நீங்கள் தேடியது "ரெயில்"

உத்தரப்பிரதேச மாநிலம் மதுராவில், நின்று கொண்டிருந்த சரக்கு ரெயிலின் அடியில் நுழைந்து தண்டவாளத்தை பெண் ஒருவர் கடக்க முயன்றுள்ளார். அப்போது சரக்கு ரெயில் நகர தொடங்கியதால் அவர் தண்டவாளத்திலேயே படுத்துக்கொண்டார்.

ரெயில் செல்லும்போது அந்த பெண் தண்டவாளத்தில் படுத்திருக்கும் வீடியோ இணையத்தில் வெளியாகி வைரலானது.

மதுராவில் இருந்து ஆக்ராவுக்குப் புறப்படுவதற்குத் தயாராக ஒரு சரக்கு ரயில் நடைமேடை 1 இல் நிறுத்தப்பட்டிருந்தது. அப்போது சரக்கு ரயிலுக்கு அடியில் சென்று தண்டவாளத்தை கடக்க 2 பெண்கள் முயற்சி செய்தனர்.

பெண்களில் ஒருவர் சரக்கு ரெயிலின் அடியில் ஊர்ந்து சென்றபோது, ரெயில் திடீரென நகரத் தொடங்கியது. இதனையடுத்து அப்பெண் தண்டவாளத்தில் படுத்துக்கொண்டார்.

ரெயில் முன்னோக்கி நகரத் தொடங்கியதும், ரெயில் நிலையத்தில் இருந்தவர்கள் சரக்கு ரெயிலை முன்னோக்கி நகரவிடாமல் நிறுத்துமாறு கூச்சலிட்டனர்.

பொது மக்களின் அலறல் சத்தத்திற்கு பிறகும் சரக்கு ரயில் நிற்கவில்லை. அதிசயமாக, சரக்கு ரெயில் அவருக்கு எந்தப் பாதிப்பையும் ஏற்படுத்தாமல் கடந்து சென்றது. இதனால் நூல் இழையில் அப்பெண் உயிர் பிழைத்தார்.

சென்னை:

2022-ம் ஆண்டு பரங்கிமலை ரெயில் நிலையத்தில் ரெயில் முன்பு மாணவி சத்ய பிரியா தள்ளிவிட்டு கொல்லப்பட்டார். இச்சம்பவம் பெரும் அதிர்ச்சியை ஏற்படுத்திய நிலையில், இந்த வழக்கு தொடர்பாக சதீஷ் என்பவனை போலீசார் கைது செய்து விசாரணை நடத்தினர்.

அப்போது, சதீஷும், சத்யாவும் காதலித்து வந்ததாகவும் பிறகு சதீஷின் நடவடிக்கைகள் பிடிக்காததால் அவரை விட்டு பிரிய துவங்கியிருக்கிறார் சத்யா. இதை ஏற்றுக்கொள்ள முடியாத சதீஷ், அவ்வப்போது சத்யாவை நேரில் சந்தித்து தன்னை காதலிக்குமாறு தொல்லை கொடுத்ததாகவும் தெரிகிறது.

எனினும் சத்யப்ரியா சதீஷின் காதலை ஏற்கவேயில்லை. இதனால் ஒருகட்டத்தில் ஆத்திரமடைந்த சதீஷ், கடந்த 2022 அக்டோபர் 13ம் தேதி கல்லூரிக்குச் செல்ல பரங்கிமலை ரெயில் நிலையம் வந்த சத்யபிரியாவை, தாம்பரம் சென்று கொண்டிருந்த மின்சார ரெயில் முன்பு தள்ளிவிட்டு கொலை செய்தார். இதனை தொடர்ந்து கைதான சதீஷ் பல முறை ஜாமினுக்கு முயன்றும் கிடைக்கவில்லை. இதனால் தொடர்ந்து சதீஷ் சிறையிலேயே அடைக்கப்பட்டுள்ளார்.

இந்த வழக்கு சென்னை அல்லிகுளத்தில் உள்ள மகளிர் நீதிமன்ற நீதிபதி ஸ்ரீதேவி முன்பு விசாரணைக்கு வந்தபோது, சிபிசிஐடி காவல்துறை தரப்பில் 70 சாட்சிகள் விசாரணை செய்யப்பட்டதாகவும், அனைத்து தரப்பு வாதங்களும் நிறைவடைந்த நிலையில், வழக்கின் தீர்ப்பை டிசம்பர் 27ஆம் தேதி அறிவிப்பதாகவும் கூறியிருந்தார்.

இதையடுத்து கடந்த 27 தேதிக்கு இந்த வழக்கின் தீர்ப்பை நீதிபதி அறிவித்தார். சதீஷ் குற்றவாளி என தீர்ப்பு அளித்த நீதிபதி குற்றவாளி சதீஷுக்கான தண்டனை விவரம் 30-ந்தேதி அறிவிக்கப்படும் என கூறியிருந்தார்.

இந்நிலையில் அவருக்கு மரண தண்டனை விதித்து சென்னை மகளிர் சிறப்பு நீதிமன்றம் உத்தரவிட்டுள்ளது.

