற்றும் ஏரிகள், குளங்கள், ஓடைகளில் இறங்கி குளிக்க வேண்டாம் என்று மாவட்ட கலெக்டர் கார்த்திகேயன் கேட்டுக் கொண்டுள்ளார்.

எனினும் அதனை கண்டுகொள்ளாமல் நெல்லை மாநகரப் பகுதியில் குறுக்குத்துறை வண்ணாரப்பேட்டை பேராட்சி அம்மன் கோவில் படித்துறைகளில் பொதுமக்கள் இன்று காலையில் இருந்து குளித்து வருகின்றனர்.

மாநகர் பகுதியில் நேற்று மாலையில் தொடங்கி இரவு வரை விட்டுவிட்டு சாரல் மழை பெய்து கொண்டிருந்தது. இன்று காலை முதல் டவுன் சந்திப்பு, வண்ணார்பேட்டை, மேலப்பாளையம், கேடிசி நகர், டக்கரம்மாள்புரம் உள்ளிட்ட பகுதிகளில் சாரல் மழை பெய்து வருகிறது. இதனால் காலையில் பள்ளி, கல்லூரிகளுக்கு செல்லும் மாணவ, மாணவிகள், பணிக்கு செல்லும் பெண்கள், வாகன ஓட்டிகள் பலதரப்பட்டவர்களும் மிகுந்த அவதி அடைந்தனர். அவர்கள் குடை பிடித்தபடி சாலையில் சென்றனர். மாவட்டத்தில் மூலைக்கரைப்பட்டி சுற்றுவட்டார பகுதிகளில் 20 மில்லி மீட்டர் மழை பதிவாகியுள்ளது. சேரன்மகாதேவி, களக்காடு, நாங்குநேரி, ராதாபுரம், அம்பை உள்ளிட்ட பகுதிகளில் இன்று காலையில் இருந்தே பரவலாக சாரல் மழை பெய்து வருகிறது. இதனால் விவசாயிகள் மிகுந்த மகிழ்ச்சி அடைந்துள்ளனர். பிசான பருவ நெல் சாகுபடி பணிகளும் மும்முரமாக நடைபெற்று வருகிறது.

தொடர் கனமழை காரணமாக மணிமுத்தாறு அருவியில் இன்று 8-வது நாளாக குளிக்க தடை நீட்டிக்கப்பட்டுள்ளது. களக்காடு தலையணையிலும் நீர்வரத்து அதிகமாக இருப்பதால் அங்கும் தடை நீடிக்கிறது. பாபநாசம் அகஸ்தியர் அருவியில் தண்ணீர் ஆர்ப்பரித்து கொட்டி வருகிறது.

தென்காசி மாவட்டத்தில் நேற்று விட்டுவிட்டு சில இடங்களில் சாரல் மழை பெய்து வந்த நிலையில் இன்று காலையில் இருந்து பரவலாக சாரல் மழை அடித்து வருகிறது. இதனால் குளிர்ச்சியான சூழ்நிலை நிலவுகிறது. பொதுமக்களின் இயல்பு வாழ்க்கை பாதிப்படைந்துள்ளது. தென்காசி, செங்கோட்டை, ஆய்க்குடி, சிவகிரி உள்ளிட்ட மேற்கு தொடர்ச்சி மலையை ஒட்டி அமைந்துள்ள பகுதிகளில் மழை அதிகமாக பெய்து வருகிறது. இதனால் சாலைகளில் வெள்ளம் பெருக்கெடுத்து ஓடுகிறது.

அணைப்பகுதிகளை பொறுத்தவரை 85 அடி கொள்ளளவு கொண்ட கடனா அணை நீர்மட்டம் இன்று ஒரே நாளில் 7 அடி உயர்ந்து 57.50 அடியை எட்டியுள்ளது. ராமநதி அணை நீர்மட்டம் 2 அடி உயர்ந்து 65 அடியாக உள்ளது. தொடர்ந்து பெய்து வரும் கனமழை காரணமாக அந்த அணைகளுக்கு நீர்வரத்து அதிகரித்து வருவதால் விவசாயிகள் மகிழ்ச்சி அடைந்துள்ளனர். கருப்பாநதி அணை நீர்மட்டம் 47.57 அடியாகவும், அடவிநயினார் அணை நீர்மட்டம் 56.25 அடியாகவும் உள்ளது. கடனாநதி அணைப்பகுதியில் 51 மில்லி மீட்டர் மழை பதிவாகியுள்ளது. ராம நதிகள் 16 மில்லி மீட்டர், குண்டாறு பகுதியில் 18 மில்லி மீட்டரும் மழை பெய்துள்ளது.

நெல்லை:

தமிழ்நாடு காங்கிரஸ் கமிட்டி தலைவர் செல்வப்பெருந்தகை எம். எல்.ஏ. இன்று நெல்லை வந்தார். அவர் வண்ணார்பேட்டை அரசு சுற்றுலா மாளிகையில் நிருபர்களை சந்தித்தார். அப்போது அவர் கூறியதாவது:-

சட்டமன்ற பொது கணக்கு குழுவினர் இன்று நெல்லைக்கு வருகை தந்துள்ளோம். நெல்லை மாவட்டத்தில் நடைபெற்று வரும் பல்வேறு திட்ட பணிகளை ஆய்வு செய்து முடித்துவிட்டு கலெக்டர் அலுவலகத்தில் நடைபெறும் ஆய்வுக் கூட்டத்தில் பங்கேற்க உள்ளோம்.

கன்னியாகுமரியில் இருந்து வரும்போது நாங்குநேரி தொழில்நுட்ப பூங்காவை பார்வையிட்டு ஆய்வு செய்தோம். அங்கு தொழில் துறை அதிகாரிகளிடம் ஆலோசனை நடத்தியதில் கலைஞர் ஆட்சிக் காலத்தில் ஆரம்பிக்கப்பட்ட நாங்குநேரி தொழில் பூங்கா பல்வேறு வழக்குகள் காரணமாக முடங்கிப் போய் கிடக்கிறது.

இதில் தற்போது ஒரு வழக்கு முடிக்கப்பட்டு 590 ஏக்கர் இடம் மீட்கப்பட்டுள்ளதாகவும், விரைவில் மற்ற வழக்குகளையும் முடித்து சுமார் 1800 ஏக்கர் இடத்தை மீட்க நடவடிக்கை எடுக்கப்பட்டு வருவதாகவும் தெரிவித்துள்ளனர்.

