கள்ளக்குறிச்சி:
கள்ளக்குறிச்சி தெற்கு மாவட்ட தி.மு.க. செயலாளரும் ரிஷிவந்தியம் தொகுதி சட்டமன்ற உறுப்பினருமான வசந்தம் கார்த்திகேயன் சட்டமன்றத்தில் பேசியதாவது:
கள்ளக்குறிச்சி மாவட்டத்தில் உள்ள தனியார் மற்றும் கூட்டுறவு சர்க்கரை ஆலைகளில் விவசாயிகளுக்கு வழங்க வேண்டிய நிலுவைத் தொகையை உடனே வழங்க வேண்டும். கள்ளக்குறிச்சி நகரத்தில் போக்குவரத்து நெரிசலை தவிர்க்க வெளிவட்ட சாலை மற்றும் புறநகர் பேருந்து நிலையம் அமைத்து தர வேண்டும்.
கள்ளக்குறிச்சி நகராட்சி பஸ் நிலையத்திலிருந்து புதிதாக கட்டப்பட்டுள்ள அரசு மருத்துவக் கல்லூரி மருத்துவமனைக்கு 30 நிமிடங்களுக்கு ஒரு முறை நகர பேருந்தை இயக்க நடவடிக்கை எடுக்க வேண்டும். கள்ளக்குறிச்சி மாவட்ட காவல் கண்காணிப்பாளர் அலுவலகம் வாடகை கட்டிடத்தில் இயங்கி வருகிறது எனவே புதிய கட்டிடம் கட்ட நடவடிக்கை எடுக்க வேண்டும்.
கள்ளக்குறிச்சி புதிய மாவட்ட கலெக்டர் அலுவலக கட்டிடம் கட்ட நடவடிக்கை எடுக்க வேண்டும். சின்னசேலம் கள்ளக்குறிச்சி ரெயில் பாதை திட்டத்தை நிறைவேற்ற மத்திய அரசிடம் தமிழக அரசு வலியுறுத்த வேண்டும்.
கள்ளக்குறிச்சி அரசு கலை மற்றும் அறிவியல் கல்லூரிக்கு புதிய கட்டடத்தை கள்ளக்குறிச்சி சுங்கச்சாவடி அருகே கட்டித்தர வேண்டும். கள்ளக்குறிச்சி நகராட்சி அலுவலகம் தற்போது நகராட்சி திருமண மண்டபத்தில் செயல்பட்டு வருகிறது. எனவே நகராட்சிக்கு புதிய அலுவலகம் கட்டித்தர நடவடிக்கை எடுக்க வேண்டும். ரிஷிவந்தியம் தொகுதிக்குட்பட்ட வாணாபுரம் பகண்டை கூட்டு சாலையில் ஒரு சார்பதிவாளர் அலுவலகம், தீயணைப்பு நிலையம் மற்றும் விவசாயிகள் விளைபொருளை விற்பனை செய்திட ஒழுங்குமுறை விற்பனை கூடம் ஆகியவை அமைத்து தரவேண்டும்.
மணலூர்பேட்டை பெருமாள் கோவிலை புனரமைத்து கும்பாபிஷேகம் செய்து தரவேண்டும். மேலும் கள்ளக்குறிச்சி, ரிஷிவந்தியம், சங்கராபும் ஆகிய பகுதிகளுக்கு உட்பட்ட பல்வேறு இடங்களில் புதிய அங்கன்வாடி கட்டடங்கள், உயர்மட்ட பாலங்கள், பள்ளிகள் தரம் உயர்த்துதல், பள்ளி மாணவ, மாணவிகள் பயன்பெறும் வகையில் கூடுதல் பஸ்கள், பட்டா வழங்குதல், புதிய மேல்நிலை நீர்த்தேக்கத் தொட்டிகள், தடுப்பணைகள், கால்நடை மருத்துவமனைகள், பகுதிநேர நியாய விலைக் கடைகள், உடற்பயிற்சி நிலையங்கள், காடுகளில் குடிநீர் தொட்டிகள் அமைத்தல் உள்ளிட்ட பல்வேறு கோரிக்கைகளை வலியுறுத்தி பேசினார்.
