நீங்கள் தேடியது "Indian independence"

வெள்ளையர்களின் காலனி ஆதிக்க ஆட்சியில் இருந்து இந்தியா 1947ல் சுதந்திரம் பெற்றது.

பல மதங்கள், இனங்கள், சாதிகள், ஏற்றத்தாழ்வுகள் மற்றும் பிரிவுகள் கொண்ட இந்திய மக்களை ஒருங்கிணைத்து வழிநடத்தி செல்லும் விதமாக நாட்டிற்கு ஒரு திசைகாட்டியாக விளங்க அரசியலமைப்பு சட்டம் தேவைப்பட்டது. இதை உருவாக்கி தரும் பெரும் முக்கியத்துவம் வாய்ந்த பொறுப்பை அரசியல் நிர்ணய சபை எனும் அறிஞர்களை கொண்ட குழு ஏற்று கொண்டது.

1949 நவம்பர் 26 அன்று இந்திய அரசியலமைப்பு நிர்ணய சபை உருவாக்கி தந்த அரசியலமைப்பு சட்டத்தை இந்திய பாராளுமன்றம் ஏற்று கொண்டது.

இந்த அரசியலமைப்பு சட்டம் 1950 ஜனவரி 26 அன்று செயலுக்கு வந்தது.

இதையொட்டி ஆண்டுதோறும் நவம்பர் 26, இந்திய அரசியலமைப்பு சட்ட தினம் (சம்விதான் திவஸ்) என கொண்டாடப்படும் என 2015 அன்று மத்திய அரசாங்கத்தால் அதிகாரபூர்வமாக அறிவிக்கப்பட்டது.

இந்த அறிவிப்பு இந்திய பிரதமர் நரேந்திர மோடியால் 2015 அக்டோபர் 11 அன்று வெளியிடப்பட்டது. அதற்கு முன்பு வரை இது சட்ட தினம் என கொண்டாடப்பட்டு வந்தது.

அரசியலமைப்பு சட்டம் பொதுமக்களுக்கு வழங்கியுள்ள அதிகாரங்கள், உரிமைகள், கட்டுப்பாடுகள், சலுகைகள், விதிகள் மற்றும் விலக்குகள், வலியுறுத்தும் கடமைகள் உள்ளிட்ட அனைத்து அம்சங்களை குறித்தும் நாடு முழுவதும் விழிப்புணர்ச்சி ஏற்படுத்தும் விதமாகவும், இந்த அரசியலமைப்பை உருவாக்கிய குழுவின் தலைவராக இருந்த டாக்டர். பி.ஆர். அம்பேத்கர் அவர்களின் உயரிய சித்தாந்தங்களை மக்கள் நினைவுகூரும் விதமாகவும் இந்திய அரசியலமைப்பு சட்ட தினம் கொண்டாடப்படுகிறது.

சம உரிமை, சுதந்திரம், சகோதரத்துவம், சுரண்டலை மறுக்கும் உரிமை, தனது மதத்திற்கான சுதந்திரம் உள்ளிட்ட பல மனித உரிமைகள் எந்த பேதமுமின்றி அனைவருக்கும் கிடைப்பதை உறுதி செய்வது அரசியலமைப்பு சட்டத்தில் வலியுறுத்தப்படுகிறது.

இந்திய அரசியலமைப்பு சட்ட தினம் ஒரு பொது விடுமுறை நாள் அல்ல என்பதும் உலக நாடுகளின் அரசியலமைப்பு சட்டங்களிலேயே இந்திய அரசியலமைப்பு சட்டம்தான் அதிக நீளம் உடையது என்பதும் குறிப்பிடத்தக்கது.

