முஸ்லீம் மாதங்களில் ரமலான் மாதம் ஒன்பதாம் சந்திரமான மாதமாகும். அதுதான் நோன்பு நோற்கும் மாதம். திருக்குரான் அருளப்பட்ட மாதமும் அதுதான். அந்த மாதம் முழுமையும் இஸ்லாமியர்கள் நோன்பு நோற்க வேண்டும். சூரியோதயத்திலிருந்து சூரியன் மறையும் வரை உணவும் பானமும் அகற்றப்பட்டு, ஒவ்வொரு நாளும் தொழுகையிலும், புனிதமான எண்ணங்களிலும் அர்ப்பணிக்க வேண்டும். மேலும், இதே ரமலான் மாதம் ஜகாத் - பித்ரா முதலிய தானங்கள் செய்யும் மாதமாகும்.
நோன்பின் நன்மைகள் : அல்லாவின் கட்டளைக்குக் கீழ்ப்படிந்து ஒரு முஸ்லீமும் நோன்பு நோற்கிறான். பகல் முழுவதும் பட்டினியாக இருப்பதால் உடல் பலவீனமடைகிறது. அதனால் உலக இச்சைகள் குறைகின்றன. எனவே, ஆத்மா வன்மையடைகின்றது. ஆத்மிக உணர்ச்சிகளால் உந்தப்பட்ட நோன்பாளி இறைவனையும், இறைவன் நமக்கு அருளும் நன்மைகளையும் நினைக்கிறான். வேறு விதமான ஆத்மிக அனுகூலங்களையும் பெறுகிறான்.
இதே நோன்பினால் உடலுக்கும் நன்மையுண்டாகின்றது. நோன்பாளி உண்ணாமலும், தண்ணீர் குடிக்காமலும் இருக்கும் பொழுது உடலிலுள்ள நீர் சுரக்கும் உறுப்பு (சுரப்பி) களிலிருந்து உண்டாகும் அமிலங்கள் மனிதனுடைய இரைப்பையிலுள்ள நோய்க் கிருமிகளைக் கொன்று விடுகின்றன. மேலும், கஷ்ட நஷ்டங்கள் ஏற்படும் பொழுது அவற்றைப் பொறுத்துக் கொள்ளும் சக்தியை வழக்கம் போல் தன் தினசரி வாழ்க்கையின் கடமைகளைச் செய்யவும் பழகிக் கொள்கிறான்.
இறைவனுடைய அன்பைப் பெறுவதற்காக ஒருவன் நோன்பு நோற்கும் பொழுது அவனுக்கு உடல் சம்பந்தமான நன்மைகளும் கிடைக்காமல் போகவில்லை. ஆண்டவனுக்காகவே ஒருவன் ஒரு செயலைச் செய்தால் அது உடல் - ஆத்மா இரண்டிற்கும் பயனுள்ளதாக அமைகின்றது.
இஸ்லாம் கட்டளையிட்டுள்ள தொழுகை - ஜகாத் - ஹஜ் போன்ற ஆத்மீக அனுஷ்டானங்கள் இதே குறிக்கோளுடன் அமைக்கப்பட்டுள்ளன. ஆனால், ஒருவன் உலக இச்சைக்காக மட்டும் ஒரு செயலைச் செய்தால் அவன் ஆத்மீகப் பலன் அடைய மாட்டான்.
நோன்பு தனி மனிதனுக்கு மட்டும் உயர்வு தந்து நின்றுவிடவில்லை. உலகிலுள்ள முஸ்லீம் சமுதாயத்தார் அனைவரும் ஒரே ரமலான் மாதத்தில் நோன்பு நோற்று இறையச்சமுள்ளோராக வாழ்க்கை நடத்துவதால், சமுதாய உணர்ச்சியும் தொடர்பும், அன்பும் அனுதாபமும், தரும சிந்தனையும் உண்டாகின்றன. ரமலான் மாதத்தில் பட்டினியிருக்கும் முஸ்லீம் செல்வந்தர், அதே சமயத்தில் பட்டினியாயிருக்கும் ஏழையின் கஷ்டத்தை உணர முடிகிறது.
இஸ்லாமியச் செயல்முறைகள் எல்லாம் ஆண்டவனுடைய சொல்லாகிய குர் - ஆனிலிருந்து கட்டளையிடப்பட்டுள்ளன. இஸ்லாம் என்பது பூரண வாழ்க்கை வழியாதலால் அது இம்மைக்கும் மறுமைக்கும், உடலுக்கும் ஆத்மாவுக்கும் வழி காட்டுகின்றது. எனவே, ஒரு முஸ்லீம் உலகக் கடமைகளைச் செய்யும் பொழுது, ஆத்மாவுக்கும் அனுகூலம் உண்டாகிறது. அதைப் போன்று ஆத்மிகக் கடமைகளைச் செய்யும் பொழுது உடலுக்கும் பயனுண்டாகிறது.
ரமலான் மாதம் சந்திரமான மாதம். இந்த நோன்பு மாதம், இலையுதிர்க் காலம், குளிர் காலம், வசந்த காலம், கோடை காலம் என்று அனைத்து தட்ப வெப்பநிலைகளிலும் வருவதால் பல மாதிரியான கஷ்டங்களை ஏற்றுக் கொள்ள நோன்பாளி பழகிக் கொள்கிறான். இறைவனுடைய கட்டளைக்குக் கீழ்ப்படிந்து இவ்விதமான ஆத்மிகப் பயிற்சியை ஏற்றுக் கொள்கிறான். இதையன்றி, உலக விசயங்களில் உடலுக்காகச் சுகாதார சம்பந்தமான பயிற்சியும், இராணுவப் பயிற்சியும், மனவுறுதியை வளர்க்கும் பயிற்சியும் பெறுகிறான். இறைவனுக்காக ஒருவன் நோன்பு நோற்கும் பொழுது இருலோக பாக்கியங்களையும் பெறுகிறான்.
இஸ்லாம் மாதத்தில் தொழுகை, நோன்பு, ஜகாத், தீமையிலிருந்து விலகியிருத்தல் முதலிய புறக்கடமைகளும், இறைநம்பிக்கை, இறைவனுக்கு நன்றி செலுத்தல், நேர்மை, கர்வமின்மை முதலிய அகக்கடமைகளும் உள்ளன. ஆனால், புறக்கடமைகளும் ஆத்மாவைத் தூய்மையாக்கவே ஏற்படுத்தப்பட்டுள்ளன.
நோன்பின் சன்மானம் நோன்பு நோற்கும் ஆண்களும், நோன்பு நோற்கும் பெண்களும் அவர்களுக்காக மன்னிப்பையும், மேலான சன்மானத்தையும் அல்லா ஆயத்தமாக்கி வைத்திருக்கிறான். (அஹ்ஸாப் - 33:35)