அதனைப் பயன்பாட்டுக்கு கொண்டு வருவதன் மூலம் நாங்குநேரி சுற்றுவட்டாரத்திலும், நெல்லை மாவட்டத்திலும் ஏராளமான இளைஞர்களுக்கு வேலை வாய்ப்பு கிடைக்கும். தற்போது அங்கு ஐ.எஸ்.ஆர்.ஓ. சார்பில் உதிரி பாகங்கள் தயாரிப்பதற்கான இடத்தை தேடி வருகிறார்கள்.

ஜார்கண்ட், மகாராஷ்டிரா, வயநாடு உள்ளிட்ட பகுதிகளில் இந்தியா கூட்டணிக்கு வெற்றி வாய்ப்பு பிரகாசமாக இருக்கிறது.

வயநாடு தொகுதியில் பிரியங்கா காந்தி லட்சக்கணக்கான வாக்குகள் வித்தியாசத்தில் அமோக வெற்றி பெறுவார்.

நெல்லை கிழக்கு மாவட்ட காங்கிரஸ் தலைவராக இருந்த கே.பி.கே. ஜெயக்குமார் மர்ம மரண வழக்கில் சி.பி.சி.ஐ.டி. போலீசார் தொழில்நுட்ப விசாரணையில் இறங்கி உள்ளனர்.

அமைச்சர் கே. என். நேருவின் சகோதரர் ராம ஜெயம் கொலை வழக்கில் சி.பி.ஐ. அதிகாரிகள் திணறி வருவது போலவே கே.பி.கே. ஜெயக்குமார் வழக்கும் சவாலான ஒன்றாக இருக்கிறது. விரைவில் இந்த வழக்குக்கு தீர்வு கிடைக்கும் என்று போலீஸ் தரப்பில் தெரிவிக்கப்பட்டுள்ளது.

இதுவரை நடைபெற்ற விசாரணையில் 2, 3 நபர்களை சந்தேகப்பட்டு அதன் அடிப்படையில் அவர்களின் நடவடிக்கைகளை கண்காணித்து விசாரணை நடத்தி வருவதாக போலீஸ் உயர் அதிகாரிகள் தெரிவித்துள்ளனர். விசாரணைக்கு முழு ஒத்துழைப்பு அளித்து வருகிறோம். விரைவில் ஜெயக்குமார் வழக்கில் முடிவு கிடைக்கும்.

இந்தியா கூட்டணி வலிமையான கூட்டணியாக உள்ளது. எக்கு கோட்டையாக எங்களது கூட்டணி இருக்கிறது. கூட்டணியில் இருக்கும் கட்சிகளின் நிர்வாகிகள் சிலர் தங்களது கருத்து சுதந்திரத்தின் அடிப்படையில் சில கருத்துக்களை எதிர்மறையாக தெரிவிக்கலாம்.

கூட்டணி என்பது சமுத்திரம் போன்றது. அதில் அலைகள் இருக்கத்தான் செய்யும். எங்கள் கூட்டணி வலிமையாக இருக்கிறது. இன்னும் பல கட்சிகள் இந்த கூட்டணியில் வந்து சேரும்.

தமிழக வெற்றிக்கழகம் என்பது நடிகர் விஜய் கட்சி. கட்சி கூட்டணி குறித்து அவர் முடிவு செய்து கொள்வார். எங்கள் கூட்டணி வலிமையாக இருக்கிறது. நாங்கள் தெளிவாக இருக்கிறோம்.

மழை காரணமாக ஓரிரு இடங்களில் மட்டும் இன்று ஆய்வு செய்ய உள்ளோம். மாவட்ட நிர்வாகத்தில் உள்ள அதிகாரிகள் மழை நிவாரண பணிகளில் ஈடுபட்டு வருகின்றனர். அரசு சிறப்பாக செயல்பட்டு வருகிறது.

இவ்வாறு அவர் கூறினார்.

பேட்டியின் போது முன்னாள் மத்திய மந்திரி தனுஷ்கோடி ஆதித்தன், மாநில பொருளாளர் ரூபி மனோகரன் எம்.எல்.ஏ., நெல்லை பாராளுமன்ற உறுப்பினர் ராபர்ட் புரூஸ், மாநகர் மாவட்ட தலைவர் சங்கரபாண்டியன், முன்னாள் இளைஞர் காங்கிரஸ் தலைவர் வி.பி. துரை, பாளை வட்டார தலைவர் டியூக் துரைராஜ், துணை வட்டார தலைவர் ஜேம்ஸ் பீட்டர் மற்றும் பலர் உடன் இருந்தனர். 

டெல்டா மாவட்டங்கள் மற்றும் தென் மாவட்டங்களில் கடந்த சில தினங்களாக பரவலாக மழை பெய்து வருகிறது. ஓரிரு இடங்களில் கனமழை பெய்து வருகிறது. நேற்று தூத்துக்குடி மாவட்டத்தில் கனமழை தொடர்ந்ததால் பள்ளிளுக்கு விடுமுறை அளிக்கப்பட்டது.

இந்த நிலையில் இன்று திருநெல்வேலி மாவட்டத்தில் உள்ள பள்ளிகளுக்கு மழைக் காரணமாக விடுமுறை அளிக்கப்பட்டுள்ளது.

நேற்றுமுதல் மிதமான மழை பெய்து வந்த நிலையில், மழை தொடரும் என வானிலை மையம் தெரிவித்துள்ள நிலையில் விடுமுறை அளிக்கப்பட்டுள்ளது.

நெல்லை:

நெல்லை மேலப்பாளையத்தில் உள்ள அலங்கார் தியேட்டரில் நடிகர் சிவகார்த்திகேயன் நடித்த அமரன் திரைப்படம் இரவு காட்சிகளாக திரையிடப்பட்டு வருகிறது.

இந்த தியேட்டரில் கடந்த 3 நாட்களுக்கு முன்பு அதிகாலை 2 மர்ம நபர்கள் பெட்ரோல் குண்டுகளை வீசிவிட்டு தப்பி சென்றனர். இதுகுறித்து மேலப்பாளையம் போலீசார் வழக்குப்பதிவு செய்து சி.சி.டி.வி. காட்சிகளை அடிப்படையாக கொண்டு விசாரணை நடத்தியபோது, அதில் மேலும் ஒருவருக்கு தொடர்பு இருப்பது தெரியவந்தது.