உத்தரபிரதேசத்தின் பிரயாக்ராஜில் ஒவ்வொரு வருடமும் கும்பமேளாவும் 12 வருடங்களுக்கு ஒருமுறை மகா கும்பமேளாவும் நடைபெறுகிறது. இந்த நிலையில் வருகிற ஜனவரி மாதம் மகா கும்பமேளா தொடங்க உள்ளது.

உ.பி. கும்பமேளாவுக்காக தமிழ்நாட்டில் இருந்து தலா 20 பெட்டிகள் கொண்ட 15 ரெயில்கள் வட மாநிலங்களுக்கு திருப்பி விடப்பட்டுள்ளது.

இதனால் தமிழ்நாட்டில் முக்கிய ரெயில்களில் முன்பதிவில்லா பெட்டிகள் நீக்கப்பட்டுள்ளது. தாம்பரம் - ராமேஸ்வரம் ரெயில் சேவை நிறுத்தப்பட்டதுடன், தாம்பரம் - திருச்சி, தாம்பரம் - கோவை ரயில்களில் பொதுப்பெட்டிகள் நீக்கத்தால் பயணிகள் அவதியடைந்தனர்.

இதனையடுத்து 600 கூடுதல் சிறப்புப் பேருந்துகளை தமிழக அரசுப் போக்குவரத்துத் துறை அறிவித்துள்ள நிலையில், மதுரை மற்றும் கோயம்புத்தூர் செல்வதற்கான கட்டணத்தை தனியார் பேருந்துகள் இரு மடங்காக உயர்த்தியதாக கூறப்படுகிறது.

ரெயில் பயணம் மகிழ்ச்சியாகவும் பாதுகாப்பாகவும் இருப்பதால் பயணிப் போரின் எண்ணிக்கை அதிகரித்து வருகிறது. தெற்கு ரெயில்வே மூலம் இயக்கப்படும் ரெயில்களில் ஆண்டுக்கு 6 கோடி பேர் பயணம் செய்கிறார்கள். தமிழகத்தின் பல்வேறு பகுதிகளுக்கு மட்டுமின்றி வெளி மாநிலங்களுக்கும் சென்று வருகின்றன.

ரெயிலில் குளிர்சாதன பெட்டியில் பயணம் செய்யும் பயணிகளுக்கு தலையணை, படுக்கை விரிப்பு, போர்வை, கம்பளி, துண்டு ஆகியவை வழங்கப்படுகிறது. அனைத்து ரெயில்களுக்கும் இவை எவ்வாறு கொண்டு செல்லப்படுகின்றன.

அதனை தூய்மை படுத்தும் பணி எப்படி மேற்கொள்ளப்படுகிறது. ஒவ்வொரு ரெயிலுக்கும் குறித்த நேரத்துக்கு முன்பாக கொண்டு செல்லுதல், அதே போல பயன்படுத்தப்பட்ட அழுக்கு போர்வை, படுக்கை விரிப்புகளை எடுத்து பாதுகாப்பாக கொண்டு சென்று மீண்டும் சலவை செய்து வழங்குவதற்கான வேலைகள் ஒரு பெரிய தொழில்நுட்ப வளையத்திற்குள் நடைபெறுவது மிகுந்த ஆச்சர்யத்தை ஏற்படுத்துகிறது.

பல்வேறு இடங்களில் சென்னைக்கு வரும் ரெயில்களும், இங்கிருந்து பிற மாநிலங்களுக்கு செல்லும் ரெயில்களிலும் பயணிகள் பெட்டிக்கு வருவதற்கே முன்பே படுக்கை விரிப்புகள் கவர் போடப்பட்டு வைக்கப்படும்.

போர்வை, படுக்கை விரிப்பு போன்றவற்றை தூய்மை செய்வதற்காக சென்னை பேசின் பாலம் அருகில் நவீன தொழில்நுட்பத்திலான மிகப்பெரிய சலவை செய்யும் தொழிற்சாலை உள்ளது. இதில் தினமும் 21 டன் துணிகள் சலவை செய்யப்படுகின்றன. ஒரு ஷிப்டுக்கு 7 டன் வீதம் 3 ஷிப்டு என 24 மணி நேரமும் இந்த சலவை தொழிற்சாலை இயங்கி கொண்டு இருக்கிறது. தினமும் 42 எக்ஸ்பிரஸ் ரெயில்களுக்கு இங்கிருந்து போர்வை, கம்பளி உள்ளிட்டவை சுகாதாரமான முறையில் சுத்தம் செய்யப்பட்டு ரெயில்களுக்கு கொண்டு செல்லப்படுகிறது.

இந்த பணிகள் அனைத்தும் முறையாக திட்டமிடப்பட்டு குறித்த நேரத்திற்குள் நீராவி மூலம் சுத்தம் செய்து தானியங்கி கருவி சலவை செய்வதுடன் தானாகவே மடித்தும் வெளியே வந்து விடும். அதனை ஊழியர்கள் கவரில் அடைத்து ஒவ்வொரு ரெயில் பெட்டிக்கும் கொண்டு செல்லப்படுகின்றன.

