3 நாட்களாக நடைபயிற்சியை தவிர்த்த டி.ஐ.ஜி. - கடைசியாக பிறந்தநாள் விழாவில் பங்கேற்பு

டி.ஐ.ஜி. விஜயகுமார் தான் தங்கியிருக்கும் முகாம் அலுவலகத்தில் தினமும் அதிகாலை வேளையில் நடைபயிற்சி செய்வது வழக்கம்.

ஆனால் கடந்த 3 நாட்களாக அவர் நடைபயிற்சி செய்வதை தவிர்த்துள்ளார். மன உளைச்சல் காரணமாக அவர் வீட்டிலேயே முடங்கி இருந்ததாக கூறப்படுகிறது. இன்று காலையும் அவர் நடைபயிற்சி செய்யாமல் இருந்துள்ளார்.

டி.ஐ.ஜி. விஜயகுமார் நேற்று மாலை கோவையில் நடந்த பிறந்தநாள் நிகழ்ச்சி ஒன்றில் பங்கேற்றுள்ளார். இது தான் அவர் பங்கேற்ற கடைசி நிகழ்ச்சியாகும்.

கோவை மாநகர வடக்கு போலீஸ் துணை கமிஷனராக பணியாற்றும் சந்தீசின் மகன் பிறந்தநாள் விழா நேற்று மாலை நடந்தது. இந்த விழாவில் பங்கேற்க டி.ஐ.ஜி. விஜயகுமாருக்கும் அழைப்பு விடுக்கப்பட்டு இருந்தது. அதன்படி பிறந்தநாள் விழாவில் டி.ஐ.ஜி. விஜயகுமார் பங்கேற்று துணை கமிஷனர் மகனுக்கு பரிசுப்பொருள் வழங்கி வாழ்த்து தெரிவித்துள்ளார்.

விழாவில் அவர் அமைதியாக, இறுக்கமான மனநிலையிலேயே இருந்ததாக பிறந்தநாள் விழாவில் பங்கேற்ற போலீசார் தெரிவித்தனர். அதைத்தொடர்ந்தே இன்று காலை டி.ஐ.ஜி. தற்கொலை செய்து கொண்டுள்ளார்.