கடத்தூர்,
கடத்தூரில் நூலகர் செய்தி மடல் என்னும் மின்னிதழ் தொடக்க விழா நடைபெற்றது. நிகழ்ச்சிக்கு நூலகர் சண்முகம் தலைமை தாங்கினார்.
கடத்தூர் கிளை நூலக நூலகரும், மின்னிதழ் ஆசிரியருமான நூலகர் சரவணன் வரவேற்புரை ஆற்றினார். கடத்தூர் அரசு பாலிடெக்னிக் கல்லூரி நூலகர் முனைவர் செந்தில் மின்னிதழை தொடங்கி வைத்து பேசும்போது, பொது நூலகத் துறையில் பணிபுரியும் நூலகர்களுக்கு மட்டுமல்லாது, பொதுமக்களுக்கும் இந்த மின்னிதழ் பயனுள்ளதாக இருக்கும் என்றார்.
நூலகர்கள் குமரன், சரவணகுமார், தங்கம்மாள், சிவகாமி உள்ளிட்ட நூலகர்கள் வாழ்த்திப் பேசினர். முடிவில் நூலகர் ஜாகிர் உசேன் நன்றி கூறினார். நிகழ்ச்சியில் தருமபுரி மாவட்ட நூலகர்கள் திரளாக கலந்து கொண்டனர்.
