பட்டுக்கோட்டை:
தஞ்சாவூர் மாவட்டம் பட்டுக்கோட்டை அடுத்த துவரங்குறிச்சியை சேர்ந்தவர் பிரவீன். இவரது மனைவி சந்தியா (வயது 32). இந்த தம்பதிக்கு 3 வயதில் பெண் குழந்தை உள்ளது. இவர்கள் பெங்களுருரில் வசித்து வருகிறார்கள்.
இந்நிலையில் சந்தியா 2-வது முறையாக கர்ப்பம் அடைந்தார். இதைத் தொடர்ந்து பிரசவத்திற்காக சந்தியாவும், அவரது கணவரும் சொந்த ஊருக்கு வந்தனர். இந்நிலையில் சந்தியாவுக்கு பிரசவவலி ஏற்பட்டது. இதைத் தொடர்ந்து அவர் பிரசவத்திற்காக பட்டுக்கோட்டையில் உள்ள ஒரு தனியார் ஆஸ்பத்திரியில் அனுமதிக்கப்பட்டார்.
இந்நிலையில் அவருக்கு ஆண்குழந்தை இறந்து பிறந்தது. மேலும் அவருக்கு ரத்தபோக்கு ஏற்பட்டு உயிருக்கு ஆபத்தான நிலை ஏற்பட்டது. இதைத் தொடர்ந்து ஆம்புலன்சில் சந்தியாவை சிகிச்சைக்காக தஞ்சாவூர் அரசு மருத்துவமனைக்கு அனுப்பி வைத்தனர்.
அப்போது செல்லும் வழியிலேயே அவர் இறந்து விட்டார். இதனால் ஆத்திரமடைந்த சந்தியாவின் உறவினர்கள் மருத்துவமனை முன்பு ஆம்புலன்ஸில் உடலை வைத்தபடியே முற்றுகையிட்டு போராட்டத்தில் ஈடுபட்டனர். மேலும் இறந்த பெண்ணின் உறவினர்கள் சாலை மறியலில் ஈடுபட்டனர். அதில் சிலர் ஆவேசமடைந்து மருத்துவமனை வளாகத்திற்குள் புகுந்து அடித்து உடைக்க தொடங்கினர். சிலர் மருத்துவமனை மீது கல்வீசி தாக்கினர்.
இது குறித்து தகவல் அறிந்ததும் பட்டுக்கோட்டை போலீசார் சம்பவ இடத்திற்கு விரைந்து சென்று உறவினர்களுடன் பேச்சு வார்த்தை நடத்தினர். இது தொடர்பாக நடவடிக்கை எடுப்பதாக கூறினர். இதைத் தொடர்ந்து அனைவரும் கலைந்து சென்றனர்.
