இந்தியா

உத்தரபிரதேச மாநிலம் வாரணாசியில் கார் மீது குரங்கு விழுந்ததில் காரின் சன்ரூப் கண்ணாடி சுக்கு நூறாக உடைந்தது. அப்போது காருக்குள் விரிந்த குரங்கு உடனடியாக வெளியே குதித்து தப்பி ஓடியது.

தொழிலதிபர் முகேஷ் ஜெய்ஸ்வாலின் கார் கண்ணாடியை தான் குரங்கு உடைத்துள்ளது என்று தெரிய வந்துள்ளது.

காரின் சன்ரூப் கண்ணாடியை குரங்கு உடைத்த வீடியோ இணையத்தில் வெளியாகி வைரலானது. இந்த வீடியோ வாரணாசி நகரத்தில் குரங்குகளின் அட்டகாசத்தால் மக்கள் படும் அவதியை வெளிச்சம் போட்டு காட்டியுள்ளது.

மதுரையில் அதிமுகவின் முன்னாள் அமைச்சர் செல்லூர் ராஜூ செய்தியாளர்களை சந்தித்து பேசினார்.

அப்போது அவர் கூறியதாவது:-

ஒரு திரைப்பட நடிகை. அவரது மகனுக்கு 12 வயது. ஆட்டிசம் நோயால் பாதிக்கப்பட்டவர். அந்த பெண் தான் மகனை முழுவதுமாக உடன் இருந்து கவனித்துக் கொள்ள வேண்டும்.

திமுக பேசாத பேச்சா.. எல்லோரும் பேசுவதைப் போல் அந்த நடிகையும் பேசிவிட்டார். சரி அந்த விஷயத்திற்குள் நான் செல்லவில்லை.

ஒரு நடிகையை இரண்டு தனிப்படைகளை அமைத்து காவல் துறை பிடித்திருக்கிறார்கள். ஒரு நடிகையை பிடிக்க இவ்வளவு செய்யும்போது, அமைச்சர் செந்தில் பாலாஜி சிறைக்கு சென்று வந்து ஒரு வருடங்களுக்கும் மேல் ஆகியும் அவரது தம்பியை காவல்துறையினரால் இன்னும் பிடிக்க முடியவில்லையே. முதலமைச்சர் மு.க.ஸ்டாலினுக்கு கீழ் இருக்கும் காவல்துறை. இதற்கு மேல் என்ன கூறுவது.

ஆக மொத்தம் இந்த அரசை மாற்ற வேண்டும் என்று மக்கள் முடிவுடன் இருக்கின்றனர்.

எத்தனை நாட்களுக்கு முன்னால் தேர்தல் பணிகளை ஆரம்பித்தாலும் வருகின்ற சட்டசபை தேர்தலில் திமுகவையும் அதன் கூட்டணி கட்சிகளையும் மக்கள் முடிவுக்கு கொண்டு வந்துவிடுவார்கள்.

இவ்வாறு அவர் கூறியுள்ளார்.

டெல்லியில் வரும் 2025-ம் ஆண்டில் சட்டசபை தேர்தல் நடைபெற உள்ளது. இதற்கான ஆயத்தப் பணிகளில் தேர்தலில் போட்டியிடும் கட்சிகள் ஈடுபட்டு வருகின்றன.

தேர்தல் தேதி இன்னும் அறிவிக்கப்படாத நிலையில், டெல்லி சட்டசபை தேர்தல் அடுத்த ஆண்டு பிப்ரவரியில் நடைபெறும் என எதிர்பார்க்கப்படுகிறது.

இந்நிலையில், டெல்லி சட்டசபை தேர்தலில் போட்டியிடும் வேட்பாளர்களின் முதற்கட்ட பட்டியலை ஆம் ஆத்மி கட்சி வெளியிட்டுள்ளது.

இதில், முதற்கட்டமாக 11 வேட்பாளர்கள் மற்றும் அவர்கள் போட்டியிடும் தொகுதி குறித்து அறிவிக்கப்பட்டுள்ளது.

அதன்படி, சத்தர்பூர் தொகுதியில் பிரஹ்ம் சிங்தன்வார் போட்டியிடுகிறார். தொடர்ந்து, பதார்பூர் தொகுதியில் ராம் சிங் நேதாஜி, லட்சுமி நகர் தொகுதியில் பிபி தியாகி, சீலாம்பூர் தொகுதியில் சவுதிரி சுபாயிர் அகமது, சீமா புரி தொகுதியில் வீர் சிங் திங்கன், ரோஹ்டாஸ் நகர் தொகுதியில் சரிதா சிங், கோண்டா தொகுதியில் கவுரவ் சர்மா, விஷ்வாஸ் நகர் தொகுதியில் தீபக் ஷிங்லா, கரவால் நகர் தொகுதியில் மனோஜ் தியாகி, கிராரி தொகுதியில் அனில் ஜா, மாடியாலா தொகுதியில் சுமேஷ் ஷோகீன் ஆகியோர் போட்டியிடுகின்றனர்.

