அய்யா வைகுண்டசாமி அவதார தின விழாவையொட்டி ஒவ்வொரு வருடமும் நாகர்கோவிலில் இருந்து சாமித்தோப்பை நோக்கி அவதார தின விழா ஊர்வலம் நடைபெறுவது வழக்கம். இந்த வருட அவதார தின விழா ஊர்வலம் இன்று (வெள்ளிக்கிழமை) காலை நடைபெறுகிறது.
இதற்கிடையே நேற்று காலையில் திருச்செந்தூர் மற்றும் திருவனந்தபுரத்திலிருந்து நாகர்கோவில் நோக்கி புறப்பட்ட அவதார தின வாகன பேரணி இரவில் நாகர்கோவில் நாகராஜா கோவில் திடலை வந்தடைந்தது. மேலும் மாவட்டத்தின் பல பகுதிகளில் இருந்து அய்யாவழி பக்தர்கள் அவதார தின விழா ஊர்வலத்தில் கலந்து கொள்வதற்காக நாகராஜா திடலில் குவிந்தனர்.
இன்று காலை 6 மணிக்கு அவதார தின விழா ஊர்வலம் நாகர்கோவில் நாகராஜா கோவில் திடலில் இருந்து புறப்படுகிறது. இந்த ஊர்வலத்தை அய்யா வைகுண்டர் அறநெறி பரிபாலன அறக்கட்டளை நிறுவனத் தலைவர் பால. ஜனாதிபதி தொடங்கி வைக்கிறார். வக்கீல் ஜனா.யுகேந்த் தலைமை வகிக்கிறார்.
இந்த ஊர்வலம் முத்துக்குடை முன்செல்ல கோட்டார், இடலாக்குடி, சுசீந்திரம், வழுக்கம்பாறை, ஈத்தங்காடு, வடக்கு தாமரைகுளம் வழியாக தலைமைப்பதியின் முக்கிய பகுதியான முத்திரிகிணற்றங்கரையை வந்தடைகிறது. அங்கிருந்து தலைமைப்பதியின் பெரிய ரத வீதி மற்றும் தலைமை பதியையும் சுற்றிவந்து தலைமைப்பதியில் கிழக்கு வாசல் முன்பு ஊர்வலம் முடிவடைகிறது.
மேலும் வைகுண்ட சாமி அவதார தின விழாவை முன்னிட்டு தலைமைப்பதி முழுவதும் மின் விளக்குகளால் அலங்கரிக்கப்பட்டிருந்தது. தலைமைப்பதி வளாகத்தில் ஆங்காங்கே பந்தல்கள் தோரணங்கள் கட்டி, இரவு நேரங்களில் மின் விளக்குகளின் ஜொலிப்பில் காட்சி அளித்தது.
அவதார தின விழாவில் பல மாவட்டங்களில் இருந்து அய்யாவழி மக்கள் கலந்து கொள்வதால் பாதுகாப்பு பணிக்காக மாவட்ட போலீஸ் சூப்பிரண்டு பத்ரி நாராயணன் உத்தரவின் பேரில் கன்னியாகுமரி துணை சூப்பிரண்டு ராஜா தலைமையில், கன்னியாகுமரி இன்ஸ்பெக்டர் ஆவுடையப்பன் தென்தாமரைகுளம் சப்-இன்ஸ்பெக்டர்கள் சுந்தர்ராஜ், செல்வராஜன் மற்றும் போலீசார் குவிக்கப்பட்டுள்ளனர்.
ஊர்வலம் செல்லும் வழியில் குறிப்பிட்ட நேரத்தில் போக்குவரத்து மாற்றம் செய்யப்பட்டுள்ளது.
முன்னதாக திருவனந்தபுரத்தில் கிள்ளிப்பாலம் சிங்காரதோப்பு பதியில் இருந்து நேற்று காலை 9.30 மணிக்கு வாகன பேரணி தொடங்கியது. பேரணியை பாலபிரஜாபதி கொடி அசைத்து தொடங்கி வைத்தார். அய்யா வைகுண்டர் ஆராய்ச்சி மைய தலைவர் எஸ். அகிமோகன் தலைமை தாங்கினார். நிகழ்ச்சியில் ஓய்வு பெற்ற இந்தியன் வங்கி மேலாளர் பி.முருகேசன் மற்றும் ஏராளமான அய்யா வழி பக்தர்கள் கலந்து கொண்டனர்.