இதையடுத்து 3 தனிப்படைகள் அமைத்து தொடர்புடையவர்களை போலீசார் தேடி வந்தனர். மேலும் தென்மண்டல தீவிரவாத தடுப்பு பிரிவு போலீசாரும் தீவிர விசாரணையில் இறங்கினர்.

மதுரையில் இருந்து அந்த பிரிவின் போலீஸ் சூப்பிரண்டு ரமேஷ் கண்ணா தலைமையிலான போலீசார் நெல்லையில் முகாமிட்டு இன்று 3-வது நாளாக விசாரித்து வருகின்றனர்.

சுமார் 60-க்கும் மேற்பட்ட சி.சி.டி.வி. காட்சிகளை வைத்து விசாரணை நடத்தி சந்தேகப்படும்படியாக இருந்த 3 நபர்களை மேலப்பாளையம் போலீசார் பிடித்து ரகசிய இடத்தில் வைத்து விசாரணை நடத்தினர். அதில் ஒருவருக்கு இந்த வெடிகுண்டு வீச்சு சம்பவத்தில் தொடர்பு இருப்பது தெரிய வந்துள்ளது.

அமரன் திரைப்படத்திற்கு எதிர்ப்பு தெரிவித்து தான் இந்த வெடிகுண்டு வீச்சு சம்பவம் நடந்துள்ளது என போலீசார் உறுதிபடுத்தி உள்ள நிலையில், அந்த நபரை கைது செய்து போலீசார் துருவி துருவி விசாரித்து வருகின்றனர்.

அந்த நபர் அளிக்கும் தகவலின் அடிப்படையில், வெடிகுண்டு வீச்சு சம்பவத்தில் ஈடுபட்ட மற்ற 2 பேர் யார்-யார்? என்பது தெரியவரும் எனவும், இன்றைக்குள் அவர்கள் போலீசில் பிடிபடுவார்கள் எனவும் போலீசார் தரப்பில் தெரிவிக்கப்பட்டுள்ளது. அதே நேரம் தீவிரவாத தடுப்பு பிரிவு போலீசாரும் ஒருவரை பிடித்து ரகசிய இடத்தில் வைத்து விசாரணை மேற்கொண்டு வருகின்றனர்.

நெல்லை:

நெல்லை மேலப்பாளையத்தில் உள்ள அலங்கார் தியேட்டரில் நடிகர் சிவகார்த்திகேயன் நடித்த அமரன் திரைப்படம் இரவு காட்சிகளாக திரையிடப்பட்டு வருகிறது. இந்த தியேட்டரில் நேற்று முன்தினம் இரவு காட்சி முடிந்த பின்னர் ரசிகர்கள் வெளியேறிவிட்டனர். தியேட்டர் ஊழியர்கள் அங்கு பணியில் இருந்த நிலையில் நேற்று அதிகாலை 3 மணியளவில் மர்ம நபர்கள் 2 பேர் தியேட்டர் வளாகத்திற்குள் 2 பெட்ரோல் குண்டுகளை வீசிவிட்டு தப்பிச்சென்றனர்.

இதுகுறித்து தகவல் அறிந்து மேலப்பாளையம் போலீசார் அங்கு விரைந்து சென்று விசாரணை நடத்தினர். மேலும் தடயவியல் நிபுணர்கள் வரவழைக்கப்பட்டு தடயங்கள் சேகரித்தனர். இதுகுறித்து போலீசார் வழக்குப்பதிவு செய்து மர்ம நபர்களை தேடி வருகின்றனர். சி.சி.டி.வி. காட்சி மேலும் துணை போலீஸ் சூப்பிரண்டு விஜயகுமார் மேற்பார்வையில் இன்ஸ்பெக்டர் விஜி தலைமையில் தனிப்படைகள் அமைக்கப்பட்டு மர்ம நபர்கள் குறித்து தீவிர விசாரணை நடத்தப்பட்டு வருகிறது.

அந்த பகுதியில் உள்ள சி.சி.டி.வி. கேமராவில் பதிவான காட்சியில் 2 மர்ம நபர்கள் பெட்ரோல் குண்டுகளை வீசிய காட்சிகள் பதிவாகி உள்ளது. அதன் அடிப்படையில் தேடுதல் வேட்டை நடந்து வருகிறது. நேற்று தியேட்டர் அருகே பொருத்தப்பட்டிருந்த சி.சி.டி.வி. கேமராவை தவிர சந்தை முக்கு ரவுண்டானா, குறிச்சி முக்கு செல்லும் மெயின் ரோட்டில் பொருத்தப்பட்டுள்ள கேமராக்களையும் தனிப்படையினர் ஆய்வு செய்தனர். ஆனால் அதில் அந்த நபர்கள் சென்ற காட்சிகள் இல்லை. அதேநேரம் பெட்ரோல் குண்டு வீச்சில் மேலும் ஒரு வாலிபருக்கு தொடர்பு இருப்பது தெரியவந்துள்ளது.

3 பேரும் ஒரே மோட்டார் சைக்கிளில் வந்த நிலையில், ஒருவர் மோட்டார் சைக்கிளை தயார் நிலையில் வைத்துக் கொண்டு நின்றுள்ளார். மற்ற 2 பேரும் பெட்ரோல் குண்டுகளை தியேட்டரில் வீசிவிட்டு அந்த மோட்டார் சைக்கிளில் ஏறி தப்பி சென்றுள்ளது தெரிய வந்துள்ளது. அந்த கும்பல் மெயின்ரோட்டின் வழியாக தப்பித்து சென்றால் சி.சி.டி.வி. கேமராக்களில் சிக்கி கொள்வோம் என்பதை அறிந்தே மேலப்பாளையம் பகுதியில் உள்ள தெருக்கள் வழியாக தப்பி சென்றுள்ளது விசாரணையில் தெரிய வந்துள்ளது.