ஜம்மு:

ஜம்மு-காஷ்மீருக்குள் பாகிஸ்தான் பயங்கரவாதிகள் ஊடுருவல் தொடர்பாக தேசிய புலனாய்வு முகமை (என்.ஐ.ஏ.) அதிகாரிகள் வழக்குப்பதிவு செய்து விசாரணை நடத்தி வருகிறார்கள்.

இந்நிலையில் இது தொடர்பாக ஜம்முவில் என்.ஐ.ஏ. அதிகாரிகள் இன்று சோதனை நடத்தினார்கள். ஜம்மு பகுதியில் உள்ள ரியாசி, உதம்பூர், ரம்பவின் கிஷ்த்வார் ஆகிய பகுதிகளில் உள்ள 9 இடங்களில் அதிரடி சோதனை நடத்தப்பட்டது.

இந்த நடவடிக்கையில் என்.ஐ.ஏ. அதிகாரிகளுக்கு போலீசார் மற்றும் மத்திய ரிசர்வ் போலீஸ் படையினர் உதவினர்.

புதுக்கோட்டை:

புதுக்கோட்டை மாவட்டம் ஆதனக்கோட்டை பகுதியை சேர்ந்த சகோதரர்கள் பால கிருஷ்ணன், சக்திவேல். இவர்கள் இருவரும் விவசாயம் செய்து வருவதோடு, ஆடு வளர்த்து விற்கும் தொழிலும் ஈடுபட்டு வருகின்றனர்.

இந்நிலையில் பால கிருஷ்ணன் தனது மகளின் திருமணத்திற்காக ஒரு நிதி நிறுவனத்தில் ரூ.10 லட்சம் கடன் பெற்றுள்ளார். 19 மாதம் தவணையாக அந்த கடன் தொகையை திருப்பி செலுத்த வேண்டும். 15 மாத தவணை தொகை அவர் சரியாக செலுத்தி உள்ளார். ஆனால் கடந்து 3 மாதங்களாக தவணை செலுத்தவில்லை.

இதே போல சக்திவேல் மற்றொரு நிதி நிறுவனத்தில் கடன் பெற்றுள்ளார். அவரும் சரியாக தவணை செலுத்தி வந்த நிலையில் கடந்த 3 மாதங்களாக தவணை தொகை செலுத்தவில்லை.

இதன் காரணமாக கடன் தொகையை வசூலிக்க வந்த நிதி நிறுவன ஊழியர்கள் பாலகிருஷ்ணன், சக்தி வேலுக்கு சொந்தமான வீட்டில் பெரிய அளவில் இந்த வீடு அடமானத்தில் உள்ளது. 3 மாத நிலுவை ரூ.45,204 செலுத்தப்படவில்லை என்று கொட்டை எழுத்தில் எழுதிவிட்டு சென்றுள்ளனர். இதனை கண்ட அந்த கிராம மக்கள் தினம்தோறும் துக்கம் விசாரிப்பது போல அந்த வீட்டிற்கு வந்து விசாரணை செய்து சென்றுள்ளனர்.

அவமானத்தால் மனமுடைந்த சக்திவேல் விஷம் குடித்து தற்கொலைக்கு முயன்றுள்ளார். அக்கம்பக்கத்தினர் அவரை தடுத்து நிறுத்தி புத்தி சொல்லி வீட்டிற்கு கொண்டு வந்து சேர்த்து உள்ளனர். பால கிருஷ்ணனின் மனைவி அவமானம் தாங்க முடியாமல் தனது தாய் வீட்டிற்கு சென்று விட்டார். பாலகிருஷ்ணன் தற்போது தனது வீட்டிற்கு வராமல் வெளியிலேயே சுற்றி திரிகிறார்.

இது குறித்து சக்திவேல் கூறும்போது, தவணை தொகையை சரியான காலத்தில் செலுத்தி வந்தோம். கடந்த 3 மாதங்களுக்கு முன்பாக எங்களது தாயாரின் உடல் நிலை கடுமையான பாதிப்பிற்கு உள்ளானது. இதன் காரணமாக அவரை மருத்துவமனையில் சேர்த்து சிகிச்சை அளித்ததால், வைத்திருந்த பணம் மருத்துவத்திற்காக செலவிடப்பட்டு விட்டது. 3 மாத தவணையை எப்படியும் செலுத்தி விடுவோம் என்று நாங்கள் பணம் வசூலிக்கும் நிதி நிறுவன ஊழியரிடம் கெஞ்சினோம். ஆனால் அவர்கள் இவ்வாறு எங்களை அவமானப்படுத்தி விட்டு சென்று விட்டனர்.