இந்த நவீன சலவையகம் 20 ஆயிரம் சதுர அடியில் செயல்படுகிறது. 40 ஆயிரம் போர்வைகள் 20 ஆயிரம் துண்டு, 20 ஆயிரம் தலையணை கவர், 700 கம்பளி ஆகியவை தினமும் தூய்மைப்படுத்தப்படுகிறது.

நாகர்கோவில், எர்ணாகுளம் ஆகிய இடங்களில் குறைந்த கொள்ளளவு சலவையகம் செயல்பட்டு வருகிறது. விரைவில் மதுரை, கோவை மற்றும் மங்களூரில் 7800 செட் போர்வை தூய்மைப்படுத்தும் மையம் நிறுவப்பட உள்ளது.

தெற்கு ரெயில்வே மூலம் இயக்கப்படும் அனைத்து ரெயில்களிலும் சுத்தமான சுகாதாரமான போர்வை, கம்பளி, படுக்கை விரிப்புகள் வழங்கப்படுவதாக அதிகாரிகள் தெரிவித்தனர்.

எங்கோ பயணத்தை தொடங்கும் இடத்தில் இருந்து அது முடியும் இடம் வரை பயணிகளுகூகு வழங்கப்படும் போர்வை கம்பளியின் தூய்மை பணியில் நூற்றுக்கணக்கான ஊழியர்கள் ஈடுபட்டு வருகிறார்கள். இரவு-பகலாக நடைபெற்று வரும் இந்த பணியின் மூலம் ஒவ்வொரு ரெயில் பயணிகளுக்கும் சொகுசான மற்றும் சுகாதாரமான பயணத்தை கொடுக்கும் வகையில் இந்த பணி அமைந்துள்ளது.

சென்னை சென்ட்ரல் மற்றும் எழும்பூரில் இருந்து இயக்கப்படும் எக்ஸ்பிரஸ் ரெயில்களில் ஏ.சி. முதல் வகுப்பு, இரண்டாம் மற்றும் 3-ம் வகுப்பு பயணிகள் வெண்மையான போர்வை, துண்டு ஆகியவற்றை பயன்படுத்தும் வகையில் இந்த சேவை அமைந்துள்ளது. இந்த பணியை தனியார் நிறுவன "பூட் அடிப்படையில் செய்ய தெற்கு ரெயில்வே அனுமதி அளித்துள்ளது.

ரெயில்வே வழங்கும் இந்த சேவைக்கு ஏ.சி. டிக்கெட்டுடன் அதற்கான கட்டணம் சேர்த்து வசூலிக்கப்படுகிறது. எனவே பயணிகளுக்கு தரப்படும் போர்வை, துண்டு, படுக்கை விரிப்பு தூய்மையாக இல்லையென்றால் புகார் தெரிவிக்கலாம். அதன் மீது உரிய நடவடிக்கையும் ரெயில்வே எடுத்து வருகிறது. தூய்மை, சுகாதாரம் ஆகியவற்றுக்கு முன்னுரிமை கொடுத்து வரும் ரெயில்வே இந்த பணியை தீவிரமாக கண்காணித்தும் வருகிறது.

ரெயில்கள் தாமதமாக புறப்படுவது, வந்து சேர்த்து எல்லாம் இந்தியாவில் படு சகஜமான மக்களுக்கு பழகிவிட்ட ஒரு விஷயம். 2, 3 மணி நேரங்கள் முதல் 1, 2 நாட்கள் வரைகூட ரெயில் தாமதம் குறித்து கேள்விப்பட்டிருப்போம்.

ஆனால் இந்தியாவிலேயே அதிக தாமதமாக தனது பயணத்தை முடித்த ரெயில் சுவாரஸ்யமான ஒரு சமாச்சாரம். 42 மணி நேரத்தில் பயணத்தை முடிக்க திட்டமிடப்பட்ட இந்த குறிப்பிட்ட ரெயிலானது 3 ஆண்டுகள், 8 மாதங்கள் மற்றும் 7 நாட்கள் எடுத்துக்கொண்டது.

இந்த நிலைமை 2014 ஆம் ஆண்டு ஆந்திரப் பிரதேசத்தின் விசாகப்பட்டினத்திலிருந்து உத்தரப்பிரதேசத்தின் பஸ்திக்கு சென்ற சரக்கு ரெயிலுக்கு நிகழ்ந்துள்ளது.

2014 ஆம் ஆண்டு,பஸ்தியில் உள்ள தொழிலதிபரான ராமச்சந்திர குப்தா, விசாகப்பட்டினத்தில் உள்ள இந்தியன் பொட்டாஷ் லிமிடெட் நிறுவனத்திடம் இருந்து சுமார் ரூ.14 லட்சம் மதிப்பிலான டை- அமோனியம் பாஸ்பேட் (DAP) ஐ தனது வணிகத்திற்காக ஆர்டர் செய்தார்.

நவம்பர் 10, 2014 அன்று, 1,316 DAP சாக்குகள் ஒரு சரக்கு ரயிலில் ஏற்றப்பட்டு திட்டமிட்டபடி புறப்பட்டது. ஆனால் ரெயில் வந்துசேர வேண்டிய நேரத்தில் வரவில்லை. ராம்சந்திர குப்தாவின் பல புகார்களுக்குப் பிறகு, ரெயில் வரும் பாதையிலேயே மாயமானதை அதிகாரிகள் கண்டுபிடித்தனர்.

