புதுச்சேரி:
புதுச்சேரி மாநில அ.தி.மு.க. சட்டமன்ற கட்சி தலைவர் அன்பழகன் எம்.எல்.ஏ வெளியிட்டுள்ள அறிக்கையில் கூறியிருப்பதாவது:-
கொரோனா தொற்று தீவிரமடையும் போதே மாநிலம் முழுவதும் படுக்கை வசதிகளை அதிகப்படுத்த அரசு உரிய நடவடிக்கை எடுக்க வேண்டும் என்று வலியுறுத்தினோம். அரசு அதற்கான நடவடிக்கை எடுக்காததால்வீட்டில் இருந்தபடியே சிகிச்சை பெறுமாறு ஆயிரக்கணக்கான கொரோனா நோயாளிகள் மருத்துவமனையில் இருந்து திருப்பி அனுப்பப்படுகின்றனர்.
தொற்று பாதித்தோருக்கு ரூ.10 ஆயிரம் வழங்க வேண்டும் என்று கூறியிருந்தோம். ஆனால் இந்த அரசு எந்த ஒரு சிறு நிதியுதவியும் செய்யவில்லை. கொரோனா பாதித்து குணமடைந்தோருக்கு யாரும் வேலை வழங்க முன்வராததால் அந்த குடும்பங்கள் சாப்பாட்டிற்கே கஷ்டப்படும் நிலை ஏற்பட்டுள்ளது. அவர்களில் சிலருக்கு தான் அரசு சார்பில் ரூ.700 அளவுக்கு உணவுப் பொருள் வழங்கப்படுகிறது.
மருத்துவமனைகளில் தங்கி சிகிச்சை பெறுவோருக்கு நாள் ஒன்றுக்கு ரூ.230 சாப்பாட்டிற்காக அரசு செலவு செய்கிறது. இந்த தொகை ரூ.300 ஆக உயர்த்தப்படும் என் சுகாதாரத்துறை அமைச்சர் கூறியுள்ளார். கொரோனாவுக்காக வீடுகளில் சிகிச்சை பெற திருப்பி அனுப்பப்படுபவர்கள் குறைந்தது 20 நாட்கள் தனிமையில் இருக்க வேண்டும். அப்படியானால் அவர்களுக்கு தலா ரூ.6 ஆயிரம் வழங்க வேண்டும். இந்த விஷயத்தில் அரசு மக்களை ஏமாற்றாமல் உடனே உதவிகளை செய்ய வேண்டும்.
இவ்வாறு அதில் அவர் கூறியுள்ளார்.
