சென்னை :
இந்தியாவின் முதல் வந்தே பாரத் ரெயில் சேவையை கடந்த 2019-ம் ஆண்டு பிப்ரவரி மாதம் டெல்லி-வாரணாசி இடையே பிரதமர் மோடி தொடங்கி வைத்தார். அதிவேக பயணம், குளிர்சாதன வசதி, நேரம் மிச்சமாவதால் வந்தே பாரத் ரெயில் சேவைக்கு பயணிகள் மத்தியில் பெரும் வரவேற்பு கிடைத்துள்ளது. வந்தே பாரத் ரெயில் பெட்டிகள் சென்னை பெரம்பூரில் உள்ள ஐ.சி.எப்.-ல் தயாரிக்கப்படுகிறது. இந்தநிலையில், கடந்த 27-ந்தேதி மத்திய பிரதேச மாநிலம் போபாலில் புதிதாக 5 வந்தே பாரத் ரெயில் சேவையை பிரதமர் மோடி தொடங்கி வைத்தார்.
அன்றைய தினம், போபால்- ஜபல்பூர், கஜிராஹோ- போபால்- இந்தூர், கோவா- மும்பை, ஹதியா- பாட்னா மற்றும் தார்வாட்- பெங்களூரு ஆகிய வழித்தடங்களில் ரெயில் சேவை தொடங்கப்பட்டது. இதன் மூலம் நாட்டில் இயக்கப்படும் வந்தே பாரத் மொத்த ரெயில்களின் எண்ணிக்கை 23-ஆக உயர்ந்தது. இந்த நிலையில், 24 மாநிலங்களில் இயக்கப்படும் வந்தே பாரத் ரெல்களில், 27 லட்சத்து 20 ஆயிரம் பேர் பயணம் செய்துள்ளதாக ரெயில்வே அதிகாரிகள் தெரிவித்துள்ளனர்.
இதுதொடர்பாக, ரெயில்வே அதிகாரிகள் கூறியதாவது:-
வந்தே பாரத் ரெயில்களுக்கு பயணிகள் மத்தியில் பெரும் வரவேற்பு கிடைத்து வருகிறது. வரும் ஆகஸ்ட் மாதத்திற்குள் 75 வந்தே பாரத் ரெயில்களை தயாரித்து இயக்க ரெயில்வே துறை திட்டமிட்டுள்ளது. பிரதமர் மோடி கடந்த 27-ந்தேதி ஒரே நேரத்தில் பல்வேறு வழித்தடங்களில் 5 வந்தே பாரத் ரெயில் சேவையை தொடங்கி வைத்தார். இதன்மூலம், வந்தே பாரத் ரெயில்கள் 24 மாநிலங்களை இணைத்துள்ளது. கடந்த ஆண்டு ஏப்ரல் மாதம் இந்த ஆண்டு ஜூன் 21-ந்தேதி வரையில் இயக்கப்பட்ட 2 ஆயிரத்து 140 டிரிப்களில், மொத்தம் 27 லட்சத்து 20 ஆயிரம் பேர் பயணம் செய்துள்ளனர். படுக்கை வசதி கொண்ட முதல் வந்தே பாரத் ரெயில், விரைவில் பயன்பாட்டிற்கு வர உள்ளது. இதற்கான பூர்வாங்க பணிகள் நடைபெற்று வருகின்றன.
இவ்வாறு அவர்கள் கூறினர்.
