ஸ்பைடர்மேன் மூன்றாம் பாகத்தில் வில்லனாக வந்து கலக்கிய வெனம் என்ற வில்லன், நாயகன் டாம் ஹார்டியின் (எடி பிராக்) உடலுடன் இணைந்து போடும் ஆட்டம் தான் வெனம் படம்.
ரிஸ் அஹமது (டாக்டர்.கார்ல்டன் டிரேக்) தலைமையில் செயல்படும் லைஃப் பவுண்டேஷன் என்ற நிறுவனம், விண்வெளியில் வாழும் ஏலியன்கள் பற்றிய ஆராய்ச்சியில் இறங்குகிறது. அந்த ஆய்வில் 4 வகையான வேற்றுகிரக உயிரினங்களை (சிம்பியாட்ஸ்) கண்டுபிடித்து, அதன் மாதிரிகளை பூமிக்கு கொண்டு வரும் போது, விண்கலம் விபத்திற்குள்ளாகிறது. அதில் ஒரு உயிரினம் தப்பித்துவிடுகிறது. மற்ற மூன்றும் அமெரிக்காவில் உள்ள ரிஸ் அஹமதுவின் ஆராய்ச்சி கூடத்திற்கு கொண்டுவரப்படுகிறது.
பிரபல பத்திரிகை ஒன்றில் பணியாற்றி வருகிறார் டாம் ஹார்டி. ரிஸ் அஹமதுவின் நிறுவனத்தில் முக்கிய பணியில் இருக்கிறார் டாமின் காதலி மிச்செல் வில்லியம்ஸ். இந்த நிலையில், ரிஸ் அஹமதுவை பேட்டி எடுக்கும் வாய்ப்பு டாம் ஹார்டிக்கு கிடைக்கிறது. அந்த வாய்ப்பை பயன்படுத்திக் கொள்ள நினைக்கும் டாம் ஹார்டி, தனது காதலியின் லேப்டாப்பில் உள்ள ரகசிய தகவல்களை திருடி அவரை பேட்டி காண்கிறார்.
இதனால் டாமுக்கும், ரகசிய தகவல்களை சேகரித்ததாக அவரது காதலிக்கும் வேலை பறிபோகிறது. இதையடுத்து டாம் - மிச்செல் இருவரும் பிரிகின்றனர். இந்த நிலையில், லைஃப் பவுண்டேஷனில் வேலை பார்க்கும் மெலோரா வால்டர்ஸ், லைப் பவுண்டேஷன் சமூக விரோத செயல்களை செய்து வருவதாக கூறி, அதை தடுக்க வேண்டும் என்று கூறுகிறார்.
தனது காதலி, வேலையை இழந்த டாம் ஹார்டி, முதலில் அதனை ஏற்க மறுத்து பின்னர், அங்கு செல்கிறார். அப்போது வெனம், பாதிக்கப்பட்ட பெண் ஒருவரின் உடலில் இருந்து டாம் ஹார்டியின் உடலுக்குள் நுழைகிறது. தனக்கு என்ன நடக்கிறது என்பதே புரியாமல் தவிக்கும் டாம் ஹார்டி, வெனம் தனது உடலில் இணைந்ததற்கான காரணத்தை தேடுகிறார்.
கடைசியில், வெனம் தனது நோக்கத்தை நிறைவேற்றிக் கொண்டதா? டாம் ஹார்டியின் உடலில் இருந்து வெளியேறியதா? ரிஸ் அஹமது தனது ஆசையை நிறைவேற்றிக் கொண்டாரா? அதன் பின்னணியில் என்ன நடந்தது என்பதே படத்தின் மீதிக்கதை.
டாம் ஹார்டி, ரிஸ் அஹமது இருவருமே போட்டி போட்டுக் கொண்டு நடித்திருக்கிறார்கள். குறிப்பாக வெனமாக மாறி இருவரும் சண்டையிடும் காட்சிகள் சிறப்பாக வந்திருக்கிறது. மற்றபடி மிச்செல் வில்லியம்ஸ், ஜென்னி ஸ்லேட் உள்ளிட்ட மற்ற கதாபாத்திரங்களும் படத்தின் ஓட்டத்திற்கு ஏற்ப நடித்துள்ளனர்.
முதல் பாதியின் தொடக்கத்தில் வேகமில்லாமல் இருந்தாலும், லேட்டானாலும் லேட்டஸ்டா வருவது போல, அரைமணி நேரத்திற்கு பின்னர் வரும் காட்சிகள் ரசிக்கும்படியாக இருக்கிறது. படம் பெரும்பாலும் இருட்டில் நடப்பது போல இருந்தாலும், அந்த அனுபவம் சிறப்பானதாக இருக்கிறது. வேகமான திரைக்கதை, காமெடி, கிராபிக்ஸ் என மற்ற துறைகளும் சிறப்பாக பணியாற்றியிருக்கின்றனர்.
லட்விக் கோரான்சனின் இசையில் பின்னணி இசை படத்திற்கு கூடுதல் பலம். மேத்தியூ லிபேட்டிக்கின் ஒளிப்பதிவில் காட்சிகள் சிறப்பாக வந்துள்ளது.
மொத்தத்தில் `வெனம்' நல்ல குணம். #VenomReview #TomHardy