அந்த ரெயில் வழிதவறிச் சென்றது பின்னர் தெரியவந்தது. ரெயில் உள்ள இடம் கண்டுபிடிக்கப்பட்டாலும் அதில் உள்ள ஒரு பெட்டி [bogie] பயணத்திற்குத் தகுதியற்றதாகக் கருதப்பட்டதால், ரெயில் நீண்ட காலத்திற்கு ஒரே இடத்தில் கைவிடப்பட்ட நிலையில் நின்றிருக்கிறது.

கோப்புப் படம் 

கடைசியாக ஜூலை 25, 2018 அன்றுதான் ரயில் பஸ்தி நிலையத்தை வந்தடைந்தது. மூன்று ஆண்டுகளுக்கும் மேலாக சும்மா இருந்ததால் உரம் முற்றிலும் பாழானது குறிப்பிடத்தக்கது. 

திருப்பதியில் இருந்து கொல்லம் சென்ற ரெயிலில் ஆபத்தை உணராமல் ஆந்திர ஐயப்ப பக்தர்கள் கற்பூரம் ஏற்றி வழிபட்ட வீடியோ இணையத்தில் வைரலானது.

திருப்பதியில் இருந்து கொல்லம் சென்ற ரெயில் சேலம் வழியாக சென்ற போது தடையை மீறி கற்பூரம் ஏற்றி ஐயப்ப பக்தர்கள் வழிபாடு செய்தனர். இணையத்தில் வெளியான வீடியோவை வைத்து போலீசார் அவர்கள் மீது மீது வழக்கு பதிவு செய்துள்ளனர்.

ஐயப்ப பக்தர்கள் தரிசனம் முடித்து திரும்பிய பின்னர் அவர்கள் மீது நடவடிக்கை எடுக்க போலீசார் திட்டமிட்டுள்ளனர்.

ரெயிலில் கற்பூரம் கொண்டு சென்றால் 3 ஆண்டுகள் சிறை, அபராதம் விதிக்கப்படும் என தெற்கு ரயில்வே ஏற்கனவே எச்சரித்திருந்தது குறிப்பிடத்தக்கது.

சென்னை - விழுப்புரம் ரெயில் வழித்தடம் விரைவில் சரி செய்யப்பட்டு விடும் என அதிகாரிகள் தெரிவித்துள்ளனர் என்று தென்னக ரயில்வே நிர்வாகம் பிற்பகல் 3 மணிக்கு தெரிவித்த தகவலை மதுரை எம்.பி. சு.வெங்கடேசன் தனது எக்ஸ் பக்கத்தில் பதிவிட்டுள்ளார்.

அவரது பதிவில், "காலையிலிருந்து ரயில் பயணிகள் மற்றும் பயணிகளின் உறவினர்களிடமிருந்து தொடர்ந்து தொலைபேசி அழைப்புகள் வந்து கொண்டிருக்கின்றன. ஒரு புறம் பயணிகளிடனும் இன்னொரு புறம் தெற்கு இரயில்வேயின் தலைமையகத்துடனும் தொடர்ந்து பேசி வருகிறேன். யாரும் பதட்டமடைய வேண்டாம். ரயில்வே நிர்வாகம் உரிய மாற்று ஏற்பாடுகளை செய்து நிலமையை திறம்பட கையாண்டு வருகின்றனர். என்பதை பயணிகளுக்கு தெரிவித்தபடி உள்ளேன்.

ரயில்வே நிர்வாகம் பிற்பகல் 3 மணிக்கு தெரிவித்த நிலைமையை கீழே பதிவிட்டுள்ளேன்.

கீழே உள்ள இரயில்கள் தவிர தென் மாவட்டங்களில் இருந்து சென்னை வந்த பிற ரயில்கள் அனைத்தும் மாற்றுப்பாதையில் இயக்கப்பட்டுள்ளன. விரைவில் அவைகள் அனைத்தும் நிறைவிடத்துக்கு வந்து சேரும்.

சென்னை விழுப்புரம் இடையே உள்ள முக்கிய வழித்தடம் அடுத்த இரண்டு மணி நேரத்துக்குள் சரி செய்யப்பட்டு விடும் என்று அதிகாரிகள் நம்பிக்கையோடு தெரிவித்தனர். எனவே இன்று இரவு சென்னையிலிருந்து புறப்படும் இரயில்கள் அனேகமாக ரத்தாக வாய்ப்பில்லை. தேவைப்பட்டால் புறப்படும் நேரத்தில் சிறிது மாற்றம் இருக்கலாம் என்பதை தெரிவித்துள்ளனர்.

நேற்று மாலை 5.30 மணிக்கு புறப்பட்ட கன்னியாகுமரி விரைவு வண்டி இப்பொழுது வாலாஜா ரோடு கடந்துள்ளது. காலை உணவு திருக்கோயிலூர் மக்கள் தந்தனர். காட்பாடியில் அவரவர் வாங்கிக் கொண்டனர் என்று இரயில் பயணிகள் தெரிவித்தனர்.

