மாடியில் இருந்து தவறி விழுந்து தொழிலாளி பலி

அரக்கோணம்:

அரக்கோணம் அடுத்த தணிகை போளூர் கிராமத்தில் பத்மஜா என்பவரின் வீடு உள்ளது. இவரது 6 மாடி கொண்ட அடுக்குமாடி வீட்டில் மாடிக்கு செல்ல படிக்கட்டில் கைப்பிடி வைக்கப்படவில்லை.

இந்நிலையில் அந்த வீட்டிற்கு வண்ண பூச விழுப்புரம் மாவட்டம் துருவை கிராமத்தில் இருந்து 3 தொழிலாளர்கள் பணிசெய்து வந்தனர்.

இவர்கள் சுண்ணாம்பு அடிக்கும் பணியை மேற்கொண்டு வந்த நிலையில் நேற்று இரவு தனஞ்செழியன் (வயது 51) என்ற தொழிலாளி கைப்பிடி இல்லாத மாடிப்படியில் ஏறிய போது 3-வது மாடி படிக்கட்டில் இருந்து தவறி விழுந்தார்.

இதனால் பலத்த காயம் அடைந்த தனஞ்செழியன் சம்பவ இடத்திலேயே பரிதாபமாக இறந்தார். இது குறித்து தகவல் அறிந்த அரக்கோணம் தாலுகா போலீசார் சம்பவ இடத்திற்கு சென்று அவரது உடலை மீட்டு பிரேத பரிசோதனைக்காக அரக்கோணம் அரசு ஆஸ்பத்திரிக்கு அனுப்பி வைத்தனர்.

இது குறித்து போலீசார் வழக்கு பதிவு செய்து விசாரணை நடத்தி வருகின்றனர்.