நேற்று இரவு வரை சுமார் 25-க்கும் மேற்பட்ட சி.சி.டி.வி. கேமராக்களை போலீசார் ஆய்வு செய்து முடித்துள்ளனர். மெயின் சாலைகளில் அந்த கும்பல் வரவில்லை என்பது உறுதியாகி உள்ளது. இதனால் இன்று அந்த பகுதியில் உள்ள தெருக்களில் உள்ள சி.சி.டி.வி. கேமராக்களை ஆய்வு செய்யும் பணியில் போலீசார் தீவிரம் காட்டி உள்ளனர். ஏற்கனவே அமரன் திரைப்படம் வெளியானபோது அலங்கார் தியேட்டரிலும் பல்வேறு அமைப்பினர் திரண்டு வந்து போராட்டம் நடத்தியதால் தென்மண்டல தீவிரவாத தடுப்பு பிரிவு போலீசாரும் நேற்று நெல்லை வந்து முகாமிட்டுள்ளனர்.

அவர்கள் நேற்று சம்பவம் நடந்த இடத்தில் உள்ள தடயங்களை சேகரித்து ஆய்வு செய்தனர். தொடர்ந்து அந்த பிரிவின் போலீஸ் சூப்பிரண்டு ரமேஷ் கண்ணா தலைமையிலான போலீசார் இன்று 2-வது நாளாக தீவிரவாத அமைப்புகள் ஏதேனும் இந்த சம்பவத்தில் ஈடுபட்டிருக்கலாமா? என்ற கோணத்தில் விசாரித்து வருகின்றனர்.

நெல்லை:

தமிழக மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் நெல்லை அரசு மருத்துவக்கல்லூரி மருத்துவமனையில் புதிய கட்டிடங்களை இன்று திறந்து வைத்தார். அதனை தொடர்ந்து அவர் நிருபர்களிடம் கூறியதாவது:-

தமிழகத்திலேயே முதல் முறையாக நெல்லை அரசு மருத்துவக்கல்லூரி மருத்துவமனையில் மாணவிகள், பெண் மருத்துவர்கள், செவிலியர்கள் மற்றும் பெண் பணியாளர்கள் பயன்படுத்தும் வகையில் 'பிங்க் சோன்' எனப்படும் 5 தனி ஓய்வறைகள் திறந்து வைக்கப்பட்டு உள்ளது.

நெல்லையில் சுமார் ரூ. 72 கோடி மதிப்பீட்டில் 450 படுக்கை வசதிகள், 10 ஆபரேஷன் தியேட்டர்கள் கட்டும் பணிகள் வருகிற மார்ச் மாதத்திற்குள் முடிவடைந்து மக்கள் பயன்பாட்டிற்கு கொண்டு வரப்படும்.

நெல்லை மாவட்டத்தில் நகர்ப்புற நல்வாழ்வு மையம் என்ற 22 புதிய மருத்துவமனைகள் அமைக்க அனுமதிக்கப்பட்டுள்ளது. இதில் மருத்துவர், செவிலியர், சுகாதார பணியாளர் மற்றும் உதவியாளர் என 4 பணியாளர்கள் பணியமர்த்தப்பட்டுள்ளனர்.

இதில் முதலமைச்சரால் 12 மருத்துவமனைகள் திறந்து வைக்கப்பட்டுள்ளது. கூடிய விரைவில் மேலும் 10 மருத்துவமனைகள் திறந்து வைக்கப்பட உள்ளன.

தமிழ்நாட்டில் காலியாக உள்ள 1,353 மருத்துவ பணியிடங்கள் மற்றும் 2026-ம் ஆண்டு வரை தேவைப்படும் மருத்துவர்கள் பணியிடங்கள் என 2,553 காலி பணியிடங்களுக்கு 24 ஆயிரம் விண்ணப்பங்கள் வந்துள்ளன.

அதற்கான தேர்வுகள் வருகிற ஜனவரி 27-ந்தேதி நடைபெற உள்ளது. மிகப்பெரிய நிறுவனங்கள் மூலம் ஆன்லைனில் இந்த தேர்வுகள் நடைபெறும்.

மேலும் கிராமப்புற செவிலியர் பணியிடங்கள் 2,250 நிரப்பப்படும். இது சம்பந்தமாக 30 வழக்குகள் நிலுவையில் உள்ளன.

இவ்வாறு அவர் கூறினார்.

நடிகர் சிவகார்த்திகேயன் நடிப்பில் வெளியாகி உள்ள 'அமரன்' திரைப்படம் தீபாவளிக்கு வெளியாகி தமிழகம் முழுவதும் வெற்றிகரமாக ஓடிக் கொண்டிருக்கிறது.

அமரன் திரைப்படத்தில் முஸ்லிம்கள் மீது வெறுப்பை விதைத்து நல்லிணக்கத்தை கெடுக்கும் வகையில் காட்சிகள் அமைக்கப்பட்டுள்ளதாக கூறி எதிர்ப்புகள் எழுந்தன. இது தொடர்பாக அமரன் திரைப்படம் திரையிடப்பட்ட தியேட்டர்கள் முன்பு கடந்த வாரம் போராட்டம் நடத்தப்பட்டது.

இதைதொடர்ந்து, நெல்லை மேலப்பாளையத்தில் 'அமரன்' திரைப்படம் திரையிடப்பட்டுள்ள அலங்கார் தியேட்டரில் பெட்ரோல் குண்டுகள் வீசப்பட்டுள்ளன. இது நெல்லையில் பெரும் பரபரப்பை ஏற்படுத்தியது.

இந்நிலையில், நெல்லையில் அமரன் திரைப்படம் ஓடும் திரையரங்கின் மீது பெட்ரோல் குண்டு வீசிய சம்பவத்தில் 3 தனிப்படைகள் அமைத்து விசாரணை தீவிரமாக நடைபெற்று வருகிறது.

இதில், காவல் ஆய்வாளர்கள் தலைமையில் 2 தனிப்படையும், உதவி ஆய்வாளர் தலைமையில் ஒரு தனிப்படையும் அமைக்கப்பட்டுள்ளது.

இந்த விவகாரம் தொடர்பாக தென்மண்டல பயங்கரவாத தடுப்புப் பிரிவு போலீசார் விசாரணை நடத்தி வருகின்றனர்.

நெல்லை:

நெல்லை, தென்காசி, தூத்துக்குடி மாவட்டங்களில் கடந்த 2 நாட்களாக வடகிழக்கு பருவமழை பரவலாக பெய்து வருகிறது.

