தஞ்சாவூர்:
தஞ்சை காவல்துறை அதிகாரிகளுக்கு வாக்குச்சாவடி மற்றும் வாக்குப்பதிவு எந்திரங்களை கையாளுவது தொடர்பான பயிற்சி முகாம் தஞ்சை தீர்க்க சுமங்கலி மஹாலில் இன்று நடைபெற்றது பயிற்சியில் தஞ்சை மாவட்ட கலெக்டர் அண்ணாதுரை கலந்துகொண்டு போலீசாருக்கு பயிற்சி வழங்கி பேசினார்.
தஞ்சை மாவட்டத்தில் 2287 வாக்குச்சாவடி மையங்கள் உள்ளன. ஒவ்வொரு வாக்குச்சாவடி மையத்திலும் காவலர்கள் கண்காணிப்பு பணியை கண்ணும் கருத்துமாக கண்காணிக்க வேண்டும். மாவட்டத்தின் 104 பதட்டமான வாக்குச்சாவடிகள் ஆக கண்டறியபட்டுள்ளது. இந்த வாக்குச்சாவடிகளில் கூடுதல் கண்காணிப்பு அவசியம் ஏற்படுத்த வேண்டும்.
மேலும் மாவட்டத்தில் சட்டம் ஒழுங்கு பிரச்சினைகள் ஏற்படக்கூடிய வாக்குச்சாவடிகள் எவை எவை என்பதை முன்கூட்டியே கண்டறிந்து அங்கு தேவையான நடவடிக்கைகளை ஏற்படுத்த வேண்டும்.
முன்னதாக வாக்குப்பதிவு நடைபெறும் 48 மணி நேரத்திற்கு முன்னதாக அனைத்து மதுக்கடைகளும் மூடப்பட்டிருக்கும் நிலையில் மொத்தமாக யாராவது மதுபானங்களை வாங்கி செல்வது தெரியவந்தால் அதுகுறித்து விசாரித்து நடவடிக்கை எடுக்க வேண்டும். தேர்தல் நடைபெறும் சமயத்தில் தேர்தல் ஆணையம் வகுத்துள்ள விதிமுறைகளின்படி 200 மீட்டருக்கு அப்பால்தான் அரசியல் கட்சியினர் இருக்க வேண்டும் என்பதை அவசியம் கடைபிடித்து யாரும் வரம்பு மீறாத அளவிற்கு நடவடிக்கை எடுக்கவேண்டும். மாவட்டத்தில் 347 பேர் தொடர்ச்சியாக பிடியாணை பிறப்பிக்கப்பட்ட நிலையில் அவர்கள் எங்கு இருக்கிறார்கள் என்ற தகவலை முன்கூட்டியே காவல்துறையினர் தெரிந்து கொண்டு அதற்கேற்ப முன்னெச்சரிக்கை நடவடிக்கை எடுக்க வேண்டும்.
திடீரென வாக்குச்சாவடி மையங்களில் பிரச்சினைகள் ஏற்பட்டால் அதை தீர்க்க தகுந்த நடவடிக்கைகளை எடுக்க வேண்டும் தேர்தல் பாதுகாப்பு பணிக்கு வரும் மத்திய துணை ராணுவப் படையினர் இன்ஸ்பெக்டர் தலைமையிலான போலீசார் அவர்களுக்கு வழிகாட்டுதல் செய்ய வேண்டும் அவர்களுக்கு தேவையான தங்குமிடம் வாகன வசதி உள்ளிட்ட அனைத்து வசதிகளையும் உள்ளூர் போலீசார் செய்து தர வேண்டும்.
இவ்வாறு அவர் பேசினார்.
இதில் தஞ்சை மாவட்ட போலீஸ் சூப்பிரண்டு மகேஸ்வரன் மற்றும் அனைத்து சரகத்திற்கு உட்பட்ட உதவி துணை போலீஸ் சூப்பிரண்டுகள், மற்றும் துணை போலீஸ் சூப்பிரண்டுகள், இன்ஸ்பெக்டர்கள் 200க்கும் மேற்பட்டோர் கலந்து கொண்டனர்.