ஒரு புறம் நிலமையை திறம்பட கையாளப் பெருக்கெடுத்தோடும் நீருக்கு நடுவே நின்று தண்டவாளங்களை சரி செய்து கொண்டிருக்கும் இரயில்வே ஊழியர்கள். மற்றும் விழிப்போடு இயங்கிக் கொண்டிருக்கும் இரயில்வே அலுவலர்கள். மறுபுறம், எங்கெங்கோ சென்றபடி நகரும் ரயிலுக்குள் நிலமையை சமாளித்து பயணித்துக் கொண்டிருக்கும் பயணிகள். இரு முனைகளின் குரல்களையும் தொடர்ந்து கேட்டுக்கொண்டிருக்கிறேன்.

பெரும் புயலும், பேரிடரும் சந்தித்து மீளும் வலிமையே மனிதத்தின் தனித்துவம்.

——

இரயில்வே நிர்வாக தகவல்கள்;

சென்னை பிரிவு;

17653 கச்சேகுடா - புதுச்சேரி எக்ஸ்பிரஸ் செங்கல்பட்டில் நிறுத்தப்பட்டது.

17655 காக்கிநாடா துறைமுகம் - புதுச்சேரி சர்கார் எக்ஸ்பிரஸ் செங்கல்பட்டில் நிறுத்தப்பட்டது.

560 உணவுப் பொட்டலங்களும் 700 தண்ணீர் பாட்டில்களும் விநியோகிக்கப்பட்டன சிக்கித் தவிக்கும் பயணிகளை ஏற்றிச் செல்ல பேருந்து ஏற்பாடுகள் செய்யப்பட்டன.

திருச்சி பிரிவு;

போக்குவரத்து ஏற்பாடுகள்: மாம்பழப்பட்டு, வெங்கடேசபுரம் மற்றும் விழுப்புரம் ரயில் நிலையங்களில் சிக்கித் தவிக்கும் 2700க்கும் மேற்பட்ட பயணிகளை சென்னையின் பல்வேறு இடங்களுக்கு அழைத்துச் செல்ல மொத்தம் 27 பிரத்யேக பேருந்துகள் பயன்படுத்தப்பட்டன. •

உணவு மற்றும் நீர் விநியோகம்: பாதிக்கப்பட்ட ரயில்களில் பயணம் செய்த அனைத்து பயணிகளுக்கும் இடையூறு ஏற்படும் போது அவர்களின் வசதி மற்றும் நல்வாழ்வை உறுதி செய்வதற்காக உணவு பொட்டலங்கள் மற்றும் தண்ணீர் பாட்டில்கள் வழங்கப்பட்டன. (3000 உணவுப் பொட்டலங்கள் மற்றும் தண்ணீர் பாட்டில்கள் விநியோகிக்கப்பட்டன) • பாதுகாப்பான போக்குவரத்து: பேருந்துகள் பயணிகளை பாதுகாப்பாக சென்னையில் அவர்கள் சேருமிடத்திற்கு ஏற்றிச் சென்றன.

இவைகள் தவிர

1. மாம்பழப்பட்டில் (MMP) - 16 பேருந்துகள், 1500 பயணிகள் 2. வெங்கடேசபுரத்தில் (விகேஎம்) - 5 பேருந்துகள், 600 பயணிகள் 3. விழுப்புரம் ஜன. (VM) - 5 பேருந்துகள், 600 பயணிகள் உணவுப் பொட்டலங்கள் ஏற்பாடு செய்யப்பட்டுள்ளன: 1. மாம்பழப்பட்டில் (MMP) - 450 பாக்கெட்டுகள் மற்றும் போதுமான அளவு தண்ணீர் பாட்டில்கள் 2. வெங்கடேசபுரத்தில் (விகேஎம்) - 450 பாக்கெட்டுகள் மற்றும் போதுமான அளவு தண்ணீர் பாட்டில்கள் 3. விழுப்புரம் ஜன. (VM) - 2000 பாக்கெட்டுகள் மற்றும் போதுமான அளவு தண்ணீர் பாட்டில்கள் 4. திருவண்ணாமலையில் (TNM) - 100 பாக்கெட்டுகள் மற்றும் போதுமான அளவு தண்ணீர் பாட்டில்கள் தரப்பட்டுள்ளன.

கீழே உள்ள ரயில்கள் நிறுத்தப்பட்டுள்ளன

1. பண்ருட்டி நிலையத்தில் ரயில் எண். 20606 (TCN-MS).

2. ரயில் எண். 17408 (MQ-TPTY) திருப்பாதிரிப்புலியூர் நிலையத்தில்

3. ரயில் எண். 12694 (TN-MS), ரயில் எண். 22662 (RMM-MS), 16752 (RMM-MS) விழுப்புரம் ஜே.என்.