நெல்லை மாவட்டத்தில் மேற்கு தொடர்ச்சி மலைப்பகுதியில் 2 நாட்களாக தொடர்ந்து கனமழை பெய்து வருகிறது. இதனால் அணைகளுக்கு நீர்வரத்து அதிகரித்து வருகிறது. மாவட்டத்தின் பிரதான அணையான 143 அடி கொள்ளளவு கொண்ட பாபநாசம் அணைக்கு 1,504 கனஅடி நீர் வந்து கொண்டிருக்கிறது. அணையில் இருந்து பாசனத்திற்காக 1,375 கனஅடி நீர் வந்து கொண்டிருக்கிறது. அந்த அணை நீர்மட்டம் 84.25 அடி நீர் இருப்பு உள்ளது. இன்று காலை நிலவரப்படி அந்த அணை பகுதியில் 28 மில்லிமீட்டர் மழை பெய்துள்ளது.

மற்றொரு பிரதான அணையான 118 அடி கொண்ட மணிமுத்தாறு அணைக்கு வினாடிக்கு நேற்று காலை வரை குறைவான நீர்வரத்து இருந்த நிலையில், இன்று காலை வினாடிக்கு 1,375 கனஅடி நீர் வந்து கொண்டிருக்கிறது. அந்த அணையின் நீர்மட்டம் 2 அடி உயர்ந்து 67 அடியை எட்டியுள்ளது. அங்கு 30.6 மில்லிமீட்டர் மழை பதிவாகி உள்ளது. தொடர் மழையால் நீர்வரத்து அதிகரித்துள்ளதால் மணிமுத்தாறு அருவியில் 3-வது நாளாக சுற்றுலா பயணிகள் குளிக்க தடை விதிக்கப்பட்டுள்ளது.

சேர்வலாறு அணை நீர்மட்டம் 82.47 அடியாக உள்ளது. கொடுமுடியாறு அணை பகுதியில் 17 மில்லிமீட்டரும், நம்பியாறு அணை பகுதியில் 11 மில்லிமீட்டரும் மழை பெய்துள்ளது. மேலும் கன்னடியன் கால்வாய் பகுதியில் 35 மில்லிமீட்டர் மழை பதிவாகி உள்ளது.

மாநகரில் நேற்று பரவலாக மழை பெய்த நிலையில், இன்று அதிகாலையில் இருந்து வானம் மேகமூட்டமாக காட்சியளித்தது.

தொடர்ந்து காலையில் சாரல் மழை பரவலாக பெய்தது. அதன்பின்னர் வெயில் அடிப்பதும், மழை சாரலாக பெய்வதுமாக இருந்து வந்தது. பாளையில் 11.4 மில்லிமீட்டரும், நெல்லையில் 7.4 மில்லிமீட்டரும் மழை பதிவாகி உள்ளது. மாவட்டத்தை பொறுத்தவரை பரவலாக கனமழை பெய்தது.

குறிப்பாக அம்பை, நாங்குநேரி, களக்காடு, மூலைக்கரைப்பட்டி மற்றும் அதன் சுற்றுவட்டார பகுதிகளில் பரவலாக மழை பெய்தது. களக்காட்டில் 15 மில்லி மீடடரும், அம்பையில் 26 மில்லிமீட்டரும், நாங்குநேரி, மூலைக்கரைப்பட்டியில் தலா 16 மில்லிமீட்டரும் மழை பதிவாகி உள்ளது.

தென்காசி மாவட்டத்தில் நேற்று பகலில் தொடங்கி இரவு வரையிலும் பெரும்பாலான இடங்களில் சாரல் மழை பெய்து கொண்டே இருந்தது. தென்காசியில் 7 மில்லிமீட்டரும், செங்கோட்டையில் 9 மில்லி மீட்டரும், ஆய்குடி யில் 17 மில்லிமீட்டரும் மழை பதிவாகியது.

மேற்கு தொடர்ச்சி மலையில் அமைந்துள்ள கடனா, ராமநதி, கருப்பாநதி, குண்டாறு அணைகளின் நீர்பிடிப்பு பகுதிகளில் பரவலாக மழை பெய்தது. அதிகபட்சமாக கடனா அணை பகுதியில் 23 மில்லிமீட்டரும், ராமநதியில் 15 மில்லிமீட்டரும், குண்டாறில் 12 மில்லிமீட்டரும், கருப்பாநதியில் 10 மில்லிமீட்டரும் மழை பெய்தது. அடவிநயினார் அணை பகுதியில் 5 மில்லிமீட்டரும் மழை பெய்தது.

மேற்கு தொடர்ச்சி மலையில் பெய்த கனமழை காரணமாக குற்றாலம் அருவிகளில் தண்ணீர் ஆர்ப்பரித்து கொட்டி வருகிறது. அங்கு ஐயப்ப பக்தர்கள் மாலை அணிவித்து புனித நீராடியதால் கூட்டம் அதிகமாக காணப்பட்டது.

தூத்துக்குடி மாவட்டத்தில் திருச்செந்தூர், காயல்பட்டினம், குலசேகரன்பட்டினம் மற்றும் அதன் சுற்றுவட்டார பகுதிகளில் பலத்த மழை பெய்தது. தூத்துக்குடி, ஒட்டப்பிடாரம், கடம்பூர் மற்றும் அதன் சுற்றுவட்டாரத்திலும் கனமழை பெய்தது. இன்று காலையில் சில இடங்களில் சாரல் மழையும், ஒரு சில இடங்களில் வெயிலும் அடித்தது. திருச்செந்தூரில் 39 மில்லிமீட்டரும், ஒட்டப்பிடாரம், காயல்பட்டினத்தில் தலா 36 மில்லிமீட்டரும், குலசேகரன்பட்டினத்தில் 21 மில்லிமீட்டரும் மழை பதிவாகி உள்ளது.

நெல்லை:

நடிகர் சிவகார்த்திகேயன் நடிப்பில் வெளியாகி உள்ள 'அமரன்' திரைப்படம் தீபாவளிக்கு வெளியாகி தமிழகம் முழுவதும் வெற்றிகரமாக ஓடிக் கொண்டிருந்தது.

ராணுவத்தில் பணியாற்றி வீரமரணம் அடைந்த சென்னை தாம்பரத்தை சேர்ந்த விமானப்படை அதிகாரி முகுந்த் வரதராஜனின் உண்மை சம்பவத்தை அடிப்படையாக கொண்டு தயாரிக்கப்பட்ட இந்த படத்தில் சிவகார்த்திகேயன் காஷ்மீரில் பயங்கரவாதிகளை வேட்டையாடும் கதாபாத்திரத்தில் நடித்துள்ளார்.

