குருத்திகா தனது பெற்றோருடன் செல்ல விரும்புகிறார்- மதுரை ஐகோர்ட்டில் தென்காசி போலீசார் அறிக்கை

மதுரை:

தென்காசி மாவட்டம் கொட்டாகுளத்தைச் சேர்ந்த வினித், மதுரை ஐகோர்ட்டில் தாக்கல் செய்த மனுவில் கூறியிருப்பதாவது:-

தென்காசி அருகே கொட்டாகுளத்தில் வசித்து வருகிறேன். சென்னையில் உள்ள தனியாா் நிறுவனத்தில் என்ஜினீயராக பணியாற்றுகிறேன். இதே பகுதியில் இலஞ்சி தென்றல் நகரைச் சோ்ந்தவா் நவீன்பட்டேல். இவருடைய மகள் குருத்திகாபட்டேல். நானும் குருத்திகாபட்டேலும் கடந்த 6 வருடங்களாக காதலித்தோம். கடந்த டிசம்பர் மாதம் 27-ந் தேதி நாகா்கோவிலில் திருமணம் செய்துகொண்டோம்.

இதற்கிடையே தன்னுடைய மகளை காணவில்லை என நவீன்பட்டேல் குற்றாலம் போலீஸ் நிலையத்தில் புகாா் செய்தாா். அது தொடர்பான விசாரணைக்காக கடந்த மாதம் 4-ந்தேதி நான் எனது மனைவியுடன் குற்றாலம் போலீஸ் நிலையத்தில் ஆஜரானேன். அங்கு போலீசார் முன்னிலையில் கணவர் என்ற முறையில் என்னுடன் செல்ல விரும்புவதாக குருத்திகா பட்டேல் தெரிவித்தார். அதன் பெயரில் நான் அவரை எங்கள் வீட்டிற்கு அழைத்துச் சென்றேன்.

இந்தநிலையில் கடந்த 14-ந்தேதி என்னுடைய மனைவியுடன் தென்காசியில் மருத்துவமனைக்கு சென்றேன். அங்கு அவரது பெற்றோர் வந்து என்னுடன் தகராறில் ஈடுபட்டனா்.

இதுகுறித்து முதல்-அமைச்சரின் தனிப்பிரிவில் புகாா் செய்தேன். இந்த புகாா் மனுவின் மீதான விசாரணைக்கு நான், என் மனைவி, என் தந்தை, சகோதரா் ஆகியோருடன் குற்றாலம் போலீஸ் நிலையத்தில் ஆஜரானேன். ஆனால் என் மனைவியின் பெற்றோர் வருவதற்கு தாமதமானது. இதையடுத்து நாங்கள் எங்கள் வீட்டிற்கு காரில் சென்று கொண்டு இருந்தோம்.

அப்போது எங்களை வழிமறித்து குருத்திகாவின் பெற்றோர் மற்றும் உறவினர்கள் கடுமையாக தாக்கி என் மனைவி குருத்திகாவை கடத்திச் சென்றுவிட்டனர்.

நான் இது குறித்து குற்றாலம் போலீஸ் நிலையத்தில் புகாா் செய்தேன். அதன் பேரில் போலீசார் வழக்குப்பதிவு செய்தனர். ஆனால், குருத்திகா பட்டேலை மீட்க எந்த நடவடிக்கையும் எடுக்கவில்லை.

திருமணத்தை பதிவு செய்வதற்காக காத்திருந்த நேரத்தில் குருத்திகா பட்டேல் கடத்தப்பட்டுள்ளார். எனவே என் மனைவி குருத்திகா பட்டேலை மீட்டு ஆஜர்படுத்த உத்தரவிட வேண்டும்.

இவ்வாறு அதில் கூறப்பட்டிருந்தது.

இந்த வழக்கு ஏற்கனவே ஐகோர்ட்டில் விசாரணைக்கு வந்தபோது, மனுதாரரின் புகாரின் அடிப்படையில் 12 பேர் மீது வழக்கு பதிவு செய்யப்பட்டு, 5 பேர் கைதாகியுள்ளனர். மற்றவர்களை தேடி வருகிறோம் என்று போலீசார் தெரிவித்தனர். இதையடுத்து இந்த வழக்கு குறித்து அறிக்கை தாக்கல் செய்யும்படி தென்காசி மாவட்ட போலீஸ் சூப்பிரண்டுக்கு நீதிபதிகள் உத்தரவிட்டனர்.

இதற்கிடையே குருத்திகா பட்டேல் குஜராத்திற்கு கடத்தப்பட்டதாக கூறி மாயமான குருத்திகாவை மீட்டு போலீசார் மதுரை ஐகோர்ட்டில் ஆஜர்படுத்தினர். அப்போது அவரை காப்பகத்தில் வைத்து விசாரித்து அறிக்கை தாக்கல் செய்யும்படி நீதிபதிகள் உத்தரவிட்டனர்.

இந்த மனு நீதிபதிகள் ஜெயச்சந்திரன், ராமகிருஷ்ணன் ஆகியோர் முன்பு இன்று விசாரணைக்கு வந்தது. அப்போது தென்காசி கோர்ட்டில் குருத்திகா பட்டேலிடம் பெறப்பட்ட விசாரணை அறிக்கையை சீலிட்ட கவரில் வைத்து தென்காசி போலீசார் தாக்கல் செய்தனர்.

இதனையடுத்து நீதிபதிகள், குருத்திகா பட்டேலிடம் பெறப்பட்ட விசாரணையில் அவர் பெற்றோருடன் செல்ல விரும்புவதாக தெரிவித்ததாக போலீஸ் அறிக்கையில் தெரிவிக்கப்பட்டுள்ளது என்றனர். அதற்கு மனுதாரர் சார்பில் வக்கீல் ஆஜராகி, குருத்திகா பட்டேலிடம் பெறப்பட்ட விசாரணை முறையாக இல்லை என தெரிவித்தார்.

இதனையடுத்து நீதிபதிகள், ஆட்கொணர்வு மனுவை பொருத்தவரையில் பெண் யாருடன் செல்வதாக தெரிவிக்கிறாரோ, அவருடன்தான் அனுப்பப்படுவார் என்றனர்.

அரசு தரப்பில், குருத்திகா பெற்றோர்கள் தலைமறைவாக உள்ளனர் என்று தெரிவிக்கப்பட்டது. அப்போது குருத்திகா பெற்றோர் சார்பில் வக்கீல் ஆஜராகி, உறவினர்களிடம் குருத்திகாவை ஒப்படைக்கலாம் என தெரிவித்தார்.

இதனையடுத்து நீதிபதிகள், குருத்திகா உறவினர்கள் தரப்பில் குருத்திகாவை அழைத்துச் செல்வதாக பிரமாண பத்திரம் தாக்கல் செய்ய வேண்டும். அதனை போலீசார் முறையாக விசாரணை செய்ய வேண்டும். குருத்திகாவின் பாதுகாப்பு மிக முக்கியம் எனக் கூறி வழக்கு விசாரணையை நாளை (14-ந்தேதி)க்கு ஒத்திவைத்தனர்.

குருத்திகா பெற்றோர் தரப்பில், இந்த விவகாரத்தில் மீடியாக்கள் மீது புகார் தெரிவித்தனர். அதற்கு நீதிபதிகள் நீங்களாக விருப்பப்பட்டு செய்தது. இதில் மீடியாக்களை குறை சொல்வதற்கு எதுவும் இல்லை என தெரிவித்தனர்.