4. வெங்கடேசபுரத்தில் ரயில் எண். 20636 (QLN-MS)

5. மாம்பழப்பட்டில் ரயில் எண். 12662 (SCT-MS), 12638 (MDU-MS) 

மண்டபம்:

ராமேசுவரம் தீவினை இந்தியாவுடன் இணைக்கும் பாம்பன் ரெயில் பாலத்தில் ஏற்பட்ட தொழில்நுட்பப் பிரச்சினைகள், தூக்குப் பாலத்தில் ஏற்பட்டுள்ள விரிசல் காரணமாக புதிய ரெயில் பாலம் கட்டுவதற்கு பிரதமர் மோடி 1.03.2019 அன்று அடிக்கல் நாட்டினார். அதற்கான பூர்வாங்க பணிகள் தொடங்கி தற்போது நிறைவடைந்துள்ளது.

2,078 மீட்டர் நீள புதிய பாலம், கடல் மட்டத்திலிருந்து 7 மீட்டர் உயரத்தில் எழுப்பப்பட்டுள்ளது. 101 தூண்களைக் கொண்ட இந்த பாலத்தில் 60 அடி நீளம் கொண்ட 99 இணைப்பு கர்டர்கள் பொறுத்தப்பட்டு பாலத்தின் மையப்பகுதியில் கப்பல்கள் செல்வதற்கு வசதியாக 77 மீட்டர் நீளம், 27 மீட்டர் உயரத்திற்கு ஹைட்ராலிக் லிப்ட் மூலம் இயங்கக் கூடிய செங்குத்து தூக்கு பாலமும் அமைக்கப்பட்டுள்ளது.

பாம்பன் கடலில் புதிய ரெயில் பாலத்தின் கட்டுமான பணிகள், தண்டவாளங்கள், கர்டர்கள் மற்றும் பாலத்தின் நடுவே கப்பல்கள், படகுகள் கடந்து செல்வதற்கு செங்குத் தூக்குப் பாலத்தை பொறுத்தும் பணிகள் முடிந்து, அதனை தூக்கி இறக்கும் சோதனை, ரெயில்கள் சோதனை ஓட்டமும் வெற்றிகரமாக நிறைவடைந்தது.

இறுதிகட்டமாக ரெயில்வே பாதுகாப்பு ஆணையம் சார்பாக இரண்டு நாள் ஆய்வு பாம்பனில் ரெயில்வே பாதுகாப்பு ஆணையர் ஏ.எம்.சவுத்ரி தலைமையில் தொடங்கியது. இதில் ரெயில்வே அதிகாரிகள், பாம்பன் அக்காள் மடத்தில் உள்ள ரெயில்வே கேட்டில் இருந்து டிராலி மூலம் சென்று பாம்பன் ரெயில் நிலையம், பாம்பன் தெற்குவாடி ரெயில்வே கேட், புதிய பாம்பன் பாலம், புதிய பாலத்தில் அமைக்கப்பட்டுள்ள செங்குத்து தூக்குப்பாலம், இதற்காக நடுக்கடலில் அமைக்கப்பட்டு உள்ள கட்டுப்பாட்டு அறை, பாலத்தில் உள்ள சிக்னல்கள் ஆகியவற்றை ஆய்வு செய்தனர்.

மேலும், சின்னப்பாலம் ரெயில்வே கேட்டில் இறங்கி, புதிய வழித்தடத்தின் செயல் பாடுகள், பாதுகாப்பு உபகரணங்கள் மற்றும் வழிகாட்டு முறைகள் குறித்தும் பாதுகாப்பு ஆணையர் ஆய்வு மேற்கொண்டார். காற்றின் வேகம், நிலையை கண்காணிப்பதற்கான அனிமோ மீட்டர் அமைப்பு மற்றும் பாலத்தின் சிக்னல் அமைப்புகளையும் அவர் ஆய்வு செய்தார்.

தூக்குப் பாலத்தை இயக்கும் ஆபரேட்டர் அறைக்குள் சென்று அதிகாரிகளிடம் விளக்கம் கேட்டார். பின்னர் தூக்குப்பாலத்தில் இருந்து மண்டபம் நோக்கி உள்ள ரெயில் பாலத்தை முழுமையாக ஆய்வு செய்து மாலை 6 மணிக்கு முதல்கட்ட ஆய்வை நிறைவு செய்தார். சுமார் 10 மணிநேரம் நடந்த ஆய்வில் புதிய பாலத்தில் ரெயிலை இயக்குவதற்கான சாத்தியக்கூறுகள் மற்றும் பாதுகாப்பு கட்டமைப்புகள் குறித்து உறுதி செய்யப்பட் டது. மேலும் தூக்கு பாலத்தை திறந்து அதன் வழியாக கப்பல்களை இயக்கியும் சோதனை செய்யப்பட்டது.