அமரன் திரைப்படத்தில் முஸ்லிம்கள் மீது வெறுப்பை விதைத்து நல்லிணக்கத்தை கெடுக்கும் வகையில் காட்சிகள் அமைக்கப்பட்டுள்ளதாக கூறி எதிர்ப்புகள் எழுந்தன. இது தொடர்பாக அமரன் திரைப்படம் திரையிடப்பட்ட தியேட்டர்கள் முன்பு கடந்த வாரம் போராட்டம் நடத்தப்பட்டது.

இதையடுத்து அமரன் படம் ஓடும் தியேட்டர்கள் முன்பு போலீஸ் பாதுகாப்பும் போடப்பட்டது. தமிழகம் முழுவதும் தியேட்டர்களில் போலீசார் கண்காணிப்பு பணியிலும் ஈடுபட்டனர்.

இந்த நிலையில் நெல்லை மேலப்பாளையத்தில் 'அமரன்' திரைப்படம் திரையிடப்பட்டுள்ள அலங்கார் தியேட்டரில் பெட்ரோல் குண்டுகள் வீசப்பட்டுள்ளன. நெல்லையில் பெரும் பரபரப்பை ஏற்படுத்தியுள்ள இந்த சம்பவம் பற்றிய விவரம் வருமாறு:-

மேலப்பாளையம் சந்தை முக்கு ரவுண்டானாவில் உள்ள அலங்கார் தியேட்டருக்கு நேற்று நள்ளிரவு 2.30 மணி அளவில் மர்ம நபர்கள் 2 பேர் வந்தனர். அவர்கள் தியேட்டருக்கு வெளியில் நின்றபடியே தியேட்டர் மீது பெட்ரோல் குண்டுகளை வீசினார்கள். அடுத்தடுத்து வீசப்பட்ட 3 பெட்ரோல் குண்டுகளும் தியேட்டர் வளாகத்தில் விழுந்து 'டமார்' என்கிற பயங்கர சத்தத்துடன் வெடித்து சிதறின. இதில் தியேட்டர் வளாகத்தில் தீப்பிளம்பு எழுந்தது. பெட்ரோல் குண்டுகள் விழுந்த இடம் தீப்பற்றி எரிந்தது.

இதையடுத்து தியேட்டரில் இருந்த ஊழியர்கள் அலறியடித்துக் கொண்டு ஓடிச் சென்று பார்த்தனர். வளாகத்தில் தீ பற்றிய இடத்தை அவர்கள் தண்ணீர் ஊற்றி அணைத்தனர். நள்ளிரவு நேரம் என்பதால் தியேட்டரில் ஆள் நடமாட்டம் இல்லாமல் இருந்தது. இதனால் யாருக்கும் பாதிப்பு ஏற்படவில்லை.

இதுபற்றி தகவல் கிடைத்ததும் மேலப்பாளையம் போலீசார் தியேட்டருக்கு விரைந்து சென்றனர். நெல்லை போலீஸ் துணை கமிஷனர் விஜயகுமார், உதவி கமிஷனர் சரவணன், மேலப்பாளையம் இன்ஸ்பெக்டர் விஜி ஆகியோரும் விரைந்து சென்று தியேட்டர் ஊழியர்களிடம் பெட்ரோல் குண்டு வீச்சு சம்பவம் பற்றி கேட்டறிந்தனர்.

தியேட்டர் வளாகத்தில் பெட்ரோல் குண்டாக பயன்படுத்தப்பட்ட பாட்டில்களின் கண்ணாடி துண்டுகள் சிதறி கிடந்தன. அவைகளை போலீசார் தடயங்களாக சேகரித்தனர்.

பின்னர் பெட்ரோல் குண்டுகளை வீசிய நபர்கள் யார் என்பதை கண்டு பிடிப்பதற்காக அதிரடி விசாரணையில் இறங்கினர். அப்பகுதியில் உள்ள கண்காணிப்பு கேமராக்களை போட்டு பார்த்து ஆய்வு செய்தனர். தியேட்டருக்கு வெளியில் இருந்த ஒரு சி.சி.டி.வி. கேமராவில் 2 பேர் பெட்ரோல் குண்டுகளுடன் வந்து அதில் தீ வைத்து கொளுத்தி தியேட்டர் மீது வீசும் காட்சிகள் பதிவாகி இருந்தன. அதனை கைப்பற்றிய போலீசார் அவர்கள் யார்? என்பது பற்றி தீவிர விசாரணையில் ஈடுபட்டு உள்ளனர்.

பெட்ரோல் குண்டு வீச்சில் இருவரையும் கைது செய்ய தனிப்படை அமைத்து தேடுதல் வேட்டை தீவிரப்படுத்தப்பட்டு உள்ளது.

அவர்கள் பீர் பாட்டில்களை பெட்ரோல் குண்டுகளாக மாற்றி வீசி இருப்பது தெரிய வந்துள்ளது. 2 குண்டுகள் தியேட்டர் வளாகத்திற்குள் வீசப்பட்ட நிலையில் 3-வது குண்டு தவறி கீழே விழுந்து தீ பிடித்த காட்சிகளும் சி.சி.டி.வி. கேமராவில் பதிவாகி இருக்கிறது.

மர்ம நபர்கள் இருவரும் பெட்ரோல் குண்டுகளை வீசி விட்டு தலைமறைவாகி இருக்கிறார்கள். அவர்களை கைது செய்து இருவரின் பின்னணி பற்றியும் முழுமையாக விசாரணை நடத்த போலீசார் முடிவு செய்துள்ளனர்.

இந்த சம்பவம் குறித்து உரிய விசாரணை நடத்தி குற்றவாளிகளை உடனடியாக கண்டுபிடிக்க போலீஸ் கமிஷனர் ரூபேஷ்குமார் மீனா உத்தரவிட்டுள்ளார்.

இதையடுத்து மேலப்பாளையம் அலங்கார் தியேட்டரில் பலத்த பாதுகாப்பு போடப்பட்டுள்ளது.

இந்த தியேட்டரில் அமரன் படம் வெளியிடப்பட்ட போதே பல்வேறு அமைப்பினர் எதிர்ப்பு தெரிவித்து தியேட்டர் முன்பு ஆர்ப்பாட்டத்தில் ஈடுபட்டனர். இதனால் அங்கு கடந்த வாரம் பாதுகாப்பு போடப்பட்டு இருந்தது.