இவ்வாறு அவர் கண்ணீருடன் தெரிவித்தார்.

இந்த சம்பவம் குறித்து வழக்கறிஞர் ஒருவர் கூறும்போது, தவணை தொகை செலுத்தவில்லை என்றால் நிதி நிறுவனங்கள் சட்டரீதியான நடவடிக்கை எடுக்க வேண்டுமே தவிர, இது போன்ற அநாகரீகமான செயல்களில் அவர்கள் ஈடுபடக்கூடாது. இது மிகவும் தவறு. சட்டப்படி அவர்கள் மீது வழக்கு தொடரலாம் என்று அவர் கூறினார்.

அதானி நிறுவனத்துடன் தமிழ்நாடு மின்சார வாரியத்திற்கு தொடர்பு இருப்பதாக தகவல் பரவி வருகிறது.

இதுதொடர்பாக மின்சாரத்துறை அமைச்சர் செந்தில் பாலாஜி விளக்கம் அளித்துள்ளார்.

இதுகுறித்து செந்தில் பாலாஜி கூறியிருப்பதாவது:-

தமிழ்நாடு மின்சார வாரியத்தை பொறுத்தவரை அதானி நிறுவனத்தோடு எந்த விதமான வணிக ரீதியான தொடர்பும் கடந்த 3 ஆண்டுகளாக இல்லை என்பதை தெளிவுப்படுத்திக் கொள்கிறேன்.

தமிழ்நாட்டின் மின் தேவையை கருத்தில் கொண்டு மத்தியில் இருக்கக்கூடிய மத்திய மின்சாரத்துறை வாரியத்தின் அமைப்புகளோடு 1500 மெகா வாட் மின்சாரம் கொள்முதல் செய்வதற்கான ஒப்பந்தங்கள் செய்யப்பட்டுள்ளன. அந்த நிறுவனத்துடன் தான் தமிழ்நாடு மின்சார வாரியம் புரிந்துணர்வு ஒப்பந்தம் செய்துள்ளது.

சோலார் எனர்ஜி கார்ப்பரேஷன் ஆப் இந்தியா மத்திய அரசின் நிறுவனம். அந்த நிறுவனம் தான் யாரெல்லாம் மின் உற்பத்தி செய்கிறார்களோ அவர்கள் அந்த நிறுவனத்தோடு புரிந்துணர்வு ஒப்பந்தம் செய்கிறார்கள்

தமிழ்நாட்டில் மிக குறைந்த விலையில் அதாவது ரூ.2.61 க்கு கொள்முதல் செய்கின்றனர்.

அதனால், தமிழ்நாட்டின் மின்சார வாரியத்திற்கும் அதானி நிறுவனத்திற்கும் எந்தவித தொடர்பும் இல்லை என்பதை தெளிவுப்படுத்திக் கொள்கிறேன்.

இதுதொடர்பாக மேலும் சந்தேகம் இருந்தால் அதை தெளிவுப்படுத்த தமிழக அரசு தயாராக இருக்கிறது.

இவ்வாறு அவர் கூறினார்.

கொடைக்கானல்:

கொடைக்கானல் அருகில் உள்ள கவுஞ்சி ராஜபுரத்தை சேர்ந்தவர் சர்வேஸ் (வயது 30) விவசாய கூலித்தொழிலாளி. இவரது மனைவி பிரியதர்ஷினி (24). இவர்களுக்கு ஏற்கனவே 2 வயதில் 1 ஆண்குழந்தை உள்ளது. இந்நிலையில் மீண்டும் கருவுற்ற பிரியதர்ஷினி கொடைக்கானல் அரசு ஆஸ்பத்திரியில் அனுமதிக்கப்பட்டார். அவருக்கு 20 நாட்களுக்கு முன்பு அறுவை சிகிச்சை மூலம் பெண் குழந்தை பிறந்தது. அதன் பிறகு அவர் வீடு திரும்பினார்.

சில நாட்களிலேயே பிரியதர்ஷினிக்கு வயிற்று வலி ஏற்படவே அதே பகுதியில் மருந்தகம் நடத்தி வரும் பிரின்ஸ் என்பவரிடம் சிகிச்சைக்கு சென்றார். அவருக்கு மருந்து மாத்திரைகளை பிரின்ஸ் வழங்கி உள்ளார். இவர் முறையான மருத்துவம் படிக்காமல் தனது வீட்டிலேயே கிளீனிக் போல நடத்தி அப்பகுதி மக்களுக்கு மருந்து மாத்திரைகள் கொடுத்து வந்துள்ளார். இந்நிலையில் நேற்று மீண்டும் பிரியதர்ஷினிக்கு வயிற்று வலி ஏற்படவே பிரின்ஸ்சிடம் சிகிச்சைக்கு வந்துள்ளார். அவர் வலி குறைவதற்காக அதிக வீரியம் கொண்ட ஊசியை அவருக்கு செலுத்தினார். சற்று நேரத்தில் பிரியதர்ஷினிக்கு மூச்சுத்திணறல் ஏற்பட்டது.