இரண்டாவது நாளான இன்று முக்கிய அம்சமாக மண்டபம் ரெயில் நிலையத்திலிருந்து புதிய பாம்பன் ரெயில் பாலம் வழியாக பாம்பன் ரெயில் நிலையம் வரையிலும் ரெயிலை இயக்கி சோதனை நடத்தப்பட்டது. அப்போது 4 பெட்டிகளுடன் 80 கிலோ மீட்டர் வேகத்தில் ரெயில் இயக்கப்பட்டது. குறிப்பாக செங்குத்து தூக்கு பாலத்தின் அதிர்வுகள், உறுதித்தன்மை தொடர்பாக பாதுகாப்பு ஆணையர் ரெயில் பயணம் செய்தவாறு ஆய்வு செய்தார். இந்த ஆய்வில் தலைமை திட்ட மேலாளர் கமலாகர் ரெட்டி, தலைமை நிர்வாக அதிகாரி அமித்குமார் மனுவால், மதுரை ரெயில்வே கோட்ட மேலாளர் ஷரத் ஸ்ரீவத்சவா மற்றும் அதிகாரிகள் பங்கேற்றனர்.

இந்த ஆய்வு தொடர்பான அறிக்கை மத்திய ரெயில்வே அமைச்சகத்திடம் விரைவில் தாக்கல் செய்யப்படுகிறது. அதன் அடிப்படையில் இந்த மாத இறுதிக்குள் பாம்பன் புதிய ரெயில் பாலம் திறப்பு விழா தேதி முறைப்படி அறிவிக்கப்படும், என்றும் அதில் பிரதமர் மோடி கலந்துகொள்வார் என்றும் அதிகாரிகள் தரப்பில் தெரிவிக்கப்பட்டது.

பீகார் மாநிலம் பெகுசராய் பகுதியில் உள்ள பரவுனி ரெயில் நிலையத்தில் ரெயில் பெட்டிகளை எஞ்சினுடன் இணைக்கும் கப்லிங்கை (COUPLING) பிரிக்கும் பணியில் ஈடுபட்டபோது எதிர்பாராத விதமாக இரண்டு பெட்டிக்கும் இடையே சிக்கிய ரயில்வே ஊழியர் உடல் நசுங்கி பரிதாபமாக உயிரிழந்தார்.

லோகோ பைலட் எஞ்சினை முன்னோக்கி இயக்குவதற்கு பதிலாக பின்னோக்கி இயக்கியதால் இந்த விபத்து ஏற்பட்டது என்று சொல்லப்படுகிறது.

விபத்து நடந்தவுடன் சுற்றி இருந்தவர்களின் அலறல் சத்தம் கேட்டதும் லோகோ பைலட் அங்கிருந்து ஓடிவிட்டதாக தகவல் வெளியாகியுள்ளது.

இந்த விபத்து தொடர்பான புகைப்படங்கள் இணையத்தில் வெளியாகி அதிர்ச்சியை ஏற்படுத்தியுள்ளது. இந்த விபத்து குறித்து ரெயில்வே அதிகாரிகள் விசாரணை நடத்தி வருகின்றனர். 

பூரி:

ஒடிசாவில் பத்ரக் பகுதியருகே சென்று கொண்டிருந்த பூரி-ஆனந்த் விகார் நந்தன்கனன் எக்ஸ்பிரஸ் ரெயில் மீது துப்பாக்கி சூடு நடத்தப்பட்டது. இதுபற்றி பூரி நகரின் அரசு ரெயில்வே போலீஸ் காவல் நிலைய உயரதிகாரி எஸ்.கே. பாஹினிபதி செய்தியாளர்களிடம் கூறும்போது, பத்ரக் பகுதியை எக்ஸ்பிரஸ் ரெயில் கடந்து சென்றதும் அதன் மீது துப்பாக்கி சூடு நடத்தப்பட்டு உள்ளது என எங்களுக்கு தகவல் கிடைத்தது.

இதன்பின்னர், ரெயில்வே போலீஸ் மற்றும் ரெயில்வே பாதுகாப்பு படை வீரர்கள் உடனடியாக அந்த பகுதிக்கு சென்றனர். அந்த ரெயில் பூரி நகரை பாதுகாப்பாக சென்றடையும் வகையில் அவர்கள் இணைந்து செயல்பட்டு பாதுகாப்பை வழங்கினர். இதுபற்றி ரெயில்வே பாதுகாப்பு படை மற்றும் போலீசார் அடங்கிய 4 குழுக்கள் விசாரணை நடத்தி வருகின்றன என்றார்.

இந்த சம்பவத்தில் பயணிகள் யாருக்கும் காயம் ஏற்படவில்லை. ரெயில் பெட்டியில் துப்பாக்கி குண்டு துளைத்ததற்கான அடையாளம் காணப்பட்டது. பயணிகள் அனைவரும் அந்த பெட்டியில் இருந்து பாதுகாப்பாக வெளியேற்றப்பட்டனர். இந்த சம்பவத்தில் ஈடுபட்ட மர்ம நபர்கள் யார் என்பது உடனடியாக கண்டறியப்படவில்லை. இதுபற்றி போலீசார் விசாரணை மேற்கொண்டு வருகின்றனர்.

இந்தியாவில் ரெயிலில் பயணம் செய்யும் பயணிகளின் எண்ணிக்கை தொடர்ந்து அதிகரித்து வருகிறது. ஆதலால் ரெயிலில் டிக்கெட் கிடைக்காமல் பல பயணிகள் சிரமத்திற்கு உள்ளாகின்றனர்.

