நேற்று (மார்ச் 3 ஆம் தேதி) பிரபுதேவாவின் பிறந்த நாள். இந்த வருடம் தனது பிறந்த நாள் தினத்தில் பிரபு தேவா, வாசன் விஷுவல் வென்ச்சர்ஸ் சார்பில் கே.எஸ்.சீனிவாசன் - கே.எஸ்.சிவராமன் இருவரும் இணைந்து தயாரிக்கும் 'யங் மங் சங்' படத்தின் படப்பிடிப்பில் இருந்தார். நடிகர் பிரபுதேவா, லட்சுமி மேனன், பிரகாஷ்ராஜ் நடிக்கும் இப்படத்தின் படப்பிடிப்பு கும்பகோணம் பகுதியில் நடந்து வருகிறது.
இந்நிலையில், அவரது பிறந்த நாளை சிறப்பாக கொண்டாட முடிவு செய்த, அப்பகுதி பிரபுதேவா ரசிகர்கள் மிகப்பெரிய கேக்கைத் தயார் செய்து படப்பிடிப்பு நடைபெற்ற கோவிலுக்கு கொண்டு சென்றனர். ஆனால் தனது பிறந்தநாள் கொண்டாட்டத்தில் பங்கேற்க பிரபுதேவா மறுப்பு தெரிவித்துள்ளார்.
இரண்டு நாட்களுக்கு முன்னர் `யங் மங் சங்' படப்பிடிப்பில் நடந்த கார் விபத்தில் இரண்டு டிரைவர்களும் ஒரு தயாரிப்புப் பணியாளரும் இறந்துவிட்டனர். எனவே தனது பிறந்தநாளைக் கொண்டாடும் மனநிலையில் தான் இல்லை என்று கூறிய பிரபுதேவா, அந்த பிறந்த நாள் கொண்டாட்டத்தை ரத்து செய்யச் சொல்லினார்.