இதனை தொடர்ந்து கொடைக்கானல் அரசு ஆஸ்பத்திரிக்கு சிகிச்சைக்கு கொண்டு வந்தபோது அவர் வழியிலேயே பரிதாபமாக உயிரிழந்தார்.

இதுகுறித்து கொடைக்கனால் போலீசாருக்கு தகவல் தெரிவிக்கப்பட்டது. போலீசார் அவரது உடலை கைப்பற்றி திண்டுக்கல் அரசு மருத்துவக்கல்லூரி ஆஸ்பத்திரிக்கு பிரேத பரிசோதனைக்காக அனுப்பி வைத்தனர். மேலும் அவருக்கு சிகிச்சை அளித்த பிரின்சை தேடி வருகின்றனர். அவர் முறையான மருத்துவம் படிக்காமல் பல வருடங்களாக கிராம மக்களுக்கு வைத்தியம் பார்த்து வந்துள்ளார். தற்போது அவரது சிகிச்சையால் ஒரு பெண் உயிரிழந்த சம்பவத்தை தொடர்ந்து அங்கு போலீசார் மற்றும் மருத்துவ துறையினர் விசாரணையை தொடங்கி உள்ளனர்.

போலி டாக்டர்கள் கொடைக்கானல் மலை கிராமங்களில் இதுபோல பல்வேறு இடங்களில் கிளீனிக் வைத்து செயல்படுகின்றனர். அரசு ஆஸ்பத்திரிக்கு நீண்ட தூரம் செல்லவேண்டும் என்பதால் அருகில் கிடைக்கும் மருத்துவத்தை அப்பகுதி கிராம மக்கள் எடுத்து வருகின்றனர். இவர்களுக்கு ஒருசில டாக்டர்களும் உதவி வருவதாக கூறப்படுகிறது.

இதனால் மாவட்ட கலெக்டர் உடனடியாக தலையிட்டு கொடைக்கானல் மலை கிராமங்களில் போலி டாக்டர்களின் நடமாட்டத்தை கண்டறிந்து அவர்கள் மீது கடும் நடவடிக்கை எடுக்க வேண்டும் என்ற கோரிக்கை எழுந்துள்ளது.

சென்னை:

தி.மு.க. அமைப்புச் செயலாளர் ஆர்.எஸ்.பாரதி அறிவாலயத்தில் நிருபர்களை சந்தித்து பேட்டி அளித்தார். அப்போது அவர் கூறியதாவது:-

கள்ளக்குறிச்சி சம்பந்தமாக சி.பி.ஐ.க்கு உத்தரவிட்டதை எதிர்க்கட்சித் தலைவர் எடப்பாடி பழனிசாமி அறிக்கை விட்டுள்ளார்.

முதலில் அவர் தான் எடுத்த நடவடிக்கை குறித்து தன்னையே பரிசீலித்து கொள்ள வேண்டும். 2018 -ம் ஆண்டு சென்னை உயர்நீதிமன்றத்திலே நெடுஞ்சாலை துறையிலே 4800 கோடிக்கு ஊழல் செய்ததற்காக வழக்கு தொடரப்பட்டது. தி.மு.க. சார்பில் நான்தான் சென்னை உயர்நீதிமன்றத்தில் வழக்கு தொடர்ந்தேன்.

அந்த வழக்கில் நாங்கள் சி.பி.ஐ. விசாரணை கோரவில்லை. ஆனால் நீதிமன்றமே இந்த வழக்கை சி.பி.ஐ. விசாரிக்க வேண்டும் என்று உத்தரவிட்டது.

இவ்வளவு பேசுகிற எடப்பாடி பழனிசாமி நேற்றைய தினம் கள்ளக்குறிச்சி வழக்கை எதிர்த்து உச்சநீதிமன்றத்துக்கு தமிழக அரசு, ஸ்டாலின் போகக்கூடாது என்று மனசாட்சியை அடகு வைத்து விட்டு அறிக்கை விட்டுள்ளார்.

அவர்தான் முதன் முதலில் உச்சநீதிமன்றத்தை நாடி அவர் மீது சி.பி.ஐ. வழக்கு நடத்த வேண்டும் என்று சென்னை உயர்நீதிமன்றம் பிறப்பித்த உத்தரவை எதிர்த்து வழக்கு தொடர்ந்து தடை பெற்றார். அந்த வழக்கு நடைபெற்றது.