இதையடுத்து இயல்பு நிலை திரும்பி இருந்தது. அதை பயன்படுத்தி மர்மநபர்கள் பெட்ரோல் குண்டு வீசி விட்டு தப்பி சென்று உள்ளனர்.

இந்த பெட்ரோல் குண்டு வீச்சு சம்பவம் மேலப்பாளையம் மற்றும் அதன் சுற்று வட்டார பகுதியில் பரபரப்பை ஏற்படுத்தி உள்ளது.

தூத்துக்குடி:

நாம் தமிழர் கட்சி தலைமை ஒருங்கிணைப்பாளர் சீமான் நேற்று நெல்லை பாளையங்கோட்டையில் கட்சி நிர்வாகிகளுடன் கலந்தாய்வு கூட்டத்தில் பங்கேற்றார்.

அப்போது நிர்வாகிகள் சிலருக்கிடையே திடீரென வாக்குவாதம், கைகலப்பு ஏற்பட்ட நிலையில் நிர்வாகிகள் சிலர் கூட்டத்தில் இருந்து வெளிநடப்பு செய்தனர். இந்த சம்பவம் பரபரப்பை ஏற்படுத்தியது.

இந்நிலையில், நாம் தமிழர் கட்சி தலைமை ஒருங்கிணைப்பாளர் சீமான் இன்று தூத்துக்குடியில் முன்னாள் நகர்மன்ற தலைவர் குரூஸ்பர்னாந்து பிறந்த தினத்தையொட்டி அவரது சிலைக்கு மாலை அணிவித்து மரியாதை செலுத்தினார். பின்னர் அவர் செய்தியாளர்களுக்கு பேட்டி அளித்தபோது நெல்லை சம்பவம் தொடர்பாக செய்தியாளர்கள் சீமானிடம் கேள்வி எழுப்பினர்.

அதற்கு சீமான் பதிலளிக்கும் போது, நேற்று நெல்லையில் நடந்தது. சம்பவம் அல்ல, நாங்கள் 2026-ல் செய்யப்போவது தான் சம்பவம் என்றார். தொடர்ந்து சீமான் கூறியதாவது:-

அரசு மருத்துவர்கள் மக்களிடத்தில் பேரன்பு கொண்டு நடந்து கொள்ள வேண்டும். நாம் அவர்கள் மீது பெருமதிப்பு வைத்துள்ளோம். மருத்துவமனையில் காலிப் பணியிடங்கள் நிரப்பப்படவில்லை.

மருத்துவர்களுக்கு பாதுகாப்பு வேண்டும். அரசு மருத்துவமனைகளில் துணை காவல் நிலையம் போல் அமைத்து காவலர்களை பணியில் வைக்க வேண்டும்.

தமிழகத்தில் எங்கு திரும்பினாலும் எல்லா போதைப் பொருளும் எல்லா இடங்களிலும் எளிதாக கிடைக்கிறது. குறிப்பாக பள்ளி, கல்லூரி மாணவிகளுக்கு கிடைக்கிறது. மாநில அரசு போதைப் பொருளை தடுக்க மத்திய அரசுக்கு கடிதம் எழுதுகிறது.

தமிழக மீனவர்கள் தொடர்ந்து கைது செய்யப்படுவதில் மனது முழுவதும் கோபம் இருக்கிறது. ஒரு முறை எனக்கு வாய்ப்பு கொடுங்கள். தமிழக மீனவர்களை தொட்டுவிட்டால் என்னை கேளுங்கள் என்றார்.

தொடர்ந்து நடிகை கஸ்தூரியை கைது செய்ய 2 தனிப்படைகள் அமைக்கப்பட்டது குறித்து செய்தியாளர்கள் கேள்வி எழுப்பினர். அதற்கு அவர் பதிலளிக்கையில், பேசுவதை எல்லாம் குற்றம் என்று கைது செய்யக்கூடாது. வருத்தம் தெரிவித்து விட்டால் விட்டுவிடலாம். அதை பெரிய குற்றமாக நான் கருதவில்லை. இது அரசியல் பழிவாங்கலாக நடக்கிறது.

உதயநிதி ஸ்டாலின் உதயசூரியன் சின்னத்துடன் நேற்று அரசு விழாவில் கலந்து கொண்டது குறித்து கேட்கிறீர்கள் இது அவர்கள் ஆட்சி. அவர்கள் எப்படி வேண்டுமானாலும் வருவார்கள். அரசு விழாவில் அவர்கள் அடையாளத்துடன் வருவதை ஒன்றும் செய்ய முடியாது. அதை நாம் கண்டிக்கிறோம். ஒன்றும் செய்ய முடியாது. அடுத்த முறையும் அதேயே தான் அவர்கள் செய்வார்கள்.

இவ்வாறு அவர் கூறினார்.

தமிழ்நாடு அரசு பேருந்துகளில் தினமும் லட்சக்கணக்கானோர் பயணம் மேற்கொள்கின்றனர். பண்டிகை காலங்களில் முன்பதிவு செய்தும் பயணத்தை மேற்கொள்கின்றனர். இப்படி லட்சக்கணக்கானோர் பயணிக்கும் பேருந்துகளை சிலர் சுத்தம் செய்து இயக்குவர். சிலர் அப்படியே இயக்குவர்.

இந்த நிலையில், அரசு பேருந்தில் சேர்ந்த குப்பைகளை பெண் பயணி ஒருவர் சுத்தம் செய்யும் வீடியோ காட்சிகள் சமூக வலைத்தளங்களில் வைரலாகி வருகிறது.

நெல்லை மாவட்டத்தில் கடந்த 25 நாட்களாக குப்பை கூளங்களுடன் அரசு பேருந்து ஒன்று பயணம் மேற்கொண்டு வந்தது. இந்த குப்பைகளை காண பொறுக்காமல் தனது வீடு போல நினைத்து பயணி மாஞ்சோலை தமிழரசி சுத்தம் செய்தார். இதுதொடர்பான வீடியோ காட்சிகள் சமூக வலைத்தளங்களில் வைரலானதை தொடர்ந்து அவருக்கு பாராட்டுகள் குவிந்து வருகின்றன.