"மக்களுக்காக, மக்களால், மக்களின் ஜனநாயகம்" என புகழ் பெற்ற இந்திய ஜனநாயகத்தின் 3 அங்கங்களாக விளங்கும் பாராளுமன்றம், நீதித்துறை மற்றும் நிர்வாக துறை ஆகியவற்றின் கடமைகளையே வலியுறுத்துவது இந்திய அரசியலமைப்பு சட்டம்தான் என்பதே இதன் பெருமைக்கு ஒரு சான்று.

அரசியலமைப்பு சட்டத்தின் அடிப்படை சித்தாந்தங்கள் வலுவாகவும் மாற்ற இயலாததாகவும் உருவாக்கப்பட்டிருந்தாலும், ஓரு சில விதிமுறைகள் வெவ்வேறு காலகட்டங்களுக்கு ஏற்ப பாராளுமன்றத்தால் மாற்றப்பட்டுள்ளன.

1950ல் ஏற்று கொள்ளப்பட்ட அரசியமைப்பு சட்டத்தில் 2023 செப்டம்பர் மாதம் வரை, 106 மாற்றங்கள் கொண்டு வரப்பட்டுள்ளன என்பது குறிப்பிடத்தக்கது.

இந்தியா சுதந்திரமடைந்த பிறகு 562 சமஸ்தான மன்னர்களுடன் பேச்சு வார்த்தை நடத்தி, வன்முறை சம்பவங்கள் இல்லாமல் ஒருங்கிணைந்த இந்திய குடியரசு ஏற்பட காரணமானவர் வல்லபாய் படேல்.

சுதந்திர போராட்ட தலைவர்களில் ஒருவரும், 'சர்தார்' என்றும் 'இரும்பு மனிதன்' என்றும் அழைக்கப்பட்ட சுதந்திர இந்தியாவின் முதல் உள்துறை அமைச்சருமான வல்லபாய் படேல் அவர்களின் பிறந்த தினம் இன்று கொண்டாடப்படுகிறது.

படேலின் நினைவாக குஜராத் மாநிலத்தில், "ஒற்றுமைக்கான சிலை" எனும் பெயரில், அவருக்கு 597 அடி உயர சிலை ஒன்று நிறுவப்பட்டுள்ளது. இது உலகிலேயே உயரமான சிலை என்பது குறிப்பிடத்தக்கது.

கடந்த 2014ல் இந்திய பிரதமர் நரேந்திர மோடி அவர்களால் துவங்கப்பட்டு, படேலின் பிறந்த தினமான அக்டோபர் 31, நாடு முழுவதும், 'தேசிய ஒற்றுமை தினம்' (ராஷ்ட்ரிய ஏக்தா திவஸ்) என ஒவ்வொரு வருடமும் கொண்டாடப்படுகிறது.

2016ல் படேல் மற்றும் ஒற்றுமைக்கான சிலையுடன் கூடிய சிறப்பு நினைவு அஞ்சல் தலை மத்திய அரசால் வெளியிடப்பட்டது.

"தேச ஒற்றுமை, ஒருமைப்பாடு மற்றும் பாதுகாப்பு ஆகியவற்றை காக்க உறுதி ஏற்கிறேன். சர்தார் படேலின் தொலைநோக்கு பார்வையால் சாத்தியமான பரந்த இந்தியாவை ஒருங்கிணைக்கும் உணர்வில் உறுதியாக இருப்பேன்" என அனைத்து அரசு அலுவலகங்களில் இன்று உறுதிமொழி ஏற்கப்படும்.

புது டெல்லியில் "ஒற்றுமைக்கான ஓட்டம்" என்ற பெயரில் ராஜ்காட்டிலிருந்து செங்கோட்டை வரை 600 பேருக்கும் மேல் பங்கேற்கும் ஓட்டம் நடைபெற்றது. இதனை உள்துறை அமைச்சர் அமித் ஷா கொடியசைத்து துவக்கி வைத்தார்.

இன்று பிரதமர் மோடி "ஒற்றுமை சிலை"  முன்பு படேலுக்கு தனது அஞ்சலியை செலுத்தினார்.