வழக்கு 2022-க்கு பிறகு விசாரணைக்கு வருகிறபோது தி.மு.க. சார்பில் அந்த வழக்கை தொடர்ந்த நானே சி.பி.ஐ. விசாரணை தேவையில்லை என்று கேட்டதற்கு, ஆட்சேபனை இல்லை என்று நாங்கள் சொன்னோம். காரணம் என்னவென்றால், சி.பி.ஐ. வேண்டும் என்று நாங்கள் எந்த காலத்திலும் கேட்டது கிடையாது. அதற்கு பல காரணங்கள் உண்டு.

2016-ம் ஆண்டு தமிழ் நாட்டிலே, திருப்பூர் அருகே தேர்தல் நேரத்தில் 570 கோடி ரூபாய் கண்டெய்னர் லாரிகள் பிடிபட்டது. அப்போது அ.தி.மு.க. தான் ஆட்சியில் இருந்தது. ஜெயலலிதா முதலமைச்சராக இருந்தார். அந்த 570 கோடி ரூபாய் கட்டு கட்டான நோட்டுகள் தேர்தல் அதிகாரிகள் கைப்பற்றினார்கள்.

அது எங்கிருந்து வந்தது? கோவை மாவட்டத்தில் இருந்து திருப்பூரில் நடுரோட்டில் கைப்பற்றுகிறார்கள். இது சம்பந்தமாக சென்னை உயர்நீதிமன்றத்தில் வழக்கு தொடர்ந்தோம். அந்த வழக்கில் சி.பி.ஐ. விசாரணை நடத்த வேண்டும் என்று 2017-2018ல் உத்தரவு போடப்பட்டது. இன்றைக்கு நான் கேட்கி றேன். சி.பி.ஐ. இதுவரையில் அந்த வழக்கு பற்றி ஏதேனும் வழக்கை துலக்கி இருக்கிறதா? விசாரணை நடத்தி இருக்கிறதா? என்பதை கேட்டு நாட்டு மக்களுக்கு தெரிவிக்க வேண்டும். ஏனென்றால் சி.பி.ஐ. எப்படிப்பட்ட விசாரணையை செய்யும் என்பதற்கு இதை விட எடுத்துக்காட்டு தேவை இல்லை.

இதுவரை அந்த ரூ.570 கோடி பணம் யாருக்கு சொந்தம்? யாருடைய பணம் என்று கண்டுபிடித்து நாட்டு மக்களுக்கு சி.பி.ஐ. சொன்னதா? சொல்லவில்லை. அதைப்பற்றி எங்களுக்கு கவலையில்லை.

ஆனால் எடப்பாடி பழனிசாமி கேட்பது போல, உச்சநீதிமன்றத்துக்கு நாங்கள் போக வேண்டியது அவசியம் இல்லை என்றாலும் கூட கள்ளக்குறிச்சி சம்பவத்திலே, உடனடியாக முதலமைச்சர் துரிதமாக நடவடிக்கை எடுத்து ஏறத்தாழ 57 மருத்துவர்களை அங்கு அனுப்பினார். கலெக்டர் மாற்றப்பட்டார். எஸ்.பி. சஸ்பெண்டு செய்யப்பட்டார்.

சம்பந்தப்பட்ட குற்றவாளிகள் உடனடியாக கைது செய்யப்பட்டார்கள். இதில் எல்லாவிதமான நடவடிக்கையும் அரசு மேற்கொண்டது.

ஆனால் எடப்பாடி பழனிசாமி யோக்கியர் போல, அப்பீல் போக கூடாது, சி.பி.ஐ. விசாரணைக்கு சென்றார். நான் கேட்கிறேன், இவர் தானே முதன் முதலில் ஒடினார். சட்டம்-ஒழுங்கு கெட்டு விட்டது என்று இன்றைக்கு பேசுகிறார்.

இவருடைய ஆட்சியில் ஒரு வழக்கறிஞர் கொலை செய்யப்பட்டார் என்ற சம்பவத்தை வைத்துக்கொண்டு சட்டம்-ஒழுங்கு கெட்டு விட்டது என்கிறார். இவர்கள் ஆட்சியில் நடக்கவில்லையா?

இதே சென்னையில் ஒரு மத்திய அமைச்சராக இருந்த தலித் எழில்மலையின் மருமகன் கொலை செய்யப்பட்டார். அந்த வழக்கில் 2 நாட்களுக்கு முன்பு தீர்ப்பு வந்தது. அது யாருடைய ஆட்சியில் நடந்தது. ஆகவே தனிப்பட்ட கொலைகள் நடப்பதற்கும் சட்டம்-ஒழுங்குக்கும் சம்பந்தம் இல்லை என்பதை முதலமைச்சராக இருந்த எடப்பாடி புரிந்து கொள்ள வேண்டும்.

இப்போது ஓசூரில் வழக்கறிஞர் வெட்டப்பட்டது தனிப்பட்ட விவகாரம், காதல் விவகாரம். உடனடியாக குற்றவாளி கைது செய்யப்பட்டுள்ளார். தஞ்சாவூரில் ஆசிரியை கொலை செய்யப்பட்டதை எடப்பாடி குறிப்பிடுகிறார். அதுவும் தனிப்பட்ட தகராறு.

அதாவது சட்டம்- ஒழுங்கு என்பது என்ன என்பதை முதலில் எடப்பாடி புரிந்து கொள்ள வேண்டும்.

தூத்துக்குடியில் நடைபெற்றது சட்டம்-ஒழுங்கு பிரச்சனை 13 பேரை சுட்டுக்கொன்றது எடப்பாடி ஆட்சி. அப்போது டி.வி.யில் பார்த்து தான் தெரிந்து கொண்டேன் என்று சொன்னவர்தான் இந்த எடப்பாடி பழனிசாமி.

அதேபோல் அம்மா, அம்மா என்று மூச்சுக்கு 32 தடவை சொல்கிற இவரது தலைவி, அம்மா கடைசி காலத்தில் வாழ்ந்தது கொட நாட்டில்தான்.

முதலமைச்சராக இருந்தபோது ஜெயலலிதா ஏறத்தாழ 3 ஆண்டு காலம் கொடநாட்டில் இருந்துதான் அரசாங்கத்தை நடத்தினார். இது எல்லோருக்கும் தெரியும். அந்த அம்மையார் வாழ்ந்த கொடநாடு வீட்டில் காவலாளி பொன்பகதூர் கொலை செய்யப்பட்டார். 5 கொலை அங்கு நடந்து உள்ளது.

பலகோடி ரூபாய் கொள்ளையடித்து கொண்டு போனார்கள். இது எடப்பாடி பழனிசாமி ஆட்சியில்தான் நடந்தது. இவரால் இதை தடுக்க முடிந்ததா?

இதெல்லாம் சட்டம்-ஒழுங்கு கெட்டதுக்கு அடையாளம் ஆகும். ஆனால் தனிப்பட்ட முறையில் நடக்கும் கொலை எல்லாம் சட்டம்-ஒழுங்கு என்று பேசுவது நியாயம் அல்ல.

எடப்பாடி பழனிசாமி ஆட்சியில் எத்தனை ஆசிரியர்கள் கொலை செய்யப்பட்டார்கள் என்பதற்கு என்னிடம் சான்று உள்ளது.

கும்பகோணத்தில் தனியார் பள்ளி ஆசிரியை குத்தி கொலை. இது 2018, நவம்பர் 2-ந்தேதி நடந்தது.

பெரம்பலூர் அருகே பட்டப்பகலில் ஆசிரியை வழிமறித்து கத்தியால் குத்தி கொலை. இது 2018 ஆகஸ்ட் 14-ல் நடந்தது.

ராமநாதபுரம் கலெக்டர் அலுவலகத்தில் ஆசிரியை படுகாலை , கணவன் கைது. இது 2020 டிசம்பர் 23-ல் நடந்தது.

கோவையில் கல்லூரி ஆசிரியை கழுத்தை அறுத்து தீ வைத்து எரித்து கொலை 2017-ஜூலை 8-ல் நடந்தது.

சென்னையில் கள்ளக்காதல் விவகாரம் காரை ஏற்றி கொலை செய்தது ஏன்? கைதான காதலன் பரபரப்பான வாக்குமூலம் 2017, மே-9ல் நடந்தது.

தூத்துக்குடி அருகே அரசுப்பள்ளி முன் ஆசிரியை படுகொலை 2019 ஆகஸ்ட் 8-ல் நடந்தது.

இப்படி எடப்பாடி ஆட்சியில் இவ்வளவு ஆசிரியர்கள் கொலை செய்யப்பட்டுள்ளார்கள். அதேபோல்தான் தஞ்சையில் நேற்று நடந்துள்ளது. இதை வைத்து கொண்டு சட்டம்-ஒழுங்கு கெட்டு விட்டது என்று பேசுவது எந்த வகையில் நியாயம்.

எடப்பாடி ஆட்சியில் மட்டும் 1672 கொலைகள் நடந்துள்ளன. ஆனால் தி.மு.க. ஆட்சியில் 792 கொலைகள் நடந்துள்ளது. இன்றைக்கு கொலைகள், குற்றங்கள் குறைந்துள்ளது.

இவ்வாறு அவர் கூறினார்.

பட்டுக்கோட்டை:

தஞ்சை மாவட்டம் மல்லிப்பட்டினத்தில் அரசு பள்ளி வளாகத்தில் ஆசிரியை ரமணி குத்திக் கொலை செய்யப்பட்ட சம்பவம் தமிழகத்தில் பெரும் அதிர்வலைகளை ஏற்படுத்தி உள்ளது. இந்த கொடூர செயலில் ஈடுபட்ட மதன்குமாரை போலீசார் கைது செய்தனர்.