நெல்லை:

நெல்லை, தென்காசி, தூத்துக்குடி மாவட்டங்களில் வடகிழக்கு பருவமழை இன்னும் தீவிரம் அடையவில்லை. கடந்த சில நாட்களாக வெயிலின் தாக்கம் அதிகமாக இருந்து வந்தது.

இதன் காரணமாக விவசாயிகளும் நெல் நடவு பணியை தொடங்குவதில் தாமதம் காட்டி வருகின்றனர். இந்நிலையில் நேற்று பரவலாக மழை பெய்தது.

நெல்லையில் சில நாட்களாக வெயில் அடித்து வந்த நிலையில் நேற்று பிற்பகலில் மாவட்டத்தில் பல்வேறு இடங்களில் கனமழை பெய்தது. சில இடங்களில் இடி-மின்னலுடன் பெய்த மழையால் மக்கள் மகிழ்ச்சி அடைந்தனர்.

மேற்கு தொடர்ச்சி மலையில் அமைந்துள்ள மாஞ்சோலை, நாலுமுக்கு, ஊத்து உள்ளிட்ட பகுதிகளில் கனமழை பெய்தது. நாலுமுக்கு பகுதியில் இன்று காலையில் பனிமூட்டத்துடன் ரம்மியமான சூழ்நிலை நிலவியது. இன்று காலை நிலவரப்படி நாலுமுக்கில் 8.2 சென்டிமீட்டரும், ஊத்து பகுதியில் 8 சென்டிமீட்டரும், காக்காச்சியில் 7.2 சென்டி மீட்டரும், மாஞ்சோலையில் 6.7 சென்டிமீட்டரும் மழை பதிவாகி உள்ளது.

அணைகளை பொறுத்தவரை பாபநாசம், மணிமுத்தாறு, சேர்வலாறு அணைகளின் நீர்பிடிப்பு பகுதிகளில் பலத்த மழை பெய்தது. மணிமுத்தாறில் 28 மில்லிமீடடரும், சேர்வலாறில் 21 மில்லிமீட்டரும் மழை பதிவாகியது. மணிமுத்தாறு அணைக்கு நீர்வரத்து 200 கனஅடியாக அதிகரித்து உள்ளது. பாபநாசம் அணைக்கு வினாடிக்கு 405 கனஅடி நீர் வந்து கொண்டிருக்கும் நிலையில், அணையில் இருந்து பிசான பருவ சாகுபடிக்காக வினாடிக்கு 1,204 கனஅடி நீர் வெளியேற்றப்படுகிறது.

கொடுமுடியாறு அணை நீர்பிடிப்பு பகுதியில் 15 மில்லிமீட்டர் மழை கொட்டியது. 52.50 அடி கொண்ட அந்த அணை நீர்மட்டம் 31.25 அடியாக உள்ளது. கடந்த ஆண்டு இதேநாளில் பாபநாசம் அணை நீர்மட்டம் 96.70 அடியாக இருந்த நிலையில் இந்த ஆண்டு 84.65 அடி நீர் இருப்பு உள்ளது. இதேபோல் கடந்த ஆண்டு சேர்வலாறு அணை நீர்மட்டம் 110 அடியாக இருந்த நிலையில் இந்த ஆண்டு இன்று 86.45 அடியாக குறைந்துள்ளது.

மாவட்டத்தில் பணகுடி, களக்காடு, ஏர்வாடி மற்றும் அதன் சுற்றுவட்டார பகுதியில் இடி-மின்னலுடன் பலத்த மழை பெய்தது. இதையொட்டி மின்தடையும் ஏற்பட்டது. குறிப்பாக ஏர்வாடி மற்றும் அதன் சுற்றுவட்டார கிராமங்களில் இடி-மின்னலுடன் கனமழை பெய்தது. இதனால் பிசான சாகுபடி செய்யும் விவசாயிகள் மகிழ்ச்சி அடைந்துள்ளனர். இன்று காலை முதல் பெரும்பாலான இடங்களில் வானம் மேகமூட்டமாக காட்சியளித்தது.

நெல்லை மாநகர பகுதியில் நேற்று காலை முதல் மாலை 4 மணி வரை வெயில் அடித்தது. அதன் பின்னர் வானம் மேகமூட்டத்துடன் காணப்பட்டது. நெல்லை ஐகிரவுண்டு, மேலப்பாளையம், தியாகராஜ நகர், மகாராஜ நகர் பகுதியில் மாலையில் பரவலாக மழை பெய்தது. இதனால் மழைநீர் ஆங்காங்கே குளம் போல் தேங்கி நின்றது. நெல்லை வண்ணார்பேட்டை, கொக்கிரகுளம், சந்திப்பு பகுதியில் சாரல் மழை பெய்தது.

இன்று கனமழை பெய்ய வாய்ப்பு இருப்பதாக நெல்லை மாவட்டத்திற்கு எச்சரிக்கை விடுக்கப்பட்டுள்ளதால், மாவட்ட கலெக்டர் கார்த்திகேயன் உத்தரவின்பேரில் முன் எச்சரிக்கை நடவடிக்கைகள் மேற்கொள்ளப்பட்டுள்ளது.

தென்காசி மாவட்டத்தில் குண்டாறு அணை நீர்பிடிப்பு பகுதியில் மட்டும் லேசான மழை பெய்துள்ளது. அங்கு 1 மில்லிமீட்டர் மழை பதிவாகி உள்ளது. இன்று காலையில் வானம் மேகமூட்டமாக காட்சியளித்தது. குற்றாலம் அருவிகளில் மிதமான அளவில் தண்ணீர் விழுந்து வருகிறது. மாவட்டத்தில் மழைபொழிவு இல்லை.

தூத்துக்குடி மாவட்டத்தில் இன்று காலை முதலே பரவலாக சாரல் மழை பெய்து வருகிறது. காயல்பட்டினத்தில் காலை 7.30 மணி முதல் சாரல் மழை பெய்ய தொடங்கியுள்ளது. தூத்துக்குடி மாநகரில் முத்தையாபுரம், பிரையண்ட் நகர் பகுதிகளிலும் மழை பெய்து வருகிறது. ஏற்கனவே அங்கும் கனமழைக்கான எச்சரிக்கை விடுக்கப்பட்டுள்ள நிலையில், காலை முதல் மழை பெய்வதால் மக்கள் மகிழ்ச்சி அடைந்துள்ளனர்.