பயணிகளின் சிரமத்தை குறைக்க RAC டிக்கெட்டுகளை ரெயில்வே வழங்குகிறது. RAC டிக்கெட் என்பது அர்த்தம் ரத்துசெய்யப்படுவதற்கு எதிரான இட ஒதுக்கீடு (Reservation Against Cancellation) என்பதன் சுருக்கமாகும். RAC டிக்கெட்டை பயன்படுத்தி ஒருவர் ரெயிலில் பயணிக்கலாம். அதே சமயம் பெர்த்திற்கு ரெயில்வே உத்தரவாதம் அளிக்காது. அதாவது உங்களிடம் RAC டிக்கெட் இருந்தால், RAC ஒதுக்கீட்டின் கீழ் உள்ள மற்றொரு பயணியுடன் நீங்கள் ஒரு பெர்த்தை பகிர்ந்து கொள்ள வேண்டும்

அதே சமயம் உறுதிப்படுத்தப்பட்ட இருக்கைகள் கடைசி நேரத்தில் ரத்து செய்யப்பட்டால் RAC டிக்கெட் வைத்திருப்பவர்களுக்கு கன்பார்ம் டிக்கெட் கிடைக்கும்.

இந்நிலையில் RAC டிக்கெட் குறித்து டெல்லியை சேர்ந்த ஜா என்பவர் தனது எக்ஸ் பக்கத்தில் ரெயில்வே அமைச்சரிடம் கேள்வி எழுப்பியுள்ளது பரபரப்பை ஏற்படுத்தியுள்ளது.

அவரது பதிவில், தனது குடும்பத்தை சாத் விழாவை கொண்டாட டெல்லியிலிருந்து பீகாரில் உள்ள தர்பங்காவிற்கு செல்ல ரெயில் டிக்கெட் முன்பதிவு செய்தேன். முன்பதிவு செய்யும்போது டிக்கெட் காத்திருப்பு பட்டியல் 124 ஆக இருந்தது. பின்னர் அக்டோபர் 30 அன்று RAC 30 ஆகவும், நேற்று RAC 12 ஆகவும் இருந்தது. ஆனால் ரெயில் சார்ட் தயாரான பிறகு காத்திருப்பு பட்டியல் 18 ஆக உள்ளது எனக்கூறி எனது டிக்கெட் ரத்து செய்யப்பட்டது.

இது என்ன மாதிரியான டிக்கெட் ரிசர்வேஷன் சிஸ்டம்? ரெயில்வே அமைச்சர் அஷ்வினி வைஷ்ணவ் அவர்களே, சாத் பண்டிகையின் போது ஒரு பீகாரி தனது வீட்டிற்கு செல்ல முடியவில்லை என்றால் என்ன நடக்கும் என்று உங்களுக்கு தெரியுமா? என்று பதிவிட்டுள்ளார்.

இந்த புகார் சம்பந்தப்பட்ட அதிகாரிகளுக்கு தெரிவிக்கப்பட்டுள்ளது என்று ரெயில்வே துறை அவருக்கு பதிலளித்தது.

இதனையடுத்து ஜா தனது எக்ஸ் பதிவில், "ரெயில்வே அதிகாரி என்னை தொடர்பு கொண்டு பேசினார். நாளை உங்கள் ஊருக்கு செல்வதற்கான ரெயில் பயணத்திற்கு தயாராக இருங்கள் என்று அவர் தெரிவித்தார். அவ்வாறு நடந்தால் ரெயில்வே அமைச்சருக்கு என் நன்றிகள்" என்று அவர் பதிவிட்டார்.

அரியானாவில் ஓடும் ரெயிலில் ஏற்பட்ட வெடிவிபத்தால் பரபரப்பு ஏற்பட்டது. நேற்று மாலை அரியானாவில் ஜிந்த் பகுதியில் இருந்து டெல்லி நோக்கி சென்றுகொண்டிருந்த பயணிகள் ரெயில் ரோஹ்தக் அருகே வந்துகொண்டிருந்தபோது ஒருவரின் பையில் இருந்த வெடிபொருள் திடீரென தீப்பற்றியுள்ளது.

இதனால் ஒரு பகுதி ரெயில் பெட்டிகளில் தீ மளமளவென பரவி உள்ளது. இதில் 4 பேருக்கு தீக்காயங்கள் ஏற்பட்டுள்ளது. உடனே ரெயில் நிறுத்தப்பட்ட நிலையில் சம்பவ இடத்துக்கு வந்த தீயணைப்புத்துறை தீயை கட்டுக்குள் கொண்டுவந்தது. தீக்காயம் அடைந்த 4 பேரும் மருத்துவமனையில் சேர்க்கப்பட்டனர்.

தொடர்ந்து ரெயில் ரத்து செய்யப்பட்டு பயணிகளுக்கு மாற்று ஏற்பாடு செய்யப்பட்டது. பயணி ஒருவரின் பையில் இருந்த சல்பர் பொட்டாசிய துப்பாக்கி அழுத்தம் காரணமாக வெடித்ததில் பையில் இருந்த பட்டாசுகள் வெடித்ததால் இந்த தீ விபத்து ஏற்பட்டதாக முதற்கட்ட விசாரணையில் தெரியவந்துள்ளது.