இந்த நிலையில் கொலை செய்யப்பட்ட ரமணியின் குடும்பத்திற்கு அரசு சார்பில் ரூ.5 லட்சம் முதலமைச்சரின் பொது நிவாரண நிதியில் இருந்து வழங்கிட முதலமைச்சர் மு.க.ஸ்டாலின் உத்தரவிட்டார்.

அதன்படி இன்று முதலமைச்சர் உத்தரவுப்படி பட்டுக்கோட்டை வட்டாட்சியர் அலுவலகத்தில் ரமணியின் பெற்றோரிடம் ரூ.5 லட்சத்திற்கான காசோலையை உயர்கல்வித்துறை அமைச்சர் கோவி.செழியன் வழங்கினார்.

அப்போது முரசொலி எம்.பி, எம்.எல்.ஏ.க்கள் அண்ணாதுரை, அசோக்குமார் மற்றும் பலர் உடனிருந்தனர். 

சென்னை வானிலை ஆய்வு மையம் வெளியிட்டுள்ள செய்திக்குறிப்பில் கூறியிருப்பதாவது:

தெற்கு அந்தமான் கடல் மற்றும் அதனை ஒட்டிய பகுதிகளில் வளிமண்டல மேலடுக்கு சுழற்சி உருவானது. இது மேற்கு-வடமேற்கு நோக்கி நகர்ந்து நாளை மறுநாள் தென்கிழக்கு வங்கக்கடலில் காற்றழுத்த தாழ்வு பகுதியாக மாறும்.

தமிழகத்தில் நாகை, ராமநாதபுரம், தூத்துக்குடி, நெல்லை, குமரி மாவட்டங்களில் இன்று மிக கனமழைக்கான ஆரஞ்சு எச்சரிக்கை விடுக்கப்பட்டுள்ளது.

தஞ்சை, திருவாரூர், மயிலாடுதுறை, புதுக்கோட்டை, சிவகங்கை, விருதுநகர், தென்காசி மாவட்டங்களில் இன்று கனமழைக்கு வாய்ப்பு உள்ளது.

தமிழகத்தில் தஞ்சை, நாகை, திருவாரூர், மயிலாடுதுறை, புதுக்கோட்டை மற்றும் காரைக்காலில் வரும் 25-ந்தேதி கனமழை பெய்ய வாய்ப்புள்ளது.

தமிழகத்தில் கடலூர், தஞ்சை, திருவாரூர், நாகை, மயிலாடுதுறை, புதுக்கோட்டை மாவட்டங்களில் வரும் 26, 27-ந்தேதிகளில் மிக கனமழை பெய்ய வாய்ப்புள்ளது.

ராமநாதபுரம், காஞ்சி, செங்கல்பட்டு, விழுப்புரம் மாவட்டங்களில் வரும் 26, 27-ந்தேதிகளில் கனமழை பெய்ய வாய்ப்புள்ளது.

சென்னையில் 2 நாட்களுக்கு அதிகாலை வேளையில் பனிமூட்டம் காணப்படும்.

இவ்வாறு அதில் கூறப்பட்டுள்ளது.

சென்னை:

வரும் 2026-ம் ஆண்டு சட்டப்பேரவை தேர்தலை சந்திக்க தி.மு.க. தயாராகி வருகிறது. இதற்கான அடிப்படை கட்டமைப்புகளை வலுப்படுத்துவதில் தி.மு.க. தலைமை மும்முரமாக ஈடுபட்டுள்ளது. தேர்தலுக்கு இன்னும் 15 மாதங்கள் உள்ள நிலையில், பல மாதங்களுக்கு முன்னதாகவே, தேர்தல் ஒருங்கிணைப்பாளர் குழு நியமிக்கப்பட்டு, அக்குழுவினர் அவ்வப்போது ஆலோசனை நடத்தி, பல்வேறு வியூகங்களை வகுத்து வருகின்றனர்.

குறிப்பாக, கட்சியில் மாவட்ட செயலாளர்கள் எண்ணிக்கையை அதிகரித்து, அதன்மூலம் இளம் நிர்வாகிகளுக்கு பொறுப்புகளை வழங்குவது, மாவட்ட வாரியாக பணிகளை ஒருங்கிணைத்தல் உள்ளிட்ட நடவடிக்கைகளை மேற்கொண்டு வருகிறது.

இதற்கிடையில், 234 தொகுதிகளுக்கும் தேர்தல் பார்வையாளர்கள் நியமிக்கப்பட்டு அவர்களுக்கும் பல்வேறு பணிகள் ஒதுக்கப்பட்டுள்ளன. சமீபத்தில் பார்வையாளர்களை சந்தித்த முதலமைச்சர் மு.க.ஸ்டாலின், கடந்த முறை கூட்டணி கட்சிகளுக்கு ஒதுக்கப்பட்டு, அவர்கள் தோல்வியடைந்த தொகுதிகளில் கூடுதல் கவனம் செலுத்த உத்தரவிட்டதுடன், சிறப்பாக பணியாற்றினால் தேர்தலில் சீட் கிடைக்கும் என்பதையும் சூசகமாக கூறி நிர்வாகிகளை ஊக்கப்படுத்தியுள்ளார்.

அத்துடன், நிர்வாகிகளிடம் 200 தொகுதிகள் என்ற இலக்கையும் வழங்கி அதற்கேற்ப பணியாற்ற அறிவுறுத்தியுள்ளார். இந்த நிலையில் கட்சியின் உயர்நிலை செயல் திட்ட கூட்டம் நேற்று நடந்தது. இதில் முதலமைச்சர் மு.க.ஸ்டாலின் பங்கேற்று 2026-ம் சட்டமன்ற தேர்தல் பணிகள் குறித்து ஆலோசனை நடத்தினார்.

இதன் தொடர்ச்சியாக தேர்தல் பணிகளை விரைவுபடுத்தும் வகையில் தி.மு.க.வின் பொதுக்குழு, செயற்குழு கூட்டத்தை கூட்ட கட்சித் தலைமை முடிவு செய்துள்ளது.

கடந்த 2022-ம் ஆண்டு அக்டோபர் மாதம் 9-ந் தேதி சென்னை பச்சையப்பன் கல்லூரி எதிரில் உள்ள புனித ஜார்ஜ் பள்ளி வளாகத்தில் 15-வது செயற்குழு, பொதுக்குழு கூட்டங்கள் நடத்தப்பட்டன. அதன்பின், 16-வது மற்றும் இந்த ஆண்டுக்கான பொதுக்குழு கூட்டம் நடத்தப்பட வேண்டியுள்ளது.

தற்போது பருவமழைக் காலம் என்பதால், வருகிற ஜனவரி மாதம் இந்த கூட்டத்தை நடத்தலாம் என்று தி.மு.க. தலைமை முடிவெடுத்துள்ளது.

தி.மு.க. பொதுக்குழுவில் சுமார் 3,500 பேருக்கும் மேல் உறுப்பினர்கள் உள்ளனர். அனைவரும் கூட்டத்தில் பங்கேற்பார்கள் என்பதால் அதற்கு சென்னை அண்ணா அறிவாலயம் கலைஞர் அரங்கம் போதாது.

இதனால் சென்னையை தவிர்த்து வேறு மாவட்டங்களில் பொதுக்குழு கூட்டத்தை நடத்த கட்சி தலைமை முடிவு செய்துள்ளது. அதன்படி தமிழகத்தின் மையப்பகுதியாக திகழும் திருச்சியில் நடத்துவது குறித்து ஆலோசிக்கப்பட்டு வருகிறது.

அதிகாரப்பூர்வ அறிவிப்பு வெளியானதும் பொதுக்குழு கூட்டம் நடத்துவதற்கான இடம் மற்றும் பொதுக்குழுவில் விவாதிக்கப்படும் தீர்மானங்கள் குறித்து இறுதி செய்யப்பட உள்ளது. இந்த முறை திருச்சியில் பொதுக்குழு கூட்டம் நடத்தப்படுவது திருச்சி மாவட்ட தி.மு.க.வினரிடையே உற்சாகத்தை ஏற்படுத்தி உள்ளது.

இதனிடையே பொதுக்குழு கூட்டத்தை மதுரையில் நடத்தலாமா என்றும் கட்சி தலைமை ஆலோசித்து வருகிறது. இதற்கான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.

ஓசூர்:

கிருஷ்ணகிரி மாவட்டம், ஓசூரில் பட்டப்பகலில் கோர்ட்டு வளாகத்தில் வக்கீல் கண்ணனை, ஆனந்தகுமார் என்பவர் சரமாரி அரிவாளால் வெட்டியுள்ளார். இதனால் வெட்டுகாயம் அடைந்த கண்ணன் கவலைக்கிடமான நிலையில் ஆஸ்பத்திரியில் அனுமதிக்கப்பட்டுள்ளார். அங்கு அவருக்கு மருத்துவர்கள் 10 மணி நேரத்திற்கு மேலாக அறுவை சிகிச்சை அளித்துள்ளனர்.

இந்த சம்பவத்தை கண்டித்து ஓசூரில் இன்று வக்கீல்கள் கோர்ட்டு புறக்கணிப்பு போராட்டத்தில் ஈடுபட்டனர். கோர்ட்டு முன்பு வக்கீல்கள் சங்க தலைவர் ஆனந்தகுமார் தலைமையில் கோரிக்கைகளை வலியுறுத்தி வக்கீல்கள் ஆர்ப்பாட்டம் செய்தனர். இதேபோல் தமிழகம் முழுவதும் இன்று வக்கீல்கள் போராட்டத்தில் ஈடுபட்